བཤད་པའི་དགེ་བ་བསྔོ་བ།
གསུམ་པ། བཤད་པའི་དགེ་བ་བསྔོ་བ།
དེ་ལྟར་རྒྱལ་བའི་གསུང་རབ་ཟབ་མོ་བཟང་དགུའི་ངེས་དོན་མཐར་ཐུག་ནི། །རིགས་གསུམ་མགོན་སོགས་རྒྱལ་སྲས་རྣམས་ཀྱི་ཞལ་གྱི་གདམས་པ་ཟབ་མོ་ཡིས། །གསལ་བར་མཛད་ལས་རྗེ་བཙུན་བླ་མའི་དྲིན་གྱིས་རྟོགས་པ་གང་ཡིན་འདི། །རི་ཁྲོད་དབེན་པར་ཟབ་མོའི་རྣལ་འབྱོར་སྤྱོད་པ་རྣམས་ཀྱི་རི་ཆོས་ཏེ། །རྣམ་པར་དག་པའི་མདོ་རྒྱུད་བསྟན་བཅོས་ཁྱད་པར་འཕགས་པ་ཐམས་ཅད་ཀྱི། །ངེས་དོན་ཆུ་བོ་མ་ལུས་འདུས་ཕྱིར་འདི་ནི་ངེས་དོན་རྒྱ་མཚོ་ཡང་ཡིན་ལ། །གཞི་ལམ་འབྲསབུ་ཇི་སྙེད་པ་དང་ལྟ་སྒོམ་སྤྱོད་པའང་ཇི་སྙེད་པའི། །མཐར་ཐུག་ཐུན་མོང་མིན་པ་སྟོན་ཕྱིར་འདི་མིང་དོན་དང་ལྡན་པ་ལགས། ། དགོངས་པ་ཟབ་མོ་ངེས་པར་འགྲེལ་སླད་འདི་ནི་རྒྱལ་བའི་དགོངས་འགྲེལ་ཏེ། །རྡོ་རྗེའི་ཚིག་ཀུན་ངེས་པར་འགྲེལ་སླད་རྡོ་རྗེའི་ཚིག་གི་མདུད་འགྲོལ་ཡང༌། །ཆོས་ཉིད་ཟབ་མོ་གསལ་བར་སྟོན་ཕྱིར་བདེ་གཤེགས་སྙིང་པོའི་སྒྲོན་མེ་དང༌། །ལུང་རིགས་མན་ངག་ཟབ་དགུ་འདུས་ཕྱིར་ཡིད་བཞིན་ནོར་བུའི་མཆོག་ཀྱང་ཡིན། །དེ་སླད་འདི་ན་རང་རིགས་རྒན་པོའི་ངག་ཙམ་དབང་དུ་བྱེད་པ་དང༌། དང་པོར་གང་ཐོས་དེ་ལ་ཞེན་སླད་ཕྲ་མ་སྔ་བཙན་དབང་སོང་དང༌། །རྟོན་པ་བཞི་བྲལ་འདོད་མི་མང་བས་བདེན་པར་འཇོག་པའི་མི་རྣམས་དང༌། །མཐུན་པ་དཀའ་མོད་སྲས་བཅས་རྒྱལ་བའི་དགོངས་པ་དང་མཐུན་དོན་དང་མཐུན། །འདི་ལ་གང་གིས་ཐུགས་དགོངས་བཟང་པོས་ཡང་ཡང་བསྐུལ་བར་མཛད་རྣམས་དང༌། །མཐུན་པའི་གྲོགས་དང་ལོངས་སྤྱོད་བཟང་པོ་འབུལ་བར་མཛད་པ་ལ་སོགས་པ། །འགྲོ་བ་ཀུན་གྱིས་དྲི་མ་མེད་པའི་མདོ་རྒྱུད་མན་ངག་ཟབ་མོའི་དོན། །མཐོང་ཞིང་རྟོགས་ནས་མྱུར་བར་ཐོབ་སྟེ་གཞན་དོན་རླབས་ཆེན་བྱེད་པར་ཤོག །གནས་སྐབས་ཀུན་དུ་སངས་རྒྱས་དགྱེས་པའི་དད་བརྩོན་ཤེས་རབ་སྙིང་རྗེ་དང༌། །སྙིང་སྟོབས་ཡིད་གཞུངས་ངོ་ཚ་ཁྲེལ་ཡོད་འཚོ་བ་མཆོག་དང་གཏོང་ཕོད་དང༌། །ཚུལ་ཁྲིམས་ཏིང་འཛིན་དམ་ཚིག་བཞི་དྲུག་བརྒྱད་དང་བཅུ་དང་བཅུ་དྲུག་གི །སྤྱོད་པ་བཟང་པོས་རྟག་ཏུ་གནས་གྱུར་ནམ་ཡང་ཉམས་པར་མ་གྱུར་ཅིག །འདི་ནི་སྐྱེས་བུ་དམ་པ་དུ་མས་བསྐུལ་བ་ལ་བརྟེན་ནས་རྒྱལ་ཁམས་པ་རྟོན་པ་བཞི་ལྡན་གྱིས་ངེས་དོན་ཟབ་མོ་མཐར་ཐུག་གི་ལུང་རིགས་མན་ངག་ཇི་ལྟ་བ་བཞིན་ཇོ་ནང་དཔལ་གྱི་གནས་ཆེན་དུ་བཀོད་པ་སྟེ། །བློ་ལྡན་གཟུ་བོར་གནས་ཤིང་ངེས་དོན་ཆོས་ཉིད་བསྒོམས་པའི་ཉམས་མྱོང་ཅན་མ་ཡིན་པ་རྣམས་ལ་བསྟན་དུ་མི་རུང་བའི་བཀའ་རྒྱ་དམ་པོ་ཡོད་པར་གསུངས་སོ། །
ཐ་མར་དགེ་བ་མཇུག་གི་དོན།
སྨྲས་པ། རྟོན་པ་བཞི་ལྡན་ཀུན་མཁྱེན་ཇོ་ནང་བའི། །ངེ༷ས་དོ༷ན་རྒྱ༷་མཚོ༷འི་ལུང་རིགས་རྣམ་དག་རྣམས། །སླར་ཡང་ཅུང་ཟད་བསྡུས་ཏེ་གཞུང་འདིར་བཀོད། །མཁས་པ་གཟུར་གནས་བློ་ལྡན་སྤྱོད་ཡུལ་ངེས། །དེང་སང་ལྟ་བའི་སྙིགས་མ་བདོ་གྱུར་བས། །ཡང་དག་ལྟ་སྒོམ་སྤྱོད་པ་ལོག་རྟོག་གི །དུག་ཆུས་མྱོས་པའི་ལོག་བཤད་བགྲང་ལས་འདས། །དེ་སླད་ངེས་དོན་བདུད་རྩིའི་གཞུང་འདི་བསྒྲུབས། །ཆོས་ཀུན་མཁྱེན་པའི་འདབ་གཤོག་རྒྱས་པ་རྣམས། །འཆད་རྩོད་རྩོམ་པའི་མཁའ་མཐར་བགྲོད་མཐོང་ནས། །ཚིག་ཙམ་བརྐུ་བའི་ཤ་སྦྲང་ཕྲག་དོག་གིས།སྤྱི་བརྡོལ་འདབ་གཉིས་བསྐྱོད་པ་ཨེ་མ་མཚར། །གཞན་ཕྱོགས་རྟོགས་པའི་ནམ་ལངས་མ་གྱུར་བར། །དགག་པའི་ཉི་མ་ཤར་བ་ག་ལ་སྲིད། །ཐོས་ཆུང་མངོན་རློམ་རྨོངས་བའི་མུན་སྡུག་གིས། །ཡང་དག་ལྟ་བའི་དབང་པོ་ཉམས་བྱེད་མཚར། །ཟབ་མོའི་དེ་ཉིད་ཉམས་སུ་མ་མྱོང་བའི། །རྟོག་གེའི་སྐྱེ་བོར་ས་འོག་གཏེར་དང་མཚུངས། །དེ་ཕྱིར་བསྡུས་དོན་ལེགས་པར་བཤད་པ་འདི། །གཞན་ལ་ཕན་པ་འབྱུང་བ་སྲིད་མཐའ་ཙམ། །འོན་ཀྱང་ངེས་དོན་གསུང་རབ་ལོག་སྨྲ་ལ། །སྙིང་ནས་བརྩེ་དང་རང་བློ་སྦྱང་ཕྱིར་དུ། །བསྡུས་དོན་ངེ༷ས་དོ༷ན་མཛེ༷ས་པའི་རྒྱ༷ན་གྱི་མཆོག །ཚ༷ངས་པ༷འི་སྒྲ༷་དབྱ༷ངས་ཇི་བཞིན་གཏམ་འདི་སྨྲས། །འདིར་འབད་དགེ་བའི་རྣམ་དཀར་ཆུ་ཕྲན་ཉིད། །དུས་གསུམ་བསགས་པའི་མཚོ་ཆེན་དང་འདྲེས་ཏེ། །ཐུབ་བསྟན་པད་དཀར་ཚལ་ལ་ཉེར་དྲངས་ནས། །ངེས་དོན་བསྟན་པའི་འབྲས་བཟང་སྨིན་པར་ཤོག །སྤྱན་རས་གཟིགས་མགོན་བསྟན་སྲུང་སྐུར་བཞེངས་པའི། །དཔལ་མགོན་དྲཀྴད་མགོན་པོ་འཁོར་བཅས་ཀྱིས། །ངེས་གསང་གཞན་སྟོང་དབུ་མའི་ལུང་རྟོགས་བསྟན། །ཕྱོགས་ཀུན་དར་རྒྱས་ཡུན་རིང་གནས་པར་མཛོད། །ཅེས་རི་ཆོས་ངེས་དོན་རྒྱ་མཚོའི་བསྡུས་དོན་ངེས་དོན་མཛེས་རྒྱན་ཚངས་པའི་སྒྲ་དབྱངས་ཞེས་བྱ་བ་འདི་ཉིད་བློ་ལྡན་དུ་མས་ཡང་ཡང་བསྐུལ་བའི་ངོར་བཙུན་པ་ངག་དབང་དངོས་གྲུབ་དཔལ་གྱིས་རབ་གནས་མེ་ཕག་ལོའི་དབོ་ཟླ་བའི་ལེགས་པ་བརྒྱད་འཛོམས་འཕྲོད་སྦྱོར་ཕུན་སུམ་ཚོགས་པའི་ཚེས་ཉེར་གཉིས་ལ་དབུ་བཟུང་ནས་ཉིན་གསུམ་གྱི་རིང་ལ་རྫོགས་པར་བསྡུས་ཏེ་སྦྱར་བའོ། །འདིས་ཀྱང་རྒྱལ་བསྟན་སྤྱི་དང་ངེས་དོན་བསྟན་པ་ཡུན་རིང་དུ་གནས་པར་གྱུར་ཅིག །མངྒ་ལཾ། བྷ་ཝཾ་ཏུ།། །།