ཐིག་གི་རིམ་པ།
དེ་ནས་མཆོད་པ་དང་གཏོར་མ་བྱས་ཏེ། བསྐུལ་བ་དང་བཅས་ཏེ་བསྒྲིལ་བར་བྱའོ། །དེ་ནས་རྡོ་རྗེ་སློབ་དཔོན་ནུབ་ཏུ་འདུག་ནས། རྡོ་རྗེ་ཁུ་ཚུར་གཡོན་པས་བཟུང་ལ། གཙོ་བོར་བསྒོམས་པའི་ལྟེ་བར་ཁུ་ཚུར་བཞག་ལ། ཛ་ཛ་ཛ་གསུམ་གྱིས་སློབ་མའི་ལག་མཐིལ་དུ་གཡས་པས་དྲངས་ཏེ་བྱིན་ལ་ཚངས་ཐིག་དང་པོ་གདབ། ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུཾ། ཞེས་གྱེན་དུ་བཏབ་པའི་སྒྲས་དེ་བཞིན་གཤེགས་པ་དག་འགྲོ་བའི་དོན་གྱི་དུས་ལ་བབ་པར་བསྐུལ། དེ་ནས་ཚངས་ཐིག་གཉིས་པ་ཡང་དེ་བཞིན་དུ་གདབ་པར་བྱའོ། །དེ་ནས་ཁ་དོག་གཅིག་པའི་སྐུད་པ་ལས་ཐམས་ཅད་པར་བྱིན་གྱིས་བརླབས་པས་སའི་ཐིག་བཏབ་ལ། ཐིག་དེའི་སྟེང་དུ་ཡེ་ཤེས་ལྔའི་ཐིག་བཏབ་ལ། སྔ་མའི་ཐིག་བྱིན་གྱིས་བརླབ་པར་བྱའོ། །དེ་ནས་ཡེ་ཤེས་ཀྱི་ཐིག་ལ་མཆོད་པ་བྱས་སླར་ཡང་གཤེགས་སུ་གསོལ་ལོ། །དེ་ནས་ལས་ཀྱི་ཐིག་ནི། དང་པོར་ས་ལ་ཚངས་ཐིག་དང་པོ་བཏབ་ལ། དེར་བྱ་རོག་རྗེས་གཉིས་བྲིའོ། །དེ་ནས་གཉིས་པ་བཏབ་སྟེ། ཟུར་བཞིར་བྱ་རོག་རྗེས་བྲི་སྟེ། དང་པོར་ཀུན་གྱི་ཐིག་ཤར་དུ་གདབ། དེ་ནས་ནུབ། དེ་ནས་བྱང༌། དེ་ནས་ལྷོར་གདབ་བོ། །དེ་ནས་མེ་དང་རླུང་གི་གྲྭར། དེ་ནས་བདེན་བྲལ་དང་དབང་ལྡན་གྱི་གྲྭར་གདབ་བོ། །དེ་ནས་ཤར་གྱི་ཚངས་པའི་ཐིག་ནས་ལྷོར་ཚངས་པའི་ཐིག་གི་སྣར་གདབ་བོ། །དེ་ནས་དེ་བཞིན་དུ་ལྷོ་ནས་ནུབ་ཏུ། དེ་ནས་ཡང་བྱང༌། བྱང་ནས་ཀྱང་ཤར་གྱི་ཚངས་ཐིག་ཏུ་གདབ་བོ། །དེ་ནས་ནང་གི་བྱ་རྗེས་བཞིར་ཐིག་བཞག་ནས། ནང་གི་ངོས་བཞིར་བཏབ་པས་ནི་ཕོ་བྲང་དང༌། སྒོ་དང༌། རྟ་བབས་ཀྱི་སྣམ་བུར་གསལ་བར་འགྱུར་རོ། །དེ་ནས་སྣམ་བུ་བཞི་པོ་དེ་རེ་རེ་ལ་སྣམ་བུ་བཞི་བཞིར་བགོས་ཏེ། ཆ་ཆེན་པོ་བཅུ་དྲུག་ཏུ་བྱའོ། །དེ་རེ་རེ་ལ་ཡང་ཆ་ཆུང་བཞི་བཞིར་བགོ་བར་བྱའོ། །ཐིག་དེ་དག་གི་ཆ་རྣམ་པར་བགོས་ཏེ། དབུས་ཀྱི་ཕོ་བྲང་ཟླུམ་པོ་དང་གྲྭ་དང་སྒོ་ལ་སོགས་པ་ཀུན་ཆར་བགོ་བར་བྱ་སྟེ། ཐིག་གི་རིམ་པའོ།། །།