གཉིས་པ་བསམ་པའི་ཡན་ལག

གཉིས་པ་བསམ་པའི་ཡན་ལག་ནི།

འདུ་ཤེས་དང༌། ཀུན་སློང་སྟེ། ཕམ་པ་དང་པོ་ནི་གཞི་ལ་འདུ་ཤེས་འཁྲུལ་ཡང་ལྟུང་བ་རྫོགས་པར་བསྐྱེད་དེ། དངོས་པོ་གཙོ་བོའི་ལྟུང་བ་ཡིན་པའི་ཕྱིར་ཏེ། མི་ཚངས་པར་སྤྱོད་པ་ལ་ནི་དེར་མ་ཟད་དོ། །ཞེས་དང༌། འོད་ལྡན་རྩ་འགྲེལ་ལས། འཁྲིག་པ་ལ་ནི་འདུ་ཤེས་གཙོར་བྱ་མེད་དེ། ཞེས་གསུངས་སོ། །འདིར་དངོས་པོ་གཙོ་བོར་འཇོག་པའི་རྒྱུ་མཚན་ནི། འཁྲིག་པ་བསྟེན་པ་དེ་འདོད་པ་དང་གནོད་པ་ཐམས་ཅད་ཀྱི་རྩ་བ་ཡིན་པས་དགག་བྱ་ཆེ་བའི་ཕྱིར་དང༌། འདོད་པ་དོན་དུ་གཉེར་བའི་གང་ཟག་ལ་ལྟོས་ཏེ་འབྱུང་ཉེ་ཞིང་སྤང་དཀའ་བའི་ཕྱིར་འདུ་ཤེས་འཁྲུལ་ཡང་ཕམ་པ། མ་འཁྲུལ་ཡང་ཕམ་པ། རང་ལ་སྤྱད་ཀྱང་ཕམ་པ། གཞན་ལ་སྤྱད་ཀྱང་ཕམ་པ། གསོན་པོ་ལ་སྤྱད་ཀྱང་ཕམ་པ། རོ་ལ་སྤྱད་ཀྱང་ཕམ་པ། མི་དང་མི་མ་ཡིན་པ་དང་དུད་འགྲོ་གང་ལ་སྤྱད་ཀྱང་ཕམ་པ་སྐྱེ་བ་ཡིན་པར་དོག་ཏུ་བཀག་པའོ། །ཀུན་སློང་ནི་མི་ཚངས་པར་སྤྱོད་པར་འདོད་པ་རྒྱུན་མ་ཆད་པ་སྟེ། ཕྱུང་བ་ཐམས་ཅད་ལ་མཐའ་ཉིད་མ་གཏོགས་པ་ནི་དགེ་འདུན་ལྷག་མའོ་ཞེས་མི་ཚངས་སྤྱོད་ཀྱི་སྦོམ་པོ་བསྐྱེད་པ་ལ་མི་ཚངས་སྤྱོད་ཀྱི་ཀུན་སློང་དགོས་པར་གསུངས་པས། འདིའི་ཕམ་པ་བསྐྱེད་པ་ལ་འདིའི་ཀུན་སློང་དགོས་པར་གནད་ཀྱིས་སྦྱོར། རྒྱུན་མ་ཆད་པ་ནི། བཏང་བ་ཡང་ངོ་ཞེས་པས་གྲུབ་བོ། ། གསུམ་པ་སྦྱོར་བའི་ཡན་ལག་ནི། ལམ་དང་ཡན་ལག་རེག་ཅིང་རྩོལ་བ་སྟེ། རེག་ཅེས་སོ། །རྩོལ་བ་ནི་ལུང་དང་མདོ་རྩ་འགྲེལ་ལས་མ་བཤད་ཀྱང་འོད་ལྡན་གྱི་རྩ་བ་ལས་དྲུད་ནས་ནི་ཞེས་བཤད་དོ། །དེ་ཡང་ལུང་ལས་ལྷག་མ་དང་པོ་ལ་རྩོལ་བ་ཡན་ལག་ཏུ་གསུངས་ལ། ཕམ་པ་དང་པོ་ལ་ཡང་རྩོལ་བ་ཡན་ལག་ཏུ་དགོས་པར་སྦྱར་ཞེས་འོད་ལྡན་ལས་གསུངས་སོ། །སེལ་བ་རས་འཐུག་པོས་གཡོགས་ཏེ་མི་རེག་པར་འཛུད་ན་སྦོམ་པོར་འགྱུར་ཏེ། རྩ་བར། མ་རེག་པར་འཇུག་པ། ཞེས་སོ། ། བཞི་བ་མཐར་ཐུག་གི་ཡན་ལག་ནི། ལམ་དང་ཡན་ལག་རེག་པ་ལས་བྱུང་བའི་བདེ་བ་ཉམས་སུ་མྱོང་ཞིང་བདག་གིར་བྱེད་པ་སྟེ། ཉམས་སུ་མྱོང་བར་བྱས་ནའོ། །ཞེས་དང༌། རྣམ་འབྱེད་ལས། ཤེས་ནས་ཀྱང་བདག་གིར་བྱེད་ན་བསྙིལ་བར་བྱའོ། །ཞེས་སོ། །སེལ་བ་ནི་མཐར་ཐུག་གི་མདུན་རོལ་ཏུ་ན་སྨད་དེ་སྐྲག་པ་དང་ངོ་ཚ་བས། ཞེས་གསུངས་པས་སོ། །སྐྲག་པ་དང་ངོ་ཚ་བས་འཛུད་པ་འདི་ལ་ཕམ་པ་མི་བསྐྱེད་པ་དེ་གང་གི་སེལ་བ་ཡིན་ཞེ་ན། མཐར་ཐུག་བདེ་བ་ཉམས་སུ་མྱོང་བའི་སེལ་བ་སྟེ། ཀུན་ཏུ་འདོད་ཆགས་མ་སྐྱེས་ནའོ་ཞེས་པས་གྲུབ་བོ། ། སྨྱོ་བ་ལ་སོགས་པ་གསུམ་གྱི་ཁྱད་པར་གང་ཞེ་ན། སྨྱོ་བ་ནི་ཤེས་པ་རང་བཞིན་དུ་མི་གནས་པ་དང་གནས་པ་འདྲེས་མར་གནས་པ་ཡིན་ལ། སེམས་འཁྲུགས་པ་ནི་རང་བཞིན་དུ་གནས་པའི་སེམས་མེད་པར་འགྱུར་ཏེ། ཤེས་པ་རང་བཞིན་དུ་མི་གནས་པ་རྒྱུན་ཆགས་སུ་གྱུར་པ་སྟེ། དེ་ལྟར་ཕྲན་ཚེགས་འགྲེལ་པ་ལས་གསུངས་སཽ། །ཚོར་བས་ཉེན་པ་ན་རིམས་ཀྱི་ཚད་པས་སེམས་འཕྱོ་བ་ལྟ་བུ་ནད་ཀྱི་སྟོབས་ཀྱིས་ཤེས་པ་རང་བཞིན་དུ་མི་གནས་པར་གྱུར་པ་སྟེ། དེ་ལྟར་རྒྱ་མཚོའི་སྤྲིན་ལས་བཤད་དོ། །རྒྱུའི་འཁྲུགས་པ་སྟེ། དགེ་ཚུལ་མའི་བསླབ་པ་བཅུ་ནི་མི་འཁྲུགས་ཏེ། གང་ཁས་བླངས་པ་ན་འཁྲུགས་ན། དགེ་སློབ་མས་འཁྲིག་པ་བསྟེན་པའི་ཕྱིར་ཁས་བླངས་ན་སྟེ། རྐུུ་བ་ལ་སོགས་པ་གཞན་གསུམ་བྱེད་པར་ཁས་བླངས་པས་ནི་མི་འཁྲུགས་སོ། །དེ་ཡང་ཆོས་དྲུག་ལ་སོགས་པ་རྣམས་གཙོ་བོར་མི་ཚངས་སྤྱོད་ཀྱི་རྒྱུར་འགྲོ་བ་འགོག་པའི་བསླབ་བྱ་ཡིན་པ་ལ། དངོས་སུ་མི་ཚངས་པར་སྤྱོད་པ་ཁས་ལེན་པ་མཚང་ཆེ་བའི་ཕྱིར་དང༌། རྩ་བ་གཞན་གསུམ་ལ་དེ་ལྟར་མ་ཡིན་པའི་ཕྱིར་རོ། །གང་ལ་ཁས་བླངས་པས་འཁྲུགས་ན། གཞན་སྐྱེས་པ་འཁྲིག་པ་བསྟེན་པའི་མཐུ་ལྡན་ལ་སྟེ། གཞན་དུ་ན་དགག་བྱ་མི་རྫོགས་པའི་ཕྱིར་རོ། །ཚུལ་ཇི་ལྟར་འཁྲུགས་ན། བསླབ་པ་བཏང་བར་གྱུར་པ་སྟེ། ཊཱི་ཀ་ལས། དགེ་སློབ་མ་དེས་བསླབ་པའི་གཞི་རྣམས་འཁྲུགས་པ་ཉིད་དེ་མེད་པར་གྱུར་ཏོ་ཞེས་བྱ་བའི་ཐ་ཚིག་གོ། །ཞེས་སོ། ། ལྔ་བ་བསླབ་བྱ་ཡོད་དེ། མི་ཚངས་སྤྱོད་ཀྱི་ཉེས་དམིགས་བསམ་ནས་ཡུལ་དུས་གནས་སྐབས་ཐམས་ཅད་དུ་ཉེས་བྱས་ཚུན་ཆད་སྤང་པར་བསླབ་པ་དེ་ཡིན་པའི་ཕྱིར་ཏེ། བམ་ལྔ་ལས། བསླབ་པར་བྱ་ན་ནི་ཡུལ་ཐམས་ཅད་ལ་གནས་སྐབས་ཐམས་ཅད་དུ་མི་ཚངས་སྤྱོད་པའི་སྦྱོར་བའི་སྦྱོར་བ་ཉེས་བྱས་དང༌། སྦྱོར་བ་སྦོམ་པོ་དང༌། དངོས་གཞིར་འགྱུར་བ་རྣམ་པ་ཐམས་ཅད་དུ་བསྟེན་པར་མི་བྱ་བར་བསླབ་པར་བྱའོ། །ཞེས་གསུངས་པའི་ཕྱིར་རོ། །ཕམ་པ་བཞི་ལས་དང་པོ་མི་ཚངས་སྤྱོད་ཀྱི་ཕམ་པ་བཤད་ཟིན་ཏོ། །