ཐིག་ནག
ཐིག་ནག་ཅེས་པ་ནི། འདུ་ཁང་དང་མགོན་ཁང་སོགས་ཀྱི་གྲྭ་ཟུར་དང་སྟེང་ལ་བཙུགས་སྲོལ་ཡོད་པ་སྟེ། དེ་ནི་འབྲི་གཡག་གི་རྩིད་པ་ནག་པོ་ལས་བཟོས་པའི་ཐུག་རལ། ལྕགས། མེ་རི་གསུམ་གྱིས་གྲུབ་པ་ཡིན། འདི་འཛུགས་སྲོལ་གྱི་ཁུངས་ནི། ས་སྐྱ་པཎྚི་ཏས་སྟོད་ཁུལ་དུ་མུ་སྟེགས་པ་འཕྲོག་བྱེད་དགའ་བོ་རིགས་ལམ་རྣམ་དག་གིས་ཚར་བཅད་ནས། ཁོའི་སྐྲ་དང་རལ་བ་གཞན་ལ་རྔམ་བརྗིད་སྟོན་པའི་ཆེད། ཁང་བའི་ཡང་སྟེང་དུ་དཔའ་དར་ལྟ་བུར་བཀལ་བ་དེ་ཡིན། དེ་ཡང་གཟུངས་དང་སྲོག་ཤིང་སྒྲུབ་བཞག་བཅས་སྒྲུབ་ལུགས་ཚང་བར་བྱེད་དགོས་ལ། ཐིག་མང་ཆེ་བ་ཚོན་མདོག་ནག་པོ་ཡིན། ཕྱིས་སུ་ཐིག་འགེལ་སྲོལ་དེ། ཕལ་མོ་ཆེ་ཆོས་སྲུང་སོགས་གནས་སའི་མགོན་ཁང་དུ་ཆགས་པས། དེ་ལ་བརྟེན་པའི་ཆོས་སྲུང་དེས་ནང་བསྟན་གྱི་དབུ་འཕང་མཐོ་བར་འདེགས་ཤིང་། མུ་སྟེགས་པ་ཚར་གཅོད་པའི་རྔམ་བརྗིད་ཀྱི་མཚོན་དོན་ལྟ་བུར་གྱུར་ཡོད། གཞན་ཡང་དགོན་སྡེ་འགར། དར་ཤིང་རིང་བོ་གཡག་ཀོ་བློན་པས་དཀྲིས་ཏེ་རྩིད་པ་འཇོལ་ལེ་ཡོད་པ་དེ་ཡང་། མུ་སྟེགས་འཕྲོག་བྱེད་ཀྱི་རལ་བ་དར་ཤིང་ལ་བསྐྱོན་པའི་མཚོན་བྱེད་ཡིན་ཟེར། ཡང་ཁ་ཅིག ཐིག་ནག་གི་ཁུངས་ནི་ཇང་གིར་རྒྱལ་བོའི་བ་དན་མདུང་རིང་ཡིན་པར་ཡང་བཤད་དོ། །
ཐིག་ནག་གི་ཕན་ནུས་ནི། ལྷ་ཁང་དེར་གོད་ཆག་མི་ཡོང་བ་དང་། ཡུལ་ཕྱོགས་དེར་འཇིགས་པ་མི་ཡོང་བའི་ནུས་མཐུ་ཡོད་པར་གྲགས་སོ། །