གཡུ་ཁོག་ཡུལ་གྱི་རི་བསང་རླུང་རྟ།
སྔོན་ཆོས་རྒྱལ་ཁྲི་སྲོང་ལྡེའུ་བཙན་གྱིས་དཔལ་གྱི་བསམ་ཡས་བཞེངས་གྲུབ་པའི་ཚེ། སློབ་དཔོན་ཨོ་རྒྱན་པདྨས་ཡུལ་ལྷ་གཞི་བདག་རྣམས་ལ་གཏང་རག་ཏུ་རྒྱགས་བརྔན་ལྷ་བསང་ཆེན་མོ་མཛད་ཅིང་ལོ་དེའི་ཟླ་བ་ལྔ་པའི་ཚེས་བཅོ་ལྔ་ཉིན་བསམ་ཡས་ཧས་པོ་རིའི་རྩེ་ནས་བོད་ཀྱི་རྒྱལ་བློན་རྣམས་ཀྱིས་འཛམ་བུ་གླིང་གི་ཡུལ་ལྷ་གཞི་བདག་རྣམས་ལ་བསང་མཆོད་རྒྱ་ཆེན་པོ་མཛད་པ་ལ་འཛམ་གླིང་དུ་སྤྱི་བསང་དུ་གྲགས་ཤིང་དེ་ཕྱིན་བོད་ཀྱི་ས་གནས་རྣམས་སུ་སྲོལ་རྒྱུན་དུ་བྱུང་བ་ལྟར་མདོ་ཁམས་གཡུ་ཁོག་གི་ཡུལ་དུ་ཡང་རི་བསང་རླུང་རྟ་བྱེད་རྒྱུ་ནི་ལོ་རེའི་དུས་མཆོད་དམ་ཡང་ན་བྱ་བ་གང་ཞིག་བསྒྲུབ་པའི་སྔོན་འགྲོ་གལ་ཆེན་ཞིག་ཏུ་བརྩི། སྤྱིར་བསང་ལ་ཡུལ་ལྷ་གཞི་བདག་གནས་པའི་རི་རྩེའམ་མདུན་ནས་བསང་མཆོད་བྱེད་པ་ལྟ་བུ་རི་བསང་དང་། རུ་གྲོང་དུ་རང་རང་གི་སྦྲའི་ཕུག་གམ་ཁང་སྟེང་སོགས་ནས་བསང་གཏོང་བ་ལྟ་བུ་གྲོང་བསང་། རུ་སྤོ་སྐབས་དང་མགྲོན་དུ་འགྲོ་བའི་ལམ་གྱི་ཇ་སྐབས་ལྟ་བུར་ཐབ་ཀའི་ནང་དུ་བསང་གཏོང་བ་ལྟ་བུ་ཐབ་བསང་། བླ་མ་དང་མི་ཆེན་བསུ་སྐྱེལ་སྐབས་ལམ་ཁ་ནས་བསང་གཏོང་བ་ལྟ་བུ་ལམ་བསང་། ལྷ་ཆབ་སྔོན་མོ་ལྟ་བུ་མནོལ་བསང་སོགས་ཀྱི་དབྱེ་བ་ཡོད། ལོ་ལྟར་བོད་ཟླ་ལྔ་པའི་ནང་གཡུ་དགོན་གྱི་བླ་སེར་རྣམས་དང་ཡུལ་གྱི་ཕོ་སྐྱེས་ཡོངས་རྫོགས་ཡུལ་ལྷའི་གཙོ་བོ་དགེ་བསྙེན་རྡོ་རྗེ་གཡུ་ཁྲོམ་གྱི་མདུན་དུ་འཛོམས་ནས་སྤྱི་བསང་གཏོང་བ་ཡིན། དེ་ཡང་ཉིན་འགའི་སྔོན་ནས་བསང་མཆོད་ཀྱི་སྟ་གོན་སེས་ཐུ་རྔོ་བ། རླུང་རྟ་དཔར་བ། རླུང་ཤིང་འཐུ་བ། མར་གསར་གྱི་རིལ་བུ་ཁྱིམ་མིའི་གྲངས་སམ་བཅུ་གསུམ། ཆང་དང་། བསང་རྫས་བརྒྱ་རྩ་སོགས་སྟ་གོན་བྱེད། དེ་ཡང་སེས་ཐུ་ནི་ཡུལ་སྐད་ཡིན་ལ་བསང་གཞུང་དུ་ཤེལ་ཚིག་སྟེ་ནས་བརྔོས་པའི་ཡོས་བཅུ་ཆ་གཅིག་ཙམ་ཚིག་ལ་མ་ཚིག་པའི་ནག་པོ་དང་། བཅུ་ཆ་དགུ་ཡོས་ཁྲ་རང་དུ་ཡོད་པ་ཞིག་དགོས་ཏེ་ཤེལ་ཚིག་ཁྲི་དཀར་སྟོང་ནག་ཟེར། ཆགས་མེད་རིན་པོ་ཆེས། ཤེལ་ཚིག་ཁྲི་དཀར་སྟོང་ནག་འདི། །རྟ་ནོར་ལུག་གསུམ་ཁྱུ་རུ་དམིགས། གསུངས་པ་ལྟར་རོ།། སེས་ཐུའི་ནང་དུ་ཀ་ར་དང་། ཆུར་བ། ཤིང་ཏོག་གི་རིགས་རྣམས་ཀྱང་བསྲེ་སྲོལ་ཡོད། རླུང་རྟ་ནི་འགྲོ་བ་མིའི་རིགས་ཀྱི་སྲོག་ལུས་དབང་ཀླུང་དར་གུད་ལ་ལྟོས་ནས་བདེ་སྡུག་འབྱུང་ཕྱིར་རྒུད་པ་དར་བར་བྱེད་པའམ། ཁ་རྗེ་དབང་ཐང་། ཚེ་བསོད་སྟོབས་འབྱོར་གོང་ནས་གོང་དུ་བསྐྱེད་བྱེད་དུ་འབུལ་བ་ཡིན་ལ། རླུང་རྟའི་ཁ་ཏོག་ཀྱང་མཐུན་གསུམ་ལོ་པའི་ཀླུང་རྟའི་ཁམས་གང་ཡིན་ཀྱི་མ་མདོག་གཙོ་བོར་བྱེད་པ་དང་། ཀླུང་ཁམས་རང་མདོག་གཙོ་བོར་བྱེད་པའི་ལུགས་གཉིས་ཡོད་ལ། དང་པོ་ལྟར་ན་སྟག་རྟ་ཁྱི་གསུམ་ལོ་པའི་ཀླུང་ཁམས་ལྕགས་ཡིན་ན། ལྕགས་མ་ས་ཡིན་ཕྱིར་སེར་པོ་མཆོག ལྕགས་རང་མདོག་དཀར་པོ་འབྲིང་། ལྕགས་དགྲ་མེ་ཡིན་པས་དམར་པོ་མི་རུང་། དེ་བཞིན་དུ་ཕག་ལུག་ཡོས་གསུམ་ལོ་པའི་ཀླུང་ཁམས་མེ། མེ་མ་ཤིང་ཡིན་པས་ལྗང་གུ་མཆོག མེ་རང་མདོག་དམར་པོ་འབྲིང་། མེ་དགྲ་ཆུ་ཡིན་སྔོན་པོ་མི་རུང་། བྱི་འབྲུག་སྤྲེལ་གསུམ་ལོ་པའི་ཀླུང་ཁམས་ཤིང་། ཤིང་མ་ཆུ་ཡིན་སྔོན་པོ་མཆོག ཤིང་རང་མདོག་ལྗང་གུ་འབྲིང་། ཤིང་དགྲ་ལྕགས་ཡིན་དཀར་པོ་མི་རུང་། བྱ་གླང་སྦྲུལ་གསུམ་ལོ་པའི་ཀླུང་ཆུ་ཁམས། ཆུ་མ་ལྕགས་ཡིན་དཀར་པོ་མཆོག ཆུ་རང་མདོག་སྔོན་པོ་འབྲིང་། ཆུ་དགྲ་ས་ཡིན་པས་སེར་པོ་མི་རུང་བར་བཤད། གཉིས་པ་ལྟར་ན་ཀླུང་ཁམས་རང་མདོག་གཙོ་བོར་བྱེད་ཚུལ་ནི་གོང་གི་འབྲིང་པོ་ཐམས་ཅད་མཆོག་ཏུ་བྱེད་པ་ཡིན། རླུང་རྟའི་ངོས་སུ་བཀྲ་ཤིས་པ་དང་དཔལ་དང་ཕུན་ཚོགས་ཀུན་ནས་གནས་ཤིང་ཕྱོགས་ཐམས་ཅད་ལས་རྣམ་པར་རྒྱལ་བར་བྱེད་ཕྱིར་འཕགས་པ་རྒྱལ་མཚན་རྩེ་མོའི་གཟུངས་དཔར་བ་དང་། ཡང་རླུང་རྟ་རྟ་འཁོར་མ་ཞེས་པ་མེ་ཁམས་ཀྱི་སྲོག་ལུས་དབང་ཀླུང་བསྐྱེད་བྱེད་རྒྱ་སྟག་དམར་པོ། ཆུ་ཁམས་བསྐྱེད་བྱེད་གཡུ་འབྲུག་སྔོན་མོ། ཤིང་ཁམས་བསྐྱེད་བྱེད་བྱ་ཁྱུང་རྒྱལ་པོ། ལྕགས་ཁམས་བསྐྱེད་སེང་གེ་དཀར་མོ། ས་ཁམས་བསྐྱེད་བྱེད་འགྲོས་ལྡན་རྟ་མཆོག་བཅས་ཀྱི་རི་མོ་དང་། བར་མཚམས་སུ་རླུང་རྟ་བསྐྱེད་སྔགས་སོགས་ཡོད་པ་དཔར་དུ་འདེབས། ཀླུང་རྟའི་དགྲ་མདོག་གི་དར་ལྕེ་དང་། བལ་དཀར་གཙང་མའི་སྐུད་པས་ཁ་ལུང་བཏགས་ཏེ་ལྷ་ཤིང་ཤུག་པ་ལས་བྱས་པའི་རླུང་ཤིང་སྟེ་དར་ཡུ་དྲང་ཞིང་ལྡེམ་པ་ལ་འདོགས། རྩེ་མོའི་ཤུག་ལོ་བལ་ཚོན་གྱིས་བརྒྱན་ནས་སྦྲ་ཁང་གི་ཕུག་ཏུ་བརྟན་པར་འཛུག སེས་ཁུག་གམ་སེས་ཏ་ནང་དུ་སེས་ཐུ་བླུགས་ནས་རླུང་རྟའི་ཉེ་དྲུང་དུ་འཇོག་ལ་ཤུག་བདུག་བྱ་ཞིང་མཚན་མོ་སྐར་འོད་ཕོག་པར་བྱེད། སྤྱིར་བསང་མཆོད་སྐབས་ཀྱི་འཛེམ་བྱ་ནི། ལོ་དེའི་ནང་མི་ཤི་བའི་ཁྱིམ་ལ་གཞི་རྩོག་མ་དང་། རོ་ཁུར་མཁན་ལ་ལག་རྩོག་མ་ཟེར་ཞིང་ལོ་གཅིག་གི་རིང་ལ་བསང་མཆོད་དུ་འགྲོ་བ་དང་རྫས་བསྲེ་བ་སོགས་མི་བྱེད། བསང་རྫས་སྟ་གོན་དང་བསང་མཆོད་དངོས་ཀྱི་སྐབས་ཁ་ལག་བཀྲུ་བ་སོགས་ཧ་ཅང་གཙང་སྦྲ་བྱེད་ཅིང་ངན་སྙིགས་དང་ཟས་འཕྲོ་སོགས་ཀྱིས་བསང་རྫས་མི་བྱེད། བསང་རྫས་སྟ་གོན་བྱས་ནས་ཤུག་བདུག་དང་སྐར་འོད་ལ་བཞག་རྗེས་བུད་མེད་ཀྱིས་མི་རེག་པ་དང་རི་བསང་ལ་འགྲོ་བའི་སྔ་ནུབ་ཏུ་བཟའ་ཚང་ཡིན་ཀྱང་ལྷན་ཅིག་ཏུ་མི་ཉལ། རི་བསང་ལ་འགྲོ་སྐབས་བོད་ཆས་སྤྲས་ནས་ཞོན་རྟ་སོགས་སླར་ཡང་ཤུག་བདུག་བྱེད་པའི་སྲོལ་ཡོད། རི་བསང་དངོས་ཀྱི་སྐབས་བླ་སེར་རྣམས་ཀྱིས་རི་ཁྲུས། འཁོར་འདས་མཆོད་པ་དང་བསང་གཞུང་ཆེན་མོ་གང་རུང་དང་། བུམ་གཏེར་སྦ་ཐབས། ལབ་ཙེ་བསྟོད་ཆོག ཤིང་རིས་བཅུ་གསུམ་འབུལ་ཐབས་སོགས་གསུང་སྲོལ་ཡོད། སྐྱེས་པ་ཚོས་བསང་ཤུག་འཐུ་ཞིང་བསང་གཏོང་། ཇ་ཕུད། ཆང་ཕུད། འོ་ཞོ། ཕྱེ་མར། དར་ཚོན། ཤེལ་ཚིག མཆོད་གཏོར་སོགས་འབུལ་ཚིག་དང་སྦྲགས་ནས་བསང་ནང་དུ་མཆོད། བསང་གཏོང་བྱེད་ནི་གཙོ་བོ་ཤུག་པ་དང་གཞན་ལྷ་ཤིང་གི་རིགས་རྣམས་ཏེ། ཆགས་མེད་རིན་པོ་ཆེས། སུར་དཀར་དུང་ལོ་ཞི་བའི་ཤིང་། །སྟག་པ་གསེར་ལོ་རྒྱས་པའི་ཤིང་། །ཤུག་པ་ཙན་དན་དབང་གི་ཤིང་། ཨ་ག་རུ་ནི་དྲག་པོའི་ཤིང་། ཞེས་དང་། བ་ལུ་དཀར་པོ་ལྷ་ཡི་ཤིང་། །འོམ་བུ་ཀླུ་ཤིང་སྨན་གྱི་མཆོག །སྟག་པ་སེར་པོ་གཉན་གྱི་ཤིང་། །ཉ་བྲུག་ས་བདག་གཉན་གྱི་ཤིང་། །གསུངས་པ་ལྟ་བུའོ། །རླུང་རྟ་བསྐྱེད་པའི་དུས་ཞོན་རྟ་ཁྲིད། རླུང་རྟ་བཟུང་ནས་བསང་སྐོར་ལན་གསུམ་བྱེད་ཅིང་རང་རང་གིས་གང་ཤེས་པའི་ཁ་སྨོན་དང་བཅས་ལབ་ཙེ་འཕྱོར་རྫིག་ཉི་ལེ་བསྟོད། དེ་ནས་གཡུ་མཁར་ཐང་སྨད་ཀྱི་གཞི་བདག་བདག་གཉན་པོ་གཡུ་རྩེ་ལ་ཡུལ་དགོན་གཉིས་ཆར་གྱིས་བསང་རླུང་རྟ་བྱེད། དེ་ནས་རང་རང་གང་དུ་ཡོད་པའི་ཡུལ་རིའི་གཞི་བདག་བདག་རྣམས་ལ་བསང་རླུང་རྟ་བྱེད་པ་ཡིན། བསང་མཆོད་དུས་སུ་དུ་བ་ལ་བཟང་རྟགས་དང་ངན་རྟགས་གཉིས་དཔྱད་དུ་ཡོད། བཟང་རྟགས་ནི་དུ་བ་ཁ་ཏོག་དཀར་ལ་ཟླུམ་པོའི་དབྱིབས་བྱུང་ན་ནད་གདོན་ཞི་བའི་རྟགས། ལྗང་སེར་ནོར་བུའི་དབྱིབས་བྱུང་ན་ཚེ་བསོད་རྒྱས་པའི་རྟགས། དམར་སེར་པདྨ་འདྲ་ན་ཁམས་གསུམ་དབང་དུ་འདུ་བའི་རྟགས། རྒྱ་གྲམ་དང་རལ་གྲིའི་དབྱིབས་བྱུང་ན་དགྲ་བགེགས་བར་ཆད་མེད་པའི་རྟགས། དུ་བ་གྱེན་དུ་དྲང་ཐལ་ལེ་འགྲོ་བ་རླུང་རྟ་དར་བའི་རྟགས། གཡས་སུ་འཁྱིལ་ཞིང་ཕྱུར་ཕྱུར་འགྲོ་ན་ཕོ་ལྷ་དར། གཡོན་དུ་འཁྱིལ་ཞིང་མཛེས་པར་བྱུང་ན་མོ་ལྷ་དགྱེས། ཁ་ཏོག་དཀར་ན་ལྷ་ལ་མནོལ་བག་མེད་པས་ངོ་སོ་མཐོ། སྔོན་པོ་མཐིང་འོད་འཚེར་ན་བཟང་། གདུགས་དང་རྒྱལ་མཚན་སོགས་བཀྲ་ཤིས་པའི་རྫས་དང་། དཔག་བསམ་ཤིང་། སྤྲིན་རིས། འབྲུག་ལྟ་བུ་བྱུང་ན་བཟང་བཤད། ངན་རྟགས་དུ་བ་དམར་ཤིག་ཤིག སྐྱ་ལྷབ་ལྷབ་འདྲ་ན་ངན། དུ་བ་ནམ་མཁར་མི་འགྲོ་བར་སྐྱ་བུན་བུན་ས་ལ་ཐུར་འགྲོ་བ། སོག་ལེ་འདྲ་བ། སྦྲུལ་ནག་ཐུར་དུ་རྒྱུག་འདྲ། སྔོ་དམར་བྱུང་ན་ལྷ་འཁྲུགས་ངོ། མེ་སྦར་ནས་འབར་དུ་མི་ཉན་པ་རྣམས་ནི་ཕུད་ཉམས་ལྷག་ཤོར་སེར་སྣ་ཤོར་བ་སོགས་ཀྱི་རྟགས་སུ་བཤད། དུ་བ་ལེགས་པར་འཐུལ་ཞིང་འབར་སྐྱེན་ན་རླུང་རྟ་དར། དོན་གྲུབ་པ་ལ་ཚེགས་མེད། ཤིན་ཏུ་འབར་དཀའ་ན་དོན་མི་འགྲུབ་སོགས་བརྟགས་སྲོལ་ཡོད་པ་ཡིན། ལྷ་བསང་གཏོང་བའི་གཟའ་སྐར་ཡང་གཟའ་དར་བ་བཀྲ་ཤིས་པའི་ཉི་མ་དང་འགྲུབ་པའི་སྦྱོར་བ་དང་། སྡེ་བརྒྱད་ཐེབས་ཡོད་ན་བཟང་། དམིགས་བསལ་ཉི་མ་ནག་པོར་བསང་བྱས་ན། །ལྷ་འདྲེ་ཐམས་ཅད་འཁྲུགས་པའི་གཞི། སྟག་གི་ཉི་མར་བསང་བྱས་ན། །ཁྲོས་ནས་ན་ཤི་དུར་གསུམ་འོང་། སྡེ་བརྒྱད་ལྡོག་ན་ཕན་གནོད་མེད། བསང་གཏོང་དུ་མི་རུང་བ་དུད་མེ་སོལ་གསུམ་ཡིན། ཞེས་སོགས་ལེགས་ཉེས་བརྟགས་པའི་སྲོལ་ཡོད། བསང་མཆོད་སྐབས་ཀྱི་དམིགས་པ་དང་དེའི་ཕན་ཕོན་ནི། བསང་དུད་ཀྱི་ཀློང་ནས་བསང་གི་ལྷ་མོ་སྔོན་མོ་གཡས་བདུད་རྩིའི་བུམ་པ་དང་། གཡོན་སྨན་གྱི་གཞོང་པ་འཛིན་པ་དཔག་ཏུ་མེད་པ་འཕྲོས་ཤིང་ཕྱག་གི་བུམ་པ་ནས་བདུད་རྩིའི་ཆབ་རྒྱུན་གཏོར་ཏེ། མི་གཙང་བ་ཐམས་ཅད་བསངས་ཤིང་དག སྨན་གཞོང་ནས་མཆོད་པའི་སྤྲིན་ཕུང་གི་དྲི་བཟང་ཕྱོགས་ཐམས་ཅད་དུ་ཁྱབ། མཆོད་རྫས་ཡོ་བྱད་འདོད་ཡོན་སྤྱན་གཟིགས་སྣ་ཚོགས་པས་ས་དང་བར་སྣང་ནམ་མཁའི་ཁམས་ཐམས་ཅད་གང་བ་མགྲོན་རིགས་སོ་སོར་གང་ལ་གང་འདོད་དུ་དམིགས་ཏེ་ཕུལ་བས་དཀོན་མཆོག་སྲིད་ཞིའི་མགྲོན་ཀྱི་ཐུགས་དམ་བསྐང་། མགོན་པོ་ཡོན་ཏན་མགྲོན་རྣམས་དགྱེས་པ་བསྐྱེད། བགེགས་རིགས་ལན་ཆགས་མགྲོན་རྣམས་ངོམས་ཤིང་ཚིམ། རིགས་དྲུག་སྙིང་རྗེའི་མགྲོན་གྱི་སྡུག་བསྔལ་ཞི་བར་བྱེད་པ་སོགས་མདོར་ན་ཚོགས་གསོག་སྒྲིབ་སྦྱང་མཆོག་ཐུན་གྱི་དངོས་གྲུབ་འཐོབ་པར་བྱེད་པའམ་མཆོད་སྦྱིན་གྱི་ཆོ་ག་ཁྱད་པར་བ་ཞིག་ཡིན་ནོ།། ས་ཕག་བོད་ཟླ་ལྔ་པའི་ཡར་ཚེས་བཅུའི་ཉིན་གཡུ་ཁོག་ཡི་དམ་རྡོ་རྗེས་བྲིས།