གསུམ་པ་རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས།
གསུམ་པ་རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས་ལ་གསུམ།
དང་པོ་སྔ་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ནི། དཔེར་ན། སྐྱེ་འཇིག་བྱེད་པ་དེ། སྔ་རྒོལ་གྲངས་ཅན་པས་ཕྱི་རྒོལ་ནང་བ་སངས་རྒྱས་པ་ལ་བློ་བདེ་སེམས་མེད་དུ་སྒྲུབ་པར་བྱེད་པའི་སྔ་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པའོ། །དེ་ཡིན་པའི་རྒྱུ་མཚན་ནི། སྔར་མེད་གསར་དུ་སྐྱེ་བ་དང༌། སྐད་ཅིག་གིས་འཇིག་པ་བློ་བདེའི་སྟེང་དུ་ཚད་མས་མ་གྲུབ་པའི་ཕྱིར་རོ། །གཉིས་པ་ཕྱི་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ནི། དཔེར་ན། ཤུན་པ་བཤུས་ན་འཆི་བ་དེ། སྔ་རྒོལ་གཅེར་བུ་པས་སངས་རྒྱས་པ་ལ་ཤིང་སེམས་ལྡན་དུ་སྒྲུབ་པར་བྱེད་པའི་ཕྱི་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ཡིན་ནོ། །འདི་ཕྱི་རྒོལ་ལ་ལྟོས་ནས་མ་གྲུབ་པ་ཡིན་ཏེ། སྲོག་འགག་པ་འཆི་བའི་དོན་གང་ཞིག སངས་རྒྱས་པས་ཤིང་ལ་སྲོག་དང་རྣམ་ཤེས་འགག་པ་མ་གྲུབ་པའི་ཕྱིར། གསུམ་པ་སྔ་རྒོལ་ཕྱི་རྒོལ་གཉིས་ཀ་ལ་ལྟོས་ནས་མ་གྲུབ་པའི་གཏན་ཚིགས་ནི། དཔེར་ན། བྱས་པ་དེ། སྔ་རྒོལ་ཕྱི་རྒོལ་གཉིས་ཀས་སྒྲ་བྱས་མ་བྱས་གང་དུ་མ་ངེས་པ་ལ་སྒྲ་མི་རྟག་པར་སྒྲུབ་པར་བྱེད་པའི་རྒོལ་ཕྱི་རྒོལ་གཉིས་ཀ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པའོ། །འདི་ལ་གཏན་ཚིགས་རིགས་པའི་དོན་བསྡུས་སུ། སྒྲ་ཆོས་ཅན། རྟག་སྟེ། མིག་ཤེས་ཀྱི་བཟུང་བྱ་ཡིན་པས་སོ། །ཞེས་གསུངས་སོ། །
དེ་ལྟར་ན་དོན་ལ་ལྟོས་ཏེ་མ་གྲུབ་པའི་གཏན་ཚིགས་བརྒྱད་དང༌། བློ་ལ་ལྟོས་ནས་མ་གྲུབ་པའི་གཏན་ཚིགས་བཞི་དང༌། རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས་གསུམ་དང་མ་གྲུབ་པའི་གཏན་ཚིགས་བཅོ་ལྔ་ཡིན་ནོ། །གཏན་ཚིགས་རིགས་པའི་བསྡུས་དོན་དུ་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་མ་བགྲང་བར་མ་གྲུབ་པའི་གཏན་ཚིགས་བཅུ་བཞི་གསུངས་ཏེ། དེ་ལས། གསུམ་པ་མ་གྲུབ་པའི་རྟགས་ལ། །རྒོལ་དང་ཕྱི་རྒོལ་གཉིས་ཀ་ལ། །མ་གྲུབ་པ་དང་རྣམ་པ་གསུམ། །རྟགས་དང་ཆོས་ཅན་གཞི་མ་གྲུབ། །རྟགས་དང་ཆོས་ཅན་འབྲེལ་བ་ལ། །ཐེ་ཚོམ་ཟ་བ་རྣམ་པ་གསུམ། །གཞི་ཆོས་རྟགས་ཐ་དད་མེད་གསུམ། །རྟགས་ཀྱི་ཕྱོགས་གཅིག་ཆོས་ཅན་ལ། །མ་གྲུབ་པ་དང་ཆོས་ཅན་གྱི། །ཕྱོགས་གཅིག་ལ་ནི་རྟགས་མ་གྲུབ། །ཤེས་འདོད་མེད་དང་བཅུ་བཞིའོ། །ཞེས་གསུངས་སོ། །རི་བོང་རྭ་ཡོད་མེད་གང་དུ་མི་ཤེས་པའི་རྒོལ་ཕྱི་རྒོལ་ལ་རི་བོང་རྭ་དེ། རི་བོང་རྭ་རི་བོང་རྭར་སྒྲུབ་པར་བྱེད་པའི་མ་གྲུབ་པའི་གཏན་ཚིགས་གང་དང་གང་ཡིན་མིན་དང༌། མ་གྲུབ་པའི་གཏན་ཚིགས་བཅོ་ལྔའི་ནང་ལ་བྱས་པ་རྟགས་སུ་བཀོད་པའི་སྦྱོར་སྐོར་གང་རུང་གི་རྟགས་གང་དང་གང་ཡོད་སོགས་དཔྱད་པར་བྱའོ། །