ལྔ་བ་སའི་ཚོགས་བཤད་པ།

ལྔ་བ་སའི་ཚོགས་བཤད་པ་ལ།

རྩ་བར། ཡོངས་སུ་སྦྱོང་བ་རྣམ་བཅུ་ཡིས། །ཞེས་པ་ནས། བཅུ་པ་ཡིན་པ་ཤེས་པར་བྱ། །ཞེས་བྱང་འཕགས་ཀྱི་སའི་ཚོགས་སྟོན་པ་ལ་རྗོད་བྱེད་བར་སྐབས་ཀྱི་ཚིགས་སུ་བཅད་པ་ཉི་ཤུ་རྩ་གསུམ་གསུངས་སོ། །དེའི་དོན་འཆད་པ་ལ་སྤྱི་དོན་དང་མཐའ་རགས་ཙམ་དཔྱད་པ་དང་གཉིས། དང་པོ་ལ། མཚན་ཉིད། ངེས་ཚིག དབྱེ་བ། ཡོན་ཏན་སོགས་བཤད་པ་དང་བཞི། ཡོན་ཏན་དུ་མའི་རྟེན་དུ་གྱུར་པའི་མངོན་རྟོགས་དེ། ས་ལམ་གཉིས་སུ་ཕྱེ་བའི་སའི་མཚན་ཉིད། མཚན་གཞི་ནི། ཚོགས་ལམ་ལྟ་བུའོ། །ཡོན་ཏན་དུ་མའི་རྟེན་དུ་གྱུར་པའི་ཐེག་ཆེན་གྱི་མངོན་རྟོགས་དེ། ཐེག་ཆེན་གྱི་སའི་མཚན་ཉིད། །ཡོན་ཏན་དུ་མའི་རྟེན་དུ་གྱུར་པའི་ཐེག་ཆེན་འཕགས་རྒྱུད་ཀྱི་མངོན་རྟོགས་དེ།ཐེག་ཆེན་འཕགས་པའི་སའི་མཚན་ཉིད། ཡོན་ཏན་དུ་མའི་རྟེན་དུ་གྱུར་པའི་བྱང་འཕགས་ཀྱི་རྒྱུད་ཀྱི་མངོན་རྟོགས་དེ། བྱང་འཕགས་ཀྱི་སའི་མཚན་ཉིད། མཚན་ཉིད་དེ་དག་འཐད་དེ། བླང་དོར་རབ་གསལ་ལས། ས་ཡི་དོན་ནི་ཡོན་ཏན་རྣམས་ཀྱི་རྟེན། །ཞེས་དང༌། བླང་དོར་རབ་གསལ་རྩ་འགྲེལ་ལས། ས་བཅུའི་མཚན་ཉིད་ནི། ཁྱད་པར་བྱང་ཆུབ་སེམས་དཔའི་ས་བཅུ་ནི། །འཕགས་པ་སློབ་པའི་ཡེ་ཤེས་མཚུངས་ལྡན་དང༌། །བཅས་པའི་ཡོན་ཏན་ཀུན་གྱི་རྟེན་ཡིན་ཏེ། །ཡོན་ཏན་གནས་པས་གནས་པ་ཞེས་ཀྱང་བསྟན། །དེ་ཡང༌། དབུ་མ་འཇུག་པར་བྱང་ཆུབ་སེམས་དཔའི་སྙིང་རྗེ་ལ་སོགས་པས་ཡོངས་སུ་བཟུང་བའི་ཡེ་ཤེས་ཁོ་ནར་ཕྱེ་བ་ལ་ནི་སའི་མིང་ཐོབ་སྟེ། ཡོན་ཏན་གྱི་རྟེན་དུ་གྱུར་པའི་ཕྱིར། ཞེས་པ་དང༌། དབུས་མཐའི་ཊཱི་ཀར་ཡང༌། ཀུན་ཏུ་འགྲོ་བ་ལེགས་པའི་དོན་ཁོང་དུ་ཆུད་པའི་གནས་སྐབས་རྣམས་ནི་དེ་ལས་སྐྱེས་པའི་ཡོན་ཏན་གྱི་གཞིའི་ཚུལ་གྱི་ས་རྣམས་སོ། །ཞེས་གསུངས་པ་ལྟར། བྱང་ཆུབ་སེམས་དཔའ་འཕགས་པ་སློབ་པའི་ཡེ་ཤེས་མཚུངས་ལྡན་དང་བཅས་པ་ཡོན་ཏན་ཁྱད་པར་ཅན་རྣམས་ཀྱི་རྟེན་དུ་གྱུར་པའོ། །དེ་ཉིད་དགེ་བ་བསྒྲུབ་པ་རྣམ་པ་སྣ་ཚོགས་པ་རྣམས་ལ་དགའ་བས་རྟག་པར་ཐམས་ཅད་དུ་གནས་པའི་གཞིའི་རྟེན་དུ་གྱུར་པའི་ཕྱིར་གནས་པ་ཞེས་ཀྱང་བྱ་སྟེ། རྒྱན་ལས། དགེ་བ་སྒྲུབ་པ་སྣ་ཚོགས་ལ། །དགའ་བས་རྟག་པར་ཐམས་ཅད་དུ། །གནས་ཕྱིར་བྱང་ཆུབ་སེམས་དཔའ་ཡི། ས་རྣམས་གནས་པ་ཡིན་པར་འདོད། །ཅེས་གསུངས་པ་ལྟར། ཞེས་གསུངས་པས་སོ། །གཉིས་པ་ངེས་ཚིག་བཤད་པ་ལ། སྤྱི་དང་ས་སོ་སོའི་ངེས་ཚིག་གཉིས་ལས། དང་པོ་ནི། འཇིག་རྟེན་ན་སའི་རྒྱུ་བ་སེམས་ཅན་དང་མི་རྒྱུ་བ་རྩི་ཤིང་ནགས་ཚལ་གྱི་རྟེན་བྱེད་པ་བཞིན་དུ་ཡོན་ཏན་ཐམས་ཅད་སྐྱེ་བའི་རྟེན་བྱེད་པས་ན་ས་ཞེས་བྱའོ། །ས་ལམ་གཉིས་སུ་ཕྱེ་བའི་ས་ནི་ས་བཏགས་པ་བ་ཡིན་ལ། ས་མཚན་ཉིད་པ་ནི་འབྱུང་བ་བཞིའི་ནང་ཚན་དུ་གྱུར་པའི་ས་ཡིན་ལ། དེའི་མཚན་ཉིད་ནི་སྲ་ཞིང་འཐས་པའི་འབྱུང་བ་དེའོ། །ཡང་ན་རྒྱན་ལས། འབྱུང་བོ་དཔག་མེད་འཇིགས་མེད་ཕྱིར། །དཔག་ཏུ་མེད་པ་དེ་དག་ལ། །ཕྱི་ཕྱིར་གོང་དུ་འགྲོ་ལྡན་ཕྱིར། །དེ་དག་ཉིད་ནི་སར་འདོད་དོ། །ཞེས་པ་ལྟར་བྷུ་མི་ཞེས་པ་ས་སྟེ་བྷཱུ་ཏ་འབྱུང་བོ་སྟེ་སེམས་ཅན། ཨ་མི་ཏ་དཔག་མེད། བྷཱུ་ལས་ཨ་བྷ་ཡ་ཞེས་སྦྱར་ན་འཇིགས་མེད། ཡང་ཨ་མི་ཏ་དཔག་མེད་དེ་ཡོན་ཏན་དཔག་ཏུ་མེད་པ་ཅན་ནོ། །ཡང་ན་སེམས་ཅན་དཔག་ཏུ་མེད་པ་རྣམས་ཀྱི་འཇིགས་པ་ཐམས་ཅད་སྤང་བར་བྱ་བའི་ཕྱིར་རེ་རེ་ལ་ཡང་ཡོན་ཏན་དཔག་ཏུ་མེད་པ་དང་ལྡན་པའི་ས་དེ་དག་ལ་ཡང་ཡང་ས་གོང་མ་གོང་མར་འགྲོ་བ་དང་ལྡན་པའི་སའོ། །