ཞི་བྱེད་པའི་གྲུབ་མཐའ།
༡ དེ་ཡང་ཞི་བྱེད་པ་ནི། ཤེར་ཕྱིན་གྱི་ཉམས་ལེན་ལ་བརྟེན་ཏེ་སྡུག་བསྔལ་ཞི་བར་བྱེད་པའི་ཆ་ནས་བཏགས་པ་ཡིན་ལ། ཆོས་བརྒྱུད་འདིའི་མ་ཁུངས་ནི་ཕ་དམ་པ་སངས་རྒྱས་ཡིན། བི་ཀྲ་མ་ཤི་ལར་མཁན་པོ་དགེ་བའི་ལྷ་ལས་རབ་ཏུ་བྱུང་། བླ་མ་མང་བོ་བསྟེན་ནས་མཁས་གྲུབ་ཀྱི་གོ་འཕང་བརྙེས། བོད་དུ་ཐེངས་ལྔར་ཕེབས་ཤིང་། སློབ་མ་དཔག་ཏུ་མེད་པ་ཞི་བྱེད་ཀྱི་གདམས་པས་སྨིན་པར་མཛད་པ་ལས། གྲགས་ཆེ་བ་ནི། ཞི་བྱེད་སྔ་ཕྱི་བར་གསུམ་སྟེ། སྔ་མ་ཁ་ཆེ་ཉྫ་ན་གུ་ཧ་ལ། དེ་ཨོང་པོ་ལོ་ཙཱ་བས་བསྒྱུར་བ། ཞི་བྱེད་སྒྲོན་མ་སྐོར་གསུམ་དང་། གཤིན་རྗེ་གཤེད་ལ་སོགས་པའི་སྒྲུབ་ཐབས་དང་། བརྒྱུད་པ་བར་མ་ནི། རྨ་ཆོས་ཀྱི་ཤེས་རབ། སོ་ཆུང་དགེ་འདུན་འབར། སྐམ་ཡེ་ཤེས་རྒྱལ་མཚན་དང་གསུམ་ལ་གདམས་ངག་གནང་ནས་འཕེལ་བ་ལ་ཟེར། བརྒྱུད་པ་ཕྱི་མ་ནི། ཕ་དམ་པ་སངས་རྒྱས་དིང་རི་གླང་སྐོར་དུ་བྱོན། དམ་པ་ཕྱར་ཆེན། ཕྱར་ཆུང་། བཛྲ་ཀྲོ་དྷ། ཀུན་དགའ་བཞི་ལས། ཀུན་དགའ་གཙོ་བོ་སྟེ། སྐུ་ཚེ་ལྔར་དམ་པ་སངས་རྒྱས་ཀྱིས་རྗེས་སུ་བཟུང་། སྐུ་ཚེ་འདིར་དེའི་གདམས་ངག་གི་མཛོད་དུ་གྱུར་བས། སློབ་མ་པ་ཚབ་སྒོམ་པ་དང་། དེ་ནས་རྒྱལ་བ་ཏེ་ནེ། རོག་ཤེས་རབ་སེང་གེ་དང་ཞིག་པོ་ཉི་མ་སེང་གེ་སོགས་བརྒྱུད་དེ་ཞི་བྱེད་དར་རྒྱས་སུ་མཛད་དོ། །ཞི་བྱེད་ཀྱི་ཆོས་ཀྱི་སྙིང་བོར་གྱུར་བ་ནི་ཤེར་མདོ་ལ་གཏུགས་ལ། ཤེར་ཕྱིན་གྱི་བརྒྱུད་པའི་བཀའ་བབས་དྲུག་གི་སྙིང་བོའི་བཅུད་བསྡུས་ནས་ཉམས་སུ་ལེན་པ་ལགས་ལ། ཁྱད་པར་དུ་ཀླུ་སྒྲུབ་ལ་ཚད་མར་མཛད་པ་སྟེ། དིང་རི་བརྒྱད་ཅུ་བར་ཡང་། སྟོང་བའི་ངང་དུ་རིག་པ་མདུང་བསྐོར་བྱ། །ལྟ་བར་ཐོགས་རྡུགས་མེད་དོ་དིང་རི་བ། །ཞེས་ལྟ་བ་མཐའ་བྲལ་དུ་གསུངས་པའི་ཕྱིར་ན་དབུ་མའི་ལྟ་བ་ལས་མ་འདས་སོ། །
༢ ཞི་བྱེད་པའི་ཡ་གྱལ་གཅོད་ལུགས། དེ་ཡང་གཅོད་ཅེས་པ་ནི། བྱམས་སྙིང་རྗེ་བྱང་ཆུབ་ཀྱི་སེམས་ཀྱི་སྒོ་ནས་རང་དོན་ཡིད་བྱེད་གཅོད། སྟོང་ཉིད་ཀྱི་ལྟ་བས་འཁོར་རྩ་གཅོད། ཐུན་མོང་གི་བདུད་བཞི་གཅོད་པས་ན། གཅོད་ཅེས་བྱེད་ལས་ཀྱི་ཆ་ནས་བཏགས་པ་དང་། ཡང་ན། རྒྱལ་སྲས་ཀྱི་ཉམས་ལེན་ཐབས་ཤེས་ཀྱི་ལམ་ལ་སྤྱོད་པས་ན་སྤྱོད་ཅེས་ཀྱང་གྲགས་སོ། །
གཅོད་ཀྱི་གདམས་པ་འདི་བརྒྱུད་ཚུལ་ནི། ཕ་དམ་པ་བོད་དུ་ཕེབས་ཐེངས་གསུམ་པར། གཙང་དུ་སྐྱོ་སྟོན་བསོད་ནམས་བླ་མ་དང་། ཡར་ཀླུང་སྨ་ར་སེར་བོ་གཉིས་ལ་གཅོད་ཀྱི་གདམས་པ་གནང་། སྨ་ར་སེར་བོས་རང་གི་ཉེ་གནས་སྨྱོན་པ་སེ་རོང་། དེས་རྩེ་སྟོན་དང་སུམ་སྟོན་གཉིས་ལ། རྩེ་སྟོན་གྱིས་གཉན་སྟོན། སུམ་སྟོན་གྱིས་སྐལ་ལྡན་སྲས་མོ། དེས་གཙང་སྟོན། དེས་གཉན་སྟོན་སོགས་ལ་གནང་བའི་རྒྱུན་ལ་ཕོ་གཅོད་དང་། སྐྱོ་སྟོན་བསོད་ནམས་བླ་མས་ལབ་སྒྲོན་ལ་གནང་བའི་རྒྱུན་ལ་མོ་གཅོད་དུ་གྲགས་སོ། །སྤྱིར་ན། གཅོད་ཀྱི་གདམས་པ་འདི་ལ་རྒྱ་གཅོད་ཆུ་བོ་བཞི་དང་། ཕོ་གཅོད་མོ་གཅོད་ཅེས་ཐ་སྙད་སྦྱོར་ཚུལ་མང་ཡང་། མ་ཅིག་གི་བརྒྱུད་པ་དྲུག་ལྡན་བྱ་བ་འདི་སྟོང་དཀྲུགས་འོ་མའི་མར་ལོ་བཞིན་དྲིལ་ཞིང་། ཁྱད་པར་དུ་འཇམ་དཔལ་གྱི་རྒྱུད་སོགས་ལས། ང་ཡི་བསྟན་པའི་སྙིགས་མ་ལ། །བྱང་ཕྱོགས་ལབ་ཀྱི་གྲོང་ཁྱེར་དུ། །རྒྱལ་བའི་ཡུམ་གྱི་སྤྲུལ་བ་ནི། །སྒྲོན་མའི་མཚན་ཅན་འབྱུང་བར་འགྱུར། །སྐྱེ་མེད་སྙིང་བོའི་དོན་སྟོན་ཅིང་། །གྲོང་དང་གྲོང་ཁྱེར་རི་སུལ་དང་། །དུར་ཁྲོད་བས་མཐའ་ཁྱད་པར་ཉུལ། །དེ་ཡི་ཆོས་ནི་རྒྱས་པར་འགྱུར། །ཞེས་ལུང་གིས་ཟིན་པའི་མ་ཅིག་ལབ་སྒྲོན་འདི་ལ་བུ་སློབ་མང་དུ་ཡོད་ཀྱང་། གཙོ་ཆེ་བའི་དབང་དུ་བཏང་ན། ཐུགས་ཀྱི་སྲས་བོ་བཞི་དང་། སྲས་མོ་བཞི། རང་མཉམ་གྱི་སྲས་བརྒྱད་དེ་བཅུ་དྲུག་སོགས་བྱུང་ནས་ཆོས་རྒྱུན་འདི་རྒྱ་ཆེར་དར་བ་ཡིན་ནོ། །
གཅོད་ཀྱི་གདམས་པའི་ངོ་བོ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྔགས་དང་མཐུན་པར་སྤྱོད་པ་སྟེ། གདམས་པའི་ཁུངས་ཡུམ་རྒྱས་འབྲིང་བསྡུས་གསུམ་དང་། ལྷག་པར་དུ་སྡུད་པ་ལས། རྒྱུ་རྣམས་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པར་མི་ནུས་ཏེ། །སྟོང་བར་གནས་དང་སེམས་ཅན་ཡོངས་སུ་མི་གཏོང་དང་། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་རླབས་ཅན། །ཞེས་བསྟན་ཏོ། །སྔགས་དང་ཇི་ལྟར་རྗེས་སུ་མཐུན་ན། བརྟག་གཉིས་ལས། ཤིང་གཅིག་དང་ནི་དུར་ཁྲོད་དང་། །མ་མོའི་ཁྱིམ་དང་མཚན་མོ་དང་། །ཡང་ན་དབེན་པའི་བས་མཐའ་རུ། །བསྒོམ་པ་བཟང་བར་བརྗོད་པར་བྱ། །ཞེས་པས་ཉམས་སུ་བླངས་པའི་གནས་དང་། ལུས་ཀྱིས་སྦྱིན་པ་སྦྱིན་བྱས་ནས། །ཕྱི་ནས་སྤྱོད་པ་ཡང་དག་སྤྱད། །ཅེས་པས་ཇི་ལྟར་ཉམས་སུ་ལེན་པའི་ཚུལ་དང་། ངེས་པར་སྔོན་དུ་ལྷ་མིན་དང་། །བརྒྱ་བྱིན་ལྟ་བུར་འོངས་ན་ཡང་། །དེ་ལ་འཇིགས་པར་མི་བྱ་སྟེ། །སེང་གེའི་གཟུགས་ཀྱིས་རྣམ་པར་རྒྱུ། །ཞེས་པས་ཉམས་སུ་བླངས་པ་ལ་བརྟེན་ནས་སློང་དང་ཆོད་ཚད་འབྱུང་ཚུལ་བཅས་བསྟན་ཏོ། །