གཉིས་པ་ཡུལ་ཆོས་ཀྱིས་བདག་པོར་གྱུར་པ།

གཉིས་པ་ཡུལ་ཆོས་ཀྱིས་བདག་པོར་གྱུར་པ་ནི།

ཤོ་གམ་བསྲུང་བ་པོ་དབང་བ་ལྟ་བུའོ། ། གསུམ་པ་རིགས་བརྒྱུད་ཀྱིས་བདག་པོར་གྱུར་པ་ནི། ཕ་ནོར་བུ་ལ་དབང་བ་ལྟ་བུའོ། ། བཞི་པ་སངས་རྒྱས་བཀའ་སྩལ་གྱི་སྟོབས་ཀྱིས་བདག་པོར་གྱུར་པ་ལ་གསུམ་ལས། དང་པོ་སངས་རྒྱས་ལ་ཕུལ་བའི་རྙེད་པ་ནི་སངས་རྒྱས་ཉིད་ཀྱི་ཡིན་པས་མཆོད་པའི་རྫས་ལ་སོགས་པ་བྱའོ། ། གཉིས་པ་ཆོས་ལ་ཕུལ་བའི་རྙེད་པ་ལ་གཉིས་ལས། དོན་དམ་པའི་ཆོས་ལ་ཕུལ་བ་ནི། ཞི་བ་མྱ་ངན་ལས་འདས་པའི་ཆོས་ལ་ཕུལ་བ་སྟེ། དེ་ནི་བྱེ་བྲག་བཤད་མཚོ་ལས། མྱ་ངན་ལས་འདས་པ་ལ་ཕུལ་བ་ནི་མཆོད་རྟེན་དང་འདྲ་བར་བཞག་གོ །ཞེས་གསུངས་པས་གཞན་གྱིས་ལོངས་སྤྱད་དུ་མི་རུང་ངོ༌། །བརྡར་བཏགས་པའི་ཆོས་ལ་ཕུལ་བ་ལ་གཉིས་ལས། སྒྲུབ་པའི་ཆོས་ལ་ཕུལ་བ་ནི་དགེ་འདུན་གྱི་རྙེད་པར་གྱུར་ཏེ། སྒྲུབ་པའི་ཆོས་དགེ་འདུན་གྱི་རྒྱུད་ལ་མངའ་བའི་ཕྱིར་རོ། །ལུང་གི་ཆོས་ལ་ཕུལ་བ་ནི། ལུང་ཆོས་སྨྲ་བ་རྣམས་དབང་སྟེ། གཙུག་ལག་གི་ཚིགས་སུ་བཅད་པ་གཅིག་འཛིན་པ་ནི་འདིར་དེ་ཉིད་ཀྱི་མཐའ་ཡིན་ནོ། །ཞེས་སོ། ། གསུམ་པ་དགེ་འདུན་ནམ་གང་ཟག་ལ་ཕུལ་བའི་རྙེད་པ་ལ་གཉིས་ཏེ། དུས་དང་གློ་བུར་གྱི་རྙེད་པ་གང་དབང་མི་དབང་བསྟན་པ་དང༌། ཤི་བའི་ཡོ་བྱད་ཀྱི་རྙེད་པ་གང་དབང་མི་དབང་བསྟན་པའོ། །དང་པོ་ལ་གཉིས་ཏེ། དུས་ཀྱི་རྙེད་པ་དང༌། གློ་བུར་གྱི་རྙེད་པའོ། །དང་པོ་ནི་དབྱར་གནས་པའི་རྙེད་པ་དེ་གནས་དེར་ཡུན་རིང་དུ་གནས་པ་རྣམས་ལ་དབང་བ་དང༌། སྲ་བརྐྱང་གི་དུས་ཀྱི་རྙེད་པ་དེ་གང་གིས་སྲ་བརྐྱང་བཏིང་བ་རྣམས་ལ་དབང་བ་ལྟ་བུའོ། །གློ་བུར་གྱི་རྙེད་པ་ལ་ནི་བཞི་པོ་འདི་དག་ལུང་གོས་གཞི་དང་འོད་ལྡན་ལས་གསུངས་ཏེ། ཁྲིམས་སུ་བྱས་པ་དང༌། མཚམས་ཀྱི་སྒྲུབ་པ་དང་སོ་སོར་ངེས་པ་དང་མངོན་དུ་གྱུར་པའོ། །དང་པོ་ནི་ཡོན་བདག་གམ་མཆོད་གནས་ཀྱི་ས་རིས་འདི་དང་འདི་ནས་ཕུལ་བ་རྣམས་དགེ་འདུན་འདི་དང་འདི་པ་རྣམས་དབང་བར་བྱེད་དོ་ཞེས་ཁྲིམས་སུ་བཅས་ན། རྙེད་པ་ནི་ཡོན་བདག་རྣམས་ཀྱིས་ཇི་ལྟར་རྣམ་པར་བསྔོས་ཤིང་ངེས་པར་བྱས་པ་ལྟར་རྣམ་པར་བཞག་གོ་ཞེས་གསུངས་པའོ། །གཉིས་པ་ནི་སྦྱིན་བདག་དགེ་འདུན་གྱི་གནས་སུ་འོངས་ཏེ། རྫས་འདི་དགེ་འདུན་ལ་འབུལ་ཞེས་དགེ་འདུན་བྱེ་བྲག་ཏུ་མ་ཕྱེད་པར་ཕུལ་ན། དགེ་འདུན་ཡོངས་སུ་མ་བཅད་ན་ལས་ཀྱི་མཚམས་ཀྱིས་ཡོངས་སུ་བཅད་དོ། །ཞེས་གསུངས་པའོ། ། གསུམ་པ་ནི་སྡེ་པའམ་གང་ཟག་འདི་ལ་འབུལ་ཞེས་སོ་སོར་ངེས་པར་བྱས་ན་སྦྱིན་བདག་གི་ཚིག་གིས་གང་ལ་ངེས་པར་བྱས་པ་དེ་ཉིད་དབང་བའོ། ། བཞི་པ་ནི་ཚིག་གིས་ངེས་པར་མ་བྱས་ཀྱང་སྦྱིན་བདག་གིས་སྡེ་པའམ་གང་ཟག་ལ་མངོན་སུམ་དུ་ཕུལ་ན་གང་ལ་ཕུལ་བ་དེ་དབང་བའོ། །གཉིས་པ་ཤི་བའི་ཡོ་བྱད་ཀྱི་རྙེད་པ་གང་དབང་མི་དབང་བསྟན་པ་ལ་གཉིས་ཏེ། རབ་ཏུ་བྱུང་བ་ཤི་བའི་ཡོ་བྱད་གང་དབང་མི་དབང་བསྟན་པ་དང༌། རྟགས་ཅན་ཤི་བའི་ཡོ་བྱད་གང་དབང་མི་དབང་བསྟན་པའོ། །དང་པོ་ལ་གཉིས་ཏེ། དགེ་འདུན་མི་དབང་བའི་རྙེད་པ་དང༌། དགེ་འདུན་དབང་བའི་རྙེད་པའོ། །དང་པོ་ལ་ལྔ་སྟེ། ཤི་བའི་སྔ་རོལ་ཏུ་ངེས་པར་བྱས་པའི་རྫས་དང༌། བུ་ལོན་པའི་རྫས་དང༌། སྡེ་ཚན་པའི་རྫས་དང༌། ནད་གཡོག་པའི་རྫས་དང༌། ཁྱིམ་གཞན་ན་གནས་པའི་རྫས་སོ། །དང་པོ་ནི། གོས་ཀྱི་གཞིའི་རྩ་བར། ནད་པས་སྨྲས་པས་སྦྱིན་པ་ཕྲི་ཡང་ཇི་སྐད་སྨྲས་པ་བཞིན་བྱ་བ་ཉིད་དོ། །ཞེས་གསུངས་སོ། ། གཉིས་པ་ནི་བུ་ལོན་པ་བྱུང་ན་དེ་ལ་གཞལ་བར་བྱ་བའི་ཚད་ཀྱི་ཤི་བའི་ཡོ་བྱད་དེ་དབང་བ་ཉིད་ཡིན་ནོ་ཞེས་གསུངས་པའོ། །གསུམ་པ་ནི་ཕོག་པ་མ་བགོས་པར་ཚོམས་དེ་ལས་འགའ་ཞིག་ཤི་ན་དེའི་སྐལ་པ་ཚོམས་དེ་པ་ལ་དབང་བ་ཉིད་ཡིན་པར་གསུངས་པའོ། །བཞི་པ་ནི་ནད་གཡོག་ཆོས་ལྔ་དང་ལྡན་ན་ཤི་བ་དེའི་ཡོ་བྱད་དྲུག་ནད་གཡོག་ལ་དབང་བ་ཡིན་ཏེ། ཆོས་འདི་བའི་རབ་བྱུང་གང་རུང་གི་སྡོམ་པ་གསོར་རུང་ཡན་ཆད་དང་ལྡན་པ་དང༌། ཤི་བ་དེ་དང་ལྟ་བ་མཐུན་པ་དང༌། ཤི་བ་དེ་དང་མཚན་མཐུན་པ་དང༌། གནས་ནས་མ་ཕྱུང་བ་དང༌། ནད་གཡོག་གི་བྱ་བ་བྱས་པ་དང་ལྔའོ། ། ལྔ་པ་ནི་དགེ་སློང་ཤི་བ་དེའི་ལྷུང་བཟེད་དང་ཆོས་གོས་ཁྱིམ་གཞན་ན་འདུག་པ་ནི་ཁྱིམ་བདག་གིས་རབ་བྱུང་གང་ལ་བྱིན་པ་དེར་དབང་ངོ༌། །དེ་ཡང་ཆོས་ལྔ་དང་ལྡན་ན་སྟེ། དང་པོ་བཞི་ནི་སྔ་མ་དང་འདྲ་ལ། ཡོ་བྱད་དེས་ཕོངས་པ་དང་ལྔའོ། །གཉིས་པ་དགེ་འདུན་དབང་བའི་རྙེད་པ་ནི་རབ་བྱུང་ཤི་བའི་ཡོ་བྱད་ལ་དགེ་འདུན་མི་དབང་བ་ལྔ་པོ་དེ་དག་ལས་གཞན་པ་ཐམས་ཅད་དགེ་འདུན་དབང་སྟེ། དགེ་འདུན་གྱིས་བྱིན་གྱིས་བརླབ་པར་བྱའོ། །འོན་ཀྱང་ཡུལ་ཆོས་དང་བསྟུན་དགོས་པའི་ཆ་ནི་ཅི་རིགས་པར་དཔྱད་དོ། །གཉིས་པ་རྟགས་ཅན་ཤི་བའི་ཡོ་བྱད་གང་དང་དབང་མི་དབང་བསྟན་པ་ནི། རིན་པོ་ཆེ་རྣམས་ནི་དཀོན་མཆོག་གསུམ་ལ་དབུལ་ཞིང་ཁྱད་པར་དུ་མུ་ཏིག་རྣམས་སངས་རྒྱས་ལའོ། །གོ་ཆ་ལ་སོགས་པ་ནི་རྒྱལ་པོ་ལ་དབུལ་ལོ་ཞེས་རྒྱས་པར་གོས་ཀྱི་གཞིར་སྟོན་ཏོ། །