གཉིས་པ་ས་སོ་སོའི་ངེས་ཚིག།

གཉིས་པ་ས་སོ་སོའི་ངེས་ཚིག་ནི།

རྒྱན་ལས། རབ་ཏུ་དགའ་དང་དྲི་མ་མེད། །འོད་བྱེད་ས་དང་འོད་འཕྲོ་ཅན། །སྦྱང་དཀའ་བ་དང་མངོན་དུ་གྱུར། །རིང་དུ་སོང་དང་མི་གཡོ་བ། །ལེགས་པའི་བློ་གྲོས་ཆོས་ཀྱི་སྤྲིན། །ཞེས་གསུངས་པ་བཞིན་རིམ་པ་ལྟར་འཆད་པ་ནི། རྒྱན་ལས། བྱང་ཆུབ་དང་ནི་ཉེ་བ་དང༌། །སེམས་ཅན་དོན་སྒྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །ཞེས་ཆོས་ཀྱི་དབྱིངས་མངོན་སུམ་དུ་རྟོགས་པས་བྱང་ཆུབ་ཆེན་པོ་དང་ནི་ཉེ་བར་གྱུར་པ་དང༌། ཡོན་ཏན་ཕུན་སུམ་ཚོགས་པ་ལ་བརྟེན་ནས་སེམས་ཅན་མང་པོའི་དོན་སྒྲུབ་པར་ནུས་པ་མཐོང་བ་ལས་རབ་ཏུ་དགའ་བ་ཁྱད་པར་ཅན་སྐྱེ་བར་འགྱུར་ཏེ། དེའི་ཕྱིར་ས་དང་པོ་ལ་རབ་ཏུ་དགའ་བ་ཞེས་བརྗོད་དོ། །རྒྱན་ལས། འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཞེས་འཆལ་བའི་ཚུལ་ཁྲིམས་ཀྱི་དྲི་མ་དང་ཐེག་པ་གཞན་ཡིད་ལ་བྱེད་པར་རྩོལ་བའི་དྲི་མ་དང་བྲལ་བའི་ཕྱིར་ས་གཉིས་པ་ལ་ནི་དྲི་མ་མེད་པའི་ས་ཞེས་བྱའོ། །རྒྱན་ལས། ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པའོ། །ཞེས་ཏིང་ངེ་འཛིན་གྱི་སྟོབས་ཀྱིས་ཆོས་ཀྱི་སྣང་བ་ཚད་མེད་པ་ཚོལ་ཞིང༌། གཞན་དག་ལ་ཡང་ཆོས་ཀྱི་སྣང་བ་རྒྱ་ཆེན་པོ་ནི་འཕེལ་བར་བྱེད་པའི་ཕྱིར་ན་ས་གསུམ་པ་ལ་འོད་བྱེད་པ་ཞེས་བྱའོ། །རྒྱན་ལས། འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་སྲེག་པས་འོད་འཕྲོ་ཅན། །ཞེས་འདི་ལྟར་བྱང་ཆུབ་ཀྱི་ཕྱོགས་དང་མཐུན་པའི་ཆོས་རྟོགས་པའི་ཤེས་རབ་ནི་མི་མཐུན་ཕྱོགས་ཐམས་ཅད་རབ་ཏུ་སྲེག་པར་བྱེད་པས་འོད་འཕྲོ་བ་ལྟ་བུ་སྟེ། ཤེས་རབ་དེ་དང་ལྡན་པའི་ཕྱིར་ན་ས་བཞི་པ་དེ་ནི་ཉོན་མོངས་པ་དང་ཤེས་བྱའི་སྒྲིབ་པ་གཉིས་པོ་སྲེག་པར་བྱེད་པས་འོད་འཕྲོ་བ་ཅན་ཞེས་བྱའོ། །རྒྱན་ལས། སེམས་ཅན་རྣམས་ཡོངས་སྨིན་བྱེད་ཅིང༌། །རང་གི་སེམས་ཀྱང་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱོང་དཀའ་ཞེས་བྱའོ། །ཞེས་སེམས་ཅན་མཐའ་ཡས་པ་རྣམས་ཡོངས་སུ་སྨིན་པར་བྱེད་ཅིང༌། དེ་དག་གི་ལོག་སྒྲུབ་ཀྱིས་མི་སྐྱོ་བར་རང་གི་སེམས་ཀྱང་ཀུན་ནས་ཉོན་མོངས་པ་ལས་བསྲུང་བའི་ཕྱིར། བློ་ལྡན་བྱང་ཆུབ་སེམས་དཔའ་རྣམས་ཀྱིས་སྦྱང་དཀའ་བ་དེའི་ཕྱིར་ན་ས་ལྔ་པ་ལ་སྦྱང་དཀའ་བ་ཞེས་བྱའོ། །རྒྱན་ལས། ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་གྱུར་པའི་ཕྱིར། །མངོན་དུ་གྱུར་པའི་ས་ཞེས་བཤད། །ཅེས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་འཁོར་བའི་རང་བཞིན་དང་ནི་མྱ་ངན་ལས་འདས་པ་གཉིས་པོ་འདི་དག་མཉམ་པ་ཉིད་མངོན་དུ་གྱུར་ཅིང་སྲིད་ཞིའི་མཐའ་ལ་མི་གནས་པའི་ཕྱིར་ས་དྲུག་པ་ལ་མངོན་དུ་གྱུར་པའི་ས་ཞེས་བཤད་དོ། །རྒྱན་ལས། བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །ཞེས་མྱ་ངན་ལས་འདས་པར་བགྲོད་པ་གཅིག་པའི་ལམ་ས་བརྒྱད་པ་དང་འབྲེལ་ཞིང་དེ་ཐོབ་པ་ལ་ཉེ་བའི་ཕྱིར་རྩོལ་བཅས་སྦྱོར་བའི་མཐར་ཕྱིན་ཏེ་འཁོར་བ་ལས་རིང་དུ་སོང་བས་ན་[ས་བདུན་པ་ལ་]རིང་དུ་སོང་བའི་ས་ཞེས་བྱ་བར་འདོད་དོ། །རྒྱན་ལས། འདུ་ཤེས་ཉིད་ཀྱིས་མི་གཡོའི་ཕྱིར། །མི་གཡོ་བ་ཞེས་ངེས་པར་བརྗོད། །ཅེས་མཚན་མ་སྤང་བར་རྩོལ་བ་དང་མཚན་མེད་སྒྲུབ་པར་རྩོལ་བའི་འདུ་ཤེས་གཉིས་ཀྱིས་མི་གཡོ་བའི་ཕྱིར་ན་ས་བརྒྱད་པ་ལ་མི་གཡོ་བ་ཞེས་བྱ་བར་ངེས་པར་བརྗོད་དོ། །རྒྱན་ལས། སོ་སོ་ཡང་དག་རིག་བློ་བཟང༌། །ས་དེ་ལེགས་པའི་བློ་གྲོས་ཡིན། །ཞེས་གཙོ་བོར་སོ་སོ་ཡང་དག་པར་རིག་པ་བཞི་ལ་དབང་ཐོབ་པའི་བློ་གྲོས་བཟང་པོ་དང་ལྡན་པའི་ས་དགུ་བ་དེ་ནི་ལེགས་པའི་བློ་གྲོས་ཞེས་བྱ་བ་ཡིན་ནོ། །རྒྱན་ལས།སྤྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་སྤྲིན་གྱིས་ནམ་མཁའ་ལ་ཁྱབ་པ་བཞིན་དུ་བརྟེན་པ་ཏིང་ངེ་འཛིན་དང་གཟུངས་ཀྱི་སྒོ་གཉིས་ཀྱིས་ནམ་མཁའ་ལྟ་བུར་རྒྱ་ཆེ་བའི་ཆོས་ཀྱི་རྟེན་ལ་ཁྱབ་པའི་ཕྱིར་ན་ས་བཅུ་པ་ལ་ཆོས་ཀྱི་སྤྲིན་ཞེས་བྱའོ། །

གསུམ་པ་དབྱེ་བ་ནི།

ཐེག་དམན་གྱི་ས་དང༌། ཐེག་ཆེན་གྱི་ས་གཉིས་ཡོད། དང་པོ་ལ་དམན་པ་ས་བརྒྱད་ཡོད་དེ། དཀར་བོ་རྣམ་པར་མཐོང་བའི་ས། རིགས་ཀྱི་ས། བརྒྱད་པའི་ས། མཐོང་བའི་ས། བསྲབས་པའི་ས། འདོད་ཆགས་དང་བྲལ་བའི་ས། བྱས་པ་རྟོགས་པའི་ས། རང་སངས་རྒྱས་ཀྱི་ས་དང་བརྒྱད་ཡོད་པའི་ཕྱིར་རོ། །དེ་ཡང་དཀར་པོ་རྣམ་པར་མཐོང་བའི་ས་ནི་མོས་སྤྱོད་དང༌། རིགས་ཀྱི་ས་ནི་ཆོས་མཆོག་དང༌། བརྒྱད་པའི་ས་ནི་རྒྱུན་ཞུགས་ལ་ཞུགས་པ་དང༌། མཐོང་བའི་ས་ནི་རྒྱུན་ཞུགས་དང༌། བསྲབས་པའི་ས་ནི་ཕྱིར་འོང་དང༌། འདོད་ཆགས་དང་བྲལ་བའི་ས་ནི་ཕྱིར་མི་འོང་དང༌། བྱས་པ་རྟོགས་པའི་ས་ནི་དགྲ་བཅོམ་དང༌། རང་རྒྱལ་གྱི་མངོན་རྟོགས་རྣམས་ནི་རང་རྒྱལ་གྱི་ས་ཡིན་ནོ། །

གཉིས་པ་ཐེག་ཆེན་གྱི་ས་ལ།

སོ་སྐྱེས་ཀྱི་ས་དང༌། འཕགས་པའི་ས་གཉིས་ཡོད། །ཐེག་ཆེན་འཕགས་པའི་ས་ལ། བྱང་འཕགས་དང་སངས་འཕགས་ཀྱི་ས་གཉིས་ཡོད་དོ། །བྱང་འཕགས་ཀྱི་ས་ལ་དབྱེ་ན། ས་དང་པོ་རབ་ཏུ་དགའ་བ། གཉིས་པ་དྲི་མ་མེད་པ། གསུམ་པ་འོད་བྱེད་པ། བཞི་བ་འོད་འཕྲོ་བ། ལྔ་བ་སྦྱང་དཀའ་བ། དྲུག་པ་མངོན་དུ་གྱུར་པ། བདུན་པ་རིང་དུ་སོང་བ། བརྒྱད་པ་མི་གཡོ་བ། དགུ་བ་ལེགས་པའི་བློ་གྲོས། བཅུ་བ་ཆོས་ཀྱི་སྤྲིན་དང་བཅུའོ། །ཡང་སའི་མིང་གིས་བསྟན་པ་དུ་མ་ཡོད་དེ། བསམ་གཏན་ས་དྲུག་ནི། བསམ་གཏན་དང་པོའི་ཉེར་བསྡོགས་མི་ལྕོགས་མེད་དང༌། དང་བོའི་དངོས་གཞི་ཙམ་པོ་བ་དང་ཁྱད་པར་གྱི་དངོས་གཞི། གཉིས་པའི་དངོས་གཞི། གསུམ་པའི་དངོས་གཞི། བཞི་བའི་དངོས་གཞི་རྣམས་སོ། །ཁམས་གསུམ་ས་དགུ་ནི་འདོད་སེམས་དང་བསམ་གཏན་བཞི་དང་གཟུགས་མེད་བཞིའོ། །ཟག་མེད་ས་དགུ་ཡོད་དེ། ཟག་མེད་ཀྱི་བསམ་གཏན་ས་དྲུག་དང༌། གཟུགས་མེད་དང་བོ་གསུམ་གྱིདངོས་གཞི་ཟག་མེད་རྣམས་སོ། །