ཕྱག་མཚན།

ཕྱག་མཚན་ནི།

དུས་འཁོར་བསྟོད་ཆེན་ལས། རྡོ་རྗེ་རལ་གྲི་རྩེ་གསུམ་གྲི་གུག་མདའ་དང་ལྕགས་ཀྱུ་ཌཱ་མ་རུ། །ཐོ་བ་འཁོར་ལོ་མདུང་དབྱུག་དགྲ་སྟས་གཡས་ཀྱི་ཕྱག་བརྒྱན་གཡོན་པ་ཡང༌། །དྲིལ་བུ་ཕུབ་དང་ཁ་ཊྭཱཾ་ཐོད་པ་གཞུ་དང་ཞགས་པ་རིན་པོ་ཆེ། །པད་དཀར་དུང་དང་མེ་ལོང་ལྕགས་སྒྲོག་ཚངས་མགོས་བརྒྱན་ལ་ཕྱག་འཚལ་ལོ། །ཞེས་གསུངས་པ་ལྟར་ཕྱག་གཡས་ཀྱི་ནག་པོའམ་སྔོན་པོ་བཞིས་རིམ་པ་བཞིན་དུ་རྡོ་རྗེ་རྩེ་ལྔ་བ་གསེར་མདོག་རང་སོར་བཅུ་གཉིས་པ། རལ་གྲི་དང༌། ལྕགས་མདུང་རྩེ་གསུམ་པ། སོ་རྣོ་བའི་གྲི་གུག་གསུམ་འཁྱོགས་ཆང་ཟུང་གི་སྟེང་དུ་རྡོ་རྗེ་ཕྱེད་པས་བརྒྱན་པ་འཛིན་པའོ། ། དམར་པོ་བཞིས་རིམ་བཞིན་ཚ་བ་མེའི་རང་བཞིན་ལས་གྲུབ་པའི་མདའ་སྒྲོ་མདེའུ་དང་བཅས་པའི་མདའ་དམར་པོ་གསུམ་རིང་ཐུང་གྲུ་དོ་ཡོད་པའོ། ། དེ་དང་མི་འདྲ་བར་ཕྱོགས་རྒྱལ་དུས་འཁོར་རྒྱུད་མཆན་ལས། མེའི་མདའ་ལྕགས་ཀྱི་སྦུབས་སུ་མདའ་ཐུང་བཅུག་ནས་ཚ་རག་གི་རྫས་ཀྱིས་མེའི་ཤུགས་ཀྱིས་འཕེན་པའི་མདའ། ཞེས་གསུངས་མོད་སྔ་མ་ལྟར་ཕྱག་ལེན་མཛད་པ་ལེགས་སོ། །ཡུ་བ་མཐོ་གང་གི་རྩེ་མོ་གུག་པའི་སྟེང་དུ་རྡོ་རྗེས་མཚན་པའི་ལྕགས་ཀྱུ། སྒྲ་དང་བཅས་པའི་ཌ་མ་རུ། ཡུ་བ་མཇུག་ཕྲ་བའི་མགོ་ན་རྡོ་རྗེ་ཕྱེད་པ་ཡོད་པའི་ཕྱོགས་གཉིས་ན་ཐོ་བའི་དབྱིབས་ཡོད་པར་རྟག་བརྟན་དུ་བཞུགས་པའི་གྱང་བྲིས་སུ་གསལ། འབའ་མདའ་བླ་མས། ཡུ་བའི་སྟེང་དུ་སྣ་ཚོགས་རྡོ་རྗེ་ལེབ་ཆགས་སུ་བཙུག་པའི་ངོས་གཅིག་ཐོ་བའི་དབྱིབས་སུ་བྱས་པའི་ཐོ་བ། ཞེས་གསུངས་ལ། གང་ལྟར་ཡང་ཐོ་བ་འཛིན་པའོ། །དཀར་པོ་བཞིས་རིམ་བཞིན་དུ་ཆ་གཅིག་གིས་ལྟེ་བ་དང་ཆ་ཕྱེད་ཀྱིས་ནང་གི་མུ་འཁྱུད་དང༌། རྐང་བ་དང་བཅས་པའི་ཆ་གཅིག་གིས་རྩིབ་བརྒྱད་དང༌། ཆ་གཅིག་གིས་ཕྱིའི་མུ་འཁྱུད་བྱས་པའི་འཁོར་ལོ་སེར་པོ། རིང་ཚད་མིའི་ལུས་ཚད་གཉིས་སམ་གསུམ་པ་ཅན་གྱི་མདུང་རྣོན་པོ། འབའ་མདའ་བླ་མས། རྡོ་རྗེའི་ཏོག་དང་བཅས་པའི་དབྱུག་པ་དཀར་བོ་གྲུ་བཞི་བ། ཞེས་གསུངས་ལ། རྟག་བརྟན་གཙུག་ལག་ཁང་གི་གྱང་བྲིས་ལ་དབྱུག་པ་སེར་པོ་ཟླུམ་པོ་མཇུག་ཕྲ་བ་རྩེ་མོ་ནོར་བུའི་ཏོག་དང་བཅས་པར་བྲིས་པ་བཞུགས། དགྲ་སྟ་ནི། དབྱུག་གུའི་རྩེ་མོ་དང་རྒྱབ་གཉིས་ལ་རྡོ་རྗེ་མདུན་སྟ་རེའི་ཁ་དང་འདྲ་བའོ། །འོན་ཀྱང་འབའ་མདའ་བླ་མས། སྟ་རེ་རྣོན་པོ་གཉིས་རྒྱབ་སྤྲད་པའི་གཡས་གཡོན་དུ་རྡོ་རྗེ་ཕྱེད་པ་རྩེ་མོ་འཕྲེད་དུ་ཕྱོགས་ནས་ཟུག་པ། སྟེང་དུ་རྡོ་རྗེ་རྩེ་ལྔ་པས་བརྒྱན་པ་སྟེ་དབྱུག་གུའི་རྩེར་རྡོ་རྗེ་རྒྱ་གྲམ་ལེབ་མོར་བཙུག་པའི་མདུན་རྒྱབ་གཉིས་སྟ་རེའི་ཁ་དང་འདྲ་བ་ལྟ་བུའི་སྟེང་དུ་རྡོ་རྗེས་མཚན་པའི་དགྲ་སྟྭ། ཞེས་གསུངས་སོ། །རང་བཟོས་སླད་མེད་ན་ཕྱག་རྗེས་མི་འདྲ་བ་གང་གི་རྗེས་སུ་འབྲང་ན་འགལ་བ་མེད་པ་འདྲའོ། །ཕྱག་གཡོན་པ་རྣམས་ཀྱི་ནག་པོ་བཞིས་རིམ་བཞིན་དུ་རང་སོར་བཅུ་གཉིས་པའི་དྲིལ་བུ། ཕུབ་དཀར་པོ། ཡུ་བའི་རྩེ་མོར་རྡོ་རྗེ་ཕྱེད་པ་རྩེ་ལྔ་པ་རབ་ཏུ་གདེངས་པ་གྱེན་དུ་བསྟན་པའི་ཁ་ཊཱཾ་ག་ཁ་ཕྱེ་བ། སྤྱིར་ཁ་ཊཱཾ་ག་ནི། རྩ་བ་ན་རྡོ་རྗེ་རྩེ་གཅིག་པ། དེའི་སྟེང་དུ་ཀེང་རུས་ཀྱི་དབྱུག་པའི་རྩེ་མོ་ལ་བུམ་པ་སྣ་ཚོགས་རྡོ་རྗེས་ཁ་རྒྱན་པ་ལས་ཌ་མ་རུ་དང་དྲིལ་བུ་གཡེར་ཁ་དང༌། བ་དན་ལྕེ་གསུམ་པ་དཔྱངས་པ། སྣ་ཚོགས་རྡོ་རྗེའི་སྟེང་དུ་མི་མགོ་རློན་པ་སྔོ་ནག རེད་པ་དམར་པོ། བརླན་བྲལ་གྱི་ཐོད་རིལ་དཀར་བ་རྣམས་བརྩེགས་པ། རྩེ་མོ་རྡོ་རྗེ་རྩེ་ལྔ་བའོ། །འོག་ཏུ་བདེ་ཆེན་འཁོར་ལོའི་དོན་གྲུབ་སོགས་ལ་རྡོ་རྗེའི་མཚན་པ་བྱ་ཡང་མི་མགོ་གསུམ་མི་དགོས་པར་དབྱུག་པ་ཙང་མགོ་ཙང་གཞུག་ཅན་གྱི་སྟེང་དུ་མི་མགོ་སྐམ་རློན་གང་རུང་ཡོད་པ། མི་མགོའི་མགུལ་དུ་དར་དཔྱངས་བཅིངས་ཤིང་དྲིལ་ཆུང་བཏགས་པ་ཙམ་གྱིས་ཆོག་པར་གསུངས། དུས་འཁོར་གྱི་ཕྱག་མཚན་ལ་གཡས་ན་མདུང་རྩེ་གསུམ་པ་འཛིན་ཡོད་པས་ཁ་ཊཱཾ་ག་ལ་རྩེ་གསུམ་མི་དགོས་སོ། །ཁྲག་གིས་གང་བའི་ཐོད་པ་འཛིན་པའོ། །དམར་པོ་བཞིས་རིམ་བཞིན་དུ་རང་མཐོ་བཅུ་བ་ཅན་གྱི་གཞུ། སྣེ་གཉིས་ལ་ལྕགས་ཀོར་དང་ལྕགས་ཀྱུ་ཡོད་པའི་ཞགས་པ། འབའ་འདའ་བླ་མས། སྣེ་གཉིས་སུ་རྡོ་རྗེས་མཚན་པའི་ཞགས་པ། ཞེས་སོ། །རིན་པོ་ཆེ་རྩེ་མོ་དགུ་བ་འོད་འཕྲོ་བ་ནི། དངོས་གྲུབ་ཉེར་འཚོ་ལས། རིན་པོ་ཆེ་ནི་རིན་པོ་ཆེ་ཟུར་དགུ་པ་སྟེ། རང་བྱུང་གི་ཤེལ་ལྟར་རྒྱ་བཞོགས་ཀྱི་ཟུར་བརྒྱད་ལ་རྩེ་མོ་རེ་རེ་དང་དབུས་ཀྱི་རྩེ་སྟེ་དགུའོ། །ཞེས་གསུངས་ལྟར་རྟག་བརྟན་གཙུག་ལག་ཁང་ན་དེ་འདྲ་བྲིས་པ་ལེགས་སྙམ། འབའ་མདའ་བླ་མས་ཡང༌། རིན་པོ་ཆེ་རྩེ་མོ་དགུ་བ་སྟེ་རིན་པོ་ཆེ་ཟླུམ་པོ་རྩེ་མོ་ཅན་གྱི་ཟླུམ་པོའི་ངོས་བརྒྱད་བཞོགས་ཀྱིས་ཟུར་བརྒྱད་དུ་བཞོག་པའི་ཟུར་བརྒྱད་རྩེ་མོ་དང་ཟུར་དགུ་བ། ཞེས་གསུངས་སོ། །གང་ལྟར་འོད་འཕྲོ་བ་དགོས་སོ། །པདྨ་དཀར་པོ་འདབ་མ་བརྒྱད་པའི་ཡུ་བ་ནས་འཛིན་པའོ། །དཀར་པོ་བཞིས་རིམ་བཞིན་དུ་དུང་དཀར། མེ་ལོང༌། རྡོ་རྗེ་ལྕགས་སྒྲོག ཚངས་པའི་མགོ་བོ་གདོང་བཞི་པའི་སྐྲ་ནས་བཟུང་ནས་རྐེའི་ཡུ་བ་སྟེང་དུ་བསྟན་ཏེ་འཛིན་པའོ། །འོན་ཀྱང་འབའ་མདའ་བླ་མས། རིག་བྱེད་འབྱུང་བའི་གནས་ཚངས་པའི་མགོ་བོ་གདོང་བཞི་བ་སྐྲ་མཚམས་སུ་མེ་ཏོག་གི་འཕྲེང་བས་སྤྲས་པའི་རྐེའི་ཡུ་བ་ནས་འཛིན་པའོ། །ཞེས་གསུངས་སོ། །ཕྱག་དང་པོ་གཉིས་ཀྱིས་ཡུམ་གྱི་སྐུ་རྒྱབ་ནས་རྡོ་རྗེ་དྲིལ་བུ་ཐུགས་ཀའི་ཐད་དུ་བསྣོལ་ནས་འཁྱུད་པའོ། །