[༡༦] གླན་སྟོན་སངས་རྒྱས་དཔལ་ནི།
ཤར་རི་རྒྱ་གར་གླིང་དུ་གླན་ཆོས་ཀྱི་སེང་གེས་དབང་བསྐུར་ཅིང་རྒྱུད་བཤད་མན་ངག་དང་བཅས་པ་བསྩལ། རབ་བཤད་སྒྲུབ། འབྲིང་ལུས་ངག་གི་སྤྱོད་ལམ། ཐ་མ་ཟང་ཟིང་གསུམ་ཀའི་སྒོ་ནས་ཐུགས་ཟིན། གསང་མཚན་རྡོ་རྗེ་བདེ་བྱེད་རྩལ་དུ་བཏགས། སྤྱིར་མདོ་སྔགས་ཐམས་ཅད་ལ་མཁྱེན་རབ་ཀྱི་རྩལ་ཐོན། དམ་པའི་མཛོད་གསུམ་འཛིན་ཞིང་དབང་གི་ཆུ་བོ་རྫོགས། བླ་མ་དམ་པའི་ཕྱག་བཞེས་ལ་རང་བྱན་ཆུད། ཁྱད་པར་མདོ་དབང་ཟུར་ལུགས་དང་། གླན་ལུགས། སེ་ལུགས། ཞང་ལུགས་ཐམས་ཅད་གསན་ཞིང་མཁྱེན། རྫ་ལུང་དཔལ་གྱི་དགོན་པ་ལ་སོགས་པར་བཤད་སྒྲུབ་ཀྱི་ཕྲིན་ལས་རླབས་པོ་ཆེས་བསྟན་པ་གསལ་བར་མཛད་དོ། །