རྩ་བའི་ས་བཅད་གཉིས་པ་གཞན་དོན་རྗེས་དཔག་བཤད་པ།

རྩ་བའི་ས་བཅད་གཉིས་པ་གཞན་དོན་རྗེས་དཔག་བཤད་པ་ལ།

གཞན་དོན་རྗེས་དཔག་དངོས་དང༌། དེའི་ཤུགས་བསྟན་བསྒྲུབ་བྱ་བཤད་པ་དང་གཉིས།

དང་པོ་ལ་མཚན་ཉིད། དབྱེ་བ། སྒྲ་བཤད་པ་དང་གསུམ། དང་པོ་ནི། ཚད་མ་མདོ་ལས། རང་གི་མཐོང་དོན་རབ་གསལ་བྱེད། །ཅེས་པས་གཞན་དོན་རྗེས་དཔག་གི་མཚན་ཉིད་བསྟན་ལ། དེ་ཡང་རང་གི་མཐོང་དོན་རབ་གསལ་བྱེད་ཅེས་པས་ཚིག་གསུམ་གྱིས་རིམ་བཞིན་བློ་སྐྱོན་དང་དོན་སྐྱོན་དང༌། སྒྲ་སྐྱོན་གསུམ་སེལ་བར་བྱེད་ལ། །དོན་ལ་ཚུལ་གསུམ་གྲུབ་ཀྱང་སྐབས་ཀྱི་གང་ཟག་གིས་མ་གྲུབ་ན་སྒྲུབ་ངག་ཡང་དག་ཏུ་མི་འགྱུར་བས་ན། རང་གིས་ཞེས་གསུངས་ལ། དོན་ལ་ཚུལ་གསུམ་མ་གྲུབ་ན་འདོད་པ་ཙམ་གྱིས་རྟགས་ཡང་དག་ཏུ་མི་འགྱུར་བས་དེ་བརྗོད་པའི་སྒྲུབ་ངག་ཀྱང་ཡང་དག་ཡིན་པ་བསལ་བའི་ཕྱིར། དོན་ཞེས་གསུངས་ལ། ཚུལ་གསུམ་དོན་ལ་གྲུབ་ཅིང༌། གྲུབ་པ་ལྟར་རང་གིས་ངེས་ཀྱང༌། གཞན་ལ་སྟོན་པ་ན། སྒྲ་ནི་མི་རྟག་སྟེ། བྱས་པ་ཡིན་པའི་ཕྱིར། དཔེར་ན་བུམ་པ་བཞིན། བུམ་པ་བྱས་པ་བཞིན་དུ་སྒྲ་ཡང་བྱས། དེའི་ཕྱིར་སྒྲ་མི་རྟག་ཅེས་པ་ལྟ་བུ། སྒྲུབ་ངག་ལྷག་ཆད་ཅན་དུ་སྨྲ་བ་བསལ་བའི་ཕྱིར། གསལ་བྱེད་ཅེས་གསུངས་སོ། །ཅིའི་ཕྱིར་སྒྲུབ་ངག་ཡན་ལག་ལྔ་ལྡན་འདི་ལྷག་ཆད་ཀྱི་སྐྱོན་དང་བཅས་ཞེ་ན། ཁྱབ་པ་བརྗོད་པ་ཆད་པ་དང་དམ་བཅའ་ཉེར་གཏོད་དང་འཇུག་སྡུད་གསུམ་བརྗོད་པ་ལྷག་པ་ཡིན་ཏེ། དཔེ་སྨོས་ཀྱང་དེ་ལ་རྟགས་ཆོས་ཀྱི་འབྲེལ་བ་མ་བསྟན་པས་ཁྱབ་པ་བརྗོད་པ་མ་ཚང་ལ། བསྒྲུབ་བྱ་སྐབས་ཀྱི་རྒོལ་བས་མ་གྲུབ་པས་དེ་བརྗོད་པས་དེས་དེ་རྟོགས་མི་ནུས་པའི་ཕྱིར་ཏེ། རྣམ་འགྲེལ་ལས། བསྒྲུབ་པར་བྱ་བ་བརྗོད་པ་ཡི། །བརྒྱུད་པ་ཡིས་ཀྱང་ནུས་པ་མེད། །ཅེས་གསུངས་སོ། །ཉེར་སྦྱོར་ཕྱོགས་ཆོས་བརྗོད་པ་དང་ཟློས་ཤིང༌། འཇུག་སྡུད་དམ་བཅའ་བརྗོད་པ་དང་ཟློས་པའོ། །དེའི་ཕྱིར་སྒྲུབ་ངག་ཡན་ལག་ལྔ་ལྡན་ལ་སྐྱོན་དང་བཅས་པའོ། །གཞན་དོན་རྗེས་དཔག་ནི་ཚིག་གི་སྐྱོན་དང་བྲལ་དགོས་ཏེ། རྣམ་ངེས་ལས། གཞན་གྱི་དོན་གྱི་རྗེས་སུ་དཔག་པར་ཚིག་གི་སྐྱོན་ཡོན་གཙོ་བོར་བྱེད་པ་ཡིན་གྱི་དོན་གྱི་ནི་མ་ཡིན་ཏེ། དོན་ཅི་ལྟ་བ་མ་ཡིན་པར་བརྗོད་པའི་སྨྲ་བ་པོ་ལ་ཀླན་ཀར་འགྱུར་བའི་ཕྱིར། ཞེས་གསུངས་སོ། །སྒྲུབ་ངག་འཆད་པའི་སྐབས་ཡན་ལག་ལྔ་ལྡན་བཤད་ཀྱང་འགོད་པའི་ཚེ་གཉིས་ལྡན་འགོད་དགོས་སོ། །ཐེག་མཆོག་དབུ་མ་ལྟར་ན་དཔྱད་རྒྱུ་ཅུང་ཟད་ཡོད་དོ། །དེས་ན། གཞན་དོན་རྗེས་དཔག་སམ་སྒྲུབ་ངག་ཡང་དག་གི་མཚན་ཉིད། རང་གིས་ངེས་པའི་ཚུལ་གསུམ་ལྷག་ཆད་དང་བྲལ་བར་གསལ་བར་སྟོན་པའི་ངག་ཡན་ལག་གཉིས་ལྡན་དེའོ། །

གཉིས་པ་དབྱེ་བ་ནི།

ཆོས་མཐུན་སྦྱོར་གྱི་སྒྲུབ་ངག་ཡང་དག་དང༌། ཆོས་མི་མཐུན་སྦྱོར་གྱི་སྒྲུབ་ངག་ཡང་དག་གཉིས། དང་པོའི་མཚན་ཉིད། རྟགས་དེ་དེ་སྒྲུབ་ཀྱི་མཐུན་ཕྱོགས་ཁོ་ན་ལ་ཡོད་པར་དངོས་སུ་སྟོན་པའི་ཡན་ལག་གཉིས་ལྡན་གྱི་སྒྲུབ་ངག་ཡང་དག དཔེར་ན། གང་བྱས་ན་མི་རྟག་པ་ཡིན་པས་ཁྱབ།

དཔེར་ན་བུམ་པ་བཞིན། སྒྲ་ཡང་བྱས་ཞེས་པའི་ངག་ལྟ་བུའོ། །དེ་སྐད་དུ། རིགས་སྒོ་ལས། དེ་ལ་ཆོས་མཐུན་པ་ནི་གང་ལ་རྟགས་མཐུན་པའི་ཕྱོགས་ཉིད་ལ་ཡོད་པ་སྟོན་པར་བྱེད་པ་སྟེ། གང་བྱས་པ་དེ་མི་རྟག་པར་མཐོང་སྟེ། དཔེར་ན་བུམ་པ་ལ་སོགས་པ་བཞིན་ཞེས་པའོ། །ཞེས་གསུངས་སོ། །གཉིས་པ་ཆོས་མི་མཐུན་སྦྱོར་གྱི་སྒྲུབ་ངག་ཡང་དག་གི་མཚན་ཉིད། རྟགས་དེ་དེ་སྒྲུབ་ཀྱི་མི་མཐུན་ཕྱོགས་ལ་མེད་པ་ཁོ་ན་ལ་དངོས་སུ་སྟོན་པའི་ཡན་ལག་གཉིས་ལྡན་གྱི་སྒྲུབ་ངག་ཡང་དག དཔེར་ན། གང་རྟག་ན་མ་བྱས་པ་ཡིན་པས་ཁྱབ། དཔེར་ན་འདུས་མ་བྱས་ཀྱི་ནམ་མཁའ་བཞིན། སྒྲ་ནི་བྱས་སོ། །ཞེས་པའི་ངག་ལྟ་བུའོ། །དེ་སྐད་དུ། རིགས་སྒོ་ལས། ཆོས་མི་མཐུན་པ་ཡང་གང་ལ་བསྒྲུབ་པར་བྱ་བ་མེད་པ་རྟགས་མེད་པ་ཉིད་དུ་སྟོན་པ་སྟེ། གང་རྟག་པ་དེ་བྱས་པ་མིན་པར་མཐོང་སྟེ། དཔེར་ན་ནམ་མཁའ་བཞིན་ཞེས་པའོ། །ཞེས་གསུངས་སོ། །དེ་གཉིས་གང་རུང་བསྟན་ན་རྗེས་སུ་འགྲོ་ལྡོག་གང་རུང་དངོས་སུ་རྟོགས་ནས་གང་རུང་ཤུགས་ལ་རྟོགས་པ་ཡིན་ཏེ། རྣམ་འགྲེལ་ལས། དེ་ཉིད་ཀྱིས་ཕྱིར་འབྲེལ་ཤེས་ན། །གཉིས་ལས་གང་ཡང་རུང་སྨྲས་པས། །དོན་གྱི་གོ་བས་གཅིག་ཤོས་ལ། །དྲན་པ་ཡང་དག་སྐྱེ་བར་འགྱུར། །ཞེས་གསུངས་པའི་ཕྱིར་རོ། །

གསུམ་པ་སྒྲ་བཤད་པ་ནི།

སྔ་རྒོལ་ལས་གཞན་ཕྱི་རྒོལ་གྱི་དོན་ཡིན་པས་ན་གཞན་དོན་དང༌། རྗེས་དཔག་གི་རྒྱུ་ཡིན་པས་ན་རྗེས་དཔག་ཏུ་བཏགས་པའོ། །དེ་ནི་རྗེས་དཔག་དངོས་ནི་མ་ཡིན་ཏེ། ཚིག་གི་རང་བཞིན་ཡིན་པའི་ཕྱིར་རོ། །དེ་ལ་རྗེས་དཔག་ཅེས་བཏགས་པ་ལ་དགོས་པ་ཡོད་དེ། ངག་དེ་ལ་བརྟེན་ནས་བསྒྲུབ་བྱ་རྟོགས་པའི་རྗེས་དཔག་སྐྱེ་བ་ཤེས་པའི་ཆེད་ཡིན་པའི་ཕྱིར། སྒྲུབ་ངག་འགོད་པའི་དུས་དང༌། སྒྲུབ་ངག་ཡང་དག་ཏུ་སོང་བའི་དུས་དང༌། སྒྲུབ་ངག་གཉིས་ལས་གང་རུང་ལས་གཉིས་ཀ་འགོད་དགོས་པའི་རྒོལ་བ་ཡོད་མེད་དང༌། སྒྲུབ་ངག་ཡང་དག་ལ་ཡན་ལག་གཅིག་ལྡན་མེད་པ་དང༌། སྒྲུབ་ངག་གི་ཚིག་ཟུར་སོ་སོས་ཚུལ་གསུམ་སོ་སོར་བསྟན་ཚུལ་སོགས་གཞན་ལས་ཤེས་པར་བྱའོ། །འདིར་མང་དོགས་ནས་མ་སྤྲོས་སོ། །ཞར་བྱུང་དུ། གཏན་ཚིགས་རིགས་པའི་དོན་བསྡུས་ལས། རྒོལ་བ་སྟེ་དེ་ཡི་མཚན་ཉིད། གྲུབ་མཐའ་ལ་རྩོད་པར་བྱེད་པའི་གང་ཟག དེ་ལ་དབྱེ་ན། སྔ་རྒོལ་ཕྱི་རྒོལ་དཔང་པོ་དང་གསུམ་མོ། །མཚན་ཉིད་རིམ་པ་ལྟར། ཕྱོགས་སྔ་མ་ཁས་ལེན་པའི་གང་ཟག་དང༌། ཕྱོགས་ཕྱི་མ་ཁས་ལེན་པའི་གང་ཟག་དང༌། རྒོལ་ཕྱི་རྒོལ་གྱི་རྒྱལ་འཕམ་ཤན་འབྱེད་པར་ཁས་ལེན་པའི་གང་ཟག་གོ །དང་པོ་ལ་སྔ་རྒོལ་ཡང་དག་དང༌། ལྟར་སྣང་གཉིས་ཏེ། མཚན་ཉིད་རིམ་པ་ལྟར། ཕྱོགས་སྔ་མ་བཞག་པས་རྩོད་ཟླ་ཕྱི་རྒོལ་གྱི་སྤོབས་པ་འཇོམས་ནུས་ཀྱི་གང་ཟག་དང༌། དེ་མི་ནུས་པའི་གང་ཟག་གོ །གཉིས་པ་ཕྱི་རྒོལ་ཡང་དག་དང་ལྟར་སྣང་གཉིས་ཏེ། མཚན་ཉིད་རིམ་པ་ལྟར། ཕྱོགས་ཕྱི་མ་ཁས་བླངས་ཏེ་སུན་འབྱིན་ཡང་དག་བརྗོད་པས་སྔ་རྒོལ་གྱི་སྤོབས་པ་འཇོམས་ནུས་ཀྱི་གང་ཟག་དང༌། ཕྱོགས་ཕྱི་མ་ཁས་ལེན་ཞིང་སྔ་རྒོལ་གྱི་སྤོབས་པ་འཇོམས་མི་ནུས་པའི་གང་ཟག་གོ །གསུམ་པ་དཔང་པོ་ཡང་དག་དང་ལྟར་སྣང་གཉིས་ཏེ། མཚན་ཉིད་རིམ་པ་ལྟར། རྒོལ་ཕྱི་རྒོལ་གྱི་རྩོད་པའི་རྒྱལ་འཕམ་རིག་ནས་དེ་བརྡ་སྤྲོད་ནུས་ཀྱི་གང་ཟག་དང༌། དཔང་པོར་རློམ་ཞིང་རྒོལ་ཕྱི་རྒོལ་གྱི་རྒྱལ་འཕམ་ཤན་འབྱེད་མི་ནུས་པའོ། །དཔང་པོ་ལ་ཡང་རྗེས་སུ་བརྗོད་པའི་དཔང་པོ། ཤན་འབྱེད་པའི་དཔང་པོ། ཚར་གཅོད་པའི་དཔང་པོ་གསུམ་མོ། །ཞེས་གསུངས་སོ། །རྒྱས་པར་གཞན་ལས་ཤེས་པར་བྱའོ། ། ཇི་ལྟར་རྩོད་ཚུལ་ནི། སྐྱེས་སྟོབས་ཀྱི་ཤེས་རབ་ཆེ་བ་དང༌། སྒྲ་ཚད་ལ་བློ་སྦྱངས་པ་དང༌། རང་གཞན་གྱི་གྲུབ་མཐའ་ལ་ལེགས་པར་སྦྱངས་བ་ནི་རྩོད་པ་ལ་མཁས་པའི་རྒྱུ་ཡིན་ལ། བཞིན་གྱི་དཀྱིལ་འཁོར་འཛུམ་པ་དང༌། དོན་དང་ལྡན་ཞིང་གསལ་ལ་འཇམ་པའི་ངག་དང་ལྡན་པ་དང༌། སྒྱིད་ལུག་པ་དང་ང་རྒྱལ་མེད་པ་ནི། རྩོད་པ་མཛེས་པའི་རྒྱན་ཡིན་པའོ། །རྩོད་པའི་བསམ་པ་ནི། ཕ་རོལ་བོ་དམའ་བར་འདོད་པའི་ཞེ་སྡང་དང༌། རང་ཉིད་མཐོ་བར་འདོད་པའི་འདོད་ཆགས་དང༌། རིགས་ལམ་འདོར་བར་འདོད་པའི་གཡོ་སྒྱུ་རྣམས་ནི་རྩོད་པའི་བསམ་པ་ཐ་ཤལ་ཡིན་ལ། རང་གིས་ཤེས་པར་འདོད་པའི་གུས་པ་དང༌། གཞན་གྱི་ལོག་རྟོག་བསལ་བར་འདོད་པའི་སྙིང་རྗེ་དང༌། ཕ་རོལ་པོ་ལ་ཟབ་མོའི་ཆོས་བསྟན་པར་འདོད་པའི་བྱམས་པ་རྣམས་ནི་རྩོད་པའི་བསམ་པ་ཕུལ་དུ་བྱུང་བ་ཡིན་ནོ། །རྣམ་དག་རྩོད་པའི་དཔེ་ནི། རང་དང་གཞན་གྱི་གཏི་མུག་གཅོད་པ་འཁོར་ལོ་ལྟ་བུ་དང༌། སུན་འབྱིན་པའི་རླུང་གིས་མི་གཡོ་བ་ལྷུན་པོ་ལྟ་བུའོ། །ཚིག་དང་དོན་ལ་མ་རྨོངས་པ་ཐུབ་པའི་དབང་པོའི་སྲས་ལྟ་བུའོ། །རྩོད་པའི་འབྲས་བུ་ཡང་དག་ནི། རྟོགས་པ་འཕེལ་བས་རང་རྒྱུད་ཚིམ་པ་དང༌། སྙན་པའི་གྲགས་པ་ཕྱོགས་ཀུན་ཏུ་ཁྱབ་པ་དང༌། བསྟན་པ་བསྲུངས་པའི་ཆོས་ཀྱི་རྒྱལ་པོ་ཐོབ་པར་འགྱུར་བའོ། །དེས་ན་རྩོད་པའི་སྐྱོན་རྣམས་སྤངས་ནས་རྣམ་པར་དག་པའི་རྩོད་པ་ལ་བདག་ལེགས་སུ་འདོད་པ་རྣམས་ཀྱི་འབད་པར་བྱའོ། །