རྙིང་མ་བ།
༡ རྙིང་མའི་ཆོས་རྒྱུན་བརྒྱུད་ཚུལ། རྙིང་མའི་ཆོས་ལུགས་ནི། བོད་དུ་ནང་བའི་གསང་སྔགས་ཀྱི་ཆོས་བྱུང་བའི་ཐོག་མ་ཡིན་ལ། མདོ་ཕྱོགས་ལ་རྙིང་མ་ཞེས་པའི་ཐ་སྙད་འདི་མ་བྱུང་ལ། གསང་སྔགས་ཀྱི་སྒོ་ནས་བཞག་པ་ཡིན། དེ་ཡང་བཤད་སྲོལ་མི་འདྲ་བ་ཡོད་ཀྱང་གཙིགས་ཆེ་བ་ནི། པཎྚི་ཏ་སྨྲི་ཏི་བྱོན་པ་ཡན་ཆད་དུ་བསྒྱུར་བའི་གསང་སྔགས་ཀྱི་གཞུང་རྣམས་ལ་རྙིང་མ་དང་། མངའ་རིས་ལོ་ཙཱ་བ་རིན་ཆེན་བཟང་བོ་བྱོན་པ་མན་ཆད་དུ་བསྒྱུར་བའི་རྒྱུད་རྣམས་ལ་སྔགས་གསར་མ་ཟེར། བརྒྱུད་པའི་རིམ་པ་ལ། རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་གསུམ་དང་། ཡང་། བཀའ་བབས་ལུང་བསྟན་གྱི་བརྒྱུད་པ། ལས་འཕྲོ་གཏེར་གྱི་བརྒྱུད་པ། སྨོན་ལམ་གཏད་རྒྱའི་བརྒྱུད་པ་སྟེ་དྲུག་ཏུ་འང་བཤད་ཀྱང་། འདིར་བརྗོད་པར་བྱ་བ་ནི། རིང་བརྒྱུད་བཀའ་མ། ཉེར་བརྒྱུད་གཏེར་མ། ཟབ་མོ་དག་སྣང་གི་བརྒྱུད་པ་སྟེ་གསུམ་གྱི་སྒོ་ནས་འཆད་ན།
རིང་བརྒྱུད་བཀའ་མ་བྱུང་ཚུལ་ནི། པཎ་ཆེན་བི་མ་ལ་མི་ཏྲས་རྨ་རིན་ཆེན་མཆོག་དང་། གཉགས་ཛཉ་ན་ཀུ་མ་ར་གཉིས་ལ་སྒྱུ་འཕྲུལ་གསང་བ་སྙིང་བོའི་སྐོར་བཤད་ཅིང་བསྒྱུར་བས། སློབ་མ་དེ་གཉིས་ལས་ཡང་སློབ་མང་བོ་བརྒྱུད་དེ་སྤེལ་བ་དང་། ཡང་སློབ་དཔོན་དྷ་ན་རཀྵ་རས་བལ་བོ་དྷ་རྨ་བྷོ་དྷི་ལ་རྩ་རྒྱུད་དང་། བཤད་རྒྱུད་སོགས་བཤད། བྲུ་ཤའི་ཡུལ་དུ་ཁྲོམ་རུམ་ཆེ་བཙན་སྐྱེས་ལ་བཤད་ཅིང་བསྒྱུར། དེ་ནས་རིམ་པར་འཕེལ་བ་ཡིན།
ཉེ་བརྒྱུད་གཏེར་མ་ནི། བསོད་ནམས་ཐམས་ཅད་སྡུད་པ་ཏིང་ངེ་འཛིན་གྱི་མདོ་ལས། དྲི་མ་མེད་པའི་གཟི་བརྗིད། ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་གཏེར། རི་དང་རི་སུལ་དང་ཤིང་གི་ནང་ན་བཅུག་པ་དག་ཡོད་དེ། གཟུངས་དང་ཆོས་ཀྱི་སྒོ་མཐའ་ཡས་པ་ལྒིགས་བམ་དུ་བྱས་པ་དག་ཀྱང་ལག་ཏུ་འོང་བར་འགྱུར་རོ། །ཞེས་པ་ལྟར། སློབ་དཔོན་པདྨ་འབྱུང་གནས་ལ་སོགས་པ་ཚད་མའི་སྐྱེས་བུ་འགའ་ཟུང་གིས་འབྱུང་འགྱུར་གྱི་གདུལ་བྱར་མཆོག་ཐུན་གྱི་དངོས་གྲུབ་འགྲུབ་པའི་མན་ངག་མང་བོ་རི་བྲག་སོགས་ལ་གཏེར་དུ་སྦས། གཏེར་དེ་ནམ་འདོན་དང་། འདོན་པ་པོའི་མིང་རུས་དང་འཁྲུངས་གཞིས། ལུས་ཀྱི་རྟགས་མཚན་སོགས་ཆ་ཚང་གཏེར་གྱི་ཁ་བྱང་བཏབ། ཕྱིས་སུ་གནས་དུས་གང་ཟག་འཛོམས་པ་ན་གཏེར་དེ་བཏོན་ནས་དར་སྤེལ་བཏང་བ་ལ་གཏེར་ཆོས་སུ་གྲགས། ﹙གྲུབ་མཐའ་གཞན་ལའང་གཏེར་ཆོས་རེ་གཉིས་སྲིད་ཀྱང་མང་ཆེ་ཤས་རྙིང་མའི་ཆོས་ལ་ཡོད། ﹚གཏེར་སྟོན་པའང་དངོས་རྫུས་ཅི་རིགས་ཡོད་ཀྱང་། སློབ་དཔོན་པདྨས་ལུང་གིས་ཟིན་མ་ཟིན་བསྡོམས་གཏེར་སྟོན་ཚད་ལྡན། རྒྱལ་དབང་ལྔ་བའི་བྱང་བདག་རིག་འཛིན་ངག་གི་དབང་བོའི་རྣམ་ཐར་ལས། གཏེར་སྟོན་བརྒྱ་དང་བཅུ་བདུན་གྱི་མཚན་ཙམ་གསལ། གཏེར་སྟོན་བརྒྱ་རྩའི་གཏེར་ཆོས་རགས་བསྡུས་རིན་ཆེན་གཏེར་མཛོད་སོགས་སུ་གསལ།
ཟབ་མོ་དག་སྣང་གི་བརྒྱུད་པ་ནི། བླ་མ་འགའ་ཞིག་ལ་ཡི་དམ་གྱི་ལྷ་ཞལ་གཟིགས་ནས་དངོས་སུ་གསུངས་པའི་མན་ངག་གི་སྐོར་ལ་ཟེར།
༢ རྙིང་མའི་ལྟ་སྒོམ་སྤྱོད་གསུམ་སོགས། ལྟ་བ་ཀློང་ཆེན་རབ་འབྱམས་ཡིན་གསུངས་པ་སྟེ། དེ་ཡང་དབྱིངས་སྤྲོས་བྲལ་ཀྱི་ཆོས་བདེ་གཤེགས་སྙིང་བོ་ཀློང་ཆེན་པོ་ན། འཁོར་འདས་ཀྱི་སྣང་བ་ཇི་སྙེད་པ་ཐམས་ཅད་ཆོས་ཉིད་མཉམ་པ་ཉིད་དུ་རྫོགས་པའི་དོན་ཤེས་པའོ། །
སྒོམ་པ་མཁྱེན་བརྩེ་འོད་ཟེར་ཡིན་གསུངས་ཏེ། དེ་ལྟ་བུའི་ལྟ་བ་སྤྲོས་བྲལ་གྱི་རང་བཞིན་མཁྱེན་ཆ་ཤེས་རབ་ལྷག་མཐོང་གིས་གཏན་ལ་འབེབས་ཞིང་། སྟོང་ཉིད་དེ་ཡང་སྙིང་རྗེ་བརྩེ་བ་ཆེན་པོའི་ཞི་གནས་ཀྱི་ཐབས་དང་མ་བྲལ་བར་རྩེ་གཅིག་ཏུ་མཉམ་པར་འཇོག་པ་སྟེ། སྟོང་ཉིད་སྙིང་རྗེ་དང་འབྲེལ་བ་ནི་སྒོམ་པའོ། །སྤྱོད་པ་རྒྱལ་བའི་མྱུ་གུ་ཡིན་གསུངས་པ་སྟེ། དེ་ལྟ་བུའི་ལྟ་སྒོམ་དང་ལྡན་པའི་ངང་ནས་རྒྱལ་བའི་མྱུ་གུ་བྱང་ཆུབ་སེམས་དཔའ་རྣམས་ཀྱི་ཚུལ་དང་མཐུན་པའི་ཕར་ཕྱིན་དྲུག་ཉམས་སུ་ལེན་པས་སོ། །
གཞན་ཡང་། རྙིང་ཆོས་ཀྱི་སྙིང་བོར་གྱུར་བ་ནི། མན་ངག་རྫོགས་པ་ཆེན་པོ་ཞེས་གྲགས་པ་སྟེ། དེའི་སྒྲ་བཤད་ཀྱང་། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རིག་པ་སྟོང་བ་འདིའི་ནང་དུ་རྫོགས་པས་ན་རྫོགས་པ་དང་། དེ་ལས་ལྷག་པའི་འཁོར་བ་ལས་གྲོལ་བའི་ཐབས་གཞན་མཆོག་ཏུ་གྱུར་བ་མེད་པས་ན་ཆེན་པོ་བྱ་ལ། དེ་ལ་ནང་གསེས་ཀྱིས་སེམས་སྡེ། ཀློང་སྡེ། མན་ངག་གི་སྡེ་གསུམ་ལས། སེམས་སྡེ་ནི་ཅིར་སྣང་སེམས་ཡིན་ལ། སེམས་ཉིད་རང་བྱུང་གི་ཡེ་ཤེས་སུ་ཤར་བས་རང་བྱུང་གི་ཡེ་ཤེས་ལས་གཞན་དུ་གྱུར་བ་མེད་པ་དང་། ཀློང་སྡེ་ནི་ཆོས་ཉིད་ཀུན་ཏུ་བཟང་བོའི་ཀློང་ནས་འགྲོ་ས་གཞན་མེད་ཆོས་ཉིད་ཀྱི་ཀློང་ལས་གཞན་བྱུང་འགོག་པ་ཡིན། མན་ངག་གི་སྡེ་ནི། སྤང་བླང་བྲལ་བ་ཟུང་འཇུག་གཉིས་སུ་མེད་པའི་ཡེ་ཤེས་ཀྱིས་འཁོར་འདས་ཀྱི་ཆོས་ཐམས་ཅད་ཆོས་ཉིད་སྟོང་འཛིན་དང་བྲལ་བའི་ངང་དུ་སྐྱེལ་བའི་གནད་ཀྱིས་འཁོར་འདས་གང་དུའང་མ་ཕྱེ་བའི་རིག་པ་ཉིད་ཆོས་ཉིད་ཀྱི་ཡུལ་མངོན་སུམ་དུ་ཤར་ནས། རང་རིག་ལུ་གུ་རྒྱུད་ཀྱི་སྐུར་སྨིན་ཅིང་གྲོལ་བར་བྱེད་པའོ། །