[༢༧] རིགས་སྲས་པདྨ་འགྱུར་མེད་རྒྱ་མཚོ་ནི།
གཏེར་ལུང་ལས། རིགས་སྲས་རྟ་མགྲིན་སྤྲུལ་པ་ནི༔ རྡོ་རྗེའི་མིང་གིས་འགྲོ་དོན་སྤྱོད༔ ཅེས་ལུང་གིས་ཟིན་པ་འདི་ཉིད་ཡབ་གཏེར་ཆེན་ཉིད་དང་ཡུམ་རྗེ་རིགས་མཁའ་འགྲོའི་རྟགས་ཀྱིས་སྤྲས་པའི་ཡོན་ཏན་སྒྲོལ་མ་ཞེས་པའི་སྲས་སུ་མེ་སྟག་ལ་འཁྲུངས། བཙས་པའི་མཚན་ལ་ཤེས་རབ་རྣམ་རྒྱལ་རྡོ་རྗེ་འབུམ་ཞེས་གསོལ། ཆུང་ངུ་ནས་དམ་པ་རྣམ་གཉིས་ཀྱི་ཆོས་ཀྱི་བདུད་རྩི་བུམ་པ་གང་བྱོའི་ཚུལ་དུ་གསན། དགུང་ལོ་ཉི་ཤུ་པ་ལ་མཁན་པོ་ལོ་ཙཱ་བ་ངག་དབང་ཆོས་དཔལ་རྒྱ་མཚོ་ལས་ཆིག་རྫོགས་ཀྱི་བསྙེན་པར་རྫོགས་ནས། ཆོས་རྗེ་གཞན་ཕན་དབང་པོའི་དྲུང་དུ་འདུལ་མཛོད་ཕར་ཕྱིན་ལ་སོགས་པ་རིགས་ལམ་ནས་ལུང་རིགས་ཀྱི་བཤད་པ་མཐའ་ཆོད་པ་གསན། བླ་མ་དམ་པ་གཉིས་ཀྱི་གསན་པ་གང་ཡོད་སྟེང་དུ་གོང་དཀར་ཆོས་སྡེ་ནས་སློབ་དཔོན་དབང་ཕྱུག་པ་སྤྱན་དྲངས་ནས་རྡོ་རྗེ་ཕྲེང་བ་ལ་སོགས་པའི་གསར་མའི་ཆོས་ཀྱི་རྒྱུན་ཡོད་དོ་ཅོག་ཀྱང་གསན། སྒྲ་ཚད་སྙན་ངག་སོགས་ཕྱི་ནང་གི་རིག་པ་མཐའ་དག་ལ་མངའ་དབང་འབྱོར་ཞིང་དགུང་ལོ་སུམ་ཅུའི་ཐོག་ཡབ་རྗེ་ཆོས་ཀྱི་རྒྱལ་པོའི་ཁྲི་ལ་ཞབས་སོར་བཀོད། བསྟན་བཅོས་ཀྱང་སྙན་ངག་གི་ཊཱིཀ ཕར་ཕྱིན་གྱི་སྤྱི་དོན། གསང་སྙིང་གི་སྤྱི་དོན། སྡོམ་གསུམ་གྱི་ཟུར་འདེབས། ཚེ་བདག་གི་ལས་སྦྱོར་ལ་གཅེས་པའི་མན་ངག་སྒྲོལ་མ་བདུན་པ། གཞན་ཡང་དབང་དང་སྒྲུབ་འཕྲིན་ལས་ཁ་ཚར་དང་བཅས་པའི་བསྟན་བཅོས་མཐའ་ཡས། ཡབ་གྱི་ཞལ་ཆེམས་སུ་ཆོས་ཆར་ཕ་ལས་བུ་ལྷག་ཅེས་དབུགས་དབྱུང་། དེ་ལྟར་ཆོས་ཀྱི་ཕྲིན་ལས་བསྐྱངས་པའི་མཐར་དགུང་ལོ་སོ་གསུམ་པ་ས་ཁྱི་ཧོར་ཟླ་དང་པོའི་ཉེར་དྲུག་ལ་ལོག་སྨོན་ཅན་དེ་རྣམས་ལ་ལུས་སྲོག་ལྟོས་མེད་དུ་བཏང་སྟེ་ཡ་ང་དང་བག་ཚ་མེད་པའི་ལྟ་གདེངས་ཀྱིས་གཤེགས་སོ། །