སྦྱོར་ལམ་རྣལ་འབྱོར་མངོན་སུམ་དང་རྟོག་མེད་ཡིན་མིན་ལ་དཔྱད་སྒོ།
སྦྱོར་ལམ་རྣལ་འབྱོར་མངོན་སུམ་དང་རྟོག་མེད་ཡིན་མིན་ལ་དཔྱད་སྒོ་ནི།
སྦྱོར་ལམ་ཆོས་ཅན། ཆོས་ཉིད་མངོན་སུམ་དུ་རྟོགས་པར་ཐལ། གསལ་སྣང་ཅི་རིགས་ཐོབ་པའི་ཚུལ་གྱིས་རྟོགས་པ་ཡིན་པའི་ཕྱིར། འདོད་ན། སྦྱོར་ལམ་ཆོས་ཅན། ཆོས་ཉིད་མངོན་སུམ་དུ་མ་རྟོགས་པར་ཐལ། སྦྱོར་ལམ་ཡིན་པའི་ཕྱིར། མ་ཁྱབ་ན། ཁྱབ་པ་ཡོད་པར་ཐལ། དྲོད་ཐོབ་ནས་ཆོས་ཉིད་མངོན་སུམ་དུ་མ་མཐོང་བའི་བར་གྱི་ལམ་སྦྱོར་ལམ་ཡིན་པའི་ཕྱིར། མ་གྲུབ་ན། ཡིན་པར་ཐལ། ཡིན་པ་དེ་ཡང་ས་བཟང་མ་ཏི་པཎ་ཆེན་གྱི་དགོངས་པ་ཡིན་པའི་ཕྱིར།མ་གྲུབ་ན། ཡིན་པར་ཐལ། དེ་ཉིད་ཀྱིས་མཛད་པའི་ཀུན་བཏུས་འགྲེལ་བ་ལས། དྲོད་ཐོབ་ནས་བདེན་བཞིའི་ཆོས་ཉིད་མངོན་སུམ་དུ་མ་མཐོང་གི་བར་དུ་སྦྱོར་ལམ་དང༌། ཞེས་གསུངས་པའི་ཕྱིར། འདོད་ན། སྦྱོར་ལམ་ཆོས་ཅན། ཁྱོད་ཀྱིས་ཆོས་ཉིད་མངོན་སུམ་དུ་མ་མཐོང་བར་ཐལ། འདོད་པའི་ཕྱིར། འདོད་ན། སྦྱོར་ལམ་ཆོས་ཅན། ཁྱོད་ཀྱིས་ཆོས་ཉིད་མངོན་སུམ་དུ་མ་མཐོང་བ་མ་ཡིན་པར་ཐལ། དེ་མངོན་སུམ་དུ་རྟོགས་པའི་ཕྱིར། མ་གྲུབ་ན། དེ་ཆོས་ཅན།ཆོས་ཉིད་མངོན་སུམ་དུ་རྟོགས་པར་ཐལ། ཆོས་ཉིད་ལ་གསལ་སྣང་ཅན་ཡིན་པས་དེ་རྣལ་འབྱོར་མངོན་སུམ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ལྟར་ཡིན་པ་དེ་ཡང་ཉ་དབོན་ཀུན་དགའ་དཔལ་གྱི་དགོངས་པ་ཡིན་པའི་ཕྱིར། མ་གྲུབ་ན། དགོངས་པ་ཡིན་པར་ཐལ།དེ་ཉིད་ཀྱིས་མཛད་པའི་ཉ་ཊཱིཀ་ཡིད་ཀྱི་མུན་སེལ་ལས། ཡེ་ཤེས་ཆོས་ཉིད་གསལ་སྣང་ཅན་ཡིན་པས་རྣལ་འབྱོར་མངོན་སུམ་དུ་ཁས་བླང་དགོས་ཏེ། ཞེས་གསུངས་པའི་ཕྱིར། འདོད་ན།འོ་ན་སྦྱོར་ལམ་སྐབས་ཀྱི་ཆོས་ཉིད་ཆོས་ཅན། རྣལ་འབྱོར་མངོན་སུམ་གྱིས་རྟོགས་པ་ཡིན་པར་ཐལ། འདོད་པའི་ཕྱིར། འདོད་ན། རྣལ་འབྱོར་མངོན་སུམ་གྱིས་རྟོགས་པ་མ་ཡིན་པར་ཐལ། དེ་མ་ཡིན་པ་དེ་ཡང་ཐམས་ཅད་མཁྱེན་པ་ཏཱ་ར་ནཱ་ཐའི་དགོངས་པ་ཡིན་པའི་ཕྱིར། མ་གྲུབ་ན། དགོངས་པ་ཡིན་པར་ཐལ། དེ་ཉིད་ཀྱིས་མཛད་པའི་སྔོན་མེད་ལེགས་བཤད་ལས།རྣལ་འབྱོར་མངོན་སུམ་གྱིས་རྟོགས་པ་ནི་མ་ཡིན་པ་དང༌། ཞེས་གསུངས་པའི་ཕྱིར། གཞན་ཡང་ཉ་ཊཱིཀ་ཡིད་ཀྱི་མུན་སེལ་ལས། ཆོས་ཉིད་སྔར་མ་མཐོང་བ་གསར་དུ་མཐོང་བས་མཐོང་ལམ།ཞེས་དང༌། མཛོད་ལས། མ་མཐོང་མཐོང་ཕྱིར་མཐོང་བའི་ལམ། ཞེས་དང༌། རྒྱུད་བླ་མ་ལས།སོ་སོའི་སྐྱེ་བོ་ཕྱིན་ཅི་ལོག །བདེན་པ་མཐོང་བ་བཟློག་པ་སྟེ། །ཞེས་དང༌། ཐེག་མཆོག་ཤིན་ཏུ་རྒྱས་པའི་དབུ་མ་ཆེན་པོ་ཟིན་བྲིས་ལས། ཆོས་ཉིད་ལ་གསལ་སྣང་ཅི་རིགས་ཐོབ་པའི་ཚུལ་གྱིས་རྟོགས་པ་ཡིན་པ་དང་ཞེས་གསུངས་པ་སོགས་བློ་ལྡན་རྣམས་ཀྱིས་དཔྱད་སྒོར་བཀོད་པའོ། །