ལྔ་པ་གོ་རིམ་ངེས་པ་ནི་ཆད་པ་ལྕི་ཡང་གི་གོ་རིམ།
ལྔ་པ་གོ་རིམ་ངེས་པ་ནི་ཆད་པ་ལྕི་ཡང་གི་གོ་རིམ་སྟེ།
ཕམ་པ་ལ་སོགས་པ་སྡེ་ཚན་སྔ་མ་སྔ་མ་ཆད་པ་ལྕི་ལ། སྡེ་ཚན་སྔ་མ་ལ་ལྟོས་ནས་སྡེ་ཚན་ཕྱི་མ་ཕྱི་མ་རྣམས་ཆད་པ་ཡང་བའི་ཕྱིར་རོ། །སྤང་ལྟུང་ལ་སོགས་པའི་ཆད་པ་བས་ལྕི་བའི་ཆོས་ལས་འདས་པའི་ཉེས་བྱས་ཆད་པ་ལྕི་བ་ཡོད་དེ་དམིགས་བསལ་ཡིན་ནོ། ། དྲུག་པ་སྒྲ་བཤད་པ་ལ། ཐོག་མར་ཕམ་པའི་སྒྲ་བཤད་པ་ནི་པ་ར་ཛི་ཏ་ཞེས་པ་སཾ་སྐྲྀ་ཏའི་སྐད་ལས་བྱུང་སྟེ། པ་ར་ཞེས་པ་གཞན་ཡིན་ལ། ཛི་ཏ་ཞེས་པ་ཐུབ་པ་སྟེ་གཞན་གྱིས་ཐུབ་པས་ན། ཕམ་པ་ཞེས་བརྗོད་པ་སྟེ། ཊཱི་ཀ་ལས། གཞན་རྒྱལ་བའི་ཉེས་པ་ནི་ཕམ་པའོ། །ཞེས་སོ། །