གཉིས་པ་རིམ་གཉིས་ཀྱི་ལམ་བཤད་པ།

གཉིས་པ་རིམ་གཉིས་ཀྱི་ལམ་བཤད་པ་ལ།

བསྐྱེད་རིམ་དང་རྫོགས་རིམ་དང་དེ་གཉིས་ཀྱི་སྤྱོད་པ་བཤད་པ་དང་གསུམ། དང་པོ་བསྐྱེད་རིམ་ནི། བརྫུས་སྐྱེས་དང་མཚུངས་པ་སྐད་ཅིག་གིས་བསྐྱེད་པ་དང༌། དྲོད་གཤེར་སྐྱེས་དང་མཚུངས་པར་ས་བོན་ཕྱག་མཚན་ལས་བསྐྱེད་པ་དང༌། སྒོང་སྐྱེས་དང་མཚུངས་པ་མངོན་པར་བྱང་ཆུབ་ལྔ་ལས་བསྐྱེད་པ་དང༌། མངལ་སྐྱེས་དང་མཚུངས་པ་ཞུ་བ་གླུས་བསྐུལ་དང༌། མཁའ་ནང་ནས་སྤྲོ་བ་སོགས་ཡིན་ཞིང༌། མངོན་རྟོགས་ཚར་གཅིག་ལ་འཆི་བ་དང་བར་དོ་དང༌། སྐྱེ་བ་གསུམ་སྦྱང་བའི་ཐབས་ཚང་བ། ཆོས་ལོངས་སྤྲུལ་གསུམ་ལམ་དུ་བྱེད་ནུས་པ་ཞིག་དགོས་ཏེ། དེ་ཡང་ལྷ་གཙོ་བོ་བསྐྱེད་པ་དང་པོ་སྦྱོར་བ། འཁོར་ཚོགས་སྤྲོ་བ་དཀྱིལ་འཁོར་རྒྱལ་མཆོག དག་པ་དྲན་པ་དང༌། ཕྲ་ཐིག་བསྒོམ་པ་སོགས་ལས་རྒྱལ་མཆོག་སྟེ། ཏིང་ངེ་འཛིན་གསུམ་ཚང་བའམ། བསྙེན་པ། ཉེར་སྒྲུབ། སྒྲུབ་པ། སྒྲུབ་ཆེན་ཏེ་བསྙེན་བསྒྲུབ་ཡན་ལག་བཞི་ཚང་པའི། རྣལ་འབྱོར། རྗེས་སུ་རྣལ་འབྱོར། ཤིན་ཏུ་རྣལ་འབྱོར། རྣལ་འབྱོར་ཆེན་པོ་སྟེ་རྣལ་འབྱོར་བཞི་ཆ་ཚང་བ་གང་རུང་ཞིག་དགོས། བསྐྱེད་རིམ་གྱི་ཡན་ལག་ཏུ་བཟླས་པ་དང་གཏོར་མ་གཉིས། ཁ་ཟས་དང་རྗེས་ཆགས་གཉིས། ཉལ་བ་དང་ལྡང་བ་དང་གཉིས། སྤྱོད་ལམ་དང་མཆོད་པའི་རྣལ་འབྱོར་གཉིས་ཏེ་རྣལ་འབྱོར་བརྒྱད་པོ་དེ་རྣམས་དགོས་ལ། སྦྱིན་སྲེག་དང་འཁོར་ལོའི་མཆོད་པ་སོགས་ལའང་བསླབ་པར་བྱ་བ་ཡིན་ནོ། ། བསྐྱེད་རིམ་གྱི་ངོ་བོ་ནི། སྒོམ་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་ཅི་རིགས་ལས་མ་བྱུང་ཞིང་སྐྱེ་ཤི་བར་དོ་གསུམ་པོ་ཅི་རིགས་དང་རྣམ་པ་མཐུན་པར་བློས་བརྟགས་ནས་བསྒོམ་པའི་རིགས་སུ་གནས་པའི་རང་འབྲས་རྫོགས་རིམ་གྱི་སྨིན་བྱེད་ཀྱི་རྣལ་འབྱོར་དེ། བསྐྱེད་རིམ་གྱི་མཚན་ཉིད་ཡིན་ཏེ། རིམ་ལྔའི་འགྲེལ་ཆེན་རྡོ་རྗེ་འཆང་ཆེན་པོའི་དགོངས་པ་ལས། བསྐྱེད་རིམ་གྱི་ངོ་བོ་ནི། རང་རྒྱུ་རྣམ་པར་རྟོག་པས་དངོས་སུ་བཏགས་ཤིང༌། ངོ་བོ་རྟོག་བཅས་དང་རྟོག་མེད་གང་རུང་གི་ལྷའི་རྣལ་འབྱོར་ཞིག་ལ། རྣམ་པ་འཁོར་བའི་སྐྱེ་ཤི་བར་དོ་གསུམ་དང་དབྱིབས་མཐུན་པས་སྦྱོང་ཞིང༌། སྐུ་གསུམ་དང་རྣམ་པ་མཐུན་པས་ལམ་དུ་བྱེད་པ། དགོས་པ་རྫོགས་རིམ་གྱི་སྨིན་བྱེད་ཀྱི་གཞིར་གྱུར་ཞིང༌། གྲོགས་བཅོས་མའི་བདེ་བ་དང་སྟོང་པས་བརྒྱན་པའི་ཏིང་ངེ་འཛིན་ནོ། །ཞེས་དང༌། ཚིགས་བཅད་བཅུ་པའི་འགྲེལ་པ་ཟིན་བྲིས་ལས། བསྐྱེད་རིམ་གྱི་མཚན་ཉིད་བཤད་པ་ནི། འབྲས་བུ་དང་མཚུངས་པ་རྟོག་པའི་རྒྱུ་ཅན་བདེ་བ་ཆེ་དང་སྟོང་པའི་རྣམ་པ་ལྷ་ཡི་གཟུགས་བརྙན་ནི། །བདེ་བ་ཅུང་ཟད་ལམ་དུ་བྱཻད་ནུས་སྣང་དང་འཛིན་པ་ལྷོད་བྱེད་རྫོགས་པ་སྦྱོར་བ་དང་པོ་སྟེ། །ཞེས་གསུངས་ཏེ། བསྐྱེད་རིམ་གྱི་ངོ་བོ་ནི་འབྲས་བུ་སངས་རྒྱས་ཀྱི་རྣམ་པ་བཞུགས་ཚུལ་དང་མཐུན་པ་ཞིག་དང༌། འཁོར་བའི་གནས་ལུས་ལོངས་སྤྱོད་དང་རྣམ་པ་མཐུན་པའི་སྒོ་ནས་སྦྱོང་ཐུབ་པ་ཞིག་དང༌། རྫོགས་རིམ་གྱི་ལམ་གྱི་གཞི་འདིངས་ཤིང་སྨིན་བྱེད་དུ་འགྲོ་བ་ཞིག་དང༌། རྟོག་པའི་རྒྱུ་ཅན་ཞེས་པ་ངོ་བོ་མི་རྟོག་པ་ལས་རང་ཤར་བ་མ་ཡིན་པར། རྣལ་འབྱོར་རྟོག་པའི་རྩོལ་བ་ལས་འབྱུང་ཞིང་གོམས་པ་ལས་ལྷ་སྐུར་ཤར་བ་ཡིན་པ། བདེ་བ་ཆེ་དང་ཞེས་པས། དེ་ཡང་བདེ་བ་ཆེན་པོར་ཤར་བ། སྟོང་པའི་རྣམ་པ་ཞེས་པས། དེ་ཐམས་ཅད་སྟོང་པ་ཉིད་དུ་རྟོགས་ཤིང་རྒྱས་ཐེབས་པ། ལྷའི་གཟུགས་ནི་ཞེས་པས། ཐ་མལ་གྱི་སྣང་བ་མ་ཡིན་པ་ལྷ་གང་དང་གང་བསྒོམས་པ་དེ་རྣམ་པ་ཤིན་ཏུ་གསལ་བ་དེ་ལྟ་བུ་ཡིན་ལ། དེ་ཉིད་སྒོམ་པ་གོམས་པས་ནི། བདེ་བ་ཅུང་ཟད་ལམ་དུ་བྱེད་ནུས་པ་ཡིན་ཏེ། ཕྲ་ཐིག་གི་རྣལ་འབྱོར་གྱི་སྒོ་ནས་འབར་འཛག་གི་བདེ་བ་མྱོང་ཞིང་ལམ་དུ་བྱེད་པ་ཡིན་པས། རྫོགས་རིམ་ལྟ་བུའི་བདེ་བ་ཆེན་པོ་མྱོང་མི་ཐུབ་པས། ལམ་དུ་བྱེད་ནུས་ཞེས་པའོ། །སྣང་དང་འཛིན་པ་ལྷོད་བྱེད་ཅེས་པས། དེ་ལྟ་བུའི་བྱེད་ལས་དེའི་བྱེད་པ་ནི། མ་དག་པའི་སྣང་བ་གནས་ལུས་ལོངས་སྤྱོད་ལ་སོགས་པ་རྣམ་པ་སྣ་ཚོགས་པར་ཤར་བའི་སྣང་ཞེན་དམ་པོ་འདི་ལྷོད་པོར་བྱེད་པ་དང། དེ་ལས་གང་ཟག་དང་ཆོས་ལ་སོགས་པ་འདི་དང་འདི་ལྟ་བུའོ་ཞེས་སྙམ་དུ་འཛིན་པའི་གཟུང་འཛིན་གྱི་བློ་བརྟན་པོ་རྣམས་བསྐྱེད་རིམ་གྱི་ལྷ་སྐུ་བསྒོམས་པས། དེ་དག་གི་སྣང་ཞེན་ལ་སོགས་པ་འཛིན་པ་བརྟན་པོ་རྣམས་འགག་ཅིང་ལྷོད་པོ་བྱེད་པ་དང༌། རྫོགས་པ་སྦྱོར་བ་ཞེས་པས། ལམ་གོང་མ་རྫོགས་རིམ་གྱི་སྨིན་བྱེད་དུ་འགྱུར་ཞིང་མཚམས་སྦྱོར་བ་དང༌། རྫོགས་རིམ་སྒོམ་པའི་སྐལ་བ་ཅན་དུ་བྱེད་པ་ཡིན་ནོ། །ཞེས་གསུངས་པའི་ཕྱིར་རོ། །བསྐྱེད་རྫོགས་གཉིས་ཀྱི་ཁྱད་པར་དུ་མ་ཡོད་དེ། ལྷན་ཐབས་འོད་བརྒྱ་འབར་བ་ལས། རིམ་པ་གཉིས་པོ་དེའི་མཚན་ཉིད་དམ་ཁྱད་ཆོས་ནི། ཆོ་གའི་ཁྱད་པར་རྒྱུད་ལས་གསུངས་པའི་སྐྱེད་ཆོག་ཚང་བ། རང་འབྲས་ཀྱི་ཁྱད་པར་སྔགས་ཀྱི་མཐུ་སྐྱེད་ནུས་པ། ངོ་བོའི་ཁྱད་པར་ཞུ་བདེ་དང་སྟོང་ཉིད་ཀྱི་རང་བཞིན། བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ཚང་བ་སྟེ། ཁྱད་པར་བཞི་དང་ལྡན་པའི་ལྷ་སྐུ་རྣམ་པར་རྟོག་པས་བརྟགས་པ་ནི། བསྐྱེད་རིམ་གྱི་རྣལ་འབྱོར་ཡིན་ལ། རྒྱུའི་ཁྱད་པར་རྡོ་རྗེའི་ལུས་ལ་གནད་དུ་བསྣུན་པ། བྱེད་ལས་ཀྱི་ཁྱད་པར་རྩ་རླུང་ཐིག་ལེ་དབུ་མར་དག་བྱེད། རྣམ་པའི་ཁྱད་པར་བདེ་བ་དང་སྟོང་གཟུགས་ལྷན་ཅིག་པ་སྟེ། ཁྱད་པར་གསུམ་ལྡན་གྱི་མི་རྟོག་པའི་ལམ་དེ་ནི་རྫོགས་རིམ་མོ། །གྲངས་ངེས་པ་ནི། དགོས་པ་ལ་ལྟོས་པའི་གྲངས་ངེས་ཏེ། སྐྱེ་བ་ཀུན་རྫོབ་བདེན་པ་ལམ་དུ་བྱེད་པ་ལ་བསྐྱེད་རིམ་དང༌། འཇིག་པ་དོན་དམ་བདེན་པ་ལམ་དུ་བྱེད་པ་ལ་རྫོགས་རིམ་དགོས་པ་དང༌། དོན་དམ་གནས་ལུགས་ཀྱི་ལམ་ལ་འཇུག་པའི་རྒྱུད་སྦྱོང་བ་དང༌། སྦྱངས་ནས་གནས་ལུགས་སྒོམ་པ་དངོས་གཉིས་ཡོད་པ་ལས། དང་པོ་ནི་བསྐྱེད་རིམ་དང་ཕྱི་མ་ནི་རྫོགས་རིམ་ཡིན་ཏེ། རྫོགས་རིམ་གྱི་ཡེ་ཤེས་སྐྱེ་བ་ལ། རྒྱུད་སྦྱང་བའི་ཐབས་ཐུན་མོང་མ་ཡིན་པ་ཞིག་སྔོན་དུ་གཏོང་དགོས་པ་ཤས་ཆེ་བའི་ཕྱིར་རོ། །རྡོ་རྗེ་སྙིང་འགྲེལ་ལས། རྣམ་རྟོག་རྒྱ་རུ་ཆུད་པ་ཡི། །འགྲོ་བ་གསུམ་པོ་རྣམས་གཟིགས་ནས། །ཇི་ལྟ་ཇི་ལྟར་གྲོལ་གྱུར་པ། །དེ་དང་དེ་ཡི་ཐབས་བསྟན་ནོ། །རྣམ་རྟོག་བག་ཆགས་ཀྱིས་བཅིངས་ལ། །ཐོག་མར་རྟོག་པའི་ཆོ་ག་བསྟན། །རྣམ་རྟོག་རང་བཞིན་ཤེས་པ་ན། །མི་རྟོག་པ་ལ་འཇུག་པར་བྱ། །ཞེས་གསུངས་དེ་ཁོ་ནར་གོ་རིམ་ངེས་པ་ཡང་གྲུབ་སྟེ། སྙིང་འགྲེལ་ལས། དང་པོར་རེ་ཞིག་ཞིང་དག་ཕྱིར། །ཁྲེ་ཚེ་རྣམས་ནི་བཏབ་པར་གྱུར། །ཕྱི་ནས་དག་པའི་ཞིང་ལ་ནི། །ས་ལའི་འབྲས་ནི་འདེབས་པའོ། །ཞེས་དཔེ་གསུངས་ཏེ། རྫོགས་རིམ་གྱི་ཡེ་ཤེས་སྐྱེས་ཕྱིན་ཆད་དམིགས་བསལ་རེ་རེ་ཙམ་མ་གཏོགས། བསྐྱེད་རིམ་སྒོམ་པ་ལ་དགོས་པ་ཆེན་པོ་མེད་པའི་ཕྱིར། བསྐྱེད་རིམ་སྒོམ་ཕྱིན་ཆད། དམིགས་བསལ་མ་གཏོགས་རྫོགས་རིམ་གྱི་སྔོན་དུ་སྒོམ་དགོས་པར་གྲུབ་བོ། །བསྐྱེད་རིམ་བརྟན་པ་ཐོབ་ནས་རྫོགས་རིམ་བསྒོམ་པ་དང༌། བརྟན་པ་མ་ཐོབ་རུང་ཅི་རིགས་པ་བསྒོམས་ནས་རྫོགས་རིམ་ལ་འཇུག་པ་དང༌། ཐུན་སྟོད་ལ་བསྐྱེད་རིམ་སྒོམ། ཐུན་སྨད་ལ་རྫོགས་རིམ་སྒོམ་པ་སོགས་གང་བྱས་ཀྱང་དགོས་དོན་འགྲུབ་བོ། །