དུར་ཁྲོད་བརྒྱད་ཀྱི་བཤད་པ།
རྣལ་འབྱོར་པས་མཛད།
རྒྱ་གར་སྐད་དུ། ཨཥྚ་ཤྨ་ཤ་ནཱ་ཁྱ་ཏ་ནཱ་མ། བོད་སྐད་དུ། དུར་ཁྲོད་བརྒྱད་ཀྱི་བཤད་པ་ཞེས་བྱ་བ། བཅོམ་ལྡན་འདས་འཇིག་རྟེན་དབང་ཕྱུག་ལ་ཕྱག་འཚལ་ལོ། །དེ་ལ་དུར་ཁྲོད་བརྒྱད་བཤད་པར་བྱ་སྟེ། ཤར་ཕྱོགས་ཀྱི་དུར་ཁྲོད་ནི་གཏུམ་དྲག་ཅེས་བྱ་སྟེ། དེར་ཨ་རུ་རའི་ཤིང་ལ་བདག་ཉིད་ཆེན་པོ་གཏུམ་དྲག་
ཅེས་བྱ་བ་མདོག་དཀར་པོ་གླང་པོ་ཆེའི་མདོག་ཅན་ནོ། །ཤིང་གི་དྲུང་དུ་ནི་ཕྱོགས་ཀྱི་བདག་པོ་དབང་པོ་མདོག་སེར་པོ་ལག་པ་གཡས་གཡོན་ན་རྡོ་རྗེ་དང་སྡིགས་མཛུབ་ཐོགས་པ་གླང་པོ་ཆེ་ས་སྲུང་དཀར་པོ་ལ་ཞོན་པ་སྟེ། དེར་ཀླུ་བ་སུ་ཀི་མདོག་སེར་པོ་དང༌། སྤྲིན་སྒྲ་སྒྲོགས་ཞེས་བྱ་བ་མདོག་སྔོན་པོའོ། །བྱང་ཕྱོགས་ཀྱི་དུར་ཁྲོད་ནི། ཚང་ཚིང་ཅན་ཞེས་བྱ་བ་སྟེ། དེར་ནི་བྱང་ཆུབ་ཀྱི་ཤིང་ལ། བདག་ཉིད་ཆེན་པོ་བ་ག་ར་ཞེས་བྱ་བ། མི་མགོའི་གདོང་ཅན། མདོག་སེར་པོའོ། །ཤིང་གི་དྲུང་དུ་ནི་ཕྱོགས་ཀྱི་བདག་པོ་ལུས་ངན་མདོག་སེར་པོ། ལག་པ་གཡས་གཡོན་གྱིས་མི་འཇིགས་པ་དང༌། གྷ་ཧ་ཐོགས་པ་ཐུང་ཞིང་གཏེར་ལ་བཞོན་པ་སྟེ། དེར་ཀླུ་འཇོག་པོ། མདོག་དམར་པོ་དང༌། སྤྲིན་རྨུགས་པ་ཞེས་བྱ་བ་མདོག་དཀར་པོའོ། །ནུབ་ཕྱོགས་ཀྱི་དུར་ཁྲོད་ནི་འབར་བས་འཁྲིགས་པའི་ཀེང་རུས་ཞེས་བྱ་སྟེ། དེར་ཤིང་མྱ་ངན་མེད་ལ་བདག་ཉིད་ཆེན་པོ་འབར་བས་འཁྲིགས་པའི་ཀེང་རུས་ཞེས་བྱ་བ། ཆུ་སྲིན་གྱི་མགོ་ཅན། མདོག་སེར་པོའོ། །ཤིང་གི་དྲུང་དུ་ནི་ཕྱོགས་ཀྱི་བདག་པོ་བ་རུ་ན་མདོག་དཀར་པོ་ཆུ་སྲིན་ལ་ཞོན་པ། ལག་པ་གཡས་གཡོན་གྱིས་སྡིགས་མཛུབ་དང་ཞགས་པ་ཐོགས་པ་སྟེ། དེར་ཀླུ་སྟོབས་ཀྱི་རྒྱུ་མདོག་ལྗང་གུ་དང༌། སྤྲིན་དྲག་པོ་ཞེས་བྱ་བ་མདོག་དཀར་པོའོ། །ལྷོ་ཕྱོགས་ཀྱི་དུར་ཁྲོད་ན་འཇིགས་སྡེ་ཞེས་བྱ་སྟེ། དེར་བ་རུ་རའི་ཤིང་ལ་བདག་ཉིད་ཆེན་པོ་འཇིགས་སྡེ་ཞེས་བྱ་བའི་མིའི་གདོང་ཅན་མདོག་ནག་པོའོ། །ཤིང་གི་དྲུང་དུ་ནི་ཕྱོགས་ཀྱི་བདག་པོ་གཤིན་རྗེ་མདོག་ནག་པོ་ལག་པ་གཡས་གཡོན་གྱིས་དབྱིག་པ་དང་ཞགས་པ་ཐོགས་པ་མ་ཧེ་ལ་ཞོན་པ་སྟེ། དེར་ཀླུ་པད་མདོག་དཀར་པོ་དང༌། སྤྲིན་འཁྲིགས་པ་ཞེས་བྱ་བ་མདོག་སེར་པོའོ། །མེ་ལྷའི་མཚམས་ཀྱི་དུར་ཁྲོད་ནི་དཔལ་གྱི་ནགས་ཞེས་བྱ་སྟེ། དེར་ཤིང་ཀ་རཉྫ་ཞེས་བྱ་བ་ལ་བདག་ཉིད་ཆེན་པོ་དཔལ་གྱི་ནགས་ཞེས་བྱ་བ་རའི་གདོང་ཅན་མདོག་དཀར་པོའོ། །ཤིང་གི་དྲུང་དུ་ནི་ཕྱོགས་ཀྱི་བདག་པོ་བྱིན་ཟ་མདོག་དམར་པོ་ལག་པ་གཡས་གཡོན་ན་བགྲང་ཕྲེང་དང་རིལ་བ་སྤྱི་བླུགས་ཐོགས་པ་རའི་སྟེང་ལ་ཞོན་པ་སྟེ། དེར་ཀླུ་པདྨ་ཆེན་པོ་མདོར་དཀར་པོ་དང༌། སྤྲིན་འཁྱིལ་པ་ཞེས་བྱ་བ་
མདོག་དམར་པོའོ། །བདེན་བྲལ་གྱི་དུར་ཁྲོད་ནི་འཇིགས་པའི་མུན་པ་ཞེས་བྱ་བ་སྟེ། དེར་ཨུ་དུམྺཱ་རའི་ཤིང་ལ་བདག་ཉིད་ཆེན་པོ་འཇིགས་པ་ཞེས་བྱ་བ་མ་ཧེའི་གདོང་ཅན་མདོག་ནག་པོའོ། །ཤིང་གི་དྲུང་དུ་ནི་ཕྱོགས་ཀྱི་བདག་པོ་སྲིན་པོ་བདེན་བྲལ་མདོག་ནག་པོ་ལག་པ་གཡས་གཡོན་གྱིས་སྡིགས་མཛུབ་དང་མི་མགོ་ཐོགས་པ་མི་རོ་ལ་ཞོན་པ་སྟེ། དེར་ཀླུ་མཐའ་ཡས་མདོག་སྔོན་པོ་དང༌། སྤྲིན་སྒྲ་སྒྲོགས་ཞེས་བྱ་བ་མདོག་སེར་པོའོ། །རླུང་གི་མཚམས་ཀྱི་དུར་ཁྲོད་ནི་ཀཱི་ལི་ཀཱི་ལར་སྒྲོགས་པ་ཞེས་བྱ་སྟེ། དེར་ནི་ཤིང་སྲིད་སྒྲུབ་ཅེས་བྱ་བ་ལ་བདག་ཉིད་ཆེན་པོ་ཀཱི་ལི་ཀཱི་ལར་སྒྲོགས་པ་ཞེས་བྱ་བ་མ་ཧེའི་གདོང་ཅན་དུ་བའི་མདོག་ཅན་ནོ། །ཤིང་གི་དྲུང་དུ་ནི་ཕྱོགས་ཀྱི་བདག་པོ་རླུང་ལྷ་མདོག་དཀར་པོ་ལག་པ་གཡས་གཡོན་གྱིས་རླུང་གི་སྣམ་བུ་འཛིན་པ་རི་དགས་ཤ་བ་ལ་ཞོན་པ་སྟེ། དེར་ཀླུ་རིགས་ལྡན་ཁྲ་བོ་དང་སྤྲིན་འབེབས་པ་ཞེས་བྱ་བ་མདོག་ལྗང་གུའོ། །བྱང་ཤར་གྱི་དུར་ཁྲོད་ནི་ཧ་ཧར་དགོད་པ་ཞེས་བྱ་བ་སྟེ། དེར་ཤིང་ནྱ་གྲོ་དྷ་ལ་བདག་ཉིད་ཆེན་པོ་ཧ་ཧར་དགོད་པ་ཞེས་བྱ་སྟེ་ཁྱུ་མཆོག་གི་གདོང་ཅན་མདོག་དཀར་པོའོ། །ཤིང་གི་དྲུང་དུ་ནི་ཕྱོགས་ཀྱི་བདག་པོ་དབང་ལྡན་མདོག་སྔོ་སྐྱ་ལག་པ་གཡས་གཡོན་གྱིས་མདུང་རྩེ་གསུམ་པ་དང་ཐོད་པ་ཐོགས་པ་ཁྱུ་མཆོག་ལ་ཞོན་པ་སྟེ། དེར་ཀླུ་དུང་སྐྱོང་སེར་པོ་དང༌། སྤྲིན་གཏུམ་མོ་ཞེས་བྱ་བ་མདོག་སྣ་ཚོགས་པའོ། །ཕྱོགས་ཀྱི་བདག་པོ་ཐམས་ཅད་ནི་མིའི་གདོང་ཅན་ལག་པ་གཉིས་པའོ། །ཕྱོགས་ཀྱི་ཀླུ་རྣམས་ནི་གདེངས་ཀ་བདུན་པ་མཆེ་བ་ཡིད་ཙམ་གཙིགས་ཤིང་འདོད་པའི་གཟུགས་ཅན་ནོ། །སྤྲིན་རྣམས་ཀྱང་ཁ་དོག་སྣ་ཚོགས་པའི་མདོག་ཅན་ནོ། །གཏུམ་དྲག་དང་ནི་ཚང་ཚིང་དང༌། །འབར་བས་འཁྲིགས་པའི་ཀེང་རུས་ཏེ། །འཇིགས་སྡེ་རྣམས་ནི་ཤར་ལ་སོགས། །ཕྱོགས་སུ་ཡོངས་སུ་བསྐོར་ཏེ་གནས། །ཧ་ཧར་དགོད་པ་དང་ལྡན་ཏེ། །དཔལ་གྱི་ནགས་ན་བྱིན་ཟའོ། །འཇིགས་པའི་མུན་པ་བདེན་བྲལ་ཏེ། །རླུང་མཚམས་ཀཱི་ལི་ཀཱི་ལར་སྒྲོགས། །འདི་ནི་དུར་ཁྲོད་བརྒྱད་པོ་སྟེ། །དཔལ་ལྡན་རྡོ་རྗེ་རྣལ་འབྱོར་པས། །རྡོ་རྗེ་ར་བའི་ནང་ལོགས་སུ། །རབ་ཏུ་འབད་དེ་བསམ་པར་བྱ། །སློབ་
དཔོན་རྣལ་འབྱོར་པས་མཛད་པའི་དུར་ཁྲོད་བརྒྱད་ཀྱི་བཤད་པ་རྫོགས་སོ།། །།རྒྱ་གར་གྱི་མཁན་པོ་བུདྡྷ་ཀ་ར་བཛྲ་དང༌། བོད་ཀྱི་ལོ་ཙཱ་བ་འགོས་ཀྱིས་བསྒྱུར་བའོ།།