དགུ་པ་འབྲས་བུ།

དགུ་པ་འབྲས་བུ་ནི།

ས་དང་པོ་དགུའི་ས་ཕྱི་མ་ཕྱི་མ་སྔ་མའི་གནས་སྐབས་ཀྱི་འབྲས་བུ། མཐར་ཐུག་གི་འབྲས་བུ་སངས་རྒྱས་ཀྱི་ས་ཀུན་ཏུ་འོད་ཡིན་ནོ། ། གཉིས་པ་མཐའ་རགས་ཙམ་དཔྱད་པ་ལ། རྒྱན་གྱི་ས་འགྲེལ་ལས། མཚན་ཉིད་ནི། བྱང་ཆུབ་སེམས་དཔའ་སློབ་པའི་ཡེ་ཤེས་མཚུངས་ལྡན་དང་བཅས་པ་ཡོན་ཏན་ཁྱད་པར་ཅན་གྱི་རྟེན་དུ་གྱུར་པ་སྟེ། དབུ་མ་འཇུག་པའི་རང་འགྲེལ་པར། བྱང་ཆུབ་སེམས་དཔའི་སྙིང་རྗེ་ལ་སོགས་པས་ཡོངས་སུ་བཟུང་བའི་ཡེ་ཤེས་ཁོ་ན་ཆར་བྱེ་བ་ལ་ནི་སའི་མིང་འཐོབ་སྟེ།ཡོན་ཏན་གྱི་རྟེན་དུ་གྱུར་པའི་ཕྱིར་རོ་ཞེས་པ་དང༌། ཞེས་ཚིག་ཟིན་ལ་འཕགས་པ་ལ་མ་སྦྱར་བ་དང༌། གོང་དུ་བཀོད་པ་ལྟར་བླང་དོར་རབ་གསལ་ལས་བྱང་འཕགས་ལ་སྦྱར་བ་དང༌། ཉ་ཊཱིཀ་ལས། མཚན་ཉིད་ནི། ཐེག་ཆེན་གྱི་སྙིང་རྗེ་ཆེན་པོ་སོགས་ཀྱིས་ཟིན་པའི་ཟག་མེད་ཡེ་ཤེས་གང་ཞིག ཐེག་ཆེན་གྱི་སྤངས་རྟོགས་ཡོན་ཏན་གྱི་རྟེན་དུ་གྱུར་པའོ། །འཇུག་པའི་བཤད་པར། བྱང་པ་རྣམས་ཀྱི་སྙིང་རྗེ། ཞེས་སོགས་གསུངས་པ་རྣམས་ཀྱི་དོན་ལ་དཔྱད་པར་བྱའོ། །ཡང་རྒྱན་ལས། ཡོན་ཏན་དཔག་མེད། ཅེས་དང༌། ཉ་ཊཱིཀ་ལས། ཡོན་ཏན་དཔག་ཏུ་མེད་པ་དང་ལྡན་པའི་ས་དེ་དག་ལ་ཡང་ཡང་ས་གོང་མ་གོང་མར་འགྲོ་བ་དང་ལྡན་པས་སའོ། །ཞེས་གསུངས་པ་ལ་ས་དང་པོ་སོགས་ཀྱི་ཡོན་ཏན་དཔག་མེད་ཡིན་མིན་བརྟག་པར་བྱའོ། །ཡང་ཉ་ཊཱིཀ་ལས། ཁ་ཅིག་ཆོས་ཉིད་ལ་ལྡོག་པའི་ཆ་ཤས་ཡོད་ཀྱི་རྫས་ཀྱི་ཆ་མེད་པའོ་ཞེ་ན། ཆོས་ཐམས་ཅད་ཀྱི་ཆོས་ཉིད་དེ་སྤྱིའི་མཚན་ཉིད་ཀྱིས་སོ་སོར་གཅད་དུ་མེད་པར་བཤད་པ་དང་འགལ་ཞིང་གཅིག་ཏུ་བཤད་པ་དང་ཡང་འགལ་ལོ། །ཡང་སྒྲོ་བཏགས་སུ་ཡང་འགྱུར་ཏེ། ལྡོག་པ་ཐ་དད་པའི་ཐ་དད་དེ་ཡིན་པས་སོ། །ཞེས་པའི་ཁྱབ་པ་སྡེ་བདུན་མདོ་དང་བཅས་པར་བཤད་དོ། །ཞེས་གསུངས་པ་ལ་ཆོས་ཉིད་ལྡོག་ཆ་སོ་སོར་ཡོད་མེད་དང༌། ཐ་དད་ཡིན་ན་སྒྲོ་བཏགས་ཡིན་དགོས་མིན་དཔྱད། ཡང་ཉ་ཊཱིཀ་ལས། ཡང་མཐོང་ལམ་པ་ཆོས་ཅན། མཆོག་གི་དོན་ལ་སོགས་པ་ལ་སྒྲིབ་པ་སྤངས་པར་ཐལ། དེ་འདྲའི་ཆོས་ཉིད་མངོན་སུམ་དུ་རྟོགས་པས་སོ་ཞེ་ན། ཁྱབ་པ་མེད་དེ། དེ་ལ་ཆོས་གོམས་པ་གསལ་བས་རང་སྟོབས་ཀྱིས་ངེས་པ་དངོས་སུ་འདྲེན་པའི་སྒོ་ནས་མངོན་སུམ་དུ་རྟོགས་ན་དེར་འགྱུར་གྱི་མངོན་སུམ་དུ་མཐོང་བ་ཙམ་གྱིས་དེར་མི་འགྱུར་ཏེ། ཞེས་གསུངས་པ་ལ། འོ་ན་ཆོས་ཉིད་དང་ཆོས་ཉིད་མཆོག་གི་དོན་སོགས་མངོན་སུམ་དུ་མཐོང་བ་ལ་གེགས་བྱེད་ཀྱི་སྒྲིབ་པ་མེད་པར་ཐལ་བར་འགྱུར་རོ་ཞེ་ན་ཅུང་ཟད་དཔྱད་རྒྱུ་སྣང་ངོ༌། །ཡང་ཉ་ཊཱིཀ་ལས། ས་དང་པོ་ནི་རྫོགས་པར་ཐོབ་པར་འགྱུར་རོ། །ཞེས་སོགས་ཀྱིས་ས་དེ་དང་དེའི་ཡོངས་སྦྱོང་གིས་ས་དེ་དང་དེ་མ་འཐོབ་པ་ཐོབ་བྱེད་མ་ཡིན་པར་རྫོགས་པར་ཐོབ་བྱེད་ཡིན་གསུངས་པ་མི་རིགས་པར་ཐལ། མདོ་ལུགས་མ་ལས། ཡོངས་སུ་སྦྱོང་བའི་ཆོས་དུ་ཞིག་གིས་ས་དང་པོ་འཐོབ་པར་འགྱུར་ཞེ་ན། ཡོངས་སུ་སྦྱོང་བ་རྣམ་བཅུ་ཡིས། །ས་ནི་དང་པོ་འཐོབ་འགྱུར་ཏེ། །ཞེས་གསུངས་པའི་ཕྱིར་ཟེར་ན་མ་ཁྱབ་སྙམ་མོ། །ཡང་མདོ་ལུགས་མ་ལས། ཉེས་པའི་ཆོས་དུ་ཞིག་ཆད་པས་བདུན་པ་འཐོབ་ཅེ་ན། བདག་དང་སེམས་ཅན་འཛིན་པ་དང༌། །ཞེས་པ་ནས། ཉི་ཤུ་གང་ལ་རྣམ་ཆད་པ། །དེ་ཡིས་ས་ནི་བདུན་པ་འཐོབ་པ་ཡིན་ནོ། །ཞེས་དང༌། ས་བདུན་པ་ལ་གནས་པ་དེས་ཡོན་ཏན་གྱི་ཆོས་དུ་ཞིག་རྫོགས་པར་བྱ་ཞེ་ན། རྣམ་ཐར་སྒོ་གསུམ་ཤེས་པ་དང༌། །ཞེས་ས་བདུན་པའི་ཡོངས་སྦྱོང་ཉི་ཤུ་པ་ཚན་གཉིས་གསུངས་པ་ལ་ཉ་ཊཱིཀ་གི་གསུང་ཟིན་ལྟར་ན་ཅུང་ཟད་བརྟག་པའི་གནས་སུ་སྣང་ངོ༌། །ཡང་དམན་པ་ས་བརྒྱད་འཇོག་ཚུལ་གསུངས་ཟིན་ཅུང་མི་འདྲ་བ་དུ་མ་ཡོད་དེ། ཉི་ཁྲི་ལས། དཀར་པོ་རྣམ་པར་མཐོང་བའི་ས་ལས་ཡང་དག་པར་འདའ། རིགས་ཀྱི་ས་དང༌། བརྒྱད་པའི་ས་དང༌། མཐོང་བའི་ས་དང༌། བསྲབས་པའི་ས་དང༌། འདོད་ཆགས་དང་བྲལ་བའི་ས་དང༌། བྱས་པ་རྟོགས་པའི་ས་དང༌། ཉན་ཐོས་ཀྱི་ས་དང༌། རང་སངས་རྒྱས་ཀྱི་ས་དང༌། བྱང་ཆུབ་སེམས་དཔའི་ས་ལས་ཡང་དག་པར་འདས་ཏེ།ཞེས་དང༌། མདོ་ལུགས་མ་ལས། དེ་ལ་དཀར་པོ་རྣམ་པར་མཐོང་བའི་ས་དང༌། རིགས་ཀྱི་ས་དང༌། བརྒྱད་པའི་ས་དང༌། མཐོང་བའི་ས་དང༌། བསྲབས་པའི་ས་དང༌། འདོད་ཆགས་དང་བྲལ་བའི་ས་དང༌། བྱས་པ་རྟོགས་པ་ཅན་གྱི་ས་སྟེ་བདུན་ནོ། །དཀར་པོ་རྣམ་པར་མཐོང་བའི་ས་ནི། མོས་པས་སྤྱོད་པའི་སའོ། །རིགས་ཀྱི་ས་ནི་བཟོད་པ་ཆེན་པོའི་སའོ། །ཞེས་དང༌། ལེ་བརྒྱད་མ་ལྟར་འབྱུང་བ་ལྟར། ཉི་ཁྲི་སྣང་བ་ལ་སོགས་པས་འདིར་དཀར་པོ་རྣམ་པར་མཐོང་བའི་ས་ཆད་ཅིང་ཉན་ཐོས་ཀྱི་ས་ཞེས་པ་གཅིག་བཙུད་ནས་དེ་ལ་རང་བཟོའི་བཤད་པ་ཅི་རིགས་སུ་བྱས༌། ཞེས་སོགས་དང༌། ཀུན་བཏུས་ས་འགྲེལ་ལས། ས་བརྒྱད་དང་སྦྱར་བ་ནི། དཀར་པོ་རྣམ་པར་མཐོང་བའི་ས་ནི་སྦྱོར་ལམ་དང༌། རིགས་ཀྱི་ས་ནི་ཆོས་མཆོག་དང༌། བརྒྱད་པའི་ས་ནི་རྒྱུན་ཞུགས་ལ་ཞུགས་པ་དང༌། མཐོང་བའི་ས་ནི་རྒྱུན་ཞུགས་དང༌། བསྲབས་པའི་ས་ནི་ཕྱིར་འོང་དང༌། འདོད་ཆགས་དང་བྲལ་བའི་ས་ནི་ཕྱིར་མི་འོང་དང༌། བྱས་པ་རྟོགས་པའི་ས་ནི་དགྲ་བཅོམ་དང༌། ཉན་ཐོས་ཀྱི་ས་ནི་ཞུགས་པ་ཕྱི་མ་གསུམ་དུ་གསུངས་སོ། །ཞེས་དང༌། ཉ་ཊཱིཀ་ལས། དཀར་ས་ནི་མོས་སྤྱོད་ཀྱི་ས། རིགས་ས་ནི་བཟོད་པ་ཆེན་པོའི་ས་ཞེས་བྱའོ་ཞེས་ཆེ་བར་རོ། །འབུམ་ཊཱིཀ དྲོད་རྩེ་ཐོབ་པ་ན་རྣམ་བྱང་གི་ཆོས་དཀར་པོ་མཐོང་བས་དཀར་ས། རིགས་ས་ནི་བཟོད་མཆོག་ཐོབ་ཚེ་བདག་མེད་རྟོགས་པས་བྱང་ཆུབ་གསུམ་གྱི་རིགས་དང་ལྡན་པའོ། །ཞེས་དང༌། ཐུབ་དགོངས་སུ། དཀར་པོ་མཐོང་བའི་ས་ལྷག་མཐོང་འབའ་ཞིག་གི་གནས་སྐབས་ངེས་འབྱེད་ཆ་མཐུན་ལ་དང༌། རིགས་ས་ཆོས་མཆོག་གི་གནས་སྐབས་སོ། །ཞེས་སོ། །དེས་ན་ཉན་ཐོས་ཀྱི་དཀར་ས་ནས་བྱས་རྟོགས་བར་བདུན་པོ་དེ་ཉན་ཐོས་ཀྱི་ས་དང་ཞེས་སྦྱོར་བ་མདོའི་དོན་དངོས་ཡིན་ནའང་འགྲེལ་བྱེད་དག་འཁྲུལ་བར་ཟད་དོ། །ཞེས་དང༌། ཡུམ་གསུམ་གནོད་འཇོམས་༢༣༣ལས། དཀར་པོ་རྣམ་པར་མཐོང་བའི་ས་ཞེས་བྱ་བ་ནི། མོས་པས་སྤྱོད་པའི་སའོ། །རིགས་ཀྱི་ས་ཞེས་བྱ་བ་ནི་བཟོད་པ་ཆེན་པོའི་སའོ། །ཞེས་དང༌། དེ་༣༦༦ལས། དཀར་པོ་རྣམ་པར་མཐོང་བའི་ས་ནི་ལྷག་མཐོང་གི་ཚེའོ། །རིགས་ཀྱི་ས་ནི་འཇིག་རྟེན་པའི་ཆོས་ཀྱི་མཆོག་གོ །ཞེས་སོགས་གསུངས་པས་སོ། །ཉ་ཊཱིཀ་ལས། ས་དགུ་གང་ན། འདིར་མདོར་དཀར་པོ་རྣམ་པར་མཐོང་བའི་ས་བཤད། བྱས་པ་རྟོགས་པ་མི་སྣང་བར་ཉན་ཐོས་ཀྱི་ས་དང་ཞེས་སོ། །གཞན་འདྲའོ། །ཞེས་མདོར་བྱས་པ་རྟོགས་པ་མི་སྣང་བཤད་པ་ལ་གོང་དུ་བཀོད་པའི་ཉི་ཁྲིའི་ལུང་གིས་གནོད་པ་ཡོད་མེད་བརྟག་དགོས་སོ། །ཡང་ཉ་ཊཱིཀ་ལས། དེས་ན་དགུ་བའི་ཡོངས་སྦྱོང་བཅུ་གཉིས་པོ་རྫོགས་པར་སྦྱངས་པ་ཉིད་བཅུ་བའི་ཡོངས་སྦྱོང་ཡིན་ནོ། །ཞེས་གསུངས་པ་ལ། ས་དགུ་བའི་ཡོངས་སྦྱོང་ས་དགུ་བའི་རྒྱུད་ཀྱིས་བསྡུས་པ་ཡིན་མིན་དང༌། དེ་རྫོགས་པ་རྒྱུན་མཐའི་དུས་ཡིན་མིན་སོགས་དཔྱད་ཚུལ་གྱི་རིགས་ལམ་ཞིག་ཡོད་དོ། །