ཆོས་འཁོར་དང་རི་དྭགས་ཕོ་མོ།
ཆོས་འཁོར་དང་རི་དྭགས་ཕོ་མོ་གཙུག་ལག་ཁང་གི་སྒོ་སྟེང་དུ་འཇོག་པ་ནི། ཚངས་པ་ཆེན་པོས་འཁོར་ལོ་རྩིབས་སྟོང་ཞིག་ཕུལ་ཏེ། སྟོན་པ་སངས་རྒྱས་ལ་གསོལ་བ་འདེབས་པའི་ཚེ་ན། རི་དྭགས་རུ་རུ་ཕོ་མོ་གཉིས་ཀྱིས་འཁོར་ལོ་ལ་མིག་མི་ཟུམ་པར་ལྟ་བ་བྱུང་བའི་རྒྱུས། དེ་དག་མཚོན་བྱ་མཚོན་བྱེད་དུ་སྦྱར་ནས། འཁོར་ལོ་ནི་འཕགས་ལམ་ཡན་ལག་བརྒྱད་དང་སྦྱོར་ཏེ། བཙུན་པ་དབྱངས་སྒྲོགས་ཀྱིས། འཕགས་ལམ་ཡན་ལག་བརྒྱད་ཁོ་ན་ཆོས་འཁོར་ཡིན་ཏེ། འཁོར་ལོ་རིན་པོ་ཆེ་དང་ཆོས་མཚུངས་པ་དེ་ཁོ་ན་ལ་ཡོད་པའི་ཕྱིར་ཏེ། ཡང་དག་པའི་ལྟ་བ། རྟོག་པ། རྩོལ་བ་གསུམ་ནི། གཅོད་པར་བྱེད་པའི་རྩིབས་དང་ཆོས་མཚུངས་པ་སྟེ། དེ་གསུམ་ཤེས་རབ་གྱི་བསླབ་པ་ཡིན་པས། རང་གི་མི་མཐུན་ཕྱོགས་འཇོམས་པར་བྱེད་པའི་ཕྱིར། ངག ལས་ཀྱི་མཐའ། འཚོ་བ་གསུམ་ནི་རྟེན་པར་བྱེད་པའི་ལྟེ་བ་དང་ཆོས་མཚུངས་ཏེ། དེ་གསུམ་ཚུལ་ཁྲིམས་ཀྱི་བསླབ་པ་ཡིན་པས། བསླབ་པ་གཞན་གཉིས་ཀྱི་རྟེན་བྱེད་པའི་ཕྱིར། དྲན་པ་དང་ཏིང་ངེ་འཛིན་གཉིས་སྡུད་པར་བྱེད་པའི་མུ་ཁྱུད་དང་། ཆོས་མཚུངས་ཏེ། དེ་གཉིས་ཏིང་ངེ་འཛིན་གྱི་བསླབ་པའི་ནང་དུ་འདུ་བས། སེམས་དམིགས་པ་ལ་སྡུད་བྱེད་ཡིན་པའི་ཕྱིར། ཞེས་དང་། མཛོད་ལས། ཆོས་ཀྱི་འཁོར་ལོ་མཐོང་བའི་ལམ། །མྱུར་བར་འགྲོ་སོགས་རྩིབས་སོགས་ཀྱིས། །ཞེས་གསུངས། འཕགས་ལམ་ཡན་ལག་བརྒྱད་པོ་དེ། གང་ཟག་གི་རྒྱུད་ལ་འཕོ་བའི་གང་ཟག་ཕོ་མོ་གཉིས་སུ་ངེས་པ་དང་། དོན་དང་སྦྱར་ན། འཁོར་ལོ་ནི་དམ་ཆོས། རི་དྭགས་གདུལ་བྱ་རིགས་ཅན་གསུམ། འཁོར་ལོ་ནི་ཐུབ་བསྟན་དང་། རི་དྭགས་གཉིས་ནི་གཞིའི་བདེན་པ་གཉིས། ལམ་གྱི་ཐབས་ཤེས་གཉིས་དང་། ལྟ་སྤྱོད་དང་། འབྲས་བུ་ཆོས་གཟུགས་ཀྱི་སྐུ་གཉིས་ལ་སྦྱོར་དགོས་པ་ནི། སྔགས་ཀྱི་གཞལ་ཡས་ཁང་གི་དག་པ་དང་། མདོ་ཕྱོགས་གསུང་རབ་དག་ལས་ཟུར་ཙམ་འབྱུང་བའོ། །
ཡང་། མཚོན་དོན་གཞན་ཞིག་ནི། ཆོས་འཁོར་གྱི་གྲུབ་ཆ་ནི་ལྟེ་བ་དང་རྩིབས། མུ་ཁྱུད་དང་གསུམ་སྟེ། མཚོན་བྱ་ནི། བཅོམ་ལྡན་འདས་ཀྱིས། གདུལ་བྱ་རིགས་ཅན་གསུམ་ལ་རང་རང་གི་སྐལ་བ་དང་འཚམ་པའི་ཆོས་འཁོར་རིམ་པ་གསུམ་དུ་བསྐོར། སྤྱིར་ཆོས་ཀྱི་ཕུང་བོ་བརྒྱད་ཁྲི་བཞི་སྟོང་ཡོད་ཀྱང་། བསྡུ་ན། འདུལ་བ་དང་མདོ་སྡེ། མངོན་པ་བཅས་སྡེ་སྣོད་གསུམ་དུ་འདུས་ཤིང་། སྒྲིབ་གཉིས་དྲུངས་ནས་འབྱིན་པའི་གཉེན་པོ་འདི་གསུམ་ཁོ་ན་ཡིན་པས། དེ་ལྟར་མཚོན་ནོ། །རི་དྭགས་ཕོ་མོ་གཉིས་ཀྱིས་ཆོས་འཁོར་གྱི་རྩེ་མོ་ལ་མིག་མི་སུམ་པར་བལྟ་བ་ནི། སྐྱེ་བོ་མཆོག་སུ་ཡིན་ཡང་། མཐར་ཐུག་སྐུ་གསུམ་ལ་དམིགས་ཤིང་། བགྲོད་ལམ་གསུམ་ལས་གཞན་དུ་མ་མཆིས་པའི་དེ་ལྟར་རོ། །
ཁྲི་དྲུག་འགྱོགས།
ཁྲི་དྲུག་འགྱོགས་ནི་སྲོག་ཆགས་དྲུག་གིས་ཁྲི་འདོགས་པར་བྱེད་པ་སྟེ། དེ་ཡང་། ༡ སེང་གེས་སྟོབས་བཅུ། ༢ གླང་ཆེན་གྱིས་སོ་སོར་ཡང་དག་པའི་རིག་པ་བཞི། ༣ རྟ་མཆོག་གིས་དབང་བཅུ། ༤ རྨ་བྱས་སྨོན་གནས་ཤེས་པ། ༥ ཤང་ཤང་ཏེའུས་བྱང་ཆུབ་ཀྱི་ཕྱོགས། ༦ གྱད་མིས་མི་འཇིགས་པ་བཞི་མཚོན་པའོ། །
གོང་སྨོས་རྒྱན་དྲུག་གི་ཐིག་ཁོག་ཆ་མཉམ་པར་དགོས་པའི་སྐུའི་སྤྱི་གཙུག་གི་སྟེང་དུ། ཁྱུང་རྭ་ནོར་བུས་བརྒྱན་ཅིང་སྦྲུལ་ཟ་བས། ཤེས་རབ་ཀྱི་ཕར་ཕྱིན། ཀླུ་ཕྲུག་སྦྲུལ་མཇུག་གིས་སྦྱིན་པའི་ཕར་ཕྱིན། ཆུ་སྲིན་མཇུག་མ་པ་ཏྲ་ཅན་གྱིས་བསམ་གཏན་གྱི་ཕར་ཕྱིན། མཛེས་པའི་བུ་ཆུང་ཤིང་ལོ་གྱོན་པ་གཉིས་ཀྱིས་བརྩོན་འགྲུས། ཤ་ར་བྷས་ཚུལ་ཁྲིམས། གླང་ཆེན་རྒྱན་སྤྲས་ཀྱིས་བཟོད་པའི་ཕར་ཕྱིན་མཚོན་ནོ། །དེ་ཡང་གཙོ་བོ་བརྒྱད་ཀྱི་ཁྲི། སྟག སེང་གེ གཟིག་སོགས་ཕྱོགས་བཞི་དང་། གླང་ཆེན། མ་ཧེ། ཆུ་སྲིན། སྦྲུལ་ནག་པོ་སོགས་དབུས་ཞེས་འབྱུང་བ་ལྟར་དུའང་ཡོད་དོ། །