འབྲིང་རྫས་ཀྱི་དངོས་གྲུབ།
འབྲིང་རྫས་ཀྱི་དངོས་གྲུབ་ནི།
ས་འོག་དང༌། རལ་གྲི་དང༌། རིལ་བུ་དང༌། མིག་སྨན་དང༌། རྐང་མགྱོགས་དང༌། བཅུད་ལེན་དང༌། རོ་ལངས་དང༌། གཏེར་གྱི་དངོས་གྲུབ་སྟེ་དངོས་གྲུབ་བརྒྱད་དོ། །ཆེན་པོ་ལས་ཀྱི་རིག་འཛིན་ནི། འདོད་ཁམས་ཀྱི་ལྷའི་གཟུགས་ཁམས་ཀྱི་ལྷ་དང་སྐལ་བ་མཉམ་པའི་རིག་པ་འཛིན་པའི་རྒྱལ་པོའོ། །གཉིས་པ་མཆོག་གི་དངོས་གྲུབ་ལ་གནས་སྐབས་སུ་སྔགས་ཀྱི་ལམ་ལ་བརྟེན་ནས་འཕགས་པའི་ས་ཐོབ་པ་ཟུང་འཇུག་གི་སྐུ་དང༌། མཐར་ཐུག་རྫོགས་པའི་སངས་རྒྱས་གྲུབ་པ་གཉིས་སོ། །སངས་རྒྱས་ནི་སྐུ་བཞི་ཡེ་ཤེས་ལྔ་འཕྲིན་ལས་དང་བཅས་པས་བསྡུས་པའོ། །ཆོས་ལོངས་སྤྲུལ་གསུམ་གྱི་སྟེང་དུ་བདེ་བ་ཆེན་པོའི་སྐུ་བསྣན་པ་ནི་སྐུ་བཞི་དང༌། ཆོས་དབྱིངས་མེ་ལོང་མཉམ་ཉིད་སོར་རྟོག་བྱ་བ་སྒྲུབ་པའི་ཡེ་ཤེས་ལྔ་དང༌། འཕྲིན་ལས་ནི་ཐེག་པ་གཞན་དུ་བཤད་པ་དང་ཐུན་མོང་པ་ཡང་ཡོད། རིགས་དྲུག་གི་དཀྱིལ་འཁོར་སྤྲུལ་བཤད་སོགས་ཐུན་མོང་མ་ཡིན་པ་ཡང་ཡོད་དོ། །དེ་ཐམས་ཅད་བསྡུ་ན་ཡན་ལག་བདུན་དང༌། དབང་ཕྱུག་བརྒྱད་དུ་འདུ། ཇི་སྐད་དུ། སློབ་དཔོན་ངག་དབང་གྲགས་པས་ཡན་ལག་བདུན་པའི་གཞུང་དུ། ༡ལོངས་སྤྱོད་རྫོགས་དང་༢ཁ་སྦྱོར་༣བདེ་ཆེན་༤རང་བཞིན་མེད། །༥སྙིང་རྗེས་ཡོངས་གང་༦རྒྱུན་མི་འཆད་དང་༧འགོག་པ་མེད། །ཅེས་ཡན་ལག་བདུན་ནོ། །གསང་འདུས་ཀྱི་འགྲེལ་ཆེན་སྒྲོན་གསལ་ལས། རྒྱུད་རྒྱས་པའི་ལུང་དྲངས་པ་ན། ༡སྐུ་ཡི་དབང་ཕྱུག་དང་ནི་༢གསུང་གི་དབང་ཕྱུག་དང༌། །དེ་བཞིན་དུ་ནི་༣ཐུགས་ཀྱི་དབང་ཕྱུག་དང༌། །༤རྫུ་འཕྲུལ་༥ཀུན་འགྲོ་༦གནས་ཀྱི་དབང་ཕྱུག་དང༌། །༧ཅི་འདོད་བྱེད་དང་༨ཡོན་ཏན་བརྒྱད་པའོ། །ཞེས་གསུངས་ཏེ་ཕྱི་མ་གཉིས་ནི་འདོད་པའི་དབང་ཕྱུག་དང༌། ཡོན་ཏན་གྱི་དབང་ཕྱུག་ཅེས་བྱའོ། །རྒྱུད་སྡེ་བཞི་སོ་སོའི་རྣམ་བཞག་འདི་གོང་དུ་ལུང་དངོས་སུ་མ་བཀོད་པ་རྣམས་རྡོ་རྗེ་ཐེག་པའི་གནས་ལུགས་གསལ་བྱེད་ཀྱི་ཚིག་ཟིན་ལྟར་བཀོད་པའོ། །བཞི་བ་གྲུབ་པ་འབྲས་བུའི་གནས་སྐབས་ཡང་འབྲས་རྒྱུད་བཤད་པ་དེ་དང་འདྲ་བས་དེའི་སྒོ་ནས་ཤེས་པར་བྱའོ། །
སྨྲས་པ། གསང་སྔགས་རྒྱུད་སྡེ་རྒྱ་མཚོའི་དགོངས་པའི་བཅུད། །སྔགས་ཀྱི་སྤངས་རྟོགས་བརྙེས་པའི་སྐྱེས་བུ་ཡི། །གསུང་རབ་ཁྱད་འཕགས་དཔག་བསམ་ལྗོན་པ་ལས། །བསྡུས་ནས་སྐལ་མཉམ་རྣམས་ལ་ཕན་ཕྱིར་བཀོད། །དགེ་འདིས་མ་རྒན་འགྲོ་རྣམས་མ་ལུས་པ། །རིམ་གཉིས་ཟབ་ལམ་སྔགས་ཀྱི་སྣོད་དུ་གྱུར། །གློ་བུར་གནས་སྐབས་བཞི་ཡི་དྲི་བྲལ་ནས། །བདེ་སྟོང་མཆོག་གི་གཞི་དབྱིངས་འཐོབ་པར་ཤོག །
ཅེས་རྒྱུད་སྡེ་སྤྱིའི་རྣམ་བཞག་ཕྱོགས་བསྒྲིགས་ཀུན་གསལ་ཉིན་བྱེད་སྣང་བ་ཞེས་བྱ་བ་འདི་ནི་རྡོ་རྗེ་འཛིན་པ་ཆེན་པོ་རིག་པའི་རྡོ་རྗེས་རྡོ་དྲིལ་བཅས་བ{ལ་ངོར་ངག་དབང་དངོས་གྲུབ་དཔལ་གྱིས་ཕྱོགས་བསྡུས་བྱས་ནས་བཀོད་པའོ། །སརྦ་མངྒ་ལཾ།