[༡༧] གླན་སྟོན་བསོད་ནམས་མགོན་པོ་ནི།
དཔལ་ལྡན་ཆོས་སེང་དང་སངས་རྒྱས་དཔལ་གཉིས་ཀྱིས་ཆུ་བོ་བཞི་རྫོགས་ཀྱི་དབང་བསྐུར་ཅིང་བཤད་སྒྲུབ་ཕྱག་བཞེས་དང་བཅས་པ་བུམ་པ་གང་བྱོའི་ཚུལ་དུ་གནང་། གསང་མཚན་རྡོ་རྗེ་དྲག་པོ་རྩལ་ལམ་ཐིག་ལེ་དྲག་པོ་རྩལ་དུ་གྲགས། འདིའི་ཡབ་ལྷ་རྗེ་ལྷ་འབུམ་ཡིན་ཡང་མདོ་དབང་ཁུ་བོ་གཉིས་ལས་གསན་དགོས་པ་བྱུང་། ཡང་གླན་རྡོ་རྗེ་འོད་ནས་ཉེ་སྟོན་ལ་བརྒྱུད་དེ་ཞང་སྟོན་ཀུན་དགའ་འབུམ་ལས་ཀྱང་གསན་ཞེས་འབྱུང་ཞིང་། ཁ་ཅིག་འདི་གཏད་རྒྱའི་བརྒྱུད་པ་ཡིན་ཞེས་ཀྱང་གསུངས། དེ་ཡང་དང་པོར་བླ་མ་འཕགས་པའི་དྲུང་དུ་གཙུག་ཕུད་ཕུལ་ཞིང་དགེ་བསྙེན་གྱི་སྡོམ་པ་གསན། གྲུ་རྡོ་རྗེ་སེང་གེ་ལ་བརྟེན་ནས་ཀླུ་གདོན་གྱི་བར་ཆད་ལས་གྲོལ། ཤེས་བྱ་ཐམས་ཅད་ལ་སྦྱངས་པས་ཕྱོགས་མེད་དུ་མཁྱེན། ཁྱད་པར་བསྐྱེད་རྫོགས་རྫོགས་གསུམ་ལ་མཁས་པའི་གྲགས་པ་ཐོན། བསྙེན་སྒྲུབ་ལས་གསུམ་མཐར་ཕྱིན་པས་རྟག་ཏུ་ཏིང་ངེ་འཛིན་གྱི་དགོངས་པ་ལས་གཞན་དུ་མི་གཡོ་ཞིང་། མཚན་མོའི་དུས་སུའང་སྐུ་བསྲངས་ཏེ་བསམ་གཏན་གྱི་འདུག་སྟངས་ཁོ་ནར་བཞུགས། རྨི་ལམ་འབྱོངས་པས་སྤྲུལ་སྒྱུར་ནུས། མདོ་མགོན་ལེགས་ལྡན་ཆེད་དུ་མ་བསྒྲུབས་ཀྱང་ཤིན་ཏུ་འགོ་བས་འགལ་བྱེད་རྣམས་ཚར་གཅོད་པའི་རྟགས་འཕྲལ་དུ་སྟོན། སློབ་དཔོན་ཆེན་པོ་པདྨའི་ལུང་བསྟན་བཞིན་བསམ་ཡས་པེ་ཧར་གླིང་ནས་ཟབ་ཆོས་ཤོག་དྲིལ་བཅོ་ལྔ་གཏེར་ནས་བཏོན་ཏེ་བླ་མ་སྨན་ལུང་དབུས་པ་ལ་གནང་། འདུས་པ་མདོའི་དབང་ལན་བཅུ་གཅིག་དང་། དགོངས་འདུས་ཀྱི་བཤད་པའང་མང་དུ་མཛད། གཞན་ཡང་སྒྱུ་འཕྲུལ་ཞི་ཁྲོ། དོང་སྤྲུག ཡང་དག་སོགས་ཀྱི་དབང་དང་གདམས་ངག་བཤད་པ་ཕྱག་བཞེས་དང་བཅས་པས་གདུལ་བྱ་མཐའ་ཡས་པའི་དོན་མཛད་དོ། །