གཉིས་པ་སོ་སོའི་ཡོན་ཏན།
གཉིས་པ་སོ་སོའི་ཡོན་ཏན་ནི།
ས་དང་པོའི་རྗེས་ཐོབ་ཏུ་ཡོན་ཏན་བརྒྱ་ཕྲག་བཅུ་གཉིས་ཐོབ་སྟེ། ༡སྐད་ཅིག་གཅིག་གིས་ཏིང་ངེ་འཛིན་བརྒྱ་སོ་སོར་ཐོབ་ཅིང་སྙོམས་པར་འཇུག་གོ ། ༢ དེ་བཞིན་དུ་སངས་རྒྱས་བརྒྱ་མཐོང་བ།༣ དེ་རྣམས་ཀྱིས་བྱིན་གྱིས་བརླབས་པ་ཤེས་པ། ༤ འཇིག་རྟེན་གྱི་ཁམས་བརྒྱ་གཡོ་བར་བྱེད་པ། ༥སྣང་བར་ཡང་བྱེད་པ།༦ ཞིང་བརྒྱར་འགྲོ་བ། ༧ སེམས་ཅན་བརྒྱ་ཡོངས་སུ་སྨིན་པར་བྱེད་པ། ༨བསྐལ་བ་བརྒྱར་གནས་པ། ༩ སྔོན་དང་ཕྱི་མའི་མཐར་འཇུག་པ། ༡༠ ཆོས་ཀྱི་སྒོ་བརྒྱ་རྣམ་པར་འབྱེད་པ།༡༡ ལུས་བརྒྱ་སྟོན་པར་བྱེད་པ། ༡༢ ལུས་དང་ལུས་ལ་ཡང་བྱང་ཆུབ་སེམས་དཔའ་འཁོར་བརྒྱ་དང་ལྡན་པར་སྟོན་པར་བྱེད་པའོ། །དེ་བཞིན་དུ་བསྒྲེས་ཏེ། ས་གཉིས་པ་སོགས་ལ་ཡོན་ཏན་སྟོང་ཕྲག་བཅུ་གཉིས་དང༌། ས་གསུམ་པར་འབུམ་ཕྲག་བཅུ་གཉིས། ས་བཞི་བར་བྱེ་བ་བརྒྱ་དང༌། ས་ལྔ་བར་བྱེ་བ་སྟོང་དང༌། ས་དྲུག་པར་བྱེ་བ་འབུམ། ས་བདུན་པར་བྱེ་བ་ཁྲག་ཁྲིག་འབུམ་དང༌། ས་བརྒྱད་པར་སྟོང་གསུམ་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་དང༌། ས་དགུ་པར་སྟོང་གསུམ་གྱི་འཇིག་རྟེན་གྱི་ཁམས་གྲངས་མེད་འབུམ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དང༌། ས་བཅུ་བར་ཕྱོགས་བཅུའི་སངས་རྒྱས་ཀྱི་ཞིང་གྲངས་མེད་པ་ལས་འདས་པའི་རྡུལ་ཕྲ་མོ་ཇི་སྙེད་པ་དེ་སྙེད་ཀྱི་ཡོན་ཏན་ཐོབ་པ་ཡིན་ནོ། །གཉིས་པ་རྟགས་ལ་ཞུགས་པ་དང༌། རྨི་ལམ་གྱི་རྟགས་གཉིས་ལས། དང་པོ་ནི། རྒྱན་ལས། སྣང་དང་བཅས་དང་མོས་པ་དང༌། །མ་ཞུམ་པ་དང་མི་དམན་ཉིད། །གཞན་དྲིང་མི་འཇོག་བདག་ཉིད་དང༌། །ཐམས་ཅད་རབ་ཏུ་རྟོགས་པ་དང༌། །ཀུན་ལ་སེམས་ནི་མཉམ་པ་དང༌། །བཀྲི་དང་རྗེས་སུ་ཆགས་མེད་དང༌། །ཐབས་ཤེས་འཁོར་དུ་སྐྱེ་བ་ནི། །ཀུན་ལ་རྟགས་སུ་འདོད་པ་ཡིན། །ཞེས་ས་གང་ལ་ཞུགས་པ་དེའི་བླང་དོར་དང་ཡོན་ཏན་རྣམས་གསལ་བར་ཤེས་ཤིང་སྣང་བ་དང་བཅས་པ་དང༌། གང་ལ་མ་ཞུགས་པ་དེ་ལ་ཐོབ་པར་འདོད་པའི་མོས་པ་དང་དད་པ་སྐྱེ་བ་དག་ནི་རྟགས་གཅིག་དང༌། ཐེག་པ་ཆེན་པོའི་ཆོས་ཟབ་ཅིང་རྒྱ་ཆེ་བ་དམ་པ་རྣམས་ལ་མི་སྐྲག་ཅིང་མ་ཞུམ་པ་དང༌། གཞན་དོན་དུ་ལུས་གཏོང་བ་ལ་སོགས་པའི་དཀའ་སྤྱད་རྒྱ་ཆེན་པོ་ལ་མི་དམན་པ་ཉིད་དང༌། རང་གིས་གང་ཐོབ་པའི་ས་དེ་ལ་སུ་ལའང་ལྟོས་པ་མེད་པས་གཞན་གྱི་དྲིང་ལ་མི་འཇོག་པའི་བདག་ཉིད་དང༌། ས་གང་ཐོབ་པར་བྱ་བ་དེ་མངོན་པར་སྒྲུབ་པར་བྱེད་པའི་ཐབས་ལ་ས་ཐམས་ཅད་རབ་ཏུ་རྟོགས་པ་དང༌། ཆོས་ཀྱི་དབྱིངས་ཀུན་ཏུ་འགྲོ་བ་རྟོགས་པས་བདག་དང་སེམས་ཅན་ཀུན་ལ་སེམས་ནི་མཉམ་པ་ཉིད་ཐོབ་པ་དང༌། ལམ་གཞན་ལ་ཞུགས་ན་བདེ་བ་དང་ཐེག་ཆེན་ལ་ཞུགས་ན་སྡུག་བསྔལ་བའོ་ཞེས་པ་ལ་སོགས་པའི་སྙན་པ་དང་མི་སྙན་པ་བརྗོད་པས་ལམ་གཞན་དུ་བཀྲི་བར་མི་ནུས་པ་དང༌། ཟག་པ་མེད་པའི་འབྱོར་པ་ཕུན་སུམ་ཚོགས་པ་དང་ལྡན་པས་ཚངས་པ་དང་བརྒྱ་བྱིན་དང་འཁོར་ལོས་བསྒྱུར་བ་ལ་སོགས་པའི་འབྱོར་པ་ལ་རྗེས་སུ་ཆགས་པ་མེད་པ་དང༌། འཁོར་གསུམ་དུ་རྣམ་པར་མི་རྟོག་པའི་ཡེ་ཤེས་དང་ལྡན་པས་སངས་རྒྱས་ཉིད་འགྲུབ་པའི་ཐབས་ཤེས་ཤིང་མཁས་པ་དང༌། དུས་རྟག་ཏུ་སངས་རྒྱས་བཞུགས་པའི་འཁོར་གྱི་དཀྱིལ་འཁོར་དུ་སྐྱེ་བ་སྟེ་བཅུ་པོ་འདི་རྣམས་ནི་བྱང་ཆུབ་སེམས་དཔའ་ས་རྣམས་ཀུན་ལ་ཞུགས་པའི་ཐུན་མོང་གི་རྟགས་སུ་འདོད་པ་ཡིན་ནོ། །