བཅུ་གཅིག་པ་ཡེ་ཤེས་དེས་འཁྲུལ་བ་གཟིགས་ན་ཆོས་ཉིད་མི་གཟིགས་པར་ཐལ་བ།
བཅུ་གཅིག་པ་ཡེ་ཤེས་དེས་འཁྲུལ་བ་གཟིགས་ན་ཆོས་ཉིད་མི་གཟིགས་པར་ཐལ་བ་ནི།
ཡང་དེ་ཉིད་དུ་གང་ཞིག་གཤིས་ལ་ཡོད་པ་དོན་དམ་མི་མཐོང་བར་གཤིས་ལ་མེད་པ་ཀུན་རྫོབ་མཐོང་བ། །འདི་འདྲའི་མུན་ནག་རྣམ་པ་དེ་གང་ཞིག་ཡིན་ཏེ་མུན་པས་ནི་ཡོད་པ་མི་མཐོང་བར་བྱེད་ཀྱང་མེད་པ་མཐོང་བར་མི་བྱེད་པས་སོ་ཅེས་དང༌། འགྲོ་བ་དག་ན་ཆོས་ཉིད་ངོ་བོ་ཉིད་སྐུ་དེ་ལས་གཞན་ཡང་ཅུང་ཟད་གཤིས་ལ་ཡོད་མིན་ལ། །འགྲོ་བ་མ་ལུས་པ་ཡང་དེ་ལ་ཀུན་ཏུ་རྨོངས་པའི་བློས། །གཤིས་ལ་ཡོད་པ་དང་ཀུན་ནས་སྤངས་ཏེ་གཤིས་ལ་མེད་པ་ཀུན་རྫོབ་ལ་མངོན་ཞེན་གང་ཡིན་པ། །འཇིག་རྟེན་རྨོངས་པའི་རྣམ་པ་ཚབས་ཆེན་འདི་ཀོ་ཇི་ལྟ་བུ། ཞེས་དོན་ལ་ཡོད་པའི་ཆོས་ཉིད་མི་མཐོང་བར། མེད་པའི་ཆོས་ཁམས་གསུམ་པ་མཐོང་བའི་རྣམ་ཤེས་ནི་མུན་པ་ལྟ་བུ་དང་རྨོངས་ཚབས་ཆེན་པོར་གསུངས་པའི་ཕྱིར། དེ་འགགས་པའི་སངས་རྒྱས་ལ་དེའི་སྣང་བ་ཡང་འགགས་པ་ཉིད་དུ་གྲུབ་པོ། །སངས་རྒྱས་ཕལ་པོ་ཆེར་ཡང་རྣམ་པར་རྟོག་ལ་སྤྱོད་པ་ཡི། །མིག་ནི་ཤིན་ཏུ་འཁྲུལ་བ་ཡིན། །འཁྲུལ་པས་མཐོང་བ་ལོག་པ་སྟེ། །སངས་རྒྱས་ལ་ནི་ལོག་མི་མངའ།།ཞེས་འཁྲུལ་སྣང་ཁམས་གསུམ་པ་འདི་སྣང་མི་སྣང་ལ་ལོག་མ་ལོག་ཏུ་གསུངས་ལ་ཆོས་ཀྱི་དབྱིངས་ལ་བསྟོད་པར་ཡང༌། ཡུལ་དྲུག་སྣང་བ་མེད་པར་ནི། །ཡང་དག་ཇི་བཞིན་རིག་གྱུར་པའོ། །ཞེས་ཡང་དག་པའི་མཐའ་མངོན་སུམ་གྱིས་རིག་པའི་ཡེ་ཤེས་ལ་ཀུན་རྫོབ་ཀྱི་ཡུལ་དྲུག་སྣང་བ་མེད་པར་གསུངས་ཤིང༌། སློབ་དཔོན་ཀ་མ་ལ་ཤྭི་ལས་དབུ་མ་དེ་ཁོ་ན་ཉིད་སྣང་བར་ཡང༌། ཡེ་ཤེས་སྣང་བ་བྱུང་བ་ན། མུན་པ་བཞིན་དུ་འཁྲུལ་པ་དེ་སྤོང་ངོ༌། །ཞེས་དང༌། འཁྲུལ་སྣང་མ་སྤངས་ན་ཕྱིན་ཅི་ལོག་གྱུར་ཅིང༌། །སྤངས་པས་རྣལ་འབྱོར་ཅན་དུ་འགྱུར། ཞེས་དང་རྨོངས་བྱེད་སྒྱུ་མའི་མཁན་པོ་འདྲ། །ཞེས་པ་ལ་སོགས་པས། རྨོངས་པ་དག་པས་ཡེ་ཤེས་ལ་ཁམས་གསུམ་པ་ཕྱིན་ཅི་ལོག་གི་ཆོས་མུན་པ་ལྟ་བུ་འདི་མི་སྣང་བར་གསུངས་སོ། །