དོན་དམ་བདེན་པ་རྟེན་འབྲེལ་ཡིན་མིན་དཔྱད་སྒོ།
དོན་དམ་བདེན་པ་རྟེན་འབྲེལ་ཡིན་མིན་དཔྱད་སྒོ་ནི།
ཀུན་རྫོབ་རྟེན་འབྲེལ་ ལེགས་པར་རྟོགས་པ་ནི། །དབུ་མ་ཆེན་པོའི་གྲོང་དུ་འཇུག་པའི་ལམ། །ཞེས་པའི་དོན་ཡོད་པར་ཐལ། ཡོད་པའི་ཕྱིར། འདོད་ན། དེ་མེད་པར་ཐལ། དེའི་སྐབས་ཀྱི་གཞུང་གང་ཡིན་ངོས་འཛིན་རྒྱུ་མེད་པའི་ཕྱིར། མ་གྲུབ་ན། དེ་ཡོད་པར་ཐལ། རྟགས་མ་གྲུབ་ཀྱི་ལན་འཐད་པའི་ཕྱིར། འདོད་ན། ཞོག་ཅེས་ཟེར། བཀའ་བསྡུ་བཞི་བ་ཆོས་ཅན། དེ་མ་ཡིན་པར་ཐལ།དེའི་སྐབས་ཀྱི་ས་བཅད་ངོས་འཛིན་རྒྱུ་མེད་པའི་ཕྱིར། མ་གྲུབ་ན། དེའི་སྐབས་ཀྱི་ས་བཅད་ངོས་འཛིན་རྒྱུ་ཡོད་པར་ཐལ། རྟགས་མ་གྲུབ་ཀྱི་ལན་འཐད་པའི་ཕྱིར། འདོད་ན། ཞོག་ཅེས་ཟེར། རྟེན་འབྲེལ་རྟོགས་པ་དབུ་མ་འཇུག་པའི་ལམ་ཡིན་པར་བསྟན་པ་ཆོས་ཅན། དེ་མ་ཡིན་པར་ཐལ། དེ་དང་མཉམ་དུ་འཕྲོས་པའི་ས་བཅད་ངོས་འཛིན་རྒྱུ་མེད་པའི་ཕྱིར། མ་གྲུབ་ན།དེ་ངོས་འཛིན་རྒྱུ་ཡོད་པར་ཐལ། རྟགས་མ་གྲུབ་ཀྱི་ལན་འཐད་པའི་ཕྱིར། འདོད་ན་ཞོག་ཅེས་ཟེར། ཞེས་སོགས་ས་བཅད་རྒྱུགས་ལེན། དེ་མ་ཡིན་པར་ཐལ། ཀུན་རྫོབ་རྟེན་འབྲེལ་ལེགས་པར་རྟོགས་པ་ནི། །དབུ་མ་ཆེན་པོའི་གྲོང་དུ་འཇུག་པའི་ལམ། །ཞེས་པའི་ལུང་གི་དོན་མེད་པའི་ཕྱིར། མ་གྲུབ་ན། དེའི་ལུང་གི་དོན་ཡོད་པར་ཐལ། རྟགས་མ་གྲུབ་ཀྱི་ལན་འཐད་པའི་ཕྱིར། འདོད་ན། ཞོག་ཅེས་ཟེར། ཀུན་རྫོབ་རྟེན་འབྲེལ་ལེགས་པར་རྟོགས་པ་དབུ་མ་ཆེན་པོའི་གྲོང་དུ་འཇུག་པའི་ལམ་ཡིན་པ་ཆོས་ཅན། དེ་མ་ཡིན་པར་ཐལ། ཀུན་རྫོབ་རྟེན་འབྲེལ་དང་རྟེན་འབྲེལ་དོན་གཅིག་པའི་ཕྱིར། མ་ཁྱབ། དོན་དམ་བདེན་པ་ཆོས་ཅན། ཀུན་རྫོབ་རྟེན་འབྲེལ་ཡིན་པར་ཐལ། རྟེན་འབྲེལ་ཡིན་པའི་ཕྱིར། མ་གྲུབ་ན། དོན་དམ་བདེན་པ་ཆོས་ཅན། རྟེན་འབྲེལ་ཡིན་པར་ཐལ། སྟོང་ཉིད་ཡིན་པའི་ཕྱིར། མ་ཁྱབ། ཁྱབ་པར་ཐལ། དེ་ལྟར་ཁྱབ་པ་དཔལ་མགོན་འཕགས་པ་ཀླུ་སྒྲུབ་ཀྱི་དགོངས་པ་ཡིན་པའི་ཕྱིར། མ་གྲུབ་ན།དེ་ཡིན་པར་ཐལ། དེ་ཉིད་ཀྱིས་མཛད་པའི་རྩོད་བཟློག་ལས། གང་ཞིག་སྟོང་དང་རྟེན་འབྱུང་དག །དབུ་མའི་ལམ་དུ་དོན་གཅིག་པར། །ཞེས་གསུངས་པའི་ཕྱིར། འདོད་ན། དོན་དམ་བདེན་པ་ཆོས་ཅན། རྟེན་འབྲེལ་ཡིན་པར་ཐལ། འདོད་པའི་ཕྱིར། འདོད་ན། དོན་དམ་བདེན་པ་ཆོས་ཅན། རྟེན་འབྲེལ་མ་ཡིན་པར་ཐལ། དེ་ལྟར་མ་ཡིན་པ་དཔལ་མགོན་འཕགས་པ་ཀླུ་སྒྲུབ་ཀྱི་དགོངས་པ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་རྩ་བ་ཤེས་རབ་ལས། རང་བཞིན་དག་ནི་བཅོས་མིན་དང༌། །གཞན་ལ་ལྟོས་པ་མེད་པ་ཡིན། །ཞེས་གསུངས་པའི་ཕྱིར། འདོད་ན། དོན་དམ་བདེན་པ་རྟེན་འབྲེལ་མ་ཡིན་པར་ཐལ།འདོད་པའི་ཕྱིར།
༈ འོ་ན་རྟེན་འབྲེལ་དང་ཀུན་རྫོབ་བདེན་པ་དོན་གཅིག་པར་ཐལ། དོན་དམ་བདེན་པ་རྟེན་འབྲེལ་མ་ཡིན་པའི་རྒྱུ་མཚན་ཡོད་པའི་ཕྱིར། འདོད་ན། ཀུན་བརྟགས་ཆོས་ཅན། རྟེན་འབྲེལ་ཡིན་པར་ཐལ། ཀུན་རྫོབ་བདེན་པ་ཡིན་པའི་ཕྱིར། འདོད་ན། ཀུན་བརྟགས་ཆོས་ཅན། གཞན་དབང་ཡིན་པར་ཐལ། རྟེན་འབྲེལ་ཡིན་པའི་ཕྱིར། མ་ཁྱབ། ཁྱབ་པ་ཡོད་པར་ཐལ། གཞན་དབང་དང་རྟེན་འབྲེལ་དོན་གཅིག་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ལྟར་ཡིན་པ་ཆོས་རྗེ་ཀུན་མཁྱེན་དོལ་བོ་བ་ཤེས་རབ་རྒྱལ་མཚན་གྱི་དགོངས་པ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་ཆོས་ཀྱི་ཤན་འབྱེད་ལས། རྟེན་འབྲེལ་དང་གཞན་དབང་དོན་གཅིག་པའི་ཕྱིར། ཞེས་གསུངས་པའི་ཕྱིར། འདོད་ན། ཀ ཀུན་བརྟགས་ཆོས་ཅན། རྟེན་འབྲེལ་མ་ཡིན་པར་ཐལ། གཞན་དབང་མ་ཡིན་པའི་ཕྱིར། འདོད་ན། ཀུན་བརྟགས་ཆོས་ཅན། རྟེན་འབྲེལ་ཡིན་པར་ཐལ། དེ་ལྟར་ཡིན་པ་ཐམས་ཅད་མཁྱེན་པ་ཏཱ་ར་ནཱ་ཐའི་དགོངས་པ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་ཐེག་མཆོག་དབུ་མ་ལས། ཀུན་བརྟགས་གཞན་དབང་རྟེན་འབྲེལ་ཉིད་དུ་བརྗོད། །ཅེས་གསུངས་པའི་ཕྱིར། འདོད་ན། ཀ རྩ་ཤེས་ལས། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་སོ། །ཞེས་གསུངས་པ་སོགས་ཀྱི་ཚིག་ཟིན་ལ་ཅུང་ཟད་དཔྱད་རྒྱུ་སྣང་ངོ༌། །