སྦྱིན་སྲེག་གི་ལས་ཀྱི་རིམ་པ།
དཔལ་གྱི་ཞབས་ཀྱིས་མཛད།

---

^{[མ་དཔེ་གཟིགས་ན་འདིར་གནོན།]}

༈།སྦྱིན་སྲེག་གི་ལས་ཀྱི་རིམ་པ་བཞུགས་སོ།། བཅོམ་ལྡན་འདས་ཀྱེའི་རྡོ་རྗེ་ལ་ཕྱག་འཚལ་ལོ། །སྦྱིན་སྲེག་གི་ལས་ཀྱི་རིམ་པ་ལ། དབང་བསྐུར་བའི་སྔོན་རོལ་དུ་རྒྱས་པའི་ལས་བྱས་ཏེ། དཔངས་ཁྲུ་གང་ལ་ཁྲུ་ཕྱེད་ཐུར་དུ་བརྐོའོ། །སོར་བཞི་ཕྱིར་དགྱེད། ཁ་ཁྱེར་སོར་བཞིས་བསྐོས། ཞེང་དང་དཔངས་སོར་བཞི་བྱ། དེའི་ཕྱི་རོལ་གྱི་སོར་བཞི་པོར་ལ། པདྨའི་ཕྲེང་བ་གཏང༌། དབུས་ཀྱི་ཁ་ཁྱེར་ལ་རྡོ་རྗེ་ར་བ་གཏང༌། སྤྱིར་གྲུ་བཞི་ལ་ཞེང་ཕྱི་རོལ་གྱི་རྒྱ་ཁྲུ་གསུམ་གཏང༌། ཐབ་ཁུང་ནང་དུ་གཙོ་བོའི་ཕྱག་མཚན་གཞག་པ་ནི་འཇིམ་པ་ལ་སོགས་པ་ལ་ཞེང་སོར་བརྒྱད་དཔངས་སོར་གཅིག་གཏང༌། དབུས་སུ་རིན་པོ་ཆེ། ཤར་རྡོ་རྗེ། ལྷོར་འཁོར་ལོ། ནུབ་ཏུ་པདྨ། བྱང་དུ་རལ་གྲི། ཁ་དོག་སེར་པོར་བྱུག་གོ །རྒྱས་པའི་ལས་ལ་ཁ་ཤར་དུ་བལྟའོ། །ཞི་པའི་ཐབ་ཁུང་ཟླུམ་པོ་ཁྲུ་གང་དུ་བྱས། ཁྲུ་ཕྱེད་ཐབས་སུ་བརྐོ། ཁ་ཁྱེར་རྒྱས་པ་ལ་སོགས་པ་དང་མཐུན་པར་བྱའོ། །དབུས་ཀྱི་ཁ་ཁྱེར་ལ་རྡོ་རྗེ་ཕྲེང་བ་གཏང༌། དེའི་ཕྱི་རོལ་ཏུ་པདྨ་གཏང༌། ཐབ་ཁུང་དུ་གཙོ་བོའི་ཕྱག་མཚན་གཞག་པ་ནི་དབུས་སུ་རྡོ་རྗེ། ཤར་དུ་འཁོར་ལོ། །ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲི། ཞེང་སོར་བརྒྱད་པ་བྱའོ། །ཁ་དོག་དཀར་པོར་བྱུག །བླ་མ་ཁ་བྱང་དུ་བལྟ། དབང་གི་ལས་ལ་ཐབ་ཁུང་ཟླ་གམ་སྟེ། ཟླ་གམ་བཤུལ་ལ་བཞི་བཅུ་བཏང༌། ཁ་ཁྱེར་ལ་སོར་བཞི་བཅུ་ཐམ་པ། ཟབས་སུ་སོར་བཅུ་བརྐོ་བར་བྱ། ཁ་ཁྱེར་སྤྱིར་མཐུན། ཁ་ཁྱེར་རྡོ་རྗེའི་ར་བ་གཏང༌། ཕྱི་རིམ་དུ་མེ་རི་གཏང༌། ཁ་དོག་དམར་པོར་བྱུག །ཙནྡན་སྨུག་པོས་བྱུག །དབུས་སུ་གཙོ་བོའི་ཕྱག་མཚན་བཏང་བ། པདྨ་ཕྱི་མ་སྤྱིར་མཐུན། དབང་དང་བསྐྲད་པ་ལ་ཁ་ནུབ་ཏུ་བལྟ། དྲག་པོའི་ལས་ཀྱི་རིམ་པ་ལ། ཐབ་ཁུང་ཟུར་གསུམ་ལ།

---

^{[མ་དཔེ་གཟིགས་ན་འདིར་གནོན།]}

སོར་ཉི་ཤུ་ཉི་ཤུ་བྱའོ། །ཁ་ཁྱེར་སོར་གསུམ་ཕྱིར་དགྱེད། ཁ་ཁྱེར་སོར་གསུམ་བསྐོར། །ཞེང་སོར་གསུམ་གཏང༌། དེའི་ཕྱི་རོལ་དུ་སོར་གསུམ་གཏང༌། ཁ་ཁྱེར་ལ་རྡོ་རྗེ་རྩེ་གསུམ་པ་གཏང༌། དེའི་ཕྱི་རིམ་དུ་ཐོད་པ་དང༌། མདའ་གཞུ་དང༌། མདུད་རྩེ་གསུམ་པ་ལ་སོགས་པ་དྲག་པོའི་ཕྱག་མཚན་གཏང༌། གཙོ་བོའི་ཕྱག་མཚན་དབུས་སུ་རལ་གྲི། ཕྱི་མ་ལས་ཀྱི་མཚན་ཉིད་དང༌། བླ་མའི་ཁ་ལས་ཤེས་པར་བྱའོ། །ཁ་དོག་ནག་པོས་བྱུག །ཁ་ལྷོར་བལྟའོ། །རྒྱས་པ་ནང་པར་བྱའོ། །ཞི་བ་ཉི་མ་ཕྱེད་ན་བྱའོ། །དབང་ཉི་མ་ནུབ་ན་བྱའོ། །དྲག་པོ་ནམ་ཕྱེད་ན་བྱའོ། །མེ་ཐབ་ཀྱི་རིམ་པའོ། །མཆོད་རྫས་དང་སྲེག་རྫས་ཀྱི་རིམ་པ་ལ། སྔགས་མཁན་གྱི་གཡོན་དུ་དྲི་དང་མེ་ཏོག་གིས་བཀང་བའི་དུང་ཕོར་གཞག །ཡོན་ཆབ་ཀྱི་སྣོད་གསེར་ལ་སོགས་པ་ལས་ཀྱི་བྱེ་བྲག་དང་མཐུན་པ་ཆབ་ཀྱིས་བཀང་ལ་གཞག །མ་འབྱོར་ན་ས་ལས་བྱས་པ་ཡང་རུང་ངོ༌། །དགང་གཟར་དང་བླུགས་གཟར་དང་མར་མདུན་དུ་གཞག །གཡས་སུ་ཟངས་གཞོང་གི་ནང་དུ་དྲིས་བཀང་ལ་ཀུ་ཤ་བཅུག་ལ་པྲོ་ཀྵ་ཎའི་སྣོད་གཞག་གོ །ལས་ཀྱི་བུམ་པ་གཅིག་ཀྱང་གཞག་གོ །ཏིལ་ལ་སོགས་པ་སྲེག་རྫས་ཀྱང་གཞག་གོ །དེ་ལ་རྫས་ཀྱི་རིམ་པ་རྒྱས་པ་ལ་ཞོ། ཞི་བ་ལ་ཏིལ། དབང་ལ་ཨུཏྤལ་དམར་པོ། དྲག་པོ་ལ་ཚེར་མ་ཅན་གྱི་ཤིང༌། ཕྱི་མ་རིམ་པ་བཞིན་ནོ། །ཀུན་གྱི་སྔོན་དུ་མར། ཐ་མར་ཡང་མར་རོ། །རྫས་དགྲམ་པའི་རིམ་པའོ། །རྫས་བྱིན་གྱིས་བརླབ་པ་ནི། གཞོང་བུ་ཀུན་གྱི་སྟེང་དུ་རྡོ་རྗེ་བཞག་ལ། དེ་ཉིད་གསུམ་གྱི་སྔགས་བརྫོད་པས། འཇིག་རྟེན་ཀུན་གྱི་རྟོག་པ་ཀུན་བསལ་ནས། རྫས་དེ་ཉིད་བཟང་པོར་བསམ་མོ། །ཡམ་ཤིང་གི་རིམ་པ་ལ། ཞི་བའི་ཡམ་ཤིང་ནི་འོ་མ་ཅན་གྱི་ཤིང་དང་རློན་པ་རྩེ་མོ་དང་བཅས་པ་བྱུང་བ། སྲིད་དུ་མཛུབ་གང་བ་སྦོམས་སུ་ཆག་པ་གང་ཡོད་པ་སྦྲང་རྩི་དང་འོ་མ་དང༌། ཙནྡན་དཀར་པོའི་ཆུས་སྤངས་པ། རྩེ་གཅིག་ཏུ་ཞི་བའི་ལས་ལ་དབུལ་ལོ། །རྒྱས་པའི་ཡམ་ཤིང་ནི། སྲིད་དུ་ཁྲུ་གང་བ་སྦོམས་སུ་ཞི་བ་དང་མཐུན་ནོ། །ཡལ་ག་དང་དབུས་ཀྱི་ཆ་ལས་བྱུང་བ། ཞོ་དང་མར་དང་སེར་པོའི་དྲི་ལས་སྤངས་པ། རྩེ་གཅིག་ཏུ་རྒྱས་པའི་ལས་ལ་དབུལ་ལོ། །དབང་གི་ཡམ་ཤིང་ལ། སྲིད་དུ་

---

^{[མ་དཔེ་གཟིགས་ན་འདིར་གནོན།]}

སོར་ལྔ་པ་འདབ་མ་དང་སྦོམས་སུ་ཆག་གང་བ་ཡུངས་མར་དང་བདུད་རྩི་ལ་སོགས་ཀྱིས་སྤངས་ལ། དབང་གི་ལས་ལ་དབུལ་ལོ། །དྲག་པོའི་ཡམ་ཤིང་ནི། སྲིད་དུ་སོར་བཞི་པ། རྩེ་མོ་ཅན་གྱི་ཤིང་ལས་བྱུང་བ། གསོད་པའི་ལས་ལ་རབ་ཏུ་ཤིས་པ། མི་རུས་དང་དུར་ཁྲོད་ཀྱི་སོལ་བ་དང༌། ཐལ་ཆེན་ལན་ཚྭ་ཁ་བ་དང༌། ཚ་བའི་རྫས་རྣམས་ཆུ་ལ་སྤངས་ལ། རབ་ཏུ་བསྒྲིམས་ལ་མངོན་སྤྱོད་ཀྱི་ལས་ལ་དབུལ་བར་བྱའོ། །ཡམ་ཤིང་གི་རིམ་པའོ། །བུད་ཤིང་གི་རིམ་པ་ལ། པ་ལ་ཤ་དང་ནྱ་གྲོ་དྷ་ལ་སོགས་པ་ལས་བྱའོ། །དེ་མེད་ན་འོ་མ་ཅན་གྱི་ཤིང་སྐམ་པོ་ལས་བྱས་ལ་ལས་ཀྱི་རྗེས་སུ་མཐུན་པར་བྱའོ། །དེ་ནས་སློབ་དཔོན་གྱིས་ཡི་དམ་ལྷའི་ཏིང་ངེ་འཛིན་རྫོགས་པ་དང༌། ཀུ་ཤས་པྲོཀྵ་ཎཾ་བྱའོ། །ཨཉྩ་མཱ་ནཾ་ཨ་རྒྷ་བི་དྷི་དང༌། མཆོད་པ་རྣམ་པ་ལྔ་དབུལ་བ་དང༌། ནང་གི་བྱག་རྒྱའི་མཆོད་པ་བྱ། ཕྱག་བཙལ། དེ་ནས་ཀུ་ཤས་ཐམས་ཅད་ལ་པྲོ་ཀྵ་ཎཾ་བྱའོ། །དེ་ནས་ལྕགས་ལ་སོགས་པའི་སྣོད་སར་པར་ཤིང་བརྩིགས་ལ། གཙུབས་པ་ལ་སོགས་པའི་མེ་བླངས་ལ། རླུང་ཡབ་ཀྱིས་གཡབས་ལ་མེ་སྦར་རོ། །དེ་ལ་སྦར་བའི་སྔགས་ནི། ཨོཾ་ཛྭ་ལ་ཛྭ་ལ་ཧཱུཾ་ཕཊ་ཅེས་སོ། །དེ་ནས་དུ་བ་མེད་ཅིང་ལེགས་པར་འབར་བ་དང༌། ཐབ་ཁུང་གི་ཤིང་བ་རྩིགས་པ་ལ་བླུགས་སོ། །མེ་སྦར་བའི་རིམ་པའོ། །དེ་ནས་ཀུ་ཤ་འབྲིང་གཉིས་ཤར་ཕྱོགས་སུ་ཁ་བསྟན་ལ་གཞག །ལྷོ་དང་ནུབ་དང་བྱང་དུ་ཡང་དེ་བཞིན་བསྟན། ཀུ་ཤ་དགྲམ་པའི་སྔགས། ཨོཾ་བཛྲ་ས་ཏྭ་ཨཱ་ཨུ་ཥེ་སྭཱ་ཧཱ། ཀུ་ཤ་དགྲམ་པའི་རིམ་པའོ། །དེ་ནས་སློབ་དཔོན་ཡི་དམ་བསྒོམ་པ་དང་ལྡན་པས་ཐབ་ཀྱི་ནང་དུ་སྣ་ཚོགས་པདྨ་འདབ་བརྒྱད་པ་ཅིག་བསམས་ལ། དེའི་དབུས་སུ་མངོན་པར་བྱང་ཆུབ་པ་ལྔ་དང་ལྡན་པས་ཀྱེའི་རྡོ་རྗེ་ཡབ་ཡུམ་བསྒོམ་མོ། །འདོད་ཆགས་ཆེན་པོ་སྐྱེས་པའི་སྟོབས་ཀྱིས་ཞུ་ནས་དངུལ་ཆུ་བཞིན་དུ་གནས་པ་ལས། དེ་ཉིད་ཡི་གེ་ཧཱུཾ་དང་ཛཾ་གཉིས་སུ་གྱུར། ཡི་གེ་གཉིས་ཡོངས་སུ་གྱུར་པ་ལས་མེ་ལྷ་ཡབ་ཡུམ་དུ་བསྐྱེད་དེ། མེ་ལྷ་ཞལ་གསུམ་ཕྱག་དྲུག་པ་གསུས་པ་ལྡིར་བ་རལ་པའི་ཐོར་ཅོག་ཅན། མཆོད་ཕྱིར་ཐོགས་འཆང་བ། རང་དང་འདྲ་བའི་ཤེས་རབ་མ་ལ་འཁྱུད་པའོ། །གཡས་ཀྱི་བར་མ་ནི་གུནྡྷེའོ། །ཐ་མ་མཆོད་སྦྱིན། གཡོན་བར་མ་ན་ཟེ་འབྲུ།

---

^{[མ་དཔེ་གཟིགས་ན་འདིར་གནོན།]}

ཐ་མ་ན་བགྲང་ཕྲེང་སྐུ་མདོག་ལས་ཀྱི་བྱེ་བྲག་དང་མཐུན་པའོ། །དེ་ལྟར་བསམས་པའི་ཐུགས་ཀར་སྣ་ཚོགས་པདྨ་དེའི་སྟེང་དུ་གྲུ་གསུམ་མེ། དེའི་སྟེང་དུ་བྷྲཱུཾ་བསམ། ཛཾ་བསམ། ལྕེ་ལ་རཾ་བསམ། མེ་ལྷ་དམ་ཚིག་སེམས་དཔའ་བསྒོམ་པའི་རིམ་པའོ། །དེ་ལ་ཡང་པྲོཀྵ་ཎཾ་ལ་སོགས་པ་གར་ཡན་ཆད་བྱའོ། །དེ་ནས་ཡེ་ཤེས་སེམས་དཔའ་སྤྱན་དྲངས་ཏེ། སློབ་དཔོན་གར་དང་ལྡན་པས། ཛཿ་ལྕགས་ཀྱུའི་ཕྱག་རྒྱས་སྤྱན་དྲང་ངོ༌། །དེ་ནས་མདུན་གྱི་ནམ་མཁའ་ལས་ཀྱང་བཀུག་ལ་ཐབ་ཀྱི་ཁར་བཞག །དེ་ནས་པྲོཀྵ་ཎཾ་དང་ཨ་ཉྩ་མཱ་ནཾ་ལ་སོགས་པ་ཕྱག་བྱ་བ་ཡན་ཆད་བྱ། དེ་ནས་ཡང་པྲོཀྵ་ཎཾ་ལ་སོགས་པ་གསུམ་བྱའོ། །གང་དང་ལྡན་པས་ཞགས་པས་གཉིས་སུ་མེད་པར་བསྟིམ། ལྕགས་སྒྲོག་གིས་བཅིང༌། དྲིལ་བུས་མཉེས་པར་བྱ། དེ་ནས་ཡང་པྲོkཥ་ཎཾ་ལ་སོགས་པ་གསུམ་བྱའོ། །དེ་ནས་གཟར་བུ་གཉིས་ཀྱི་ནང་དུ་ཡི་དམ་གྱི་ལྷའི་སྙིང་པོའི་ཡི་གེ་ཧཱུཾ་རེ་རེ་བསམ་མོ། །དེ་ནས་གྲུ་མོ་གཉིས་སྤྲད་ལ། མར་གཟར་བུ་བདུན་དབུལ། ཨོཾ་ན་མཿ་ས་མནྟ་བུདྡྷཱ་ནཱཾ། ཨགྣ་ཡེ་སྭཱ་ཧཱ། པུརྞ་ཏི་ཏི་མནྟྲ། ཨོཾ་ཨགྣ་ཡེ་པུཥྚིཾ་ཀུ་རུ་སྭཱ་ཧཱ། དེ་ནས་བླུགས་གཟར་གྱིས་དབུལ་བར་བྱ་སྟེ། དགང་གཟར་གཞག །ཨོཾ་སརྦ་སཾ་པ་དེ་སྭཱ་ཧཱ། ཞོ་དང་ཟན་གྱིའོ། །དེ་ནས། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་ཨ་མུ་ཀ་སརྦ་པཱ་པཾ་ད་ཧ་སྭཱ་ཧཱ། ཏིལ་གྱིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་བའིའོ། །ཨོཾ་བཛྲ་པུཥྚ་ཡེ་སྭཱ་ཧཱ། ཆག་པ་མེད་པའི་འབྲས་ཀྱིའོ། །ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའི་སྔགས་སོ། །ཨོཾ་བཛྲ་བི་ཛཱ་ཡ་སྭཱ་ཧཱ། འབྲས་ཀྱི་ལག་པན་གྱིའོ། །མ་ཧཱ་བེ་གཱ་ཡ་སྭཱ་ཧཱ། ནས་ཀྱིའོ། །ཨོཾ་མ་ཧཱ་བ་ལཱ་ཡ་སྭཱ་ཧཱ། ཆན་གྱིའོ། །ཨོཾ་བཛྲ་གྷསྨ་རི་ཡེ་སྭཱ་ཧཱ། གྲོའིའོ། །ཡམ་ཤིང་གི་ལ། ཨོཾ་བཛྲ་ཡཛྙཱ་ཡ་སྭཱ་ཧཱ། ཨུ་དུཾ་ཝཱ་རའིའོ། །ཨོཾ་བོ་དྷི་པྲིཀྵཱ་ཡ་སྭཱ་ཧཱ། བྱང་ཆུབ་ཤིང་གིའོ། །ཨོཾ་བཛྲ་རྟ་ཏཱ་ཡ་སྭཱ་ཧཱ། ནྱ་གྲོ་དྷའིའོ། །ཨོཾ་བཛྲ་ས་ཧ་ཀ་རཱ་ཡ་སྭཱ་ཧཱ། ཨ་མྲའིའོ། །དེ་ནས་ཡང་མར་དགང་གཟར་ཁེངས་པ་སྟོང་མན་ཆོད་དབུལ་ལོ། །དེ་ནས་ཡང་པྲོ་ཀྵ་ཎཾ་ལ་སོགས་པ་བྱ། དེ་ཀུན་རྫོགས་པ་དང༌། རྡོ་རྗེ་དཀུར་བརྟེན་དྲིལ་བུ་གསིལ་ལ། སྲིད་པ་རང་བཞིན་གྱིས་དག་པའི་ཚིགས་བཅད་བརྗོད་དོ། །དེ་ནས་མེ་ལྷ་ལ་བསྟོད་པ་བྱ། ཕྱག་བྱ། དེ་ནས་ལས་ཀྱི་བུམ་པའི་

---

^{[མ་དཔེ་གཟིགས་ན་འདིར་གནོན།]}

ཆུས་ཐབ་ཁུང་དུ་ལན་གསུམ་ཀུ་ཤས་གཏོར་ལ་བསང་བར་བྱའོ། །དེ་ནས་མེ་ལྷའི་ཐུགས་ཀར་དཀྱིལ་འཁོར་གྱི་ལྷའི་འཁོར་ལོ་བསམས་ལ། མེ་ལྷའི་ཁ་ཧོམ་ཁུང་དུ་བསམས། དེ་ནས་ཡེ་ཤེས་སེམས་དཔའ་གར་དང་ལྡན་པར་ཛཿ་ས་སྤྱན་དྲངས་མདུན་གྱི་ནམ་མཁའ་ལ་བཞུགས་སུ་གསོལ། པྲོཀྵ་ཎཾ་ལ་སོགས་པ་ཀུན་རྫོགས་པ་དང༌། ཡང་ཕྱག་རྒྱ་བཞིས་དགུག་པ་དང༌། གཞུག་པ་དང༌། བཅིང་བ་དང༌། དགྱེས་པ་བསྐྱེད་ནས་གཉིས་སུ་མེད་པར་བསྟིམས་ལ། དེ་ནས་ཡང་པྲོཀྵ་ཎཾ་ལ་སོགས་པ་ཕྱག་བྱ་བ་ཡན་ཆད་བྱའོ། །དེ་ནས་མར་གཟར་བུ་ཉི་ཤུ་རྩ་གཅིག་མན་ཆད་དབུལ་ལོ། །དེ་ནས་ཞོ་ལ་སོགས་པའི་རྫས་ཀྱི་རིམ་པ་ལྷ་ལ་དབུལ་ལོ། །ཡང་མར་གྱི་སྦྱིན་སྲེག་བརྒྱ་རྩ་བརྒྱད་མན་ཆད་དབུལ་ལོ། །ཡང་པྲོཀྵ་ཎཾ་ལ་སོགས་པ་བྱ། རྡོ་རྗེ་དཀུར་བརྟེན་དྲིལ་བུ་གསིལ་ལ། སྲིད་པ་རང་བཞིན་གྱིས་དག་པའི། །ཚིགས་བཅད་བརྗོད། བསྟོད་པ་བྱ། དེ་ནས་གར་གྱི་དཀྱིལ་འཁོར་གྱི་ལྷ་ལ་ཕྱག་བྱའོ། །ཨོཾ་བཛྲ་མུཿ་ས་གཤེགས་སུ་གསོལ། བཟོད་པར་གསོལ། དེ་ནས་རྫས་ལྷག་མ་ཅི་ཡོད་པས་མེ་ལྷ་ལ་མཆོད་པ་དབུལ་ལོ། །ཨོཾ་བཛྲ་ཨགྣ་ཡེ་སྭཱ་ཧཱ། ཞེས་རྫས་ཀུན་ཟད་པར་བླུགས་གཟར་གྱིས་དབུལ་ལོ། །དེ་ནས་སློབ་མ་ཀུན་མེ་ཏོག་ལག་ཏུ་ཐོགས་ལ་རྗེས་སུ་ཡི་རང་བ་བགྱི་སྟེ། སློབ་དཔོན་གྱིས་དགང་གཟར་མར་གྱིས་བཀང་བའི་ནང་དུ་སློབ་མ་ཀུན་གྱིས་མེ་ཏོག་བླུགས་ཏེ། སློབ་དཔོན་གྱིས་ཀྱང་བཛྲ་ཨགྣ་ཡེ་སྭཱ་ཧཱ། ཞེས་བརྗོད་ཅིང་འབུལ་ལོ། །སློབ་མས་ཀྱང་རྒྱས་པར་གྱུར་ཅིག་གམ། ཞི་བར་གྱུར་ཅིག་པའི་རྗེས་སུ་ཡི་རང་བ་བྱའོ། །ཞི་བ་ཡིན་ན་རུ་རུ་སྥུ་རུའི་སྔགས་ཀྱིས་མར་ལ་སྦྱིན་སྲེག་བརྒྱ་རྩ་བརྒྱད་ལ་རྗེས་སུ་ཡི་རང་བར་བགྱིའོ། །རྗེས་དབུལ་བའི་རིམ་པ་ལ། པྲོཀྵ་ཎས་ནི་སྤྱིར་བསང་བར་བྱའོ། །ཨཉྩ་མཱ་ནས་ནི་མེ་ཏོག་མཐེབ་མཛུབ་གྱིས་བླངས་ལ། ཞལ་དང་ཐུགས་དང་ཕྱག་ཏུ་དབུལ་བར་བྱའོ། །ཨརྒྷ་ནི་དུང་ཕོར་ནས་སྐྱོར་མོས་ལན་གསུམ་མདུན་དུ་དབུལ་ལོ། །པཱ་དྱཾ་ནི་དུང་ཕོར་ནས་མཐེབ་མཛུབ་གཉིས་ཀྱིས་མེ་ཏོག་བླངས་ལ། སྨད་དེ་ཐབ་ཀྱི་ཞབས་ལ་ཕོག་པར་བྱས་ལ་ལན་གསུམ་ཞལ་བསིལ་དབུལ་ལོ། །ལས་ཀྱི་བུམ་པ་ནི་བསང་བའོ། །སླ་བའི་རྫས་ནི་ཞལ་དུ་དབུལ་ལོ། །ཤིང་བུ་འོད་ལ་དབུལ། འབྲས་

---

^{[མ་དཔེ་གཟིགས་ན་འདིར་གནོན།]}

ལ་སོགས་པ་རྣམས་ནི་ཕྱག་ཏུ་དབུལ། དྲི་སྙིང་གར་དབུལ། མེ་ཏོག་དབུལ་དབུལ། བདུག་སྤོས་ཤངས་ལ་དབུལ། དྲི་ཆབ་ཞབས་ལ་དབུལ། ཨརྒྷ་དང་མར་མེ་མདུན་དུ་དབུལ། མེའི་དེ་ཁོ་ན་ཉིད་ནི་བླ་མའི་ཞལ་ལས་ཤེས་པར་བྱའོ། །ལྷ་རྣམས་མཉེས་པར་བྱ་བ་དང༌། སྔགས་རྣམས་གཟི་བྱིན་སྐྱེ་བ་དང༌། སྡིག་པ་རྣམས་ནི་བསྲེག་པའི་ཕྱིར། །བཟླས་པ་བས་ཀྱང་སྦྱིན་སྲེག་ཤིས། རྣལ་འབྱོར་གྱི་དབང་ཕྱུག་དཔལ་གྱིས་ཞབས་ཀྱིས་བཤད་པ་རྫོགས་སོ།།