ཕྱག་ན་རྡོ་རྗེ་གོས་སྔོན་པོ་ཅན་གྱི་སྦྱིན་སྲེག་གི་ཆོ་ག་ཞེས་བྱ་བ།
སློབ་དཔོན་ཛཱ་བ་རི་པ།
རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་ཧོ་མ་བི་དྷི་ནཱ་མ། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གྱི་སྦྱིན་སྲེག་གི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །གང་ཞིག་མེད་པར་དེ་མི་འབྱུང༌། །དེས་ན་དེ་ལ་འཇུག་པ་བརྩམ། །དེ་ལ་འདིར་ཐབ་ཁུང་གྲུ་གསུམ་པ་མགོ་ལྷོར་བསྟན་པའི་ནང་དུ། ཁྲོ་བོའི་རྡོ་རྗེ་སོར་བརྒྱད་པ་བཀོད་དེ། ཐལ་བ་དང་སོལ་བས་ནག་པོར་བྱུགས་ལ་དྲི་ཆུ་དང་བོང་བུ་དང་རྔ་མོའི་རྟུག་པས་བྱུག་པར་བྱའོ། །དེར་མགལ་དུམ་མམ། ཚེར་མ་ཅན་ནམ། སྐམ་པོའི་ཤིང་བཅེར་ཏེ། ཁྲག་དང༌། བའི་གཅིན་དང༌། བདུད་རྩི་དང༌། མེ་ཏོག་ནག་པོ་ནི་མཆོད་ཡོན་ནོ། །དྲི་མི་ཞིམ་པ་དང༌། རོ་ཁང་དང༌། སྔོན་པོའི་མེ་ཏོག་གོ །བདུད་རྩི་ལྔ་སྦྱར་བའི་སྤོས་སོ། །མར་ཆེན་པོའི་མར་མེ། དྲི་ཆུ་དང་ཏིལ་ནག་པོ་སྦྱར་བ་ནི་དྲི་ཆབ། དྲི་ཆེན་དང་མི་ཤ་བསྲེས་པའི་ལྷ་བཤོས་ཏེ། དེ་རྣམས་གཡས་སུ་གཞག་པར་བྱའོ། །དུག་དང༌། ཁྲག་དང༌། སྐེ་ཚེ་དང༌། ལན་ཚྭ་དང༌། ནིམ་པ་དང༌།
ད་དུ་ར་དང༌། བདུད་རྩི་ལྔ་དང་བསྲེས་པའི་ཡུངས་མར་རྣམས་ནི་དགང་གཟར་དུ་བླུགས་ཏེ་ཁྲག་ཏུ་བྱས་ལ་དབུལ་ལོ། །ཤིང་ཚེར་མ་ཅན་གྱི་ཡམ་ཤིང་དང༌། མར་ནག་དང༌། ཁྲག་དང༌། དྲི་ཆེན་དང༌། དྲི་ཆུ་དང༌། མི་རུས་དང༌། སྐྲ་དང༌། སོར་མོ་དང༌། དུག་དང༌། སྐེ་ཚེ་དང༌། ལན་ཚྭ་དེ་རྣམས་དང༌། རྐང་རྗེས་དང༌། ཁྱིམ་བྱའི་སྒོ་ང་དང༌། བྱ་རོག་གི་ཤ་རྣམས་དང༌། བོང་བུ་དང༌། རྔ་མོའི་རྟུག་པ་རྣམས་ནི་སྲེག་རྫས་ཏེ། ཤ་དང་རུས་པར་བསམ་མོ། །དེ་རྣམས་ནི་གཡོན་དུའོ། །རང་ལྷའི་རྣལ་འབྱོར་བྱས་ལ་རྫས་བྱིན་གྱིས་བརླབས་ནས་བགེགས་བསྐྲད་དོ། །རྡོལ་པའམ། སྨེ་ཤ་ཅན་ནམ་རྡོ་ལས་བྱུང་བའམ། རིའི་མེ་བླངས་ཏེ། བསང་ཞིང༌། ཨོཾ་བཛྲ་པཱ་ཎི་མ་ཧཱ་ཀྲོ་དྷ་ཛྭཱ་ལ་ཛྭཱ་ལ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཞེས་པས་མེ་སྦར་རོ། །མེ་འབར་བའི་ནང་དུ་རཾ་ལས་ཐབ་ཁུང་བསྐྱེད་ལ་དེའི་ནང་དུ་ཧཱུཾ་ལས་ཉི་མའི་སྟེང་དུ་ཨོཾ་ཨཱ་ཧཱུཾ་ལས་འཁོར་ལོ་དང༌། པདྨ་དང༌། རྡོ་རྗེར་གྱུར་ཏེ། དེ་ནས་ཁྲོ་བོའི་མེ་ལྷ་ཤིན་ཏུ་ཁྲོས་པ། སྐྲ་ཁམ་པ་གྱེན་དུ་བརྫེས་པ། འོད་ཟེར་དཔག་ཏུ་མེད་པ་འཕྲོ་བ། ཞལ་གཅིག་ཕྱག་བཞི་པ། གཡས་ན་རྡོ་རྗེ་དང་སྐྱབས་སྦྱིན། གཡོན་ན་དྲིལ་བུ་དང་དབྱུག་པ། རཾ་ལས་མེ་དང་རླུང་གི་དཀྱིལ་འཁོར་ལ་བསམས་ཏེ། ཡེ་ཤེས་སེམས་དཔའ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱས་ནས་དེར་བྱིན་རླབས་དང༌། དབང་བསྐུར་ཏེ། ཁྲུས་གསོལ་ནས་ཞལ་གདངས་པའི་ནང་དུ་མཆོད་རྫས་དང་སྲེག་རྫས་རྣམས་འདིས་དབུལ་ཏེ། ཨོཾ་བཛྲ་པཱ་ཎི་མ་ཧཱུ་བྷཱུ་ཏ་ཛྭཱ་ལ་ཡ་སརྦ་བྷསྨིཾ་ཀུ་རུ་སརྦ་དུཥྚཱཾ་མ་མ་ཆེ་གེ་མོ་མཱ་ར་ཡ་ཧཱུཾ་ཕཊ་ཅེས་པས་གསད་པར་བྱའོ། །དེ་ནས་མེ་འབར་བས་རྒྱུར་གྱུར་པའམ། ཡང་ན་དེའི་སྙིང་གར་དཔལ་ཕྱག་ན་རྡོ་རྗེ་གོས་སྔོན་པོ་ཅན་སྒྲུབ་ཐབས་ལས་ཇི་སྐད་གསུངས་པ་བཞིན་ཉི་མའི་དཀྱིལ་འཁོར་ལ་གནས་པར་བསྐྱེད་ནས་ཡེ་ཤེས་སེམས་དཔའ་སྔ་མ་བཞིན་བསྟིམས་ལ། དེ་བཞིན་དུ་བྱིན་གྱིས་བརླབས་པ་དང་དབང་བསྐུར་བར་བྱའོ། །དེ་ནས་ཕྲེང་བའི་སྔགས་ལ་མཱ་ར་ཡ་དང་བཅས་པས་མཆོད་རྫས་སྔ་མ་བཞིན་དུ་དབུལ་ལོ། །ཡང་དགང་བླུགས་ཕུལ་ཏེ། ཡེ་ཤེས་སེམས་དཔའ་
གཤེགས་སུ་གསོལ་ལོ། །དེ་ནས་ཐབ་བསངས་ཏེ། རྫས་ལྷག་མ་རྣམས་མེ་ལྷ་ལ་ཕུལ་ནས། ཨོཾ་བདག་དང་གཞན་གྱི་དོན་རྣམས་ནི། །བསྒྲུབས་ཏེ་སྦྱིན་སྲེག་བཞེས་ནས་ཀྱང༌། །སླར་ཡང་འབྱོན་པར་མཛད་ནས་ཀྱང༌། །བདག་ལ་སྔགས་ཀྱི་དངོས་གྲུབ་སྩོལ། །ཞེས་མེ་ལྷ་གཤེགས་སུ་གསོལ་ལོ། །དེའི་རྗེས་སུ་དམ་ཚིག་པ་རང་ལ་བསྡུས་ཏེ། གཏོར་མ་སྦྱིན་པར་བྱའོ། །ཉུང་བར་འདོད་ན་བླ་མའི་ཞལ་ནས་ཇི་སྐད་གསུངས་པ་བཞིན་དུ་འདི་ལ་འཇུག་པར་བྱའོ། །ཕྱག་ན་རྡོ་རྗེའི་སྦྱིན་སྲེག་གི་ཆོ་ག་མདོར་བསྡུས་པ་ཞེས་བྱ་བ་ནམ་གྲུའི་རིགས་ལས་བྱུང་བ་དངོས་གྲུབ་བརྙེས་པའི་སློབ་དཔོན་ཛཱ་བ་རི་པས་མཛད་པ་རྫོགས་སོ།། །།བ་ལ་པོའི་པཎྜི་ཏ་དེ་བ་པཱུ་རྞ་མ་ཏི་དང༌། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།།