བརྒྱད་པ་ཡོངས་སྦྱོང་།
བརྒྱད་པ་ཡོངས་སྦྱོང་ནི།
རང་རང་གི་ཡོན་ཏན་ཁྱད་པར་ཅན་རིམ་གྱིས་འཕེལ་བར་བྱེད་པ་སྟེ་མངོན་རྟོགས་རྒྱན་ལས། ཡོངས་སུ་སྦྱོང་བ་རྣམ་བཅུ་ཡིས། །ས་ནི་དང་པོ་ཐོབ་འགྱུར་ཏེ། །བསམ་དང་ཕན་པའི་དངོས་ཉིད་དང༌། །སེམས་ཅན་རྣམས་ལ་སེམས་མཉམ་ཉིད། །ཅེས་པ་ལ་སོགས་པ་རྒྱ་ཆེར་གསུངས་པ་བཞིན་ནོ། །དེ་ཡང་མདོ་ལུགས་མ་ལས། ཡོངས་སུ་སྦྱོང་བའི་དོན་ནི་ས་དེ་དང་དེ་ལ་གསུངས་པའི་ཆོས་དེ་དང་དེ་དག་ཡོངས་སུ་སྦྱང་ཞིང་དག་པར་བྱ་བ་ཉིད་ས་དེ་དང་དེ་ཡོངས་སུ་སྦྱོང་ཞིང་དག་པ་ཡིན་ནོ། །ཆོས་དེ་དང་དེ་དག་པ་ཉིད་ས་དེ་དང་དེ་དག་པ་ཡིན་ལ་དག་པ་ལ་ཐབས་ཞེས་བྱའོ། ། དེ་ལ་སྦྱོང་གཞི། སྦྱོང་བྱ། སྦྱོང་བྱེད། སྦྱོང་མཁན། སྦྱོང་ཚུལ། སྦྱངས་འབྲས་དེ་དྲུག་གིས་རྟོགས་པར་བྱའོ། །སྦྱང་གཞི་ནི་ཀུན་ཏུ་འགྲོ་བའི་དོན་ལ་སོགས་པ་ཆོས་ཀྱི་དབྱིངས་རྣམ་པ་བཅུ་ཡིན་ནོ། །སྦྱང་བྱ་དྲི་མ་ནི་ཉོན་མོངས་པ་ཅན་མ་ཡིན་པའི་མི་ཤེས་པ་བཅུའོ། སྦྱོང་བྱེད་ཀྱི་ཐབས་ནི་འཁོར་གསུམ་དུ་རྟོག་པའི་རང་བཞིན་མི་དམིགས་པའོ། །སྦྱོང་མཁན་གྱི་གང་ཟག་ནི། ས་དེ་དང་དེ་ལ་གནས་པའི་བྱང་ཆུབ་སེམས་དཔའོ། །སྦྱོང་ཚུལ་ནི་ཇི་ལྟར་གཞུང་ལས་བྱུང་བའི་རིག་པ་དེ་ཉིད་དོ། །སྦྱངས་འབྲས་ནི་རང་རང་གི་ངོ་སྐལ་གྱི་དྲི་མ་དག་པའི་ས་དེ་དང་དེ་ཉིད་དོ། །ཞེས་གསུངས་པས་སོ། །དེ་ལ་ཡོངས་སུ་སྦྱོང་བའི་ཆོས་དུ་ཞིག་གིས་ས་དང་པོ་སོགས་འཐོབ་པར་འགྱུར་ཞེ་ན། ཡོངས་སུ་སྦྱོང་བ་རྣམ་བཅུ་ཡིས། །ས་ནི་དང་པོ་འཐོབ་འགྱུར་ཏེ། །ཞེས་གསུངས་པ་ལྟར་ས་དང་པོར་ཡོངས་སྦྱོང་བཅུ། གཉིས་པར་ཡོངས་སྦྱོང་བརྒྱད། གསུམ་པར་ལྔ། བཞི་བར་བཅུ། ལྔ་པར་བཅུ། དྲུག་པར་བཅུ་གཉིས།བདུན་པར་སྤངས་གཉེན་གྱི་སྒོ་ནས་ཉི་ཤུ་པ་གཉིས། བརྒྱད་པར་བརྒྱད། དགུ་བར་བཅུ་གཉིས། ས་བཅུ་བའི་རྒྱུད་ཀྱི་དགུ་བའི་ཡོངས་སྦྱོང་བཅུ་གཉིས་པོའི་རྒྱུན་རྫོགས་པར་སྦྱངས་བ་ཉིད་བཅུ་བའི་ཡོངས་སྦྱོང་ཡིན་པར་གསུངས་སོ། །དེ་དག་བསྒོམས་ནས་སྦྱང་བའོ། །ཡོངས་སྦྱོང་དེ་དག་འདིར་མང་དུ་དོགས་ནས་མ་བྲིས་པས་གཞན་དུ་ཤེས་པར་བྱའོ། །ས་གོང་མར་འཕོ་ཚུལ་ནི་ཇི་སྲིད་དུ་རང་རང་གི་ཡོངས་སྦྱོང་མ་རྫོགས་ཀྱི་བར་དེ་སྲིད་དུ་ས་དེ་དང་དེ་ཡིན་ཞིང་རྫོགས་ནས་གོང་མ་གོང་མར་འཕོ་བ་སྟེ་བརྒྱད་སྟོང་འགྲེལ་པར། ས་གང་གི་ཡོངས་སུ་སྦྱོང་བར་འགྱུར་བའི་ཆོས་གང་ཡིན་པ་དེ་དག་མ་རྫོགས་ཀྱི་བར་དུ་ནི་ས་དེ་ཡིན་ལ། ཡོངས་སུ་རྫོགས་ནས་ནི་ས་གཞན་ཡིན་པར་ཤེས་པར་བྱའོ་ཞེས་གསུངས་པ་ལྟར་རྒྱན་གྱི་ས་འགྲེལ་ལས་གསུངས་ལ། དེ་བཞག་པ་དེ་ཉ་ཊཱིཀ་ལས། མདོ་དང་མཐུན་ནོ། །ཞེས་མདོ་དང་མཐུན་པར་གསུངས་སོ། །