དེ་དག་ཅུང་ཟད་རྒྱས་པ།

དེ་དག་ཅུང་ཟད་རྒྱས་པ་ནི།

ཚིགས་བཅད་བཅུ་པའི་ཟིན་བྲིས་ལས། སྤྱོད་པའི་རྣམ་གཞག་རྒྱས་པར་བཤད་པ་ནི། གྲུབ་པ་སྤྱོད་པའི་རྒྱུ་ཅན་དང་པོ་ཆེ་དང་སྐུ་ཡི་དོན་དང་དེ་ཉིད་རྣམ་པར་སྦྱོང་བ་དང༌། །སེམས་ཅན་དོན་དང་དོན་ཆེན་ཉེ་བའི་རྒྱུ་ནི་གཞན་ཡང་ཉི་ཚེ་ལམ་ལ་སྣ་ཚོགས་དབྱེ་བ་སྟེ། །ཞེས་པས་བསྟན་ཏེ། སྤྱོད་པ་ལ་དབྱེ་ན། བསྐྱེད་རིམ་གྱི་སྤྱོད་པ་དང༌། རྫོགས་རིམ་གྱི་སྤྱོད་པ་གཉིས་སོ། །ཐོག་མར་སྤྱོད་པ་དེ་དག་སྤྱོད་པའི་དུས། རགས་པའི་བསྐྱེད་རིམ་ལ་བརྟན་པ་ཐོབ་ནས། རི་ལུ་ལ་སོགས་པའི་དངོས་གྲུབ་རྣམས་མ་གྲུབ་པ་འགྲུབ་པའི་ཕྱིར་སྤྱད་པ་སྤྱོད་པ་དང༌། ཕྲ་བའི་བསྐྱེད་རིམ་ལ་བརྟན་པ་ཐོབ་ནས་འདོད་གཟུགས་ཀྱི་རིག་པ་འཛིན་པ་བསྒྲུབ་པའི་ཕྱིར་སྤྱད་པ་སྤྱོད་པ་ནི་བསྐྱེད་རིམ་གྱི་སྤྱོད་པའི་དུས་དང༌། རྫོགས་རིམ་གྱི་སྤྱོད་པ་ནི། དངོས་གྲུབ་སྦྱོར་ལམ་དྲོད་ཆུང་ངུ་དང་འབྲིང་དང་ཆེན་པོ་གསུམ་གང་ཡང་རུང་བའི་སྐབས་སུ། སྒྱུ་ལུས་བདག་བྱིན་རླབས་པའི་རིམ་པའི་རླུང་སེམས་ཀྱི་སྐུ་སྒྲུབ་དོན་དུ་སྤྱད་པ་སྤྱོད་པ་དང༌། སྦྱོར་ལམ་རྩེ་མོ་སོགས་ཀྱི་སྐབས་སུ་རླུང་སེམས་ཀྱི་སྐུ་དེ་འོད་གསལ་དུ་འཇུག་པའི་ཕྱིར་དང༌། སློབ་པའི་ཟུང་འཇུག་གི་སྐུ་ཐོབ་ན། འཕགས་པའི་ས་བཅུ་པའི་བར་དུ་སྤྱད་པ་སྤྱོད་པ་ནི། གཙོ་བོར་སེམས་ཅན་གྱི་དོན་སྣ་ཚོགས་གྱི་ཕྱིར་དུ་སྤྱོད་པ་དང༌། མངོན་བྱང་གོང་འོག་གི་སྐབས་སུ་ཉེ་རྒྱུའི་སྤྱད་པ་སྤྱོད་པ་ནི། རང་གཞན་གྱི་དོན་ཆེན་པོར་འགྱུར་ཕྱིར་སྤྱོད་པ་སྟེ། དེ་དག་ཀྱང་ཕལ་ཆེར་གཙོ་ཆེ་བའི་དབང་དུ་བྱས་པ་ཡིན་ལ། དེ་དག་ཏུ་མ་ཟད་གཞན་ཡང་ཉི་ཚེ་བའི་ལམ་ལ་སྤྱོད་པའི་དུས་སྣ་ཚོགས་ཀྱི་དབྱེ་བ་མཐའ་གཅིག་ཏུ་མ་ངེས་སོ། །སྤྱོད་པའི་ངོ་བོ་ལ་སོགས་པ་ནི། ངོ་བོ་ཉིད་དང་དེ་བཞིན་གཞན་ནི་སྤྱོད་པའི་ཚུལ་དང་དགོས་པ་དག་སྟེ་སླར་ཡང་དེ་ནས་གཞན། །གནས་ཀྱི་དབྱེ་བ་མཛད་དེ་དུས་དང་ཆོ་ག་ན་ཚོད་བསམ་པ་འདོད་ཆགས་ཤེས་རབ་ཀྱིས་ཀྱང་གཞན། །ཞེས་པས་བསྟན་ཏེ། སྤྱོད་པའི་ངོ་བོ་ནི། ཡུལ་སྣ་ཚོགས་དང་བདེ་སྡུག་འདོད་ཡོན་ལ་སོགས་པ་ཐམས་ཅད། ནང་ཏིང་ངེ་འཛིན་དང་རོ་གཅིག་ཏུ་བསྲེས་ཏེ་བསྒོམ་པའོ། །ཇི་ལྟར་སྤྱོད་པའི་ཚུལ་ནི། སྤྲོས་བཅས་སྤྲོས་མེད་ཤིན་ཏུ་སྤྲོས་མེད་དམ། ཀུན་འདར། ཀུན་བཟང༌། ཕྱོགས་ལས་རྣམ་རྒྱལ་གསུམ་སྟེ། ཕྱག་རྒྱ་རིག་མ་མང་པོ་དང་བཅས་ཏེ་ཡུལ་སྣ་ཚོགས་སུ་རྒྱུ་ཞིང་འདོད་ཡོན་སྣ་ཚོགས་ལ་རོལ་ལ། དེ་དག་ཏུ་བརྡ་དང་བརྡའི་ལན་དང༌། གླུ་གར་དང་བཅས་པའི་སྤྲོས་པ་རྒྱ་ཆེན་པོ་དང་བཅས་ཏེ་སྤྱོད་པ་ནི་སྤྲོས་བཅས་ཀྱི་སྤྱོད་པ་དང༌། ཕྱག་རྒྱ་ཇི་ལྟར་འོས་པ་དང་བཅས་ཏེ། བརྡ་ལ་སོགས་པའི་སྤྲོས་པ་ཕལ་ཆེར་སྤངས་ཏེ་སྤྱོད་པ་ནི་སྤྲོས་མེད་ཀྱི་སྤྱོད་པ་དང༌། ལས་རྒྱ་སྤངས་ཏེ་ཡེ་ཤེས་ཀྱི་རིག་མ་ཙམ་དང༌། འདོད་ཡོན་སྤངས་པ་ཤིན་ཏུ་སྤྲོས་མེད་ཀྱི་སྤྱོད་པའོ། །དགོས་པ་ནི་དངོས་གྲུབ་ཀྱི་ཁྱད་པར་འགའ་ཞིག་མ་གྲུབ་པ་འགྲུབ་པའི་ཕྱིར་དང༌། གྲུབ་པ་རྣམས་གོང་འཕེལ་དུ་འགྱུར་པའི་ཕྱིར་སྤྱོད་པའོ། །གནས་ནི་རང་གི་ཁྱྀམ་ཁོ་ནར་འདུག་བཞིན་པས་སྤྱོད་པ་དང༌། པཱུ་ལི་ར་མ་ལ་སོགས་པའི་ཡུལ་ཆེན་པོ་ཉི་ཤུ་རྩ་བཞིར་རྒྱུ་བ་གནས་ཀྱི་ཁྱད་པར་དང༌། དུས་ཀྱི་གོ་རིམ་ནི་ཐོག་མར་སྤྲོས་བཅས་དང༌། དེ་ནས་སྤྲོས་མེད་དང༌། དེ་ནས་ཤིན་ཏུ་སྤྲོས་མེད་ཀྱི་སྤྱོད་པ་སྤྱོད་དོ། །ཆོ་ག་ནི་དེ་དག་ཏུ་ལྷའི་རྣལ་འབྱོར་དང༌། སྔགས་དང༌། ཏིང་ངེ་འཛིན་དང༌། ཕྱག་རྒྱ་ལ་སོགས་པ་ཆོ་གའི་རིམ་པ་རྒྱས་བསྡུས་རྣམས་དང༌། བསམ་པ་ནི། སྒྲུབ་པོ་རང་གི་མོས་པས་སྤྱོད་པ་གསུམ་གང་འདོད་པ་སྤྱོད་པ་དང༌། ན་ཚོད་ནི། གཞོན་ནུའི་སྐབས་སུ་སྤྲོས་བཅས་དང༌། དར་ལ་བབ་ནས་སྤྲོས་མེད་དང༌། རྒན་པོའི་དུས་ཤིན་ཏུ་སྤྲོས་མེད་ཀྱི་སྤྱད་པ་སྤྱོད་དོ། །དེ་བཞིན་དུ་འདོད་ཆགས་ཤས་ཆེན་སྤྲོས་བཅས་དང༌། དེ་ལས་ཆུང་ནས་སྤྲོས་མེད་དང༌། ཤིན་ཏུ་ཆུང་ན་ཤིན་ཏུ་སྤྲོས་མེད་ཀྱི་སྤྱད་པ་སྤྱོད་དོ། །ཕྱག་རྒྱ་མང་པོ་ནི་སྤྲོས་བཅས་དང༌། ཉུང་ངུ་ནི་སྤྲོས་མེད་དང༌། སྤངས་པ་ཤིན་ཏུ་སྤྲོས་མེད་དོ། །སྤྱོད་པའི་ཡན་ལག་ཏུ་དགོས་པ་དྲག་ཤུལ་གྱི་སྤྱོད་པ་བསྟན་པ་ནི། དྲག་ཤུལ་སྦྱོར་བ་རྣམ་པ་གཉིས་སུ་འགྱུར་ཏེ་རིམ་པ་གཉིས་པ་སྟོང་ཉིད་གོམས་པ་དག་གིས་སོ། །གཅིག་ནི་འཇིག་རྟེན་དངོས་གྲུབ་དོན་ནོ་གླང་པོའི་བདག་པོ་རྟ་ཡིས་འཐབ་བཞིན་རྫོགས་པ་ལ་གནས་པས། །མཚན་མའི་སྤྱོད་པ་འཇུག་པ་ཉིད་དོ། །ཞེས་པས་བསྟན་ཏེ། དེ་ལ་སྡིག་སྦྱོར་གྱི་ལུས་སེམས་ཕུར་བུས་གདབ་པའམ། དྲག་ཤུལ་གྱི་སྦྱོར་བ་ཞེས་བྱ་བ། དངོས་གྲུབ་ཀྱི་དོན་དུ་ལྷ་གནད་ལ་དབབ་པ་ཡིན་ཏེ། དེའི་སྦྱོར་བ་ནི་རྣམ་པ་གཉིས་ཡིན་ཏེ། བསྐྱེད་རིམ་དང་རྫོགས་རིམ་ལ་སྟོང་ཉིད་ཀྱི་རྣལ་འབྱོར་གོམས་པ་དག་གིས་བྱ་དགོས་པ་ལས། དང་པོ་བསྐྱེད་རིམ་གྱི་དྲག་ཤུལ་སྦྱོར་བ་ནི་བསྐྱེད་རིམ་གྱི་རྣལ་འབྱོར་ལ་གནས་པའི་གང་ཟག་ལ་གཉིས་ཡོད་དེ། སྔགས་ལ་གཞོལ་བའི་རྣལ་འབྱོར་པ་དང༌། ནང་ལ་གཞོལ་བ་གཉིས་ཡོད་པའི་ནང་ལ་གཞོལ་བའི་རྣལ་འབྱོར་པ་ལ་ནི། དྲག་ཤུལ་གྱི་སྦྱོར་བ་དགོས་པ་མ་ཡིན་ལ། སྔགས་ལ་གཞོལ་བའི་རྣལ་འབྱོར་པ་ལ་དགོས་པ་ཡིན་ཞིང༌། དེ་ཡང་གཅིག་ནི་སོགས་ཀྱི་དོན་ཏེ། རགས་པའི་བསྐྱེད་རིམ་བརྟན་པ་ནི་སྔགས་ལ་གཞོལ་བ་ཡིན་པས། དེས་རིལ་ལུ་མིག་སྨན་སོགས་དངོས་གྲུབ་སྒྲུབ་པའི་ཕྱིར་དུ། སྤྱོད་པ་ལན་གསུམ་བསྐྱར་ནས་ཟླ་བ་དྲུག་ལ་སོགས་པའི་བར་དུ་སྤྱད་ཀྱང་མ་གྲུབ་ན། དེའི་ཚེ་སྔགས་ཀྱི་ལྷ་ལ་ཕུར་བུས་འདེབས་པ་སོགས་དྲག་ཤུལ་གྱི་སྦྱོར་བ་བྱས་པས་དངོས་གྲུབ་འགྲུབ་པ་ཡིན་ནོ། །རྫོགས་རིམ་གྱི་རྣལ་འབྱོར་པ་ལ་དྲག་ཤུལ་གྱི་སྦྱོར་བ་མི་དགོས་པར་འདོད་པ་ཡང་བྱུང་མོད། རང་ལུགས་ལ་ནི་རྫོགས་རིམ་ལ་ཡང་དགོས་པའི་སྐབས་ཀྱང་ཡོད་པ་ཡིན་ལ། དེ་ཡང་གླང་པོའི་བདག་པོ་སོགས་ཀྱི་དོན་ཏེ། རྫོགས་རིམ་གྱི་རྣལ་འབྱོར་བ་དེས། མཆོག་གི་དངོས་གྲུབ་ཀྱི་དོན་དུ། སྤྱོད་པ་ལན་གསུམ་བསྐྱར་བ་ཟླ་བ་དྲུག་ཏུ་སྤྱད་ཀྱང་མ་གྲུབ་ན། རྫོགས་རིམ་གྱི་འཕྲོས་རེ་ཞིག་བཞག་ནས། མཚན་མ་དང་བཅས་པའི་བསྐྱེད་རིམ་གྱི་སྤྱོད་པ་དྲག་ཤུལ་སྦྱོར་བ་དང་བཅས་པ་ལ་བཞུགས་པས་འགྲུབ་པ་ཡིན་ཏེ། དཔེར་ན་སྐྱེས་བུ་ཞིག་གིས་རི་ལ་བགྲོད་པ་ལ་བཞོན་པ་གླང་པོ་ཆེ་ལ་གནས་ནས་གཡུལ་འཐབ་པ་ལ་འཁྲུགས་པས་རྒྱལ་བར་མ་གྱུར་ན། དེ་ལས་བབས་ཏེ་རྟ་ལ་གནས་ཏེ་འཐབ་པས་རྒྱལ་བ་བཞིན་ནོ། །དེས་ན་རྫོགས་རིམ་ལ་གནས་པའི་རྣལ་འབྱོར་བ་འགའ་ཞིག་ལའང་མཚན་བཅས་ཀྱི་སྤྱོད་པ་དྲག་ཤུལ་སྦྱོར་བ་དང་བཅས་པ་ལ་འཇུག་དགོས་པ་ཉིད་དོ། །གཞན་ཡང་འཕྲོས་དོན་ནི། དབང་བསྐུར་བ་དང་ཡོངས་སུ་འབྲེལ་བའི་ཉེ་བའི་རྒྱུ་ཞེས་བྱ། །སེམས་དབེན་པ་དང་ངེས་པར་བྱང་ཆུབ་གཉིས་ཀྱང་དབང་ལས་གྱུར་པ་སྤྲུལ་དང་ལོངས་སྤྱོད་རྫོགས་ལས་སོ། །ཞེས་པ་ནི། སྤྱོད་པ་སྤྱད་པའི་རྣལ་འབྱོར་པ་དེ་ལ་དབང་བསྐུར་བ་དང་ཡོངས་སུ་འབྲེལ་བ་ནི་ཉེ་རྒྱུ་མངོན་བྱང་ཞེས་བྱ་བ་ཡིན་ཏེ། དེ་ཡང་སེམས་དབེན་གྱི་རྣལ་འབྱོར་པ་དེ། སྤྱོད་པའི་སྐབས་སུ་རྡོ་རྗེ་སློབ་དཔོན་མིའི་རྟེན་ཅན་གྱིས་དབང་བསྐུར་བ་ཡིན་ལ། དེ་ཡང་མོས་པ་ལམ་བྱེད་ཙམ་མ་ཡིན་པར་དངོས་སུ་རིག་མ་དང་བཅས་པས་དབང་བསྐུར་བ་ཡིན་ལ། དེའི་རྒྱུད་དམ་ཚིག་མ་ཉམས་པ་དང༌། རྟེན་འབྲེལ་གྱི་ཉེ་རྒྱུས་དབང་བསྐུར་བ་འོག་མར་སངས་རྒྱས་སྤྲུལ་པའི་སྐུ་རྣམས་ཀྱིས་དབང་བསྐུར་བ་ཡིན་ཏེ། སྐུ་དངོས་སམ། སྔར་གྱི་རྡོ་རྗེ་སློབ་དཔོན་དེའི་ཚུལ་བཟུང་ནས་སམ། དེ་ལ་བྱིན་གྱིས་བརླབས་ནས་དབང་བསྐུར་བ་དང༌། མངོན་བྱང་གོང་མར་ནི་ལོངས་སྤྱོད་རྫོགས་པའི་སྐུ་རྣམས་ལས་དབང་བསྐུར་བ་ཐོབ་པ་ཡིན་ནོ། །ཞེས་གསུངས་པའི་ཕྱིར་རོ། །གསུམ་པ་འབྲས་བུའི་རྒྱུད་ལ་ཐུན་མོང་དང་མཆོག་གི་དངོས་གྲུབ་གཉིས་ལས། ཐུན་མོང་ལ་ཕྲ་མོའི་ཆུང་ངུ་ལས་རིམ་སྣ་ཚོགས་ནི་ཞི་རྒྱས་དབང་དགུག་བསད་བསྐྲད་དབྱེ་མནན་ཏེ་ལས་ཆེན་བརྒྱད་ལ་སོགས་པའོ། །