(༡) སེམས་ཀློང་གཉིས་ཀྱི་བསྟན་པའི་ཆུ་འགོ་སྤྱིར་བསྟན་པ།
གསུམ་པ་ཐེག་པའི་རྩེ་རྒྱལ་འོད་གསལ་རྫོགས་པ་ཆེན་པོ་ཨ་ཏི་ཡོ་ག་དར་ཚུལ་ལ། ཕྱི་སེམས་སྡེ། ནང་ཀློང་སྡེ། གསང་བ་མན་ངག་གི་སྡེ་དང་གསུམ་དུ་བཞུགས་པ་ལས། འདིར་སེམས་ཀློང་གཉིས་ཀྱི་བསྟན་པའི་ཆུ་འགོ་སྤྱིར་བསྟན་ཏེ་ཐུན་མོང་གཅིག་འདྲེས་ཀྱི་བརྒྱུད་སྲོལ་བཤད་པ་དང་། བྱེ་བྲག་སེམས་ཀློང་སོ་སོའི་བརྒྱུད་སྲོལ་རྒྱས་པར་བཤད་པ། མཆོག་ཏུ་ཟབ་པ་མན་ངག་སྡེ་འོད་གསལ་གསང་བ་སྙིང་ཐིག་གི་བརྒྱུད་སྲོལ་བཤད་པ་དང་གསུམ་ལས། དང་པོ་ནི། དེ་ལ་སྤྱིར་སྔོན་གྱི་དུས་སུ་སེམས་ཀློང་གི་ཡིག་ཆའི་སྐོར་ལ། སེམས་སྡེ་སྔ་འགྱུར་ལྔ་དང་། ཕྱི་འགྱུར་བཅུ་གསུམ། སེམས་སྡེ་ཉེར་གཅིག བྱང་སེམས་རྡོ་ལ་གསེར་ཞུན། བཻ་རོའི་སེམས་ལུང་ཆེན་མོ། མན་ངག་གཡུ་ཐང་། ཨ་རོའི་ཁྲིད་མོ་ཆེ། སེམས་སྡེ་པྲ་ཁྲིད། ཀློང་སྡེ་རྡོ་རྗེ་ཟམ་པ་སོགས་རྒྱུད་དང་རྒྱ་གཞུང་མཐའ་ཡས་པ་བཞུགས། ཕྱིས་སུ་ཀུན་མཁྱེན་ཆོས་ཀྱི་རྒྱལ་པོའི་ཞལ་སྔ་ནས། ཀུན་བྱེད་རྒྱལ་པོའི་འགྲེལ་ཆེན། སེམས་འགྲེལ་ཉི་མའི་འོད་ཟེར། དེའི་བསྡུས་དོན་ཉི་ཟླའི་དྲྭ་བ། ཁྲིད་ཡིག་ནམ་མཁའ་ཀློང་གསལ་དང་། རྫོགས་པ་ཆེན་པོ་སེམས་ཉིད་རང་གྲོལ་རྩ་བ། དེའི་ལམ་རིམ་སྙིང་པོའི་དོན་ཁྲིད། སེམས་ཉིད་རང་གྲོལ་གསོལ་འདེབས། རྫོགས་པ་ཆེན་པོ་ཆོས་ཉིད་རང་གྲོལ། དེའི་དོན་ཁྲིད་ཡིད་བཞིན་སྙིང་པོ། རྫོགས་པ་ཆེན་པོ་མཉམ་ཉིད་རང་གྲོལ། དེའི་དོན་ཁྲིད་རིན་ཆེན་སྙིང་པོ། བྱང་ཆུབ་ཀྱི་སེམས་ཀུན་བྱེད་རྒྱལ་པོའི་དོན་ཁྲིད་རིན་ཆེན་གྲུ་བོ། འགྲེལ་པ་འོད་ཀྱི་འཁོར་ལོ། ཁྲིད་ཡིག་ཆོས་སྐུ་རང་ཤར། འགྲེལ་པ་འོད་ཀྱི་སྙེ་མ། ཁྲིད་ཡིག་ཆོས་སྐུ་རང་བབ། འགྲེལ་པ་འོད་ཀྱི་དྲྭ་བ། ཁྲིད་ཡིག་ཆོས་སྐུ་ལྷུན་གྲུབ་སྟེ་སེམས་སྡེའི་སྐོར་དང་། ཀློང་སྡེ་ལ། ཀློང་ནམ་མཁའ་རབ་འབྱམས་ལ་འགྲེལ་པ་ནམ་མཁའ་ཡངས་དོག་མེད་པའི་རྒྱ་གྲོལ། ཀློང་དགུའི་མན་ངག་གི་དོན་འགྲེལ་ཆོས་དབྱིངས་རིན་པོ་ཆེའི་མཛོད། དེའི་འགྲེལ་ཆེན་ཆོས་དབྱིངས་གསལ་བ། ཁྲིད་ཡིག་ཁྱབ་བརྡལ་ཀློང་ཡངས། སྡེ་གསུམ་སྙིང་པོའི་དོན་འགྲེལ་གནས་ལུགས་རིན་པོ་ཆེའི་མཛོད་རྩ་བ་དང་དེའི་འགྲེལ་པ། སྐུ་དང་ཡེ་ཤེས་རྒྱས་པ་ལྷུན་གྲུབ་སྙིང་པོ། འགྲེལ་བ་མི་ནུབ་པའི་རྒྱལ་མཚན། མཚན་དཔེ་སྐུ་གསུམ་ལག་ཁྲིད། མན་ངག་གི་དོན་འགྲེལ། ཀུན་འདུས་རིག་པའི་གལ་མདོ། ཀུན་གསལ་སྙིང་གི་དོན་འགྲེལ། བར་དོ་འོད་ཀྱི་སྙེ་མ་སོགས་མཛད་དེ་རྫོགས་ཆེན་སེམས་ཀློང་གི་བསྟན་པ་ཉི་མ་ལྟར་གསལ་བར་མཛད་ལ། ད་དུང་ཕྱི་མའི་དུས་སུ་མཁས་ཚུལ་གསུམ་ལ་རང་དབང་འབྱོར་བའི་དོན་གྱི་བསྟན་འཛིན་ཆེན་པོ་དག་གིས་བརྒྱུད་པའི་བཀའ་སྲོལ་བཟང་པོ་མི་ཉམས་གོང་འཕེལ་དང་ཉམས་པ་སོར་ཆུད་ཡོང་བའི་ཐུགས་སྟོབས་ཟབ་མོ་དུས་ལས་མི་ཡོལ་བ་བསྐྱེད་པར་འཚལ་ཞེས་གསོལ་བ་འདེབས་པ་ལགས་སོ། །
དེ་ལ་ཐོག་མར་རྫོགས་ཆེན་སེམས་ཀློང་གཉིས་ཀྱི་བསྟན་པའི་བཀའ་བབ་ལོ་ཆེན་བཻ་རོ་ཙ་ནའི་གཏམ་བརྗོད་པ་ནི། བདག་ཉིད་ཆེན་པོ་འདི་ནི་ཡུལ་སྙེ་མོ་བྱེ་མཁར་དུ་ཡབ་བ་གོར་ཧེ་འདོད་དང་། ཡུམ་བྲན་བཟའ་ཀ་སྒྲོན་སྐྱིད་གཉིས་ཀྱི་སྲས་སུ་སྐུ་འཁྲུངས། ཆུང་ངུ་ནས་རྣམ་དཔྱོད་ཤིན་ཏུ་ཆེ་བས་ཨོ་རྒྱན་ཆེན་པོ་དང་བཙན་པོ་ཁྲི་སྲོང་ལྡེའུ་བཙན་གྱིས་སྐུ་བདག་མཛད་དེ་ལོ་ཙཱ་བསླབས་པས་རྒྱ་ཆོས་མང་པོ་བོད་སྐད་དུ་བསྒྱུར། མཁན་ཆེན་བོ་དྷི་སཏྭ་ལས་རབ་ཏུ་བྱུང་ཞིང་བསྙེན་པར་རྫོགས་པས་བཻ་རོ་ཙ་ན་རཀྵི་ཏ་ཞེས་མཚན་གསོལ། རེ་ཞིག་ན་བཙད་པོའི་བཀའ་བཞིན་འཇིགས་པ་ཆེན་པོ་བརྒྱད་དང་དཀའ་བ་ཆེན་པོ་བཅུ་དྲུག་ཁྱད་དུ་བསད་ནས་རྒྱ་གར་གྱི་ཡུལ་དུ་བརྟོལ། དྷ་ན་ཀོ་ཤའི་ཙནྡན་བསིལ་བྱེད་ཀྱི་ནགས་སུ་སློབ་དཔོན་ཤྲཱི་སེདྷས་རྫུ་འཕྲུལ་གྱིས་བཀོད་པའི་ཀེའུ་ཚང་ཆེན་པོ་དགུ་བརྩེགས་དང་ཉེ་བར་སླེབས། དེར་ཆུ་ལེན་གྱི་རྣལ་འབྱོར་མ་ལ་ཕྲིན་བརྫངས་ཀྱང་ལན་མ་བྱུང་ཚེ་བཻ་རོས་ལྟ་སྟངས་མཛད་པས་ཆུ་སྣོད་ས་ལ་འབྱར། རྣལ་འབྱོར་མས་རང་གི་བྲང་ཕྱེས་ནས་རྡོ་རྗེ་དབྱིངས་ཀྱི་དཀྱིལ་འཁོར་བསྟན་ཅིང་དེས་གྲོགས་བྱས་ཏེ་སློབ་དཔོན་ཤྲཱི་སེང་ཧ་དང་མཇལ། གསེར་གྱི་མཎྜལ་ཕུལ་ཏེ་རྩོལ་མེད་ཀྱི་ཐེག་པ་གསུང་བར་ཞུས་པས་བརྟག་པར་བྱ་གསུངས། ནངས་པར་གསང་བའི་རྩིས་རྒྱ་བཏབ་ནས་ཟབ་མོའི་གནད་རྣམས་བསྟན་པར་བྱ་མོད་ཀྱི། འོན་ཀྱང་ཤིན་ཏུ་མ་གསང་ན་རྒྱལ་པོའི་ཆད་པས་སྲོག་གི་ཉེན་དུ་འགྱུར་བས་ཉིན་པར་པཎྜི་ཏ་གཞན་རྣམས་ལས་རྒྱུ་འབྲས་ཀྱི་ཆོས་ཉོན། མཚན་མོ་མན་ངག་གི་ཆོས་བསྟན་པར་བྱའོ་གསུངས་ཏེ་གཞན་གྱིས་མི་ཤེས་པའི་ཐབས་དང་རྟེན་འབྲེལ་མཛད། སློབ་དཔོན་གྱིས་མཚན་མོ་མན་ངག་སེམས་སྡེ་བཅོ་བརྒྱད་རྣམས་དར་དཀར་པོ་ལ་ར་དཀར་མོའི་འོ་མས་བྲིས་ཏེ་དུད་པས་བདུག་ན་ཡི་གེ་གསལ་བའི་ཐབས་བྱས་ཤིང་། མན་ངག་གི་དཔེ་བམ་པོ་བརྒྱ་དང་ལྔ་བཅུ་རྩ་བཞི་བྱུང་བའི་ཚེ་གཙང་རིས་ཀྱི་མགོན་པོ་སུམ་བརྒྱ་དྲུག་ཅུ་སོགས་བསྟན་སྲུང་རྣམས་ལ་ཆད་ཐོ་མཛད་དེེ་ཤིན་ཏུ་གསང་བའི་རྒྱས་བཏབ་བོ། །ད་དུང་ཡང་བཻ་རོ་ཐུགས་མ་ཚིམ་སྟེ་ཡིད་མི་བདེ་བཞིན་བཞུགས་པས། སློབ་དཔོན་གྱིས་ངས་མན་ངག་ཐམས་ཅད་བསྟན་ཟིན་ན་ཁྱོད་ཅི་ལ་རྡུགས་གསུངས་པར། ཆ་ལ་སེམས་སྡེ་བཅོ་བརྒྱད་པོས། །ཕྲེང་བརྒྱད་སྐྱེལ་མ་མ་ཤོགས་པས། །བདག་རང་བཻ་རོ་ཙཱ་ན་ཡང་། །ཡུལ་དུ་འགྲོ་བ་ཕྲེང་ལ་རྡུགས་སོགས་ཀྱི་མགུར་ཞུས་པས། སླར་ཡང་སློབ་དཔོན་གྱིས། རྒྱུད་སྡེ་དྲུག་ཅུའི་དབང་དང་མན་ངག་ཐམས་ཅད་དང་། འབྲས་བུ་རང་ཆས་སུ་སྟོན་པ་ཀློང་གི་སྡེ་དཀར་ནག་ཁྲ་གསུམ་རྣམས་བསྟན་པས་ཆོས་ཐམས་ཅད་ཀྱི་གཏིང་མཐར་ཕྱིན། ད་དུང་མ་ཚིམ་པ་ལྟར་མཛད་པས། སློབ་དཔོན་གྱི་ཞལ་ནས། ཆོས་ཀྱི་དབྱིངས་ལ་ཟད་མེད་ཀྱང་། །དེ་བཞིན་ཉིད་ནི་གཅིག་ཤེས་ན། །མ་ལུས་དེ་ལ་ཡོངས་སུ་རྫོགས། །དེ་ལས་ཡོད་ན་ན་ར་ཀན། །ཞེས་གསུངས་ནས། གདམས་པ་བཙའ་ལུགས་གསུམ། སྦྱིན་པའི་གནས་བཞི། མི་སྦྱིན་པའི་གནས་བཞི་རྣམས་གསུངས་ཤིང་རྒྱས་བཏབ་སྟེ་དགའ་རབ་རྡོ་རྗེ་དང་མཇལ་བར་ལུང་བསྟན། འདུ་བའི་གནས་ཀྱི་དུར་ཁྲོད་ཆེན་པོར་གཤེགས་པས་སློབ་དཔོན་དགའ་རབ་རྡོ་རྗེ་དང་མཇལ་ནས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་དོན་བརྒྱུད་ཐོབ་ཅིང་དེ་ཉིད་དུ་རྟོགས་གྲོལ་དུས་མཉམ་གྱི་དངོས་གྲུབ་ཆེན་པོ་མངོན་དུ་བརྙེས་སོ། །གཏེར་མའི་ཕྱོགས་འགའ་ནས་བཻ་རོ་སྙིང་ཐིག་ཅེས་བྱུང་བའང་བརྒྱུད་པའི་ཆུ་འགོ་འདི་ཉིད་ཡིན་པ་མཁྱེན་པར་འཚལ་ལོ། །དེ་ནས་བཻ་རོས་རྐང་མགྱོགས་གྲུབ་པ་ལ་བརྟེན་ནས་བོད་དུ་བྱོན། རྒྱལ་པོ་ཁྲི་སྲོང་ལྡེའུ་བཙན་ལ་ཉིན་མོ་རྒྱུ་འབྲས་ཐུན་མོང་བ་དང་། མཚན་མོ་རྫོགས་པ་ཆེན་པོའི་སྐོར་ལྐོག་ཆོས་ཁོ་ནར་གསུངས། སེམས་སྡེ་སྔ་འགྱུར་ལྔ་བསྒྱུར། དེའི་ཚེ་རྒྱ་གར་པས་གདམས་ངག་བོད་དུ་ཁྱེར་བ་ལ་ཕྲག་དོག་གིས་བོད་རྣམས་ཐེ་ཚོམ་བསྐྱེད་པའི་ཕྲ་མ་དང་། ཆོས་ལ་གནག་པའི་བཙུན་མོ་དང་བློན་པོ་རྣམས་ཀྱི་དབང་ལས་སློབ་དཔོན་བཻ་རོ་རེ་ཞིག་ཚ་བ་རོང་དུ་བྱོན་དགོས་པ་བྱུང་། རྒྱལ་རོང་བྲག་ལྷ་མགོན་པོའི་དགོན་པར་ཐུགས་སྲས་ཐུ་བོ་གཡུ་སྒྲ་སྙིང་པོ་རྗེས་སུ་བཟུང་བ་སོགས་འགྲོ་བ་རྣམས་སྨིན་གྲོལ་ལ་བཀོད། ཚ་རོང་རྟག་རྩེ་མཁར་དུ་གསང་སྟོན་ཡེ་ཤེས་བླ་མ་ལ་རྫོགས་པ་ཆེན་པོའི་སྐོར་རྣམས་གསུངས། དབུས་སུ་གཉགས་ཛྙཱ་ན་ཀུ་མཱ་ར་དང་། ལི་བཟའ་ཤེས་རབ་སྒྲོན་མ་ལ་གསུངས་པ་སྟེ་བརྒྱུད་སྲོལ་རིམ་པ་ལྔར་གྲགས་ཤིང་། ཕྱི་མ་འདིས་བཻ་རོ་ལི་ཡུལ་དུའང་སྤྱན་དྲངས། གཞན་ཡང་རྒྱ་ནག་སོགས་སུ་ཕེབས་ནས་ཆོས་ཀྱི་འགྲོ་དོན་རྒྱ་ཆེན་བསྐྱངས་པའི་རྣམ་ཐར་མང་། དེ་ནས་རེ་ཞིག་གི་ཚེ་ལྷ་སྲས་མུ་ནེ་བཙན་པོ་སོགས་བོད་ཀྱི་རྗེ་བློན་ཐམས་ཅད་བཻ་རོ་ཚ་བ་རོང་ནས་སྤྱན་འདྲེན་པར་གྲོས་འཆམས་ནས་བང་མི་གསུམ་བཏང་བས་ཐུགས་དགྱེས་པ་ཆེན་པོས་ཞལ་བཞེས་མཛད་ཅིང་གཡུ་སྒྲ་སྙིང་པོ་དང་བཅས་བོད་དུ་ཕེབས། ལམ་བར་གྱི་སྟོང་ཁུང་རོང་གི་བྲག་དཀར་རྫོང་དུ་སྤང་རྒན་མི་ཕན་མགོན་པོ་དང་འཕྲད་ནས་དེ་ཉིད་དུ་གྲོལ་བའི་གདམས་པ་ཟབ་མོ་གནང་། དཔལ་གྱི་བསམ་ཡས་སུ་པཎ་ཆེན་བཱི་མ་དང་མཇལ་ཞིང་གཉགས་ལོ་སོགས་འཁོར་ཚོགས་འདུས་པ་ལ་ནང་རྒྱུད་སྡེ་གསུམ་གྱི་ཆོས་འཁོར་བསྐོར། སླར་རྒྱལ་མོ་རོང་དུ་ཕྱིར་ཕེབས་ཏེ་ཐ་མའི་གདུལ་བྱ་རྣམས་སྨིན་གྲོལ་ལ་བཀོད་པ་སོགས་འགྲོ་དོན་གྱི་མཇུག་བསྐྱངས་ནས་བོད་དུ་ཕེབས། སྐུ་ཚེའི་མཐར་ཧས་པོ་རིར་ཟུང་འཇུག་གི་སྐུར་གྱུར་ཏེ་འཇའ་ལུས་སུ་གཤེགས་སོ། །
དེ་ལྟར་ལོ་ཆེན་བཻ་རོ་ཙ་ན་ནས་གོང་དུ་གསལ་བ་ལྟར་སེམས་ཀློང་གི་ཆོས་སྐོར་ལ་བརྒྱུད་པའི་སྲོལ་ལྔ་བྱུང་བ་དང་། གཞན་ཡང་སེམས་ཀློང་གཉིས་གཅིག་འདྲེས་ཀྱི་བརྒྱུད་པ་དང་སོ་སོའི་བརྒྱུད་པ་སོགས་བཀའ་སྲོལ་དུ་མ་བྱུང་བ་ལས་འདིར་གྲགས་ཆེ་བའི་བརྒྱུད་པ་དེང་སང་གི་བར་ཆོས་རྒྱུན་མ་ཆད་པ་འགའ་འདྲེན་པར་འདོད་དེ། ཐོག་མར་སེམས་ཀློང་གཉིས་པོ་ཐུན་མོང་གཅིག་འདྲེས་ཀྱི་བརྒྱུད་སྲོལ་ཀུན་མཁྱེན་རོང་ཀློང་རྣམ་གཉིས་ལ་བཀའ་བབ་པའི་བརྒྱུད་ཡིག་ལྟར་ན། ཐོག་མར་བྱང་ཆུབ་སེམས་ཀྱི་སྟོན་པ་ཀུན་བྱེད་རྒྱལ་པོ། རིགས་ལྔ། གསང་བདག དགའ་རབ། འཇམ་དཔལ་བཤེས་གཉེན། དྷ་ཧེ་ན་ཏེ་ལོ། སྲས་ར་ཛ་ཧསྟི། སྲས་མོ་ཝ་ར་ཧི། ཀླུ་རྒྱལ་འཇོག་པོ། གནོད་སྦྱིན་མ་བྱང་ཆུབ། གཟུངས་མ་ཨ་ར་ལི། སློབ་དཔོན་ཨཀྵོ་བྷྱ། ཀུ་ཀུ་རཱ་ཛ། ས་ར་ནི། བུདྡྷ་ས་མནྟ། མ་ཧཱ་རཱ་ཛ། གོ་མ་དེ་ཝི། སློབ་དཔོན་ཨ་ལོ་ཀེ ཀུ་ཀུ་རཱ་ཛ་ཕྱི་མ། ཁ་ཆེ་མ་ཧཱ་རཱ་ཛ། དྲང་སྲོང་བྷ་ཥི་ཏ། གཟུངས་མ་བདག་ཉིད་མ། སློབ་དཔོན་ཀླུ་སྒྲུབ། དཱེ་ཝ་རཱ་ཛ། འཇམ་དཔལ་བཤེས་གཉེན་ཕྱི་མ། སངས་རྒྱས་གསང་བ། ལོ་ཆེན་བཻ་རོ། གཡུ་སྒྲ། དྲི་མེད་ཟླ་ཤར་རམ་གཉགས་ཛྙཱ་ན་ཀུ་མ་ར། སོག་པོ་ཛྙཱ་ན་ཤྲཱི། གནུབས་ཆེན་སངས་རྒྱས་ཡེ་ཤེས། པ་གོར་བློན་ཆེན་འཕགས། དན་ཡོན་ཏན་མཆོག འབྲི་གསལ་བའི་མཆོག རྒྱ་བློ་གྲོས་གཞོན་ནུ། མགར་ཚུལ་ཁྲིམས་བཟང་པོ། རོང་ཟོམ་པཎ་ཆེན། མཚུར་ཡེ་དབང་། དན་ཆོས་ཀྱི་དབང་ཕྱུག ཞང་མཆོག་བླ། སྐྱེ་ཡོན་འབྱུང་། དན་འཕགས་པ་གཞོན་ནུ་དོན་གྲུབ་ནས། ཀུན་མཁྱེན་ཀློང་ཆེན་རབ་འབྱམས་ལའོ། །དེ་ནས་མན་ངག་སྡེ་གསང་བ་སྙིང་ཐིག་གི་བརྒྱུད་པ་དང་ཐུན་མོང་དུ་ཀུན་མཁྱེན་འཇིགས་མེད་གླིང་པ་ནས་ད་ལྟའི་བར་རྒྱུན་མ་ཆད་པ་བྱུང་ཚུལ་འོག་ཏུ་འབྱུང་བ་ལྟར་རོ། །