དྲུག་པ་རྒོལ་བའི་སྒོ་ནས་རྟགས་ཡང་དག།

དྲུག་པ་རྒོལ་བའི་སྒོ་ནས་རྟགས་ཡང་དག་ལ་དབྱེ་ན།

རང་དོན་གྱི་རྟགས་ཡང་དག་དང༌། གཞན་དོན་གྱི་རྟགས་ཡང་དག་གཉིས། དེ་གཉིས་ཀའི་མཚན་ཉིད་ཡོད་དེ། གཏན་ཚིགས་རིགས་པའི་དོན་བསྡུས་ལས། རང་དོན་དང་གཞན་དོན་གྱི་རྟགས་ཡང་དག་གཉིས་ཏེ། མཚན་ཉིད་ནི་རིམ་པ་ལྟར། སྔ་རྒོལ་གྱིས་ཕྱི་རྒོལ་ལ་བསྒྲུབ་བྱ་རྟོགས་པའི་ཐབས་སུ་བསྟན་པ་ལ་མ་ལྟོས་པར་ཚུལ་གསུམ་པའི་རྟགས་སུ་གྲུབ་པ་དང༌། ལྟོས་ནས་ཚུལ་གསུམ་པའི་རྟགས་སུ་གྲུབ་པའོ། །

དབྱེ་ན་རེ་རེ་ལའང་འབྲས་རང་མ་དམིགས་པ་གསུམ་གསུམ་མོ། །ཞེས་གསུངས་པའི་ཕྱིར་རོ། །སྐབས་དུ་མར་སྤྱིར་བཏང་དང་བྱེ་བྲག་སྒྲ་མི་རྟག་སྒྲུབ་ལྟ་བུའི་དབང་དུ་བྱས་པ་དང༌། སྐབས་ཀྱི་རྒོལ་བ་སོགས་ལ་སྦྱར་ཚུལ་ཤེས་དགོས་ཏེ། དེ་ལྟ་མ་ཡིན་ན་དངོས་འགལ་དུ་འགྱུར་བ་དུ་མ་ཡོད་དོ། །