ཀླུ་རིགས་བཞི་མནན་པའི་ཆོ་ག་ཞེས་བྱ་བ།
སློབ་དཔོན་ཛཱ་བ་རི་པ།
རྒྱ་གར་སྐད་དུ། ནཱ་ག་ཀུ་ལ་ཙ་རི་སྟཾ་བྷ་བི་དྷི་ནཱ་མ། བོད་སྐད་དུ། ཀླུ་རིགས་བཞི་མནན་པའི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །གང་ཞིག་དབང་དུ་འདུས་གྱུར་པས། །བསྐལ་པ་བྱེ་བའི་མཐའ་རུ་ཡང༌། །ལྡང་བར་མི་ནུས་བྱ་བའི་ཕྱིར། །རྡོ་རྗེ་ཅན་ལ་གུས་བཏུད་ནས། །སྒྲུབ་པ་པོ་ལ་ཕན་གདགས་ཕྱིར། །དེ་ཡི་མནན་པའི་ཆོ་ག་བསྟན། །གསེར་ལས་བྱས་པའི་མཆོད་རྟེན་ནམ་།ཡང་ན་རིན་ཆེན་ལྔ་ལས་བྱས། །ཁྲུ་གང་ཚད་ཀྱི་མཆོད་རྟེན་བརྩིག །བུམ་པ་ཁོག་སྟོང་བྱས་པའི་ནང༌། །ཀུ་ལ་ཙ་རིའི་གཟུགས་བྱས་ཏེ། །ཁོང་སྟོང་ཕྱོགས་བཞིར་དགོད་པར་བྱ། །དེ་འོག་ཕྱོགས་བཞིའི་རྨང་དུ་ནི། །ཀུ་ལ་ཙ་རིའི་བྲན་རྣམས་གཞུག །དེ་ནས་ལྷ་ཡི་རྣལ་འབྱོར་གྱིས། །ཕྲེང་བའི་སྔགས་ཀྱིས་བཟླས་པ་ལས། །སྔགས་ཀྱི་འོད་ཟེར་
ལྕགས་ཀྱུ་ཡིས། །བསྒྲུབ་བྱ་བཀུག་སྟེ་གཉིས་མེད་བསྟིམ། །ཡང་ན་རང་ལྷའི་ས་བོན་ལས། །ཁྲོ་བོ་སྣ་ཚོགས་སྤྲོས་པ་ཡིས། །བསྒྲུབ་བྱ་བཀུག་སྟེ་སྔ་མ་བཞིན། །མངོན་སུམ་ལྟ་བུར་ཁུགས་པར་བསམ། །ཀུ་ལ་ཙ་རིའི་སྤྱི་སྟེང་དུ། །རྡོ་རྗེ་རྒྱ་གྲམ་མེ་རི་འབར། །དེ་ཡི་ལྟེ་བའི་དཀྱིལ་དུ་ནི། །མི་འཁྲུགས་རྒྱལ་པོ་གཡོན་བརྐྱང་བཞུགས། །བསྐལ་པའི་མཐའ་རུ་མནན་པར་བསམ། །དེ་ནས་བདུད་རྩི་ལྡང་བཅས་པ། །རང་གི་འདོད་པའི་ལྷ་ལ་དབུལ། །དམ་ལ་གནས་པར་བྱ་བའི་ཕྱིར། །སྦྲུལ་དང་སྦལ་པའི་ཤ་དང་ཚིལ། །གླང་དམར་པ་དམར་ལ་སོགས་པའི། །ཁྲག་ལ་སོགས་པ་རྣམས་ཀྱིས་ནི། །བསྒྲུབ་བྱ་ལ་ནི་གཏོར་མ་སྦྱིན། །དབྱར་གྱི་ཁྱིམ་གསུམ་ཐ་མ་ཡི། །དྲུག་གཉིས་བཞི་ཡི་ཉིན་ཕྱེད་ན། །སྒྲུབ་ཁང་ཐེམ་རྩའི་འོག་ཏུ་ནི། །ཤིན་ཏུ་དམ་པར་སྦ་བར་བྱ། །ཕྱག་ན་རྡོ་རྗེ་ཁྲོ་བོ་ཆེ། །རབ་ཏུ་ཁྲོས་པའི་མཐུ་སྟོབས་ཀྱིས། །རི་རབ་ཀླད་ལ་བསྐོར་ནས་ནི། །དེ་འོག་ཀུ་ལ་ཙ་རི་ནི། །རིགས་དེ་རྣམས་ནི་མནན་བྱས་ཀྱིས། །ཐར་བ་ཡི་ནི་དུས་མེད་པར། །དམ་ཚིག་གཉན་གྱིས་མ་འདའ་ཅིག །ཉེས་པ་འདི་ལས་མ་ལྡོག་ཅིག །ལུས་འདི་རུལ་ཅིང་མྱགས་གྱུར་ནས། །སྙིང་ནི་འགེམས་ཤིང་ཟགས་པར་བྱེད། །ཚེ་ཡི་འདུ་བྱེད་བྱས་ནས་ནི། །མནར་མེད་པར་ནི་འགྲོ་བ་ཡིན། །བྱང་ཆུབ་སེམས་བསྐྱེད་བྱམས་པའི་སེམས། །སྐྱེས་པའི་ཚེ་ན་གཏང་བར་བྱ། །ཕྲེང་བའི་སྔགས་ནི་བརྒྱ་རྩ་བརྒྱད། །ཤིན་ཏུ་ཁྲོས་པས་བཟླས་པར་བྱ། །མཐུ་སྟོབས་དྲག་པོའི་ང་རོ་ཡིས། །སྟང་སྟབས་ཀྱིས་ཀྱང་མནན་པར་བྱ། །ངང་ཚུལ་བཟང་ཞིང་ཤེས་རབ་ཅན། །བླ་མ་ལ་གུས་གཏོང་ཕོད་པ། །གལ་ཏེ་རྨོངས་པས་གཞན་དུ་སྦྱིན། །ཚ་བ་ཆེན་པོར་ཡུན་རིང་གནས། །ཨོཾ་ནཱི་ལཱཾ་བ་ར་བཛྲ་པཱ་ཎི་ས་མ་ཡ་ནཱ་ག་ཀུ་ལ་ཙ་རི་ཨི་མཱཾ་བ་ལིའཾ་ཁཱ་ཧི་ཁཱ་ཧི་སྭཱ་ཧཱ། གཏོར་མ་སྦྱིན་པའི་སྔགས་སོ། །ཀླུ་རིགས་བཞིའི་མནན་པ་ནམ་གྲུའི་རིགས་ལས་བྱུང་བའི་སློབ་དཔོན་ཛཱ་བ་རི་པས་མཛད་པ་རྫོགས་སོ།།