དཔལ་དགྱེས་པ་རྡོ་རྗེ་ལ་བསྟོད་པ།
རིན་ཆེན་རྡོ་རྗེས་མཛད།
རྒྱ་གར་སྐད་དུ། ཤྲཱི་ཧེ་བཛྲ་སྟོ་ཏྲ། བོད་སྐད་དུ། དཔལ་དགྱེས་པ་རྡོ་རྗེ་ལ་བསྟོད་པ། བཅོམ་ལྡན་འདས་རྡོ་རྗེ་མཁའ་འགྲོ་ལ་ཕྱག་འཚལ་ལོ། །དངོས་པོ་དངོས་མེད་གཉིས་ལས་བྱུང༌། །རྨད་བྱུང་ཆེན་པོ་སྐུ་ཆེ་བ། །སྐུ་ལས་འདས་པ་བདེ་བ་ཆེ། །འགྲོ་བའི་མགོན་ལ་ཕྱག་འཚལ་ལོ། །ཐུགས་རྗེ་ཆེན་པོ་ཁྲོ་བ་ཆེ། །བདུད་ཀུན་རྣམ་པར་འཇོམས་མཛད་པ། །བདག་མེད་མ་ཡི་ཡིད་འོང་ཞིང༌། །ལྷ་མོའི་ཚོགས་ཀྱིས་རྣམ་པར་སད། །རྣམ་དག་དགའ་བ་སྐྱེད་མཛད་ཅིང༌། །འཇིགས་ཆེན་འཇིགས་པར་མཛད་པ་པོ། །ཞལ་བརྒྱད་འཁོར་ནི་བརྒྱད་ལྡན་ཞིང༌། །བརྒྱད་གཉིས་གྱུར་པའི་ཕྱག་དང་ལྡན། །རྣམ་པར་སྐྲག་བྱེད་མ་ལུས་ནད། །གསོལ་བར་མངོན་དུ་ཕྱོགས་པའི་ཞལ། །ཧཱུཾ་ནི་སྤྲོ་དང་སྡུད་མཛད་པའི། །མི་བཟད་རྣམ་པར་འདྲེན་པ་པོ། །དུས་མཐའི་ཆུ་འཛིན་འབྲུག་སྒྲ་ཡིས། །ཉོན་མོངས་ཉེ་བར་འཇོམས་པ་པོ། །གློག་འགྱུ་ཐུགས་རྗེའི་རླན་གྱིས་བརླན། །དམ་ཆོས་ཆར་གྱིས་རྒྱུན་འབེབས་མཛད། །མ་རིག་གཉིད་ཀྱིས་ནོན་པ་ཡི། །ཁམས་གསུམ་པ་དག་རྣམ་སད་མཛད། །ཐར་པའི་ལམ་ནི་རབ་སྟོན་པའི། །འཇིག་རྟེན་རྣམས་ལ་སྣང་བ་སྩོལ། །ལོག་པར་ལྷུང་བའི་འགྲོ་ཀུན་ལ། །ཕྱག་མང་པོ་རྣམས་རབ་བརྐྱང་ཞིང༌། །ལྷ་ཡི་སྤྱན་ནི་རབ་འཇུག་པས། །རྨོངས་པའི་རབ་རིབ་སེལ་བར་མཛད། །རབ་ཏུ་གསལ་བའི་གསང་ཆེན་པོ། །དོན་ཀུན་སྐད་ཅིག་གིས་བསྒྲུབ་པ། །གསང་སྔགས་མི་ལས་རྣམ་པར་གྲོལ། །སེམས་ཅན་ཀུན་ལ་རྗེས་བརྩེ་བ། །རྡོ་རྗེ་སྙིང་པོ་བྱང་ཆུབ་པའི། །སྟོང་ཉིད་སྙིང་རྗེའི་བདག་ཉིད་ཅན། །ཆར་སྤྲིན་སྡོན་པོ་དང་འདྲ་བ། །དུར་ཁྲོད་གནས་སུ་གར་ཐབས་བཞུགས། །བདུད་བཞི་པོ་ཡི་ཁྲག་
ཆེན་གྱིས། །ལྷ་མོའི་ཞལ་དང་བཅས་པར་མྱོས། །ཟླ་ཚེས་རྩེ་འདྲའི་མཆེ་བ་མཆོག །མཛེས་པའི་དཀྱིལ་འཁོར་ལོངས་སྤྱོད་པ། །ཐོད་ཆེན་རྒྱུ་མ་ལས་བརྒྱུས་པའི། །ཕྲེང་བས་སྐུ་ནི་རྣམ་པར་བརྒྱན། །རོལ་པར་མཛད་པའི་བཞད་ཆེན་གྱིས། །འཇིགས་བྱེད་རྣམས་ནི་འབྱེར་བར་མཛད། །ཡང་དག་དྲན་པས་འགྲོ་བའི་ཚོགས། །ཡིད་ལ་འདོད་པ་ཡོངས་རྫོགས་མཛད། །ཡིད་བཞིན་ནོར་བུ་ལས་ལྷག་པའི། །མང་ཞིང་རྒྱ་ཆེའི་བསྟོད་མཆོག་གིས། །དག་གི་དབང་ཕྱུག་ཆེན་པོས་བསྟོད། །སྒྲ་ཡི་ཡུལ་ལས་ངེས་འདས་ཤིང༌། །རྟོག་པའི་དྲ་བ་རྣམ་པར་སྤངས། །གཏི་མུག་ཆེན་པོ་ཡོངས་འཇོམས་ཤིང༌། །སྐྱེས་བུ་ཆེན་པོའི་མཚན་རྣམས་དང༌། །དཔེ་བྱད་ཡན་ལག་ཐམས་ཅད་ལྡན། །མཐོང་བས་དགའ་བ་འཕེལ་བར་མཛད། །མཆོག་ཏུ་གྲུབ་པའི་རྒྱུད་རྣམས་ནི། །ཡང་དག་ཚིམ་མཛད་ཟླ་འོད་བཟང༌། །ཐོག་མ་བར་དང་མཐའ་མེད་པ། །དུས་གསུམ་རྫོགས་སངས་རྒྱས་ཉི་མ། །ཉོན་མོངས་བུད་ཤིང་ངེས་བསྲེགས་པའི། །མེ་ཆེན་སྡིག་པ་ཕམ་མཛད་པའི། །ཉི་ཟླ་མེ་ཡི་འོད་ཟེར་གྱི། །ཞལ་རེ་ཞིང་ནི་སྤྱན་གསུམ་པ། །སྤྱན་ནི་ཉི་ཤུ་རྩ་བཞིའི་ཙོགས། །རྨོངས་པའི་དབྱེ་བ་རྣམས་གསུམ་འཇོམས། །ཆགས་དང་ཆགས་བྲལ་རྣམ་པར་སྤངས། །ཆགས་པ་ཆེན་པོས་རབ་གྲོལ་མཛད། །རང་རིག་གྲུབ་པ་མཆོག་ལྡན་པའི། །བདེ་བའི་ཐབས་ནི་ཉེ་བར་སྟོན། །སྲིད་དང་མྱ་ངན་འདས་ལས་རྒལ། །སྲིད་དང་མྱ་ངན་འདས་ནང་བཞུགས། །ཕྱག་རྒྱ་ཆེན་པོའི་མཆུ་མྱང་ཞིང༌། །ཕྱག་རྒྱ་ལྔས་ལེགས་རྒྱས་བཏབ་ལ། །ཤིན་ཏུ་འཁྱུད་པའི་ལོངས་སྤྱོད་ཀྱིས། །རབ་བསྒྲུབ་དགའ་བས་རོལ་པར་མཛད། །རོ་ཡི་ཐལ་བས་ཡང་དག་བྱུགས། །རུས་པའི་རྒྱན་གྱིས་རྣམ་པར་བརྒྱན། །མཚན་མོའི་དུས་སུ་རོལ་པ་ཆེ། །དཔལ་ལྡན་ཧེ་རུ་ཀ་ལ་འདུད། །གང་ཞིག་གཙོ་བོ་སྤངས་ནས་ནི། །སྐད་ཅིག་ཙམ་ཡང་རོལ་མི་མཛད། །སྐལ་བཟང་ཡིད་འོང་སྐལ་བ་བཟང༌། །བདག་མེད་རྣལ་འབྱོར་མ་ལ་འདུད། །དབང་པོའི་ཕྱོགས་སུ་ཚངས་པ་ནི། །ཞབས་བརྡབས་གནོན་པས་ཡང་དག་ཞུགས། །ཡིད་འོང་སྐུ་མདོག་སྔོན་པོར་ལྡན། །གཽ་རཱི་ལ་ནི་སྤྱི་བོས་འདུད། །གཡས་ཀྱི་ཕྱོགས་སུ་དབང་པོ་ནི། །རྣམ་པར་ཉེད་པས་སྟེང་བཞུགས་ཤིང༌། །
ཅང་ཏེའུ་སྒྲ་སྒྲོགས་ཡན་ལག་ཀུན། །བཙོད་མདོག་ཙཽ་རཱི་དེ་ལ་འདུད། །ནུབ་ཀྱི་ཕྱོགས་སུ་ཉེ་དབང་གིས། །སྟེང་དུ་གར་གྱིས་བཞུགས་མཛད་པ། །བཙོ་མོའི་གསེར་མདོག་རྣལ་འབྱོར་མ། །མཆོག་གྱུར་པེ་ཏཱ་ལཱི་ལ་འདུད། །བྱང་ཕྱོགས་དྲག་པོའི་སྟེང་བཞུགས་ཤིང༌། །འཇིགས་པའི་སྦྲུལ་ནི་ཕྱག་ན་བསྣམས། །རིན་ཆེན་མར་ཀཏ་མདོག་འདྲ་བའི། །དྲག་གསོལ་གྷསྨ་རཱི་ལ་འདུད། །དབང་ལྡན་ཕྱོགས་སུ་གཤིན་རྗེ་ཡི། །རྒྱལ་པོ་ཡང་དག་གནོན་པས་བཞུགས། །ཨིནྡྲ་ནཱི་ལ་འབར་འདྲ་བའི། །སྐལ་ལྡན་པུཀྐ་སཱི་ལ་འདུད། །མེ་ཡི་ཕྱོགས་སུ་གནོད་སྦྱིན་གྱི། །སྟེང་དུ་གར་གྱིས་བཞུགས་མཛད་ཅིང༌། །སྟོན་ཟླ་ལྟར་དཀར་དབང་ཕྱུག་མ། །མཆོག་གྱུར་ཤ་བ་རཱི་ལ་འདུད། །བདེན་བྲལ་ཕྱོགས་སུ་བདེན་བྲལ་ལྷ། །གནོན་ཅིང་ཕྱག་མཆོག་འཁོར་ལོས་མཚན། །སྤྲིན་མེད་ནམ་མཁའ་ལྟ་བུ་ཡི། །སྐུར་ལྡན་ཙཎྜལཱི་ལ་འདུད། །རླུང་ཕྱོགས་ཐགས་བཟངས་རིས་སྟེང་དུ། །སྐྱིལ་ཀྲུང་ཕྱེད་པའི་གར་གྱིས་བཞུགས། །ཡིད་འོང་སྣ་ཚོགས་སྐུ་མདོག་ལྡན། །ཌོམྦི་ནཱི་ལའང་གུས་པས་འདུད། །གང་ཞིག་མཆོག་ཏུ་ཟབ་འདི་ལ། །གང་དུ་བདག་གི་འདི་འདྲའི་ཚིག །གང་ཞིག་མགོན་མཆོག་རྒྱ་ཆེན་ལ། །གང་དུ་ཉུང་སྦྱར་འདི་ཡིས་བསྟོད། །འོན་ཀྱང་གང་ཕྱིར་བདག་གི་བུ། །གཞོན་ནུ་སོ་ཐར་ཞེས་བྱ་བས། །གསོལ་བ་བཏབ་པ་དེ་ཡི་ཕྱིར། །འདི་འདྲའི་བསྟོད་པ་བྱས་པ་ཡིན། །མགོན་པོ་ལྷ་མོ་བརྒྱད་བཅས་ལ། །བདག་གིས་མདོར་བསྡུས་བསྟོད་པ་ཡིས། །དགེ་བ་གང་ཞིག་ཐོབ་གྱུར་པ། །དེ་ཡིས་བདག་ཀྱང་དེ་འདྲར་ཤོག །དཔལ་རྗེ་བཙུན་དགྱེས་པའི་རྡོ་རྗེ་ལ་བསྟོད་པ་རིག་པའི་གནས་མ་ལུས་པ་ལ་མཁས་པ་གྲུབ་པའི་སློབ་དཔོན་ཁ་ཆེའི་ཡུལ་དུ་འཁྲུངས་པ་དཔལ་རིན་ཆེན་རྡོ་རྗེའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀུ་མཱ་ར་ཀ་ལ་ཤ་དང༌། ལོ་ཙཱ་བ་དགེ་སློང་བྱང་ཆུབ་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།