གཡུ་རོང་བསེ་རྫོང་ཞེས་པའི་སྒྲུང་ཡིག་ལ་ཅུང་ཟད་དཔྱད་པ་གཟུར་གནས་དགྱེས་པའི་གཏམ།
གླིང་མི་རེའི་ཁ་ན་སྒྲུང་རེ། ཞེས་པ་ལྟར་སྤྱིར་མདོ་དབུས་ཁམས་གསུམ་གྱི་སྒྲུང་བ་སོ་སོས་བཤད་པའི་གླིང་གེ་སར་གྱི་སྒྲུང་ཡིག་རྣམས་ལ་མི་འདྲ་བ་ཅུང་ཟད་རེ་མཆིས་མོད། འདི་འཐད་འདི་མི་འཐད་ཅེས་དཔྱད་པ་གཏོང་རྒྱུ་མེད་ཀྱང་། གཏེར་སྒྲུང་ཡིན་པར་བཤད་པའི་གཡུ་རོང་བསེ་རྫོང་ཞེས་མཇུག་མི་ཚང་བའི་སྒྲུང་དེབ་དེ་ནི་ལོ་རྒྱུས་ལ་རྒྱུས་མངའ་ཆུང་བའི་གང་ཟག་ཞིག་གིས་རང་འདོད་དུ་བྲིས་པ་ལས་གཏེར་སྒྲུང་དང་བབ་སྒྲུང་སོགས་ཀྱི་ཉམས་མི་འདུག་པར་སྣང་བས་གཟུ་བོར་གནས་པའི་སྒོ་ནས་རྒྱུ་མཚན་འགའ་ཞིག་ཚིག་སྣ་བསྟུངས་ནས་སྨྲ་བར་འདོད་དོ། །༼༡ དེ་ཡང་ཧོར་གླིང་གཡུལ་འགྱེད་ཀྱི་རྗེས་སུ་གཡུ་གླིང་གཡུལ་འཁྲུགས་བྱུང་བར་བཤད་འདུག དེ་ནི་ཧོར་གླིང་མ་འཁྲུགས་པའི་སྔོན་ནས་གླིང་སྡེ་རྨ་ཁོག་ཏུ་སྤོས་ཟིན་པ་ཡོངས་གྲགས་ཡིན་མོད། སྒྲུང་ཡིག་འདིའི་ནང་དུ་གཡུ་གླིང་འཁྲུགས་སྐབས་གསེར་བའི་ཉི་འབུམ་དར་ཡག་ཚང་གསེར་རྟ་ན་གཞིས་ཆགས་ནས་བཞུགས་ཡོད་པར་བཤད་པས་སྒྲུང་ཡིག་སྤྱིའི་ལུགས་དང་མི་མཐུན། ༼༢ ལྡེབ་༣༡པའི་ངོས་སུ། ཉི་འབུམ་གྱི་གླུའི་མགོར། དཔལ་ས་སྐྱ་འོག་མིན་ཕོ་བྲང་ནས༔ འགྲོ་མགོན་ཆོས་རྗེ་འཕགས་པ་མཁྱེན༔ ཞེས་དང་། ལྡེབ་༡༧༤པའི་ངོས་སུ། བདུད་ལྷའི་གླུའི་མགོར། གནས་དཔལ་རི་ཚེ་ཡི་བྲག་ཕུག་ནས༔ གྲུབ་ཆེན་ཐང་སྟོང་རྒྱལ་པོ་ལ༔ ཞེས་བྲིས་པ་ལ་གཟིགས་དང་། རབ་བྱུང་དང་པོའི་ནང་བྱོན་པའི་གླིང་གི་མི་སྣ་ཚོས་རབ་བྱུང་བཞི་པའི་ནང་བྱོན་པའི་ས་སྐྱའི་འགྲོ་མགོན་དང་། རབ་བྱུང་དྲུག་པའི་ནང་བྱོན་པའི་གྲུབ་ཆེན་ཐང་སྟོང་རྒྱལ་པོ་གཉིས་ལ་གསོལ་བ་བཏབ་པས་ཁུངས་ལྡན་གྱི་སྒྲུང་ཡིག་ཞིག་ཡིན་མིན་འདི་ཙམ་གྱིས་ཀྱང་ཤེས་ནུས་སྙམ། ༼༣ ཡང་གསེར་རྟའི་མི་སྣ་རྣམས་ཀྱི་ནང་གེ་འཕན་ཆོས་དབང་། ཝ་ཤུལ་བསོད་ནམས་སྐལ་ལྡན། སྟོང་དཔོན་འཆི་མེད་སྟོབས་ལྡན་སོགས་ཀྱི་མིང་འདོགས་ཚུལ་ནི་མི་ལོ་སྟོང་ལ་ཉེ་བའི་སྔོན་གྱི་མིང་འདོགས་སྟངས་དང་གཏན་ནས་མི་མཚུངས་པར་དེང་རབས་ཀྱི་མིང་དངོས་སུ་འདུག དེ་དག་གི་རུས་ལ་དཔྱད་ན་ཡང་གེ་འཕན་ནི་རབ་བྱུང་གཉིས་པའི་ནང་ནས་ལྡོང་མི་ནག་གི་བུ་གེ་འཕན་ལ་བུ་གསུམ་ཡོད་པའི་རྒྱུད་པ་ཡིན་པ་དང་། གསེར་རྟའི་ཕྱོགས་ཀྱི་ཝ་ཤུལ་ནི། རབ་བྱུང་གསུམ་པའི་ནང་ཙམ་ལ་བྱུང་བའི་ཝ་ཤུལ་བན་དེ་སྐྱབས་ཀྱིས་སྨར་རོང་ནས་མཁར་བརྩིགས་ནས་བསྡད་པ་དེའི་མི་རབས་མང་པོའི་འཕྲོས་ཝ་ཤུལ་སྟག་ལྷ་འཕན་གྱི་རྒྱུད་པ་གསེར་རྟ་ཕྱོགས་སུ་བྱུང་བ་ཡིན། སྟོང་དཔོན་ནི་ས་སྐྱའི་འགྲོ་མགོན་ཆོས་རྒྱལ་འཕགས་པའི་སྐུ་དུས་ནས་བྱུང་བ་ཡིན་ཚུལ་ཆོས་འབྱུང་དང་རུས་མཛོད་རྣམས་སུ་གསལ་བས་དུས་ཚིགས་སྔ་ཕྱི་མི་འགྲིག་པ་མངོན་སུམ་མོ།། ༼༤ ཡང་ཆུ་བར་གཡུ་ཐར་ཚེ་རིང་ཟེར་བ་ཨ་བོ་ཁག་གསུམ་གྱི་དཔོན་ལ་བཞག་པར་བཤད་པ་དེ་ཡང་དགོད་བྲོ་བའི་གཏམ་སྟེ། ཨ་བོ་ཁག་གསུམ་གྱི་བྱུང་ཚུལ་ནི། འགྲོ་མགོན་ཆོས་རྒྱལ་འཕགས་པ་རྒྱ་ནག་ལ་བྱོན་པའི་སྐབས་སུ་ཤིས་ཀྱི་ར་མ་ཆུ་མདོ་ནས་མགྲོན་པོ་བུ་སྤུན་གསུམ་ལ་ལུང་བསྟན་པ་ལྟར་བུ་ཆེ་བས་ས་དེར་གཞིས་བཟུང་བ་ཨ་བོ་སྐྱབས་ལོ། དེའི་རྒྱུད་པ་མགོ་ལོག་ཕྱོགས་སུ་མཆེད་པ་དང་། བུ་འབྲིང་བས་ཉག་རོང་དུ་གཞིས་བཟུང་བའི་རྒྱུད་པ་དེ་ཕྱོགས་སུ་ཡོད་ཅིང་། བུ་ཆུང་བ་ཨ་བོ་རྒྱ་གར་ཚེ་རིང་གི་རྒྱུད་པ་ཨ་བོ་གོ་བཤོལ་བདུན་སོགས་གསེར་ཁོག་ཏུ་འཕེལ་བར་ལོ་རྒྱུས་རྣམས་སུ་གསལ། དེས་ན་ཨ་བོ་ཁག་གསུམ་ནི་ཁྲ་མོ་གླིང་གི་དུས་ལས་མི་ལོ་ཉིས་བརྒྱ་ལྷག་གི་རྗེས་སུ་བྱུང་བས་མི་འགྲིག་པ་མངོན་སུམ་ཡིན། གལ་ཏེ་འགྲིག་ཏུ་ཆུག་ཀྱང་ཆུ་བར་གཡུ་ཐར་ཟེར་བ་ཨ་བོ་ཁག་གསུམ་གའི་འགོ་དཔོན་དུ་བསྐོ་ཚུལ་ཞིག་འདུག་གམ་ཞིབས་སུ་སོམས་ཤིག ༼༥ ལྡེབ་༤༤པའི་ངོས་སུ། དར་ཁུ་ཉིན་སྲིབ་སྟག་བཀྲ་མན༔ ཕོ་སེས་གཡུ་མདོ་རྫས་དགེ་ཡན༔ རྟའུ་ལྷུ་སུམ་ལྕགས་ཁྱོ་ཚུན༔ ཧོར་ཁམས་ཀ་མཛེས་མན་ཆད་ཀྱི༔ དམག་དཔོན་མཆན་ཁེབས་ལས་དམག་བཅས༔ ཞེས་ས་གནས་དེ་དག་གཡུ་རོང་རྒྱལ་པོའི་མངའ་ཁོངས་ཡིན་པར་བཤད་པ་ཡང་ཐལ་ཆེ་བའི་གཏམ་སྟེ། གཡུ་རོང་རྒྱལ་པོ་གཡུ་སྒེགས་གཉིས་ཙམ་ལ་དབང་བའི་དཔོན་ཆུང་ཞིག་ཡིན་པར་བཤད་པ་ལས་ཧོར་དཀར་མཛེས་མན་ཆད་ལ་མངའ་དབང་བསྒྱུར་བ་ཞིག་ཡིན་པའི་ཡིག་ཆ་དང་ངག་རྒྱུན་གང་ཡང་མེད་པས་མི་འཐད། ཁྱད་པར་དཀར་མཛེས་ཕྱོགས་སུ་ཧོར་ཟེར་བ་ནི་སྒ་ཨ་གཉན་དམ་པས་རབ་བྱུང་ལྔ་པ་ཡས་མས་སུ་དཀར་མཛེས་སྡེ་མགོན་ཁང་བཞེངས་སྐབས་གོང་མ་སེ་ཆེན་གྱི་སྲས་ཝང་གི་མིང་ཅན་གྱི་སྲས་ཧོར་མ་བསམ་བུ་འཁྲུངས་ཚུན་ཆད་ནས་ཐོགས་པ་ཞིག་ཡིན་ཕྱིར་མི་འགྲིགས་པ་ཤེས་སླའོ།། ༼༦ ཡང་གླིང་གི་ཨ་སྐྱོ་གཉིས་ཀྱིས་གླང་རྒན་ཞིག་ལ་བྲོ་ཆས་བཀལ་ནས་རྒྱ་ནག་གི་ལྕགས་ཟམ་དང་། མདོ་ཆེན། ལྕུམ་ལུང་། རྫ་བྲག་མདོ་རྣམས་སུ་གནས་བསྐོར་ལ་སོང་ཚུལ་བཤད་ཀྱང་། རྒྱ་ནག་ལྕགས་ཟམ་ནི་གྲུབ་ཆེན་ཐང་སྟོང་རྒྱལ་པོས་རབ་བྱུང་བདུན་པའི་ནང་བཙུགས་པ་ཡིན་ལ། མདོ་ཆེན་དགོན་ནི་རབ་བྱུང་བཅུ་བཞི་པའི་ནང་རྫོགས་ཆེན་རྒྱལ་སྲས་གཞན་མཐའ་ཡས་ཀྱིས་ཕྱག་བཏབ་པ་དང་། ལྕུམ་ལུང་ངམ་མ་ཧཱ་སྐྱིད་ལུང་དགོན་ནི་མདོ་མཁྱེན་བརྩེ་ཡེ་ཤེས་རྡོ་རྗེས་ཕྱག་བཏབ་མཛད། རྫས་བྲག་མདོའམ་གནམ་མཚོ་དགོན་པ་ཡང་གནམ་མཚོ་སྤྲུལ་སྐུས་ཕྱག་བཏབ་པས་གསུམ་ག་ཕལ་ཆེར་དུས་མཚུངས། རྫ་བྲག་མདོའི་བདེ་གཤེགས་སྒྲུབ་པ་བཀའ་བརྒྱད་ཀྱི་གནས་རི་ནི་རབ་བྱུང་བཅོ་ལྔ་པའི་མགོར་གར་དབང་འཇིགས་མེད་རྣམ་རྒྱལ་གྱིས་གནས་སྒོ་གསར་དུ་ཕྱེས་པ་ཞིག་ཡིན། ཁྲ་མོ་གླིང་གི་དུས་སུ་ས་ཆ་དེ་དག་ན་མཇལ་རྒྱུ་དང་སྐོར་རྒྱུ་ཅི་ཞིག་ཡོད་གསལ་བཤད་བྱེད་རིགས་སོ། །དེ་ལྟར་རགས་ཙམ་ལས་དཔྱད་འོས་ཆེར་མི་འདུག དེས་ན་སྒྲུང་ཡིག་དེ་ནི་རབ་བྱུང་བཅོ་ལྔ་པ་ཚུན་ཆད་ཀྱི་མི་ཞིག་གིས་མ་བརྟགས་བྱུང་རྒྱལ་ལམ་ཕྱོགས་ཞེན་གྱིས་བྲིས་པ་ཞིག་ཡིན་པ་ཧ་ཅང་གསལ་བ་ལས་བབ་སྒྲུང་དང་གཏེར་སྒྲུང་། པྲ་སྒྲུང་སོགས་ལྟ་ཅི་བརྩམས་སྒྲུང་དག་མ་ཞིག་གི་དྲི་ཡང་བྲོ་བར་མི་འདུག་གོ །༢༠༡༨ལོའི་ཟླ་༨པའི་ཚེས་༢༧ཉིན། གཡུ་ཁོག་པ་ཡི་དམ་རྡོ་རྗེར་འབོད་པས་བྲིས།