གཉིས་པ་རྫོགས་རིམ།
གཉིས་པ་རྫོགས་རིམ་ནི།
ཀླུ་སྒྲུབ་ཡབ་སྲས་ཀྱི་བཞེད་པས་རྡོ་རྗེའི་བཟླས་པའི་རིམ་པ། སེམས་ལ་དམིགས་པའི་རིམ་པ། བདག་བྱིན་རླབས་པའི་རིམ་པ། མངོན་པར་བྱང་ཆུབ་ཀྱི་རིམ་པ། ཟུང་འཇུག་གི་རིམ་པ་སྟེ་རིམ་པ་ལྔར་བཞེད་ལ། སློབ་དཔོན་སངས་རྒྱས་ཡེ་ཤེས་ཞབས་ནི་སྙིང་གར་མི་ཤིགས་པའི་ཐིག་ལེ། གསང་བར་རྫས་ཀྱི་ཐིག་ལེ། སྣ་སྒོར་སྤྲུལ་པའི་ཐིག་ལེ། ཆོས་ཉིད་ཡེ་ཤེས་ཀྱི་ཐིག་ལེ་སྟེ་ཐིག་ལེའི་རྣལ་འབྱོར་བཞིར་འདུས་པར་བཞེད་ལ། སློབ་དཔོན་རྡོ་རྗེ་དྲིལ་བུ་པའི་བཞེད་པ་ནི། བདག་བྱིན་རླབས་པའི་རིམ་པ། སྣ་ཚོགས་རྡོ་རྗེའི་རིམ་པ། ནོར་བུ་འགེངས་པའི་རིམ་པ། ཛ་ལནྡྷ་རའི་རིམ་པ། བསམ་མི་ཁྱབ་ཀྱི་རིམ་པ་སྟེ་བདེ་མཆོག་རིམ་ལྔར་གྲགས་པ་ལྟར་ཡིན། སློབ་དཔོན་ནག་པོ་སྤྱོད་པ་ནི་རྒྱུད་ཀྱི་རིམ་པ། སྔགས་ཀྱི་རིམ་པ། ཡེ་ཤེས་ཀྱི་རིམ་པ། གསང་བའི་རིམ་པ་སྟེ་རིམ་པ་བཞིར་ལམ་ཐམས་ཅད་བསྡུས་པར་བཞེད་དོ། །