ལྔ་པ་མི་སློབ་ལམ།

ལྔ་པ་མི་སློབ་ལམ་ནི།

ཚིགས་བཅད་བཅུ་པའི་འགྲེལ་པ་ཟིན་བྲིས་ལས། མི་སློབ་ལམ་བཤད་པ་ནི། དེ་ལས་འབྲས་ཞེས་པས་བསྟན་ཏེ། ལམ་བཏགས་པ་བ་དང༌། འབྲས་བུ་མཚན་ཉིད་པ་ཡིན་ལ། དེ་ཡང་སྒོམ་ལམ་གྱི་འཕགས་པའི་ས་བཅུའི་མཐར་སངས་རྒྱས་ལོངས་སྐུ་རྣམས་ཀྱིས་འོད་ཟེར་ཆེན་པོའི་དབང་བསྐུར་ནས་ས་བཅུ་རྒྱུན་མཐའི་སྐད་ཅིག་མ་གཉིས་པ་ལ། གཉིས་སུ་མེད་པའི་ཡེ་ཤེས་ཀྱི་སྐུ་ཟུང་འཇུག་རྡོ་རྗེ་འཆང་ཆེན་པོ་ཐོབ་པ་ཡིན་པས། འབྲས་བུ་མཐར་ཐུག་པ་ཡིན་ནོ། །ཞེས་གསུངས་པ་ལྟར་རོ། །ལུས་དབེན་སོགས་རིམ་ལྔ་སྔགས་ཀྱི་ལམ་ལྔའི་ས་མཚམས་དང་སྦྱོར་ཚུལ་ནི། རིམ་ལྔའི་འགྲེལ་ཆེན་རྡོ་རྗེ་འཆང་གི་དགོངས་པ་ལས། འདི་དག་གསང་སྔགས་རང་ལམ་གྱི་ས་མཚམས་དང་སྦྱོར་ཚུལ་ཇི་ལྟར་ཡིན་སྙམ་ན།བསྐྱེད་རིམ་རགས་པ་ལ་བརྟན་པ་ཐོབ་ན་ཚོགས་ལམ་ཆུང་ངུ་རྫོགས། ཕྲ་བ་ལ་བརྟན་པ་ཐོབ་ན་འབྲིང་བོ་རྫོགས། ལུས་དབེན་ངག་དབེན་གྱིས་ཚོགས་ལམ་ཆེན་པོ་རྫོགས་ཟིན་ནས། སེམས་དབེན་གྱི་ས་གསུམ་པོ་སྦྱོར་ལམ་དྲོད་ཆེ་འབྲིང་ཆུང་གསུམ་དང༌། སྒྱུ་ལུས་ཀྱི་རིམ་པའི་འགོ་གཞུག་ལ་རང་བཞིན་གྱི་རྣམ་རྟོག་རགས་པ་ཚན་གསུམ་འགག་ཚུལ་ལ་རྩེ་མོ་གསུམ་སྟེ། ཞེ་སྡང་གི་རྟོག་པར་རགས་པ་ཙམ་འགགས་པའི་གནས་སྐབས་ནི་རྩེ་མོ་ཆུང་ངུ་དང༌། དེའི་སྟེང་དུ་འདོད་ཆགས་ཀྱི་རྣམ་རྟོག་རགས་པ་འགགས་པ་ནི་རྩེ་མོ་འབྲིང་དང༌། དེ་སྟེང་གཏི་མུག་གི་རྣམ་རྟོག་རགས་པ་ཡང་འགགས་པ་ནི་རྩེ་མོ་ཆེན་པོའོ། །དེ་ནས་འོད་གསལ་གྱི་རིམ་པ་ལ་སློབ་བཞིན་པའི་སྐབས་སུ་རྣམ་རྟོག་གསུམ་པོ་དེའི་རིགས་ཀྱི་རྟོག་པ་ཕྲ་མོ་རྣམས་རིམ་ཅན་དུ་འགགས་པའི་གནས་སྐབས་གསུམ་ནི་བཟོད་པ་ཆེ་འབྲིང་ཆུང་གསུམ་མོ། །འདིར་རྣམ་རྟོག་རགས་པ་དང་ཕྲ་བ་འགགས་ཞེས་པ་འདི་རྣམས་ཐུན་རེ་ལ་འགགས་པས་གོ་མི་ཆོད་ཀྱི། གང་ཟག་དེའི་རྒྱུད་ལ་མངོན་གྱུར་བ་གཏན་ནས་མི་སྐྱེ་བའི་གནས་སྐབས་ཐོབ་པའོ། །མངོན་པར་བྱང་ཆུབ་པའི་དུས་ཀྱི་སྣང་བ་གསུམ་པོ་ནི་ཆོས་མཆོག་ཆེ་འབྲིང་ཆུང་གསུམ་ཡིན་ལ། དོན་གྱི་འོད་གསལ་ཐོག་མར་ཐོབ་པའི་སྐབས་དེ་ནི་མཐོང་ལམ་ཡིན་ནོ། །ཟུང་འཇུག་གི་རིམ་པ་རྒྱུད་ལ་སྐྱེས་པ་ཕན་ཆད་ནི། སྒོམ་ལམ་སྟེ་འདི་ལ་འཕགས་པའི་ས་བཅུར་དབྱེ་བར་བྱ་བ་ཡིན་ནོ། །ཞེས་གསུངས་པ་ལྟར་རོ། །སོར་སྡུད་སོགས་སྔགས་ཀྱི་ལམ་གྱི་ས་མཚམས་དང་སྦྱར་ཚུལ་ནི། སྦྱོར་དྲུག་སྤྱི་དོན་ལས། རང་ལུགས་ལ་ཏིང་ངེ་འཛིན་གྱི་ས་དང་པོ་མོས་སྤྱོད་ཀྱི་ས་དང་གཉིས་པ་ནས་བཅུ་གཅིག་པའི་བར་སློབ་པ་འཕགས་པའི་ས་དང༌། བཅུ་གཉིས་པ་སངས་རྒྱས་ཀྱི་ས་མ་ཡིན་ཏེ། རང་ལུགས་ལ་ཏིང་ངེ་འཛིན་གྱི་ས་དང་པོ་ནས་བཅུ་གཅིག་པའི་ཐ་མའི་བར་སྦྱོར་ལམ་བཟོད་པ་དང༌། ཆོས་མཆོག་གི་ལམ་གྱི་རིམ་པ་ཡིན་པས་སོ་སྐྱེའི་ས་དང༌། བཅུ་གཉིས་པའི་ཐ་མ་དེ་མཐོང་ལམ་དང༌། དེའི་རྒྱུན་ལ་འཕགས་པའི་ས་བཅུ་ཡོད་པའི་ཕྱིར། དེར་ཐལ། རང་ལུགས་ལ་རྡོ་རྗེའི་རྣལ་འབྱོར་དྲུག་གིས་ལམ་ཇི་ལྟར་བགྲོད་པའི་རིམ་པ་ནི། ཀུན་རྫོབ་སེམས་བསྐྱེད་མཚན་ཉིད་པ་རྒྱུད་ལ་སྐྱེས་པ་གཞིར་བཞག་པའི་སྟེང་དུ་སོར་སྡུད་གྲུབ་ནས་རྟགས་བཅུ་འཆར་བའི་མགོར་སླེབས་པ་ནས་སྔགས་བླ་མེད་ཀྱི་ཚོགས་ལམ་ཆུང་ངུ་ཐོབ་ཅིང་རྟགས་བཅུ་ག་ཤར་བ་ན་ཚོགས་ལམ་ཆུང་ངུ་མཐར་ཕྱིན།དེ་ནས་ཐིག་ལེའི་ནང་དུ་སྣ་ཚོགས་གཟུགས་བརྙན་ཤར་བ་ན་ཚོགས་ལམ་འབྲིང་པོ་དང༌། དེ་ནས་བསྐྱེད་རིམ་སྔོན་སོང་ཡིན་ན་བསམ་གཏན་གྱི་ཡན་ལག་ཐོབ་པ་ན་ཚོགས་ལམ་ཆེན་པོར་སླེབས་ཏེ། བསམ་གཏན་མཐར་ཕྱིན་པ་ན་སྦྱོར་ལམ་དྲོད་དུ་སླེབ། བསྐྱེད་རིམ་སྔོན་དུ་མ་སོང་ན་བསམ་གཏན་མཐར་ཕྱིན་པ་ན་ཚོགས་ལམ་ཆེན་པོར་སླེབ། དེ་ནས་སྲོག་རྩོལ་གྱིས་རླུང་བཅུ་ཅི་རིགས་དབུ་མར་བཅིངས་པ་ན་དྲོད་ཆུང་ངུ་དང་རླུང་བཅུ་ག་དབུ་མར་བཅིངས་ཟིན་པ་ན་བསྐྱེད་རིམ་སྔོན་དུ་སོང་མ་སོང་གང་ཡིན་ཀྱང་སྦྱོར་ལམ་དྲོད་འབྲིང་དུ་སླེབ། དེ་ནས་འཛིན་པས་ལས་རླུང་དབུ་མའི་ཐིག་ལེར་བཅིངས་ཏེ་གཏུམ་མོའི་འབར་སྣང་སྟོང་གཟུགས་སུ་གྱུར་པ་ན་དྲོད་ཆེན་པོ་ཐོབ་སྟེ། འཛིན་པ་མཐར་ཕྱིན་པ་ན་སྦྱོར་ལམ་རྩེ་མོ་ཐོབ། རྗེས་དྲན་གྱི་རང་ལུས་འདོད་ལྷར་མཐོང་བ་ན་རྩེ་མོ་འབྲིང་པོར་ཕྱིན་ཏེ། རྗེས་དྲན་མཐར་ཕྱིན་པ་ན་རྩེ་མོ་ཆེན་པོ་འགྱུར། དེ་ནས་ཏིང་ངེ་འཛིན་སྐད་ཅིག་དང་པོ་ཐོབ་པ་ན་སྔགས་བླ་མེད་ཀྱི་སྦྱོར་ལམ་བཟོད་པར་འཕོས་ཏེ། བྱང་སེམས་ཀྱི་ཆ་ཤས་དང་པོ་ནས་རིམ་གྱིས་འགག་ཅིང༌། མི་འགྱུར་བའི་བདེ་བའི་ཆ་ཤས་དང་པོ་སོགས་རིམ་གྱིས་ཐོབ་སྟེ་ཐེག་ལེའི་ཆ་ཤས་སྟོང་དང་བརྒྱད་བརྒྱ་འགགས། མི་འགྱུར་བའི་བདེ་བའི་ཆ་ཤས་སྟོང་བརྒྱད་བརྒྱའི་ཆ་ཐོབ་པ་ན་མི་འགྱུར་བའི་ཐིག་ལེས་གསང་བའི་འཁོར་ལོའི་ཕྱེད་གང༌། ཏིང་ངེ་འཛིན་གྱི་ས་དང་པོ་ཐོབ། དེ་ནས་ཐིག་ལེའི་ཆ་སྟོང་བརྒྱད་བརྒྱ་རེ་འགག་པ་དང༌། མི་འགྱུར་བའི་བདེ་བའི་ཆ་ཤས་སྟོང་བརྒྱད་བརྒྱ་རེ་ཐོབ་པས་འཁོར་ལོ་རེ་རེའི་ཕྱེད་རེ་རེ་གང་བས་ས་རེ་རེ་ཐོབ་པའི་ཚུལ་ས་འོག་མ་ཐམས་ཅད་ལ་སྦྱར་ཏེ། གསང་བའི་འཁོར་ལོའི་ཕྱེད་ཕྱི་མ་གང་བས་ས་གཉིས་པ་དང༌། ལྟེ་བའི་འཁོར་ལོའི་ཕྱེད་གང་བས་ས་གསུམ་པ་དང༌། ལྟེ་བའི་ཕྱེད་ཕྱི་མ་གང་བས་ས་བཞི་པ་དང༌། སྙིང་གའི་ཕྱེད་གང་བས་ས་ལྔ་པ་དང༌། སྙིང་གའི་ཕྱེད་ཕྱི་མ་གང་བས་ས་དྲུག་པ་དང༌། མགྲིན་པའི་ཕྱེད་གང་བས་ས་བདུན་པ་དང༌། མགྲིན་པའི་ཕྱེད་ཕྱི་མ་གང་བས་ས་བརྒྱད་པ་དང༌། དཔྲལ་བའི་ཕྱེད་གང་བས་ས་དགུ་པ་དང༌། དཔྲལ་བའི་ཕྱེད་ཕྱི་མ་གང་བས་ས་བཅུ་པ་དང༌། གཙུག་ཏོར་གྱི་ཕྱེད་གང་བས་ས་བཅུ་གཅིག་པ་ཐོབ་པ་ན་སྔགས་བླ་མེད་ཀྱི་སྦྱོར་ལམ་བཟོད་པ་མཐར་ཕྱིན་ཏེ། གཙུག་ཏོར་གྱི་ཕྱེད་ཕྱི་མ་གང་བྱེད་ཀྱི་མི་འགྱུར་བའི་ཐིག་ལེའི་ཆ་ཤས་སྟོང་བརྒྱད་བརྒྱའི་ནང་གི་ཆ་ཤས་དང་པོ་ཐོབ་པ་ན་བླ་མེད་ཀྱི་སྦྱོར་ལམ་ཆོས་མཆོག་ཏུ་འཕོས་ཏེ། དེ་ནས་མི་འགྱུར་བའི་བདེ་བའི་ཆ་ཤས་སྟོང་དང་བདུན་བརྒྱ་གོ་དགུའི་བར་ནི་སྦྱོར་ལམ་ཆོས་མཆོག་གི་སྐབས་ཡིན་ཞིང་དེའི་མི་འགྱུར་བའི་བདེ་བའི་སྐད་ཅིག་ཐ་མ་ཐོབ་པ་དང༌། སྔགས་བླ་མེད་ཀྱི་ས་དང་པོ་མཐོང་ལམ་ཐོབ་པ་དུས་མཉམ་ཡིན་པས་ཏིང་ངེ་འཛིན་གྱི་ས་བཅུ་གཉིས་པའི་ཐ་མ་ཐོབ་པ་དེ་སྔགས་བླ་མེད་ཀྱི་མཐོང་ལམ་བར་ཆད་མེད་ལམ་ཡིན་ལ། མཐོང་ལམ་བར་ཆད་མེད་ལམ་གྱིས་ཉོན་སྒྲིབ་དང་གནས་སྐབས་བཞིའི་བག་ཆགས་ལ་ཕྲ་རགས་གཉིས་ཡོད་པའི་བག་ཆགས་རགས་པ་འཁོར་བའི་ལུས་ངག་ཡིད་གསུམ་ཡེ་ཤེས་བཞི་དང་རྟེན་འབྲེལ་ཡན་ལག་བཅུ་གཉིས་བསྐྱེད་ནུས་ཀྱི་བག་ཆགས་རྣམས་སྤངས་པའི་རྣམ་གྲོལ་ལམ་ཐོབ་པ་ན་འཕགས་པའི་ས་གཉིས་པ་སྒོམ་ལམ་ཐོབ་ཅིང་སྐབས་འདིར་གཙོ་བོར་སྟོང་གཟུགས་ཀྱི་སྐུ་ལ་ལྡང་བ་ཡིན་པས་དེ་དུས་སུ་ཟུང་འཇུག་གི་སྐུ་གསར་དུ་ཐོབ་པར་བཤད་པའང་ཡོད་ལ། དེ་ནས་ཏིང་ངེ་འཛིན་གྱི་ས་བཅུ་གཉིས་པ་དེའི་རྒྱུན་ཕྱི་མ་རྣམས་གྱིས་རིམ་བཞིན་གནས་སྐབས་བཞིའི་བག་ཆགས་ཤིན་ཏུ་ཕྲ་བ་ཤེས་བྱ་ཐམས་ཅད་མཁྱེན་པ་ལ་གེགས་བྱེད་པའི་ཤེས་སྒྲིབ་ལ་སྐོར་དགུ་ཕྱེ་བའི་སྐོར་དང་པོ་སྤངས་པ་ན་འཕགས་པའི་ས་གསུམ་པ་ཐོབ་པ་ནས་སྐོར་ཐ་མ་སྤངས་པ་ན་མཐར་ཐུག་གི་ཟུང་འཇུག་སངས་རྒྱས་རྡོ་རྗེ་འཆང་ཆེན་པོ་ཐོབ་པ་ཡིན་པའི་ཕྱིར་ཏེ། རྗེ་བཙུན་རིན་པོ་ཆེའི་དགོངས་པས་མདོ་སྔགས་གང་གི་ཡང་ཐེག་ཆེན་གྱི་ས་དང་པོ་ཐོབ་ཕན་ཆད་ནས་རྣམ་སྨིན་གྱི་ལུས་སྤངས་ཏེ་ཡིད་ལུས་ཐོབ་པར་བཅོམ་ལྡན་འདས་ཀྱི་ཞལ་ནས་གསུངས་ཀྱང་ཏིང་ངེ་འཛིན་གྱི་ས་བཅུ་གཅིག་པ་ཚུན་ཆད་དུ་རྣམ་སྨིན་གྱི་ལུས་མ་སྤངས་ཤིང༌། རྣམ་སྨིན་གྱི་ལུས་བླངས་པའི་སྐབས་ཡིན་པའི་ཕྱིར་ན་དེ་དག་འཕགས་པའི་ས་མ་ཡིན་ཞིང༌། ཏིང་ངེ་འཛིན་གྱི་ས་བཅུ་གཅིག་པ་འཕགས་པའི་ས་བཅུ་པ་ཡིན་ན་འཕགས་པའི་ས་བཅུ་པའི་ཡོན་ཏན་གཞལ་དུ་མེད་པར་གསུངས་ཤིང༌། ཏིང་ངེ་འཛིན་གྱི་ས་བཅུ་གཅིག་པའི་ཡོན་ཏན་ལ་སྟོང་གསུམ་གྱི་འཇིག་རྟེན་གྱི་ཁམས་སྟོང་དང་ཉེར་བཞི་ཙམ་མཐོང་བར་བཤད་ཕྱིར་དེའི་ཡོན་ཏན་ལ་གཞལ་དུ་ཡོད་པས་དེ་གཉིས་འགལ་བར་འགྱུར་བས་ན་ཏིང་ངེ་འཛིན་གྱི་ས་བཅུ་གཅིག་པ་མན་ཆད་འཕགས་པའི་ས་མ་ཡིན་པ་དང༌། དེས་ན་ཏིང་ངེ་འཛིན་གྱི་ས་བཅུ་གཉིས་ཀྱི་ཐ་མའི་མཐར་མི་འགྱུར་བའི་བདེ་བའི་ཆ་ཤས་ཐམས་ཅད་རྫོགས་པའི་ཡེ་ཤེས་དེ་དང་ངོ་བོ་དབྱེར་མེད་པའི་ཡེ་ཤེས་ཀྱི་སྐུ་ཐོབ་པ་དེ་མཐར་ཐུག་གི་སངས་རྒྱས་ཀྱི་སྐུ་མ་ཡིན་པར་སངས་རྒྱས་ཆུང་ངུ་ཞེས་བྱ་བ་དེ་ཡིན་ཞིང་རྟེན་དེ་ལ་འཕགས་པའི་ས་བཅུ་སླར་ཡང་བགྲོད་དེ་འཚང་རྒྱ་དགོས་པའི་ཕྱིར། རྗེ་བཙུན་རིན་པོའི་ཆེས་ཟུང་འཇུག་ཏུ། ཏིང་ངེ་འཛིན་གྱི་སྐད་ཅིག་དང་པོ་ཐོབ་པ་ནས་བརྩམས་ཏེ་ལོ་གསུམ་དང་ཕྱོགས་གསུམ་དུ་བརྩོན་པར་སྒོམ་ན་ཏིང་ངེ་འཛིན་གྱི་ས་ཐ་མའི་མཐར་ཡེ་ཤེས་ཀྱི་སྐུའམ་ཟུང་འཇུག་གི་སྐུ་ཐོབ་པར་གྲགས་པ་ནི་སངས་རྒྱས་ཀྱི་ས་ཆུང་ངུ་དང་རྡོ་རྗེ་འཛིན་པའི་ས་ཐོག་མར་ཐོབ་པ་ཡིན་ནོ། །ཏིང་ངེ་འཛིན་གྱི་ས་བཅུ་གཉིས་པ་རྫོགས་པར་མ་ཐོབ་པ་ལ་ཡེ་ཤེས་ཀྱི་སྐུ་མ་ཐོབ་པར་བཤད་པས། ཏིང་ངེ་འཛིན་གྱི་ས་རྣམས་ནི་འཕགས་ས་མ་ཡིན་ཏེ། འཕགས་པའི་ས་དང་པོ་ཐོབ་ན་ཡིད་ཀྱི་རང་བཞིན་གྱི་ལུས་ངེས་པར་ཐོབ་པར་དཔལ་གྱི་མགུར་ནས་གསུངས་པའི་ཕྱིར་རོ། །གཞན་ཡང་འཕགས་པའི་ས་བཅུ་པའི་ཡོན་ཏན་གཞལ་དུ་མེད་པར་གསུངས་ན། བཅུ་གཅིག་པའི་ཡོན་ཏན་གཞལ་དུ་ཡོད་པ་དང་ཡང་འགལ་བའི་ཕྱིར་རོ། །འདི་དག་ནི་སྦྱོར་ལམ་གྱི་ནང་ཚན་ཞིག་ལས་ཕྱེ་བའི་ས་ཁོ་ནའོ། །ཞེས་དང༌། ཏིང་ངེ་འཛིན་ནི་བཟོད་པ་དང་ཆོས་མཆོག་སྟེ། ཞེས་དང༌། ཏིང་ངེ་འཛིན་གྱི་སྐད་ཅིག་ཐ་མ་ནི་མཐོང་ལམ་ཡིན་པས། ཞེས་དང་དབང་མདོར་གྱི་ཊཱི་ཀར་ཡང༌། ཏིང་ངེ་འཛིན་གྱི་མཐར་སྐུ་དང༌། གསུང་དང༌། ཐུགས་དང༌། ཡེ་ཤེས་གཅིག་ཏུ་འདུས་པའི་ཟུང་འཇུག་གི་སྐུ་ཐོབ་པ་ནས་བཟུང་ནས་རེ་ཞིག་སྒྲུབ་པ་ཞེས་མི་བྱ་སྟེ། སྐབས་འདིར་གྲུབ་པའི་གནས་སྐབས་སུ་འཇོག་དགོས་པ་ཡིན་པའི་ཕྱིར་རོ། །གྲུབ་པ་དེ་ཡང་གནས་སྐབས་ལ་ལྟོས་པའི་དབང་དུ་བྱས་པ་སྟེ། མི་སློབ་པ་སངས་རྒྱས་ཀྱི་ས་ལ་ལྟོས་ན་ནི། འདི་ཡང་སྒྲུབ་པ་ཁོ་ན་ཡིན་པར་ཤེས་པར་བྱའོ། །ཞེས་གསུངས་པའི་ཕྱིར་རོ། །གཞན་ཡང་འགྲེལ་ཆེན་ལས། སྦྱོར་བ་ཡན་ལག་དྲུག་གི་དང་པོའི་མཚན་མ་ནི་དུ་སོགས་ཀྱི་རྟགས་དང༌། བར་བའི་མཚན་མ་ནི་མི་འགྱུར་བའི་བདེ་བ་སྐད་ཅིག་དང་པོ་ཐོབ་པ་དང༌། མཆོག་མི་འགྱུར་གྱི་བདེ་བའི་སྐད་ཅིག་མ་བརྒྱ་ཕྲག་བཅོ་བརྒྱད་ཐོབ་ནས་ས་དང་པོ་ཐོབ་པ་ལ་སོགས་པ་དང༌། ཐ་མའི་མཚན་མ་ནི་མི་འགྱུར་བའི་བདེ་བའི་སྐད་ཅིག་མ་ཉི་ཁྲི་ཆིག་སྟོང་དྲུག་བརྒྱ་རྫོགས་ནས་སངས་རྒྱས་ཉིད་དང་རྡོ་རྗེ་འཆང་དང༌། ཕྱག་རྒྱ་ཆེན་པོའི་དངོས་གྲུབ་ཐོབ་པར་བཤད་པ་ཡང་སློབ་པའི་ཟུང་འཇུག་ལ་དགོངས་པ་ཡིན་པས་དེ་ལྟར་བཤད་པས་ཀྱང་ཏིང་ངེ་འཛིན་གྱི་ས་བཅུ་གཉིས་པ་མཐར་ཐུག་གི་ས་དང༌། དེར་ཐོབ་པའི་ཟུང་འཇུག་དེ་མཐར་ཐུག་གི་ཟུང་འཇུག་ཡིན་མི་དགོས་ཏེ། ཟུང་འཇུག་ཏུ་དེ་ལྟར་ན་ཏིང་ངེ་འཛིན་གྱི་སྐད་ཅིག་ཐ་མས་འཇིག་རྟེན་ལས་འདས་པ་ཕྱག་རྒྱ་ཆེན་པོ་མཆོག་གི་དངོས་གྲུབ་དངོས་སུ་ཐོབ་པ་ཡིན་ཞིང༌། དེ་སྔོན་ཆད་འཇིག་རྟེན་པ་ཡིན་པས། ཞེས་པ་ནས། ཐོག་མཐའ་བར་གསུམ་གྱི་མཚན་མའི་ནང་གི་ཐ་མའི་མཚན་མ་ཡིན་པར་གསུངས་པས་ཀྱང་འབྲས་བུའི་མཐར་ཐུག་ཏུ་མི་འགྱུར་ཏེ། ཞེས་སོགས་རྗེ་བཙུན་རིན་པོ་ཆེའི་ཏིང་ངེ་འཛིན་གྱི་ས་བཅུ་གཉིས་པོ་ཐམས་ཅད་འཕགས་ས་ལ་མ་བཤད་དོ། །འོན་ཀྱང་ཀུན་སྤངས་པ་ཐུགས་རྗེ་བརྩོན་འགྲུས་སོགས་ཀྱིས་ཏིང་ངེ་འཛིན་གྱི་ས་བཅུ་གཉིས་འཕགས་ས་ཡིན་པར་བཞེད་དེ། དེ་ཉིད་ཀྱིས་མཛད་པའི་སྦྱོར་དྲུག་གི་ས་ལམ་ལས། དེ་ནས་སྒྲུབ་པ་ཆེན་པོའི་ཡན་ལག་ཏིང་ངེ་འཛིན་གྱིས་གནས་རྡོ་རྗེ་ནོར་བུར། ལས་རླུང་ཉི་ཁྲི་ཆིག་སྟོང་དྲུག་བརྒྱའི་སྟེང་ནས་འཕོ་བ་གཅིག་གི་རླུང་སྟོང་བརྒྱད་བརྒྱ་འགགས་པས་མ་རིག་པ་འགགས་ནས། རྡོ་རྗེ་ནོར་བུར་བྱང་སེམས་ཀྱིས་གང་ཞིང་བརྟན་པ་ལས། ཕྱིར་ཆོས་ཉིད་ཀྱི་དོན་དང༌། ནང་དུ་འགྱུར་མེད་བདེ་སྟོང་གི་དོན་མངོན་སུམ་དུ་མཐོང་བས་ན་མཐོང་ལམ་མོ། །ཞེས་དང༌། ཡང་འཕོ་བ་གཉིས་པའི་རླུང་སྟོང་བརྒྱད་བརྒྱ་འགགས་པས་འདུ་བྱེད་འགགས་ནས་གསང་བའི་འཁོར་ལོར་བྱང་སེམས་བརྟན་པས་སྒོམ་ལམ་ཆུང་ངུའི་ཆུང་ངུ་བགྲོད་ནས་ས་གཉིས་པ་ཐོབ་སྟེ། ཞེས་སོགས་དང༌། འཕོ་བ་བཅུ་གཉིས་པའི་རླུང་སྟོང་བརྒྱད་བརྒྱ་འགགས་ཏེ་དེ་ལྟར་ན་ལས་ཀྱི་རླུང་ཉི་ཁྲི་ཆིག་སྟོང་དྲུག་བརྒྱའི་རྒྱུ་བ་ཐམས་ཅད་གཙུག་ཏོར་གྱི་འཁོར་ལོར་བཀག་པ་དང་རྒ་ཤི་འགགས་ཏེ། ཞེས་པ་ནས་གཙུག་ཏོར་གྱི་འཁོར་ལོའི་བར་བྱང་སེམས་བརྟན་པས་ས་བཅུ་གཉིས་པ་རྡོ་རྗེ་འཆང་གི་ས་ཚེ་འདི་ཉིད་ལ་ཐོབ་པ། ཞེས་པ་ནས། ཕུང་ཁམས་སྐྱེ་མཆེད་རྩ་སྟོང་ཕྲག་དོན་གཉིས་དང་བཅས་པ་རྣམས་མི་འགྱུར་བའི་བདེ་བས་ཟོས་པས་དེ་ཐམས་ཅད་འགྱུར་མེད་བདེ་སྟོང་གི་ངོ་བོ་རོ་གཅིག་ཏུ་གྱུར་ཏེ། སྤང་བྱ་མ་ལུས་པ་ཐམས་ཅད་སྤངས་ཤིང༌། འཐོབ་བྱ་མ་ལུས་པ་ཐམས་ཅད་ཐོབ་པ་ལུས་འདི་ཉིད་ལ་སངས་རྒྱས་ཐོབ་པའི་ཚད་དོ། །ཞེས་གསུངས་པ་སོགས་སྔོན་བྱོན་དམ་པ་མང་པོས་དེ་ལྟར་གསུངས་པ་ཡོད་དོ། །དུས་འཁོར་འགྲེལ་ཆེན་དྲི་མེད་འོད་ཀྱི་ཚིག་ཟིན་ལྟར་ན་འདི་ལྟར་འཐད་པ་ལྟ་བུར་སྣང་ན་ཡང་གཞུང་འདིར་རིམ་ལྔ་དང་སྦྱོར་དྲུག་གི་ས་མཚམས་སོགས་རྗེ་བཙུན་ཏཱ་ར་ནཱ་ཐའི་བཞེད་པ་ལྟར་བཤད་པ་ཡིན་ནོ། །དེ་དག་གི་སྐབས་སུ་ཐིག་ལེ་དང་རླུང་འགག་ཚུལ་ནི། ཚིགས་བཅད་བཅུ་པའི་ཟིན་བྲིས་ལས། ཀུནྡ་བྱང་ཆུབ་ཀྱི་སེམས་ལ་རགས་པ་ཁམས་གསུམ་གྱིས་བསྡུས་པའི་བྱང་ཆུབ་སེམས་ཀྱི་ཐིག་ལེ་དང༌། ཕྲ་བ་རྣམ་ཤེས་ཙམ་གྱི་བྱང་སེམས་ཀྱི་ཐིག་ལེ་གཉིས་ཡོད་པ་ལས། དེ་དག་འགག་ཚུལ་དྲོ་བ་ནས་ནི་ཞེས་པས། ཐིག་ལེ་རགས་པ་ནི་དྲོད་ཐོབ་ནས་འགག་པའི་འགོ་རྩོམ་པ་དང༌། ཆོས་ཀྱི་མཆོག་དང་ཞེས་པས་སྦྱོར་ལམ་ཆོས་མཆོག་ཆེན་པོ་ཐོབ་ནས། ཐིག་ལེ་ཕྲ་བ་རླུང་སེམས་ལས་གྲུབ་པ་འགག་པའི་འགོ་རྩོམ་པ་སྟེ། ཐོག་མ་ཞེས་པས་དེ་དག་ཏུ་ཐོག་མར་འགག་པ་བསྟན་ལ། དེ་བཞིན་དུ་ཐ་མ་ནི་ས་བཅུའི་མཐའ་མར་རི་བོང་ཅན་ཏེ་བྱང་ཆུབ་ཀྱི་སེམས་ཕྲ་བ་ཡང་རྩ་བ་ནས་འགག་གོ་ཞེས་པའོ། །ཞེས་ཐིག་ལེ་འགག་ཚུལ་གསུངས་ལ། རླུང་འགག་ཚུལ་ནི། ཚིགས་བཅད་བཅུ་པའི་ཟིན་བྲིས་ལས། རླུང་འགག་ཚུལ་རྒྱས་པར་བཤད་པ་ནི། དང་པོ་རྟོག་དང་གཉིས་པ་སྦྱོར་བའང་དེ་རྣམས་བདེན་པ་མཐོང་བས་འགག་ཅིང་འགག་པ་དེ་ལས་སླར། །ས་བཅུའི་མཐའ་མར་དབུགས་དག་འགོག་པ་རགས་དང་དབུས་མ་དང་ནི་ཕྲ་མོའི་དབྱེ་བ་ཤེས་པར་བྱ། །ཞེས་པས་བསྟན་ཏེ། དེ་ལ་རླུང་ལ་དབྱེ་ན། རགས་པའི་རླུང་དང༌། དེ་ལས་ཕྲ་ཞིང་ཤིན་ཏུ་ཕྲ་བ་རང་ཡང་མ་ཡིན་པའི་བར་མའམ་དབུས་མའི་རླུང་དང༌། ཤིན་ཏུ་ཕྲ་བའི་རླུང་སྟེ་གསུམ་ཡོད་པ་ལས། དང་པོ་རྟོག་དང་ཞེས་པ་རྟོག་པའི་རྣལ་འབྱོར་ནི་བསྐྱེད་རིམ་སྟེ་དེ་ལ་བརྟན་པ་ཐོབ་པས་རླུང་རགས་པ་འགག་པའི་མགོ་རྩོམ་པ་དང༌། གཉིས་པ་སྦྱོར་བ་ཞེས་པས་རླུང་འབྲིང་པོའི་བར་ནི་སྦྱོར་ལམ་དྲོད་ཐོབ་པས་འགག་པ་དང༌། ཕྲ་བ་ནི་བདེན་པ་མཐོང་བས་འགག་པ་ཡིན་ཞིང༌། རྩ་བ་ནས་འགགས་པ་ནི་སླར་འཕགས་ས་བཅུ་པའི་མཐའ་མར། ཤིན་ཏུ་ཕྲ་བའི་རླུང་ས་བོན་དང་བཅས་པ་འགོག་པ་སྟེ་འགག་ཅིང་སྤོང་བར་ཤེས་པར་བྱའོ། །ཞེས་པ་ལ། རགས་དང་དབུ་མ་དང་ནི་ཕྲ་མོའི་དབྱེ་བས་ཤེས་པར་བྱ། ཞེས་པའོ། །ཞེས་གསུངས་སོ། །