གསུམ་པ་མཚན་ཉིད་ལ་གཉིས་ལས། ལྟུང་བ་ཙམ་གྱི་མཚན་ཉིད།

གསུམ་པ་མཚན་ཉིད་ལ་གཉིས་ལས། ལྟུང་བ་ཙམ་གྱི་མཚན་ཉིད་ནི།

སངས་རྒྱས་ཀྱི་བཅས་པ་མཚན་ཉིད་པ་ལས་འདས་པའི་ཆ་ནས་ཁ་ན་མ་ཐོ་བར་གྱུར་པའོ། །ལྟུང་བ་སོ་སོའི་མཚན་ཉིད་ལ་ལྔ་ལས། ཕམ་པའི་མཚན་ཉིད་ནི། བསྙེན་རྫོགས་ཀྱི་བཅས་པ་ལས་འདས་པའི་ལྟུང་བ་དངོས་གཞི་རྫོགས་པ་ཡིན་ཞིང་རང་གི་ངོ་བོའི་ཆ་ནས་དགེ་འདུན་ལྷག་མ་མན་ཆད་ལ་ལྟོས་ནས་ཆད་པ་ལྕིར་རུང་དང་ལྡན་པའོ། །ལྷག་མ་གཏན་མ་བཅས་པའི་དུས་ཀྱི་ཕམ་པ་ཡང་མ་འོངས་པའི་དགེ་འདུན་ལྷག་མ་རྫས་སུ་གྲུབ་པ་ལ་ལྟོས་ནས་ཆད་པ་ལྕིར་རུང་སྟེ། དུས་གསུམ་རྫས་སུ་གྲུབ་པའི་གྲུབ་མཐའི་རྗེས་སུ་འབྲངས་ནས་སོ། །དེ་དག་གིས་ཕམ་པ་དང་འདྲ་བའི་ཉེས་བྱས་དང༌། ཕམ་པའི་སྦྱོར་བའི་སྦྱོར་བའི་ཉེས་བྱས་དང༌། ཕམ་པའི་སྦྱོར་བ་མཚན་ཉིད་པའི་སྦོམ་པོ་དང༌། ཕམ་པ་ལ་ལྷག་མར་འཁྲུལ་པའམ་ལྷག་མ་ལ་ཕམ་པར་འཁྲུལ་བ་ལྟ་བུ་འདུ་ཤེས་ཕར་འཁྲུལ་ཚུར་འཁྲུལ་དང༌། ལྷག་མ་མན་ཆད་སྡེ་བཞི་པོ་སེལ་བ་ཡིན་ནོ། །ཞེས་མཚོ་ཊཱིཀ་ལས་སོ། །དགེ་འདུན་ལྷག་མའི་མཚན་ཉིད་ནི། ལྟུང་བ་དངོས་གཞི་རྫོགས་པ་ཡིན་ཞིང་རང་གི་ངོ་བོའི་ཆ་ནས་ཆོ་ག་བརྗོད་ཚུལ་དགེ་འདུན་ལྷག་མའི་མིང་རིགས་བརྗོད་པས་ཚུལ་བཞིན་དུ་ཕྱིར་བཅོས་ན་འདག་ཏུ་རུང་བའོ། །རང་གི་ངོ་བོའི་ཆ་ནས་ཞེས་པ་ནི་ལུང་ཞུ་བ་ལས་ལྷག་མ་བྱུང་ནས་ཕམ་པ་འཆབ་བཅས་བྱུང་ན་ལྷག་མ་དེ་ཕྱིར་བཅོས་ཀྱང་མི་འདག་པར་གསུངས་པས་དེ་འདྲའི་ལྷག་མ་དེ་ལྷག་མ་ཡིན་པར་བསྡུད། །མཚན་ཉིད་འདི་ལ་མིང་མཚོན་བྱས་ཁྱད་པར་དུ་བྱས་ཀྱང་དོན་མཚོན་བྱས་ཁྱད་པར་དུ་མ་བྱས། ཞེས་མཚོ་མཆན་ལས་སོ། །ལྟུང་བྱེད་ཀྱི་མཚན་ཉིད་ནི། ལྟུང་བ་དངོས་གཞི་རྫོགས་པ་ཡིན་ཞིང་རང་གི་ངོ་བོའི་ཆ་ནས་ཆོ་ག་བརྗོད་ཚུལ་ལྟུང་བྱེད་ཀྱི་མིང་རིགས་བརྗོད་པས་ཚུལ་བཞིན་དུ་ཕྱིར་བཅོས་ན་འདག་ཏུ་རུང་བའོ། །སོ་སོར་བཤགས་པར་བྱ་བའི་མཚན་ཉིད་ནི། ལྟུང་བ་དངོས་གཞི་རྫོགས་པ་ཡིན་ཞིང་རང་གི་ངོ་བོའི་ཆ་ནས་ཆོ་ག་བརྗོད་ཚུལ་སོ་སོར་བཤགས་པར་བྱ་བའི་མིང་རིགས་བརྗོད་པས་ཚུལ་བཞིན་དུ་ཕྱིར་བཅོས་ན་འདག་ཏུ་རུང་བའོ། །ཉེས་བྱས་ཀྱི་མཚན་ཉིད་ནི། ཕམ་ལྷག་དང་སྦོམ་པོ་ལྟུང་བྱེད་སོ་སོར་བཤགས་པར་བྱ་བ་གང་གིའང་དངོས་གཞི་རྫོགས་པ་ཉིད་མ་ཡིན་པའི་ལྟུང་བའོ། །བསྙེན་རྫོགས་ཀྱི་སྡོམ་པ་དང་འགལ་བར་ཞུགས་པའི་དངོས་གཞི་ཡོངས་སུ་རྫོགས་པའི་ལྟུང་བ་ཡང་ཡིན་པ་གང་ཞིག ཉེས་བྱས་ཀྱི་མིང་རིགས་ཀྱི་སྒོ་ནས་བཤགས་བྱའི་ལྟུང་བའམ་བསྡམ་བྱ་ཙམ་གྱིས་འདག་རུང་གི་ལྟུང་བ་གང་རུང་དེ། ལྔར་ཕྱེ་བའི་ཉེས་བྱས་ཀྱི་མཚན་ཉིད་ཡིན་པར་ཀུན་མཁྱེན་འཇམ་བཞད་ཀྱིས་གསུངས་སོ། །མཚོ་ཊཱིཀ་མཆན་ལས། ཕམ་པ་དང་འདྲ་བའི་ཉེས་བྱས་འཆབ་བཅས་འཆབ་མེད་དང༌། ཕམ་ལྷག་གི་སྦྱོར་བའི་སྦྱོར་བ་མཚན་ཉིད་པའི་ཉེས་བྱས་དང༌། ལྟུང་བྱེད་དང་སོ་སོར་བཤགས་པར་བྱ་བའི་སྦྱོར་བའི་ཉེས་བྱས་དང༌། དངོས་གཞིས་བསྡུས་པའི་ཉེས་བྱས་དང༌། བསྡམ་པར་བྱ་བའི་ཉེས་བྱས་དེ་རྣམས་ཐམས་ཅད་ལ་མཚན་ཉིད་ཕྱོགས་གཅིག་ཏུ་བཀོད་པ་འདི་ཤིན་ཏུ་དཀའ་བར་སྣང་ངོ༌། །ཞེས་གསུངས་སོ། །ལྟུང་བ་སྡེ་ལྔ་སོ་སོའི་མཚན་ཉིད་དེ་ལྟར་བཞག་པ་ལ། ལྷག་མ་ལ་ལྟུང་བྱེད་དུ་ཤེས་པའི་ལྷག་མ་ཆོས་ཅན། ལྟུང་བྱེད་ཡིན་པར་ཐལ། ལྟུང་བྱེད་ཀྱི་མིང་རིགས་ཀྱི་ཕྱིར་བཅོས་པས་འདག་ཏུ་རུང་བ་ཡིན་པའི་ཕྱིར། རྟགས་གྲུབ་སྟེ། མཚོ་ཊཱིཀ་གི་ལས་གཞིའི་སྐབས་༩༥༧ལས། ལྟུང་བ་བྱུང་བ་ལ་ནི་ལས་ཀྱི་གནས་སུ་འདུ་བའི་ཚེ་ན་ལས་བྱེད་པའི་དགེ་འདུན་པ་རྣམས་ཀྱི་འདུ་ཤེས་ཇི་ལྟ་བ་བཞིན་དུ་ཕྱིར་བཅོས་སུ་གཞུག་པའམ་བསྙིལ་བར་སྒྲུབ་པར་བྱའོ། །ལས་བྱེད་པ་ལས་གཞན་གྱི་དུས་སུ་ཡང་རང་གི་འདུ་ཤེས་ཇི་ལྟ་བ་བཞིན་དུ་ཕྱིར་བཅོས་བྱས་ན་ལྟུང་བ་དག་པར་རིགས་ཏེ། མཁན་པོ་ཚུལ་ཁྲིམས་འཆལ་བ་ལ་ལྡན་པར་ཤེས་ན་ཚུལ་ཁྲིམས་སྐྱེ་བར་གསུངས་པའི་གནད་ཀྱིས་ཤེས་ཏེ། དེ་དང་འདི་དཔྱད་པ་ཐ་སྙད་པར་མཚུངས་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན་དཔྱད་པར་འོས་སོ། ། བཞི་པ་གྲངས་ངེས་པ་ནི། ལྟུང་བའི་སྡེ་ཚན་ལྔར་ངེས་པ་ཡིན་ཏེ། ཆད་པ་ཆེ་ཆུང་རིམ་པ་ལྔར་བཅས་པ་ལ་ལྟོས་པའི་ཕྱིར་རོ། །