བཞི་བ་རྟགས་ཡང་དག་ལ་སྒྲུབ་ཚུལ་གྱི་སྒོ་ནས་དབྱེ་བ།
བཞི་བ་རྟགས་ཡང་དག་ལ་སྒྲུབ་ཚུལ་གྱི་སྒོ་ནས་དབྱེ་བ་ལ།
དོན་སྒྲུབ་ཀྱི་རྟགས་ཡང་དག་དང༌། ཐ་སྙད་སྒྲུབ་ཀྱི་རྟགས་ཡང་དག་དང་གཉིས། དང་པོ་དོན་སྒྲུབ་ཀྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡང་ཡིན་མཚན་ཉིད་ཡིན་པའི་གཞི་མཐུན་པ་ཡོད་པའི་དེ་སྒྲུབ་ཀྱི་ཚུལ་གསུམ་ཚང་བའི་གཏན་ཚིགས། མཚན་གཞི་ནི། སྒྲ་སྐད་ཅིག་མར་སྒྲུབ་པ་ལ་བྱས་པ་ལྟ་བུའོ། །ཐ་སྙད་སྒྲུབ་ཀྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡང་ཡིན་ཁྱོད་ཀྱི་མཚོན་བྱ་ཡང་ཡིན་པའི་གཞི་མཐུན་པ་ཡོད་པའི་དེ་སྒྲུབ་ཀྱི་ཚུལ་གསུམ་ཡིན་པའི་གཏན་ཚིགས། སྒྲ་མི་རྟག་སྒྲུབ་པ་ལ་བྱས་པ་ལྟ་བུའོ། །དེ་གཉིས་ཀའི་མཚན་གཞི་ནི། མེ་མེད་མཚན་མོའི་རྒྱ་མཚོར་དུ་མེད་དུ་སྒྲུབ་པ་ལ་མེ་མེད་པ་ལྟ་བུའོ། །ཐ་སྙད་འབའ་ཞིག་སྒྲུབ་ཀྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡང་ཡིན་མཚོན་བྱ་ཡིན་པའི་གཞི་མཐུན་པ་ཡོད་ལ་མཚན་ཉིད་ཡིན་པའི་གཞི་མཐུན་པ་མེད་པའི་དེ་སྒྲུབ་ཀྱི་ཚུལ་གསུམ་ཡིན་པའི་གཏན་ཚིགས། དཔེར་ན། བུམ་པ་སྣང་རུང་མ་དམིགས་པའི་ས་ཕྱོགས་བུམ་པ་མེད་པར་སྒྲུབ་པ་ལ་བུམ་པ་ཡོད་ན་སྣང་དུ་རུང་བ་ལས་མ་དམིགས་པ་ལྟ་བུའོ། །དོན་འབའ་ཞིག་སྒྲུབ་ཀྱི་རྟགས་ཡང་དག་གི་མཚན་ཉིད་ཡོད་དེ། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡང་ཡིན་མཚན་ཉིད་ཡིན་པའི་གཞི་མཐུན་པ་ཡོད་ལ་མཚོན་བྱ་ཡིན་པའི་གཞི་མཐུན་པ་མེད་པའི་དེ་སྒྲུབ་ཀྱི་ཚུལ་གསུམ་ཡིན་པའི་གཏན་ཚིགས། དཔེར་ན། སྒྲ་སྐད་ཅིག་མར་སྒྲུབ་པ་ལ་བྱས་པ་ལྟ་བུའོ། །དེ་ལྟར་རྒྱུ་ཁྱབ་བྱེད་མ་དམིགས་པའི་རྟགས་ཡང་དག་གཉིས་ནི་ཐ་སྙད་དང་དོན་སྒྲུབ་གཉིས་ཀ་ཡིན་ལ། རང་བཞིན་མ་དམིགས་པའི་གཏན་ཚིགས་ནི། ཐ་སྙད་འབའ་ཞིག་སྒྲུབ་ཀྱི་གཏན་ཚིགས་ཡིན་ཏེ། རང་འགྲེལ་ལས། རྒྱུ་དང་ཁྱབ་པར་བྱེད་པ་མ་དམིགས་པ་ནི་གཉིས་ཀའི་ཡང་གཏན་ཚིགས་ཡིན་ནོ། །ཞེས་གསུངས་པའི་ཕྱིར་རོ། །འདིར་དོན་སྒྲུབ་དང་ཐ་སྙད་སྒྲུབ་ཀྱི་རྟགས་ཞེས་པའི་དོན་དང་ཐ་སྙད་ནི། མཚན་ཉིད་ལ་དོན་དང་མཚོན་བྱ་ལ་ཐ་སྙད་དུ་བྱས་པ་དང༌། སྒྲ་བློ་ལུས་གསུམ་གྱི་ཐ་སྙད་ལ་ཐ་སྙད་དང༌། དེའི་ཡུལ་ལ་དོན་དུ་བྱས་པའི་བཤད་ཚུལ་གཉིས་རེ་ཡོད་དོ། །