གསུམ་པ་མ་ངེས་པའི་གཏན་ཚིགས།
གསུམ་པ་མ་ངེས་པའི་གཏན་ཚིགས་བཤད་པ་ལ།
མཚན་ཉིད་དང༌།དབྱེ་བ་གཉིས། དང་པོ་སྦྱོར་བ་གང་རུང་གི་མ་ངེས་པའི་རྟགས་ཀྱི་མཚན་ཉིད། དེ་སྒྲུབ་ཀྱི་ཕྱོགས་ཆོས་གྲུབ་ཅིང༌། རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་ཁྱབ་པ་རྣལ་མ་ཡང་མ་ངེས་ཕྱིན་ཅི་ལོག་ཏུ་མ་ངེས་པ། མཚན་གཞི་ནི་སྒྲ་རྟག་པར་སྒྲུབ་པར་བྱེད་པ་ལ་གཞལ་བྱ་ལྟ་བུའོ། །མཚན་ཉིད་དེའི་ཟུར་ལ་ཕྱོགས་ཆོས་ཞེས་པས་མ་གྲུབ་པའི་གཏན་ཚིགས་སེལ་ལ། ཁྱབ་པ་རྣལ་མ་ཡང་མ་ངེས་ཞེས་པས་རྟགས་ཡང་དག་ཡིན་པ་སེལ། རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་ཁྱབ་པ་ཕྱིན་ཅི་ལོག་ཏུ་མ་ངེས་པ་ཞེས་པས་འགལ་རྟགས་སེལ་ཏེ། འགལ་རྟགས་ཡིན་ན་རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་ཁྱབ་པ་ཕྱིན་ཅི་ལོག་ཏུ་ངེས་པ་དགོས་པའི་ཕྱིར་རོ། །
གཉིས་པ་དབྱེ་བ་ལ།
ཐུན་མོང་མ་ཡིན་པའི་མ་ངེས་པའི་གཏན་ཚིགས་དང༌། ཐུན་མོང་གི་མ་ངེས་པའི་གཏན་ཚིགས་གཉིས་སོ། །དང་པོ་ལ་མཚན་ཉིད། དབྱེ་བ། ཐུན་མོང་མ་ཡིན་པའི་དོན་བཤད་པ་དང་གསུམ། དེ་སྒྲུབ་ཀྱི་ཐུན་མོང་མ་ཡིན་པའི་མ་ངེས་པའི་རྟགས་ཀྱི་མཚན་ཉིད། རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་མཐུན་ཕྱོགས་ལ་ཡོད་པར་མ་ངེས་མི་མཐུན་ཕྱོགས་ལ་ཡོད་པར་མ་ངེས་པའི་དེ་སྒྲུབ་ཀྱི་མ་ངེས་པའི་གཏན་ཚིགས། རང་ཕྱོགས་ཆོས་ཅན་དུ་སོང་བའི་གང་ཟག་གིས་མཐུན་ཕྱོགས་ལ་ཡོད་པར་མ་ངེས་མི་མཐུན་ཕྱོགས་ལ་ཡོད་པར་མ་ངེས་ཞེས་པས་ཐུན་མོང་གི་མ་ངེས་པའི་གཏན་ཚིགས་སེལ་ཏེ། ཐུན་མོང་གི་མ་ངེས་པའི་གཏན་ཚིགས་ཡིན་ན་མཐུན་ཕྱོགས་མི་མཐུན་ཕྱོགས་གང་རུང་ལ་ཡོད་པར་ངེས་པ་ཞིག་དགོས་པའི་ཕྱིར། མ་ངེས་པ་ཞེས་པས་རྟགས་ཡང་དག་དང་མ་གྲུབ་པ་དང་འགལ་རྟགས་རྣམས་སེལ་ཏེ། དེ་རྣམས་གང་རུང་ཡིན་ན་མ་ངེས་པའི་གཏན་ཚིགས་མ་ཡིན་དགོས་པའི་ཕྱིར། གཉིས་པ་དབྱེ་ན། གཏན་ཚིགས་རིགས་པའི་དོན་བསྡུས་ལས། དབྱེ་ན། དང་པོ་ལ་མཐུན་ཕྱོགས་ལ་ཡོད་ཀྱང་མ་མཐོང༌། མེད་ནས་མ་མཐོང༌། མི་མཐུན་ཕྱོགས་ལ་ཡོད་ཀྱང་མ་མཐོང༌། མེད་ནས་མ་མཐོང་བ་བཞི་སྟེ། རིམ་པ་བཞིན་དཔེར་ན་སྒྲ་མི་རྟག་སྟེ་མཉན་བྱ་ཡིན་པས་སོ། །རྟག་སྟེ། མཉན་བྱ་ཡིན་པས་སོ། །གསོན་ལུས་ཆོས་ཅན། བདག་ཡོད་དེ། སྲོག་ཡོད་པས་སོ། །བདག་མེད་དེ། སྲོག་ཡོད་པས་སོ། །ཞེས་པ་ལྟ་བུའོ། །ཞེས་གསུངས་སོ། །ཕྱི་མ་འདི་གཉིས་རྒོལ་བ་ཕྱི་རོལ་བ་འགའ་ཞིག་གི་དབང་དུ་བྱས་པའོ། །སྐབས་འདིའི་མཐོང་མ་མཐོང་ཞེས་པ་སྣང་མ་སྣང་གི་དོན་མ་ཡིན་པར་ངེས་མ་ངེས་ལ་གོ་དགོས་སོ། །དེ་ལྟ་མ་ཡིན་ན། དེ་ཕྱིར་དངོས་པོ་མཐོང་བ་ཡི། །ཡོན་ཏན་མཐའ་དག་མཐོང་བ་ཉིད། །ཅེས་གསུངས་པ་སོགས་ཀྱིས་གནོད་དོ། །མཉན་བྱ་སྒྲ་མི་རྟག་པར་སྒྲུབ་པའི་ཐུན་མོང་མ་ཡིན་པའི་མ་ངེས་པའི་གཏན་ཚིགས་ཡིན་པར་གསུངས་པ་རྒོལ་བ་དབང་རྟུལ་གྱི་ངོར་ཡིན་ཏེ། རིན་ཆེན་འབྱུང་གནས་ཞི་བའི་ནང་གི་ཁྱབ་པ་ལས། ཐུན་མོང་མ་ཡིན་གཏན་ཚིགས་ཀྱི། །ཉེས་པ་རྨོངས་ལ་ལྟོས་པ་ཡིན། །ཞེས་དང༌། དེའི་ཕྱིར་དཔེ་ལ་ཆགས་རྣམས་ལ། །བུམ་པའི་དཔེ་ནི་བསྟན་པ་མཛད། །དེ་མི་དགོས་ལ་དོན་མེད་ཡིན། །ནང་གི་ཁྱབ་པ་བློ་ལྡན་ལའོ། །ཞེས་གསུངས་པའི་ཕྱིར་རོ། །གསུམ་པ་ཐུན་མོང་མ་ཡིན་པའི་དོན་ནི། རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་རྩོད་གཞི་དང༌། མཐུན་ཕྱོགས་དང་མི་མཐུན་ཕྱོགས་གཉིས་ཀྱི་ནང་ནས་རྩོད་གཞི་ལ་ཡོད་པར་ངེས་ཀྱི། མཐུན་ཕྱོགས་ལ་ཡོད་པར་མ་ངེས་མི་མཐུན་ཕྱོགས་ལ་ཡོད་པར་མ་ངེས་པ་དེ་སྒྲ་མི་རྟག་པར་སྒྲུབ་པའི་ཐུན་མོང་མ་ཡིན་པའི་རྟགས་ཡིན་པའི་དོན་ཡིན་ནོ། །