གཉིས་པ་མ་བྱིན་པར་ལེན་པ།
གཉིས་པ་མ་བྱིན་པར་ལེན་པ་ལ།
རྩ་བར། རྐུའམ་རྐུར་བཅུག་པ་དག་གིས་སོ། །མངགས་པས་ཀྱང་ངོ། །མ་བྱིན་ལེན་པའོ། །མ་ཤ་ཀ་ལྔ་ལ་སོགས་པའོ། །རྐུ་སེམས་ཀྱིས་སོ། །མིའི་རྒྱུད་ཀྱི་ཡོངས་སུ་བཟུང་བའོ། །དེར་འདུ་ཤེས་པས་སོ། །ཞེས་སོགས་བྱུང༌། དེའི་དོན་ལ་བཞི་ལས་དང་པོ་གླེང་གཞི་ནི། ཡུལ་རྒྱལ་པོའི་ཁབ་ཏུ་གང་ཟག་དགེ་སློང་ནོར་ཅན་གྱིས་སྤྱིལ་བོའི་ཆེད་དུ་ཉེས་པ་རྒྱལ་པོའི་ཤིང་ཆེན་པོ་མ་བྱིན་པར་བླངས་པ་ལ་བརྟེན་ནས་ཕམ་པར་བཅས་སོ། ། གཉིས་པ་དགག་བྱ་ནི་གཉིས་ལས་ཐུན་མོང་གི་དགག་བྱ་སྔར་བཤད་ཟིན་ཏོ། །ཐུན་མོང་མ་ཡིན་པའི་དགག་བྱ་ནི། མ་བྱིན་པར་ལེན་པའི་བྱ་བ་དང་འབྲེལ་ན་གཞན་གྱི་ལོངས་སྤྱོད་ལ་གནོད་པ་དང༌། རང་འདོད་པ་ཆེས་པའོ། །གསུམ་པ་ལྟུང་བའི་ངོ་བོ་ནི། བཅས་པའི་རྟེན་ཅན་དགེ་སློང་གིས་མི་གཞན་དབང་བའི་རྫས་རིན་ཐང་ཚང་བའི་མཚན་ཉིད་དང་ལྡན་པ་དེ་རྐུ་སེམས་ཀྱིས་སྦྱོར་བ་རང་ངམ་བསྐོས་པས་ལུས་ངག་ཏུ་གྲུབ་ཅིང་ཐོབ་བློ་སྐྱེས་པ་ལས་གྱུར་པའི་ལྟུང་བ་དངོས་གཞིའོ། །