[༡༡] སྲེགས་སྟོན་རྡོ་རྗེ་རྒྱལ་མཚན་ནི།
འོག་གདོང་དུ་ལྷ་རྗེ་འགར་སྟོན་པ་ལས་འདུས་པ་མདོའི་དབང་བསྐུར་གསན་ཞིང་གསང་མཚན་རྡོ་རྗེ་འཇིགས་མེད་རྩལ་དུ་བཏགས། རྒྱུད་གདམས་ངག་དང་བཅས་པར་བྱང་ཆུབ་པར་མཛད་ཅིང་མཁྱེན་རྟོགས་གཉིས་ཀའི་ཕྱོགས་ནས་བླ་མའི་ཐུགས་ཟིན་པས་དབང་གི་ཆུ་བོ་བཞི་ཆར་གྱི་བཀའ་བབ། རྒྱུད་ལུང་མན་ངག་གསུམ་ལ་ཐུགས་སྦྱངས་པས་ཡོན་ཏན་ཆེན་པོ་དུ་མ་མངའ། ཁྱད་པར་དཀྱིལ་འཁོར་གྱི་བདག་པོ་མཛད་ནས་ཕྱག་བཞེས་ཐམས་ཅད་ཕུལ་དུ་གྱུར་པར་མཁྱེན། ཐོགས་པ་མེད་པའི་སྤྱན་དང་མངོན་ཤེས་མངའ་བ་སོགས་གྲུབ་པའི་མངོན་རྟགས་མཐའ་ཡས་པར་དབང་བསྒྱུར། མཆིམས་ཀྱི་འཆད་འགོ་དགོན་པར་བཞུགས་ནས་བཤད་སྒྲུབ་ཀྱི་ཕྲིན་ལས་རྒྱ་ཆེར་བསྐྱངས་སོ། །