དགེ་འདུན་ལྷག་མའི་སྒྲ་བཤད།

དགེ་འདུན་ལྷག་མའི་སྒྲ་བཤད་ནི།

རྣམ་འབྱེད་ལས། ལྟུང་བ་དེ་དགེ་འདུན་ལས་རྣམ་པར་ལྡང་བར་འགྱུར་གྱི་གང་ཟག་ལས་མ་ཡིན་ནོ་འདི་ནི་ལྷག་མ་དང་བཅས་པ་ཡིན་ཏེ། དེས་ན་དགེ་འདུན་ལྷག་མའོ། །ཞེས་གསུངས་སོ། །ལྟུང་བྱེད་ཀྱི་སྒྲ་བཤད་པ་ནི། ངན་སོང་དུ་ལྟུང་བར་བྱེད་པས་ན་ལྟུང་བྱེད་ཅེས་བྱ་སྟེ་ལྟུང་བ་སྡེ་ལྔ་ཐམས་ཅད་ཀྱིས་ངན་སོང་དུ་ལྟུང་བར་བྱེད་པ་ཡོད་ཀྱང་འདིར་ནི་སྤྱི་མིང་བྱེ་བྲག་ལ་བཏགས་པའོ། ། སོ་སོར་བཤགས་པར་བྱ་བའི་སྒྲ་བཤད་ནི། ལྟུང་བ་འདི་ལ་འཆབ་པ་མེད་ཀྱང་མཐོལ་བ་དང་བཤགས་པ་སོ་སོར་བྱ་བ་ཡིན་པས་ན་སོ་སོར་བཤགས་པར་བྱ་བ་ཞེས་བྱ་སྟེ། རྣམ་འབྱེད་ལས། སོ་སོར་བཤགས་པར་བྱ་བ་ནི་སོ་སོར་མཐོལ་བར་བྱའོ། །ཞེས་གསུངས་སོ། །རྣམ་པ་གཅིག་ཏུ་ན་མཐོལ་བ་ལ་བཤགས་པའི་མིང་གིས་བརྗོད་དགོས་པའི་ཕྱིར་ན་ཡང་སོ་སོར་བཤགས་པར་བྱ་བ་ཞེས་བྱ་སྟེ། ཀརྨ་ཤ་ཏཾ་དང་ཊཱི་ཀ་ལས་འདི་ནི་སྨྲེ་སྔགས་འདོན་པའི་རྣམ་པར་བརྗོད་པས་སོ་སོར་བཤགས་པར་བྱ་བ་ཉིད་དུ་གསུངས་པ་ཡིན་ནོ། །ཞེས་སོ། །ཉེས་བྱས་ཀྱི་སྒྲ་བཤད་ནི། ལེགས་པར་མ་བྱས་ཉེས་པར་བྱས་པས་ན་ཉེས་བྱས་ཏེ། ལྟུང་བ་སྡེ་ལྔ་ཐམས་ཅད་ལེགས་པར་མ་བྱས་པ་ཡིན་ཡང་འདི་ནི་སྤྱི་མིང་བྱེ་བྲག་ལ་བཏགས་པའོ། །བདུན་པ་དེ་ལས་འདས་ན་ཅིར་འགྱུར་ནི། སྤྱིར་ན་བཅས་པ་ལས་འདས་ན་རང་རང་གི་ལྟུང་བར་འགྱུར་རོ། །བྱེ་བྲག་ཏུ་ཕམ་པའི་བཅས་པ་ལས་འདས་ན་ཕམ་པར་འགྱུར་ཏེ། འཆབ་སེམས་སྐྱེས་ན་སྡོམ་པའི་དགོས་པ་རྣམ་པ་དྲུག་བསྒྲུབ་མི་ནུས་སུ་གྱུར་ནས་ཉམས་ལ། འཆབ་སེམས་མ་སྐྱེས་ན་དགོས་པ་རྣམ་པ་དྲུག་སྒྲུབ་ནུས་ཡིན་ཡང་ཉམས་པ་སྟེ་སྔར་བཤད་ཟིན་ཏོ། །