བཞི་པ་ཡན་ལག་གི་བརྩི་བ།
བཞི་པ་ཡན་ལག་གི་བརྩི་བ་ནི།
ཐུན་མོང་མ་ཡིན་པའི་ཡན་ལག་བསྟན་པ་དང༌། ཡན་ལག་འགའ་ཞིག་བྱེ་བྲག་ཏུ་བསྟན་པ་དང་གཉིས། དང་པོ་ནི། ཐུན་མོང་གི་ཡན་ལག་སྔར་བཤད་ཟིན་ལ། ཐུན་མོང་མ་ཡིན་པའི་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གཉིས་ཏེ། གང་ལ་རྐུ་བའི་ཡུལ་དང༌། གང་རྐུ་བའི་དངོས་པོའོ། །དང་པོ་ནི། རྫས་དེའི་བདག་པོ་མི་ཡིན་པ་དང༌། གཞན་ཡིན་དགོས་པ་རྩ་བར། རང་གིའོ་ཞེས་པའི་ཤུགས་ཀྱིས་གྲུབ་བོ། །གང་རྐུ་བའི་དངོས་པོ་ནི། མིའི་རྒྱུད་ཀྱིས་བདག་གིར་བྱས་པ་དང༌། རིན་ཐང་ཚང་བ་སྟེ། རྩ་བར། མིའི་རྒྱུད་ཀྱིས་ཡོངས་སུ་བཟུང་བའོ། །ཞེས་དང༌། མ་ཤ་ཀ་ལྔ་ལ་སོགས་པའོ། །ཞེས་པས་སོ། །སེལ་བ་བདག་གིར་མ་བྱས་པ་བརྐུས་ན་སྦོམ་པོར་འགྱུར་ཏེ། ཊཱི་ཀ་ལས། བདག་པོས་དོན་མ་རྟོགས་པའི་གཏེར་བརྐུས་ན་སྦོམ་པོར་གསུངས་པ་ལྟ་བུའོ། །རིན་ཐང་མ་ཚང་བ་བརྐུས་ན་ཡང་སྦོམ་པོར་འགྱུར་ཏེ། རྩ་བར། མ་ཆོག་པ་བརྐུས་ནའོ། །ཞེས་པས་སོ། །
གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་དང༌། ཀུན་སློང་ངོ༌། །
འདུ་ཤེས་ནི་གཞིའི་ཡན་ལག་དེ་དག་ལ་ཡིད་གཉིས་སམ་ངེས་པར་འདུ་ཤེས་མ་འཁྲུལ་བ་སྟེ། ཐམས་ཅད་ལ་ཐེ་ཚོམ་ཟ་བས་ཞུགས་པ་ནི། ཞེས་པ་དང༌། དེར་འདུ་ཤེས་པས་སོ། །ཞེས་པས་སོ། །སེལ་བ་ལྷས་སྦྱིན་གྱི་ནོར་ལ་མཆོད་སྦྱིན་གྱི་ནོར་དུ་འདུ་ཤེས་འཁྲུལ་ཏེ་བརྐུས་པའམ། མིའི་རྫས་ལ་འགྲོ་བ་གཞན་གྱིར་འདུ་ཤེས་ཏེ་བརྐུས་ན་སྦོམ་པོར་འགྱུར་ཏེ། འགྲོ་བ་གཞན་གྱིར་རོ། །ཞེས་པས་སོ། །ཀུན་སློང་ནི་ཆོས་དྲུག་ལྡན་དགོས་ཏེ། གཞན་གྱི་ཡིན་ཏེ། མ་གནང་ཡང་བདག་ཉིད་ཀྱི་དོན་དུ། འཚོ་བའི་ཆེད་དུ། གཏན་དུ་འབྲལ་བར་འདོད་པ་རྒྱུན་མ་ཆད་པའོ། །དེ་ཡང་རང་དང་ཞེས་རང་གི་ཡིན་པའི་སེམས་ཀྱིས་བླངས་ན་ལྟུང་མེད་དུ་གསུངས་པ་དང༌། ཡིད་གཅུགས་པའི་སེམས་དག་གིས། ཞེས་དང༌། གཞན་གྱི་དོན་ཉིད་དུ་ན་ཡང་དངོས་གཞིའི་རྣམ་པའོ། །ཞེས་དང༌། མཆོད་པའི་དོན་དུ་ན་ཉེས་བྱས་སོ། །ཞེས་དང༌། བརྙའ་བ་དང༌། ཞེས་རེ་ཞིག་བརྙའ་བའི་སེམས་ཀྱིས་བླངས་ན་ལྟུང་མེད་དུ་གསུངས་ཤིང༌། རྐུ་སེམས་ཀྱིས་སོ། །ཞེས་དང༌། བཏང་བ་ཡང་ངོ་ཞེས་པས་གྲུབ་སྟེ། གོ་རིམ་བཞིན་ནོ། །ཆོས་དྲུག་ལྡན་ཚང་བ་ལ་བརྐུ་སེམས་དགོས་པ་ཡིན་ན། འོ་ན་འཐག་འཇུག་དང་འཐག་བསྐྱེད་ཀྱི་སྤང་ལྟུང་གཉིས་རྐུ་སེམས་ཀྱིས་ཀུན་ནས་བསླངས་བའི་ལྟུང་བ་ཡིན་པར་ཐལ། སྐབས་དེའི་རྫས་དེ་ཐོབ་འདོད་དེ་རྐུ་སེམས་ཡིན་པའི་ཕྱིར་ཏེ། དེ་འདྲ་ལ་རྐུ་སེམས་ལ་དགོས་པའི་ཆོས་དྲུག་ཚང་བའི་ཕྱིར་ཟེར་བ་དང༌། ཡང་ལས་བྱེད་པ་ལ་གླ་མི་བྱིན་ན་ཕམ་པ་ཡིན་པར་གསུངས་པ་གང་ཞིག དེ་དང་ཀུན་ནས་མཚུངས་པའི་ཕྱིར། དང་པོ་གྲུབ་སྟེ། མཚོ་ཊཱིཀ་འཐག་འཇུག་ཐད་༥༡༤ལས། འགྲེལ་ཆུང་ལས། ལས་བྱེད་པ་ལ་གླ་མ་བྱིན་ན་ཕམ་མོ། །ཞེས་བཤད་དེ་རྐུ་སེམས་བྱུང་ན་མ་བྱིན་ལེན་དང་འཐག་འཇུག་གཉིས་ཀའི་ལྟུང་བ་འབྱུང་སྟེ། གཞི་གཅིག་ལ་སོགས་པའོ། །ཞེས་གསུངས་པ་དང༌། མཚོ་ཊཱིཀ་ལས། དངན་འཐེན་ཞེས་པ་འགྲེལ་ཆུང་ལས། གླར་བླངས་ཏེ་ལས་བྱེད་པར་ལས་གླ་མ་བྱིན་ན་ཕམ་པའོ། །ཞེས་པ་ལྟར་དངན་འཐེན་ལ་རྐུ་སེམས་ཚང་ན་འཐག་འཇུག་གི་ལྟུང་བ་འདི་ལ་རྐུ་སེམས་ཚང་བར་ཐལ། མཚུངས་པའི་ཕྱིར་ཟེར་ན་དཔྱད་པར་ཞུའོ། ། གསུམ་པ་སྦྱོར་བའི་ཡན་ལག་ནི། གང་ལ་བསམ་པའི་དོན་ལ་རྐུ་བའི་སྦྱོར་བ་རང་ངམ་བསྐོས་པས་ལུས་ངག་ཏུ་གྲུབ་པས་ཏེ། བསམ་པ་ནི་དེ་ཉིད་དོ་ཞེས་པ་དང་རྐུའམ་བརྐུར་བཅུག་པ་དག་གིས་སོ། །ཞེས་དང༌། ཊཱི་ཀ་ལས། ཐམས་ཅད་དུ་ཡང་བསྡམ་པར་བྱ་བ་ཞེས་བྱ་བ་ནི་ཡིད་ཀྱི་ཉེས་བྱས་ཡིན་པར་རིག་པར་བྱའོ། །ཞེས་པས་སོ། །སེལ་བ་གང་ལ་བསམས་པ་ལས་གཞན་དུ་སྦྱོར་བ་འཁྱོགས་ཏེ། ལྷས་སྦྱིན་གྱི་རྫས་བཀྲུ་བར་བསམས་པ་ལས་མཆོད་སྦྱིན་གྱི་རྫས་རྐུ་ན་སྦོམ་པོར་འགྱུར་རོ། །