(༢) སེམས་ཀློང་སོ་སོའི་བརྒྱུད་སྲོལ་བྱེ་བྲག་ཏུ་བཤད་པ།

༡༽ ཕྱི་སེམས་སྡེའི་བརྒྱུད་པ།

གཉིས་པ་སེམས་ཀློང་སོ་སོའི་བརྒྱུད་སྲོལ་བྱེ་བྲག་ཏུ་རྒྱས་པར་བཤད་པ་ལས། དང་པོ་སེམས་སྡེའི་བརྒྱུད་པ་ནི།

རྒྱལ་མོ་གཡུ་སྒྲ་སྙིང་པོ།

དེ་ལ་ལོ་ཆེན་བཻ་རོའི་ཐུགས་སྲས་རྒྱལ་མོ་གཡུ་སྒྲ་སྙིང་པོ་ནི་སེམས་སྡེའི་བཀའ་བབ་ཆེན་མོ་སྟེ། མདོ་གཞོར་རྒྱལ་ཁབ་རྒྱལ་མོ་ཚ་བའི་རོང་དུ་རྒྱལ་པོའི་སྲས་སུ་སྐུ་འཁྲུངས། ལོ་ཆེན་བཻ་རོས་རྗེས་སུ་བཟུང་ཞིང་མཁས་དང་གྲུབ་པའི་ཕུལ་དུ་ཕྱིན། ལོ་ཙཱ་བ་བརྒྱ་དང་རྩ་བརྒྱད་ཀྱི་གྲངས་སུ་འདྲེན་ཞིང་སློབ་དཔོན་པདྨ་དང་བཱི་མ་ལ་ལས་ཀྱང་མན་ངག་ལྟ་ཕྲེང་སོགས་ཟབ་ཆོས་དུ་མ་གསན། སྐུ་གསེར་གྱི་རྡོ་རྗེར་སྤྲུལ་ནུས་པ་སོགས་གྲུབ་པའི་རྣམ་ཐར་མཐའ་ཡས་པ་མངའ་བ་ཞིག་སྟེ། དེ་ཡང་ལོ་ཆེན་བཻ་རོ་ཙ་ན་རྒྱལ་མོ་ཚ་བའི་རོང་དུ་སྤྱུགས་སྐབས་ཡུལ་དེའི་མི་རྣམས་ཀྱིས་བོད་ཀྱི་རྟོག་ཆེན་པར་དོགས་ནས་སྦལ་དོང་དུ་ཞག་བདུན་དང་ཤིག་སྣ་ཚོགས་པའི་དོང་དུ་ཞག་བདུན་བསྐྱུར། ལོ་ཙཱ་བས་སྐྱེ་བ་མང་པོའི་གོང་དུ་ཡུལ་དེའི་ནེ་ལེར་གྱུར་ཚེ་སྦལ་པ་ཟོས་པ་དང་། ཡུལ་དེར་དགེ་སློང་ཞིག་ཏུ་གྱུར་ཚེ་ཤིག་དོར་བ་བྱ་ཡིས་ཟོས་པའི་རྣམ་སྨིན་གྱི་ཐ་མ་ཡིན་པ་ཞལ་གྱིས་བཞེས་ཏེ་དགེ་སློང་པུརྞའི་སྔོན་གནས་དྲན་པ་ཇི་བཞིན་གསུངས་པས་རྒྱལ་བློན་རྣམས་ཀྱིས་རྒྱལ་པོའི་མེས་སུ་གཏོགས་པའི་དགེ་སློང་པུརྞ་ཡིན་པར་ཤེས་ནས་བཤགས་པ་དང་བཀུར་བསྟི་བྱས། འོན་ཀྱང་རྒྱལ་པོའི་སྲས་གཡུ་སྒྲ་སྙིང་པོ་མ་དད་ཅིང་ཉམས་སད་པའི་ཕྱིར་བུ་ཤི་བའི་ཕ་མ་དང་། རྒན་རྒོན་འཆི་ལ་ཉེ་བ་དང་། སྐྱེས་པ་དང་བུད་མེད་ལང་ཚོ་ཅན་བརྩེ་བ་རྣམས་རིམ་པར་བཏང་སྟེ་ཆོས་བྱས་ན་བུ་དང་ཕྲད་དམ། རྒས་པ་གཞོན་ནུར་ལྡོག་གམ། བརྩེ་དགའ་འདི་ལས་ལྷག་པའི་བདེ་སྐྱིད་ཆོས་ལ་ཡོད་དམ་བྱ་བ་རིམ་པས་འདྲིར་བཅུག་པས། སློབ་དཔོན་གྱིས་བུས་མ་ཚད་རང་ཉིད་ཀྱང་འཆི་བ་དང་། རྒས་དུས་ཆོས་དྲན་ཀྱང་འཕྱིས་པ་དང་། ཐམས་ཅད་མི་རྟག་པ་རྣམས་རིམ་པར་གསུངས་པས་དེ་དག་ཀྱང་དད་པས་གཡུ་སྒྲ་ཡང་ཅུང་ཟད་དད་ནས་འོག་རྟ་ཕུལ་ཏེ་ཆོས་ཞུས་པས་མ་གནང་བ་ན། ཐབས་ཀྱིས་ཁྲུས་ལ་གདན་དྲངས་ནས་ཆུའི་ནང་དུ་གདམས་པ་མི་གནང་ན་ཆུ་ལ་བཀྲོང་ངོ་ཞེས་བསྡིགས་པས། ཡོན་དང་དད་པ་གཉིས་མེད་པར། །ནན་ཚིར་བྱས་པས་ཆོས་ཁུགས་སམ། །འཆི་ན་གཉིས་ཀ་འཆི་མོད་དེ། །ང་ཤི་འོག་མིན་གནས་སུ་འགྲོ། །ཁྱོད་ཤི་ངན་སོང་གསུམ་དུ་འགྲོ། །ཁྱོད་ཀྱིས་ཕོད་ན་ང་ཡིས་ཕོད། །གསུངས་པས་སྐྲག་སྟེ་བཟོད་གསོལ་བྱས། ཡང་སློབ་དཔོན་གྱི་དཔེ་ཆ་བརྐུས་ནས་ཀུན་བྱེད་ཀྱི་རྒྱུད་བྲིས་ཏེ་ང་ལ་ཡང་ཆོས་ཡོད་ཟེར་བས། རྡོ་རྗེ་སེམས་དཔའ་དགའ་རབ་འཇམ་དཔལ་གྱི། །ཞལ་ནས་གསུངས་པའི་མན་ངག་ངེས་པའི་དོན། །རྒྱལ་བའི་དགོངས་པ་ཤིན་ཏུ་གཏིང་ཟབ་ལ། །ཡིག་ནག་ཚིག་གིས་བྱང་ཆུབ་རྙེད་པ་མིན། །ཞེས་གསུངས་པས་དད་པ་དྲག་ཏུ་སྐྱེས་ནས་རྗེས་སུ་བཟུང་བར་ཞུས་པས་གཟོད་ཞལ་གྱིས་བཞེས། རྒྱུ་འབྲས་ཀྱི་ཆོས་གསུངས་པས་མ་ཚིམ་སྟེ་ཚེ་འདིར་འཚང་རྒྱ་བའི་གདམས་པ་ཞུས་པས། ལུས་ཀྱི་སྒོ་ནས་བྲན་གཡོག་ཅི་དགོས་བྱེད་པ། བླ་མའི་སྐུ་དགྲ་འདུལ་བ། ཕྱག་སྐོར་གྱིས་སྒྲིབ་པ་སྦྱང་བ་སྟེ་ལུས་ཀྱི་སྦྱང་བ་གསུམ། ངག་གིས་ཞེ་ས་དང་གསོང་པོར་སྨྲ་བ། སྐུ་དགྲ་ལ་དྲག་སྔགས་ཀྱི་དམོད་པ་འབེབས་པ། རྟག་ཏུ་གསོལ་བ་འདེབས་པ་སྟེ་ངག་གི་སྦྱང་བ་གསུམ། ཡིད་ཀྱིས་རྟག་ཏུ་བླ་མའི་རྣལ་འབྱོར་སྒོམ་པ། ཅི་གསུང་མོས་པས་སྒྲུབ་པ། ལུས་ལོངས་སྤྱོད་ཐམས་ཅད་འབུལ་བ་སྟེ་ཡིད་ཀྱི་སྦྱང་བ་གསུམ་དང་དེ་ལྟར་སྦྱང་བ་དགུ། ཁྱིམ་དང་ཉེ་འབྲེལ་སྤོང་བར་ཕོད་པ་སོགས་ཕོད་པ་བཅུ་གསུམ་བྱེད་ནུས་ན་བསྟན་ནོ་ཞེས་གསུངས་པས་ཅི་གསུང་སྒྲུབ་པར་དམ་བཅས་པ་ན། འོ་ན་ཨོ་རྒྱན་གྱི་ཡུལ་དང་རྡོ་རྗེ་གདན་རྣམས་སུ་སོང་ལ་དགའ་རབ་རྡོ་རྗེ་དང་མཁས་པ་ཉེར་ལྔ་རྣམས་ལ་གསེར་འདི་འབུལ་བ་ཕུལ་ནས་ཤོག་དང་དེ་རྣམས་ཀྱི་གདམས་པ་ངས་གདབ་བོ་ཞེས་གསེར་མང་པོ་བསྐུར། བཀའ་ལྟར་ཨོ་རྒྱན་ཏུ་འགྲོ་བར་ཆས་པ་ན་རང་གི་ཡབ་ཡུམ་བློན་འབངས་དང་བཅས་པས་ཨོ་རྒྱན་དུ་ཕྱིན་རུང་དགའ་རབ་རྡོ་རྗེ་མི་རྙེད་དེ་བས་སློབ་དཔོན་བཻ་རོ་ཉིད་ལ་གཏུག་པ་འཐད་ཟེར་ནས་བཤོལ་བཏབ་ཀྱང་མ་ཉན་ཏེ་སྲོག་ལ་བབ་ཀྱང་བླ་མའི་བཀའ་སྒྲུབ་བོ་གསུངས་པ་ན། སློབ་དཔོན་གྱི་ཞལ་ནས་ཁྱོད་དེ་ཙམ་དུ་བླ་མའི་བཀའ་བསྒྲུབས་ན་ཨོ་རྒྱན་དུ་འགྲོ་མི་དགོས་འདི་ཉིད་དུ་རྗེས་སུ་བཟུང་གིས་སྔོན་བླ་མ་ལ་ཉམས་སད་བྱས་པ་རྣམས་བཤགས་པ་གྱིས་ཤིག་ཅེས་གསུངས་པར་གཡུ་སྒྲས་ལུས་ལོངས་སྤྱོད་ཐམས་ཅད་ཕུལ་བས་བྲག་ལྷ་མགོན་པོའི་དགོན་པར་སེམས་སྡེ་གཙོ་བོར་གྱུར་པའི་གདམས་ངག་ཐམས་ཅད་གནང་། ལྷའི་སྤྱན་ཐོབ་ཅིང་རྐང་མགྱོགས་ཀྱང་གྲུབ། བཻ་རོའི་སྔོན་དུ་བོད་ལ་ཐེངས་གཅིག་ཕེབས་ཏེ་བོད་ཀྱི་རྒྱལ་བློན་རྣམས་ལ་ཉམས་སད་ཅིང་སླར་དཔོན་སློབ་གཉིས་བོད་དུ་ཕེབས་ཏེ་མདོ་སྔགས་ཀྱི་ཆོས་བསྒྱུར་བཤད་མཛད་པ་སོགས་ཕྲིན་ལས་རྒྱ་ཆེ་བའི་ངང་སྐུ་གཤེགས་སོ། །

སྤྱིར་རྫོགས་ཆེན་སེམས་སྡེའི་བརྒྱུད་སྲོལ་ལ་སེམས་སྡེ་ཉང་ལུགས་སུ་གྲགས་པ་གཉགས་ལོ་ཆེན་པོ་ནས་སོག་པོ་དཔལ་གྱི་ཡེ་ཤེས། དེས་གནུབས་ཆེན་ཡབ་སྲས་ནས་རིམ་པར་ཟུར་མེས་དབོན་རྣམས་ལ་བརྒྱུད་པ་དང་། ཡང་ཁམས་ལུགས་སུ་གྲགས་པ་ཁམས་ཀྱི་གླང་ཐང་སྒྲོལ་མར་བྱོན་པའི་མཁས་པ་ཆེན་པོ་ཨ་རོ་ཡེ་ཤེས་འབྱུང་གནས་ལ་བཻ་རོ་གཉགས་ལོ་གཉིས་ཀས་གདམས་པ་བསྟན་ཞིང་། འདི་ཉིད་ཀྱིས་རྫོགས་ཆེན་སེམས་སྡེའི་བསྟན་བཅོས་ཆེན་པོ་ཐེག་ཆེན་རྣལ་འབྱོར་བྱ་བ་མཛད་པ་ཕྱིས་པཎ་ཆེན་ཇོ་བོ་རྗེས་གཟིགས་ཚེ་ཚིག་དོན་གྱི་ཆ་ཕུན་སུམ་ཚོགས་པ་གངས་རིའི་ཁྲོད་ན་འགྲན་ཟླ་དང་བྲལ་བར་བསྔགས་པར་མཛད། དེས་ཡ་ཟི་བོན་སྟོན་གྲུ་གུ་ཀློག་འབྱུང་སོགས་ལ་བརྒྱུད་པ་དང་། ཡང་རོང་ལུགས་སུ་གྲགས་པ། ཨ་རོ་ནས་བོན་ཅོག་གཉིས་ལ་གནང་། དེ་གཉིས་ཀས་ཀུན་མཁྱེན་རོང་ཟོམ་པཎ་ཆེན་ལ་བརྒྱུད་པ་སོགས་མངའ་རིས་ནས་མདོ་ཁམས་ཡན་ཆོད་དུ་བཀའ་སྲོལ་མཐའ་ཡས་པ་བཞུགས་ཀྱང་ཡོངས་གྲགས་ལ་གཙང་བརྒྱུད་དང་། དབུས་བརྒྱུད། དབུས་གཙང་འདྲེས་མ་དང་གསུམ་དུ་བཞུགས་པ་ལས། ཕྱི་མའི་ཁོངས་སུ་བརྒྱུད་སྲོལ་ཐམས་ཅད་གཅིག་འདྲེས་སུ་བྱུང་བ་ལྟར་སྣང་ཞིང་། བརྒྱུད་སྲོལ་འདིའི་དབང་དུ་བྱས་ཏེ་མཁས་གྲུབ་སོག་བཟློག་པ་བློ་གྲོས་རྒྱལ་མཚན་གྱིས་བརྒྱུད་འདེབས་བྱིན་རླབས་དགའ་སྟོན་མཛད་པ་ལ་ཕྱིས་སུ་སྨིན་གླིང་གཏེར་ཆེན་དང་རྒྱལ་སྲས་གཞན་ཕན་མཐའ་ཡས་རྣམ་གཉིས་ཀྱིས་རང་ལུགས་ཀྱི་བརྒྱུད་སྲོལ་ཡང་འདི་ཉིད་ཁོ་ན་མཛད་དེ་ཁ་སྐོང་གནང་བའི་མཚན་ཐོ་ཙམ་བཀོད་པ་ནི། ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་སེམས་དཔའ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲཱི་སེང་ཧ། ལོ་ཆེན་བཻ་རོ་ཙ་ན། རྒྱལ་མོ་གཡུ་སྒྲ་སྙིང་པོ། གཉགས་ཛྙ་ན་ཀུ་མཱ་ར། སོག་པོ་དཔལ་གྱི་ཡེ་ཤེས། གནུབས་ཆེན་སངས་རྒྱས་ཡེ་ཤེས། གནུབས་ཡོན་ཏན་རྒྱ་མཚོ། ཉང་ཤེས་རབ་མཆོག་ལྡན། ཉང་ཡེ་ཤེས་འབྱུང་གནས། བདེ་གཤེགས་ཟུར་པོ་ཆེ་ཤཱཀྱ་འབྱུང་གནས། ཟུར་ཆུང་ཤེས་རབ་གྲགས་པ། སྐྱོ་སྟོན་ཤཱཀྱ་ཡེ་ཤེས། ལྷ་རྗེ་སྒྲོ་ཕུག་པ་ཤཱཀྱ་སེང་གེ། ལྕེ་སྟོན་རྒྱ་ནག གྲུབ་ཆེན་དབུས་པ་ཞིག་པོ། ཞིག་པོ་བདུད་རྩི། རྟ་སྟོན་ཡེ་ཇོ། རྟ་སྟོན་གཟི་བརྗིད། དམ་པ་སངས་རྒྱས། མཉམ་མེད་སྤྲུལ་སྐུ། ཟུར་བྱམས་པ་སེང་གེ། མ་གཅིག་ཟུར་མོ། མཁས་བཙུན་སངས་རྒྱས་དཔལ། སྒྲོལ་ཆེན་བསམ་འགྲུབ་རྡོ་རྗེ། ཆོས་རྗེ་སངས་རྒྱས་རིན་ཆེན། ཤངས་མདའི་རྒྱལ་སྲས། གྲུབ་མཆོག་གྲགས་པ་དཔལ་འབྱོར། རྟ་ནག་མཁན་པོ་བློ་གྲོས་རབ་ཡངས། བླ་མ་སྒྲུབ་ཆེན་པ། སོག་བཟློག་པ་བློ་གྲོས་རྒྱལ་མཚན། ལོ་ཆེན་གཞན་ཕན་རྡོ་རྗེ། རིག་འཛིན་ཕྲིན་ལས་ལྷུན་གྲུབ། གཏེར་ཆེན་འགྱུར་མེད་རྡོ་རྗེ། ངག་དབང་ཆོས་དཔལ་རྒྱ་མཚོ། རྒྱལ་སྲས་རིན་ཆེན་རྣམ་རྒྱལ། པདྨ་བསྟན་འཛིན། ཨོ་རྒྱན་ཀློང་ཡངས། རིག་འཛིན་འཇིགས་མེད་གླིང་པ། རྡོ་གྲུབ་ཀུན་བཟང་གཞན་ཕན། མི་འགྱུར་ནམ་མཁའི་རྡོ་རྗེ། རྒྱལ་སྲས་གཞན་ཕན་མཐའ་ཡས། མཁན་ཆེན་པདྨ་བཛྲ། ཨོ་རྒྱན་བསྟན་འཛིན་ནོར་བུ། མཁན་ཆེན་གཞན་ཕན་སྣང་བ། ཡབ་རྗེ་ངག་དབང་ནོར་བུ། སྐྱབས་རྗེ་པདྨ་སྐལ་བཟང་རིན་པོ་ཆེ་བཅས་སར་གནས་སེམས་དཔའ་མིའི་རྣམ་རོལ་དུ་བྱོན་པ་དོན་བརྒྱུད་རྟོགས་པའི་ལྟ་དགོངས་བརྙེས་པ་བར་མ་ཆད་པར་བྱོན་ཞིང་། སྐྱབས་རྗེ་བླ་མ་མཆོག་གི་ཞལ་སྔ་ནས་སྨིན་ཁྲིད་རྒྱུད་ལུང་དང་བཅས་པ་བདག་ཅག་གི་ཆོས་སྐལ་དུ་ལེགས་པར་ཐོབ་པ་སྟེ། བརྒྱུད་པའི་རྣམ་ཐར་ཕལ་མོ་ཆེ་གོང་དུ་མ་ཧཱ་དང་ཨ་ནུའི་སྐབས་སུ་རྒྱས་པར་སོང་ཞིང་འོག་ནས་ཀྱང་ཅི་རིགས་པ་འབྱུང་བས་འདིར་མ་བཟློས་སོ། །

༢༽ ནང་ཀློང་སྡེའི་བརྒྱུད་པ།

[༡] སྤང་རྒན་མི་ཕམ་མགོན་པོ།

གཉིས་པ་རྫོགས་ཆེན་ཀློང་སྡེའི་བརྒྱུད་པ་ནི། ལོ་ཆེན་བཻ་རོའི་ཀློང་སྡེའི་བཀའ་བབ་སྤང་རྒན་མི་ཕམ་མགོན་པོ་ནི། བདག་ཉིད་ཆེན་པོ་སྤང་མི་ཕམ་མགོན་པོ་ལ་རྫོགས་ཆེན་ཀློང་སྡེའི་བཀའ་བབ་ཅིང་འདི་ཉིད་ཀྱི་སློབ་རྒྱུད་ལས་འཇའ་ལུས་གྲུབ་པ་ཤ་སྟག་བྱུང་བ་སྟེ། འདི་ནི་ལོ་བརྒྱད་ཅུ་རྩ་ལྔ་ལོན་པ་གཞོན་ནུའི་དུས་ཆོས་མ་འགྲུབ་ཅིང་རྒས་ནས་ཉེ་འཁོར་དང་སྤུན་གྱིས་སྡང་བར་གྱུར་པ་ཞིག་སྟེ། བཻ་རོ་དང་གཡུ་སྒྲ་གཉིས་རྒྱལ་མོ་རོང་ནས་བོད་ལ་ཕེབས་པའི་ལམ་ཁ་ནས་མཇལ། རྒད་པོ་ན་རེ། བན་དེ་ཁྱེད་གཉིས་གང་དུ་འགྲོ་ཟེར་བར། གཡུ་སྒྲས་རྒྱལ་མོ་རོང་ནས་འོངས། བོད་དུ་འགྲོ་བྱས་པས། རྒད་པོས་མགྲོན་པོ་ཁྱོད་གཉིས་རེ་འཁྲུལ་ཚ་བའི་རོང་ན་བཻ་རོ་ཙ་ན་བཞུགས་ནས་ཆོས་ཀྱི་ཉི་མ་ཤར་འདུག་པ་ཐོས་པས་དེར་ཆོས་ཉན་ནས་མི་སྡོད་པར་ཁྱེད་གཉིས་འདྲ་བ་ཟེར། བཻ་རོ་ཙ་ནས་དེ་ཉིད་ང་ཡིན་གསུངས་པས་རྒད་པོས་མིག་ལ་འཁར་བ་བཙུགས་ནས་བལྟས་ཏེ་བཻ་རོའི་མགུལ་ལ་འཁྱུད་དེ་ཡུན་གཅིག་ལུས། དེ་ནས་ང་རྒན་པོ་འཆི་མ་བཏུབ་བཞིན་ཆོས་མེད་སྟོང་ལོག་སྡུག་རྒན་ང་འདྲ་སྙམ་སྟེ། རྗེ་ཁྱེད་དང་མཇལ་བས་སྐྱིད་རྒན་ཨ་རེ་དགའ་ཆོས་ཤིག་ཞུ་ཟེར་བར། བཻ་རོས་ཕྱག་སྤྱི་བོར་བཞག་སྟེ་བརྡ་བརྗོད་པས་མ་གྲོལ། ཐུགས་ལ་འདི་ལས་ཅན་གྱི་སློབ་བུར་འདུག་སྟེ་རྒས་ཆེས་པས་ལན་དགོངས་ཏེ། སྒོམ་རྟེན་འཁར་བ་ལུས་ལ་བཙུགས་ཤིང་སྒོམ་ཐག་རྐེད་ལ་བསྡམས་ནས་ཀློང་དགུ་བམ་པོ་ཉི་ཁྲིའི་བཅུད་ཕྱུང་བ་རྡོ་རྗེ་ཟམ་པའི་གདམས་ངག་བཏབ་པས། དེ་མ་ཐག་ཆོས་ཉིད་གཅེར་མཐོང་དུ་ངོ་འཕྲོད་ཅིང་རྟོགས་པ་ཐོད་རྒལ་དུ་སྐྱེས་ནས་སངས་རྒྱས་ཏེ་ལོ་བཅུ་དྲུག་གི་ན་ཚོད་དུ་གྱུར། ཡིད་དགའ་ཆེ་ནས་སློབ་དཔོན་གྱི་མགུལ་ལ་འཁྱུད་ནས་ཞག་གཅིག་བར་མ་བཏང་། དེར་རྩེ་གཅིག་ཏུ་ཉམས་སུ་བླངས་པས་ལོ་ལྔ་ཐུབ་པ་བྱུང་ཞིང་མཐར་ཕུང་པོ་ལྷག་མེད་དུ་གཤེགས་སོ། །

[༢] དེའི་སློབ་མ་ངན་ལམ་བྱང་ཆུབ་རྒྱལ་མཚན་ནི།

ཡུལ་དབུ་རུ་ངན་ལམ་རལ་གསུམ་པ་དགེ་སློང་ལོ་དྲུག་ཅུ་རྩ་བདུན་ལོན་པ་ཞིག་སྟེ་རྒྱལ་མོ་སྟག་རྩེ་མཁར་དུ་བྱོན། སྤང་མི་ཕམ་མགོན་པོ་ལ་གདམས་པ་ཞུས་པས་གནང་སྟེ། ད་ཡུལ་དུ་མ་འགྲོ་བར་ཝ་སེང་གེ་བྲག་ཏུ་སྒོམ་གསུངས། སློབ་དཔོན་གྱི་བཀའ་བཞིན་ཉན་ཏེ་དེར་བྱོན་ནས་བསྒོམས་པས་དངོས་གྲུབ་ཐོབ་ཏེ་ལོ་བརྒྱ་དང་བདུན་ཅུ་རྩ་གཉིས་ལོན་པའི་ཚེ་ཕུང་པོ་ལྷག་མེད་དུ་གཤེགས་སོ། །

[༣] དེའི་སློབ་མ་ཟ་དམ་རིན་ཆེན་དབྱིག་ནི།

མདོ་ཁམས་སྟོད་དུ་སྐུ་འཁྲུངས་ཤིང་ངན་ལམ་ལས་གདམས་པ་ཞུས། བྲག་དེ་ཉིད་དུ་བླ་མ་དང་འབྲལ་བ་མེད་པར་སྒོམ་བཞིན་བཞུགས་པས། ལོ་བརྒྱ་དང་བཞི་བཅུ་ཞེ་བཞི་ལོན་པའི་ཚེ་ཕུང་པོ་ལྷག་མེད་དུ་གཤེགས་སོ། །

[༤] དེའི་སློབ་མ་ཁུ་འགྱུར་གསལ་བའི་མཆོག་ནི།

ཡུལ་ཡར་ཀླུང་འཕྱོངས་རྒྱས་སུ་སྐུ་འཁྲུངས། རྟེན་དགེ་སློང་ཡིན་པ་ལོ་ལྔ་བཅུ་རྩ་བདུན་ལོན་པ་ན་ཟ་དམ་རིན་ཆེན་དང་མཇལ། རྫོགས་ཆེན་ཀློང་སྡེའི་གདམས་ཁྲིད་ཆ་ཚང་གནང་བས་ཡུལ་དུ་ལོག་པའི་བསམ་པ་སྤངས། ཝ་སེང་གེ་བྲག་ཉིད་དུ་བཞུགས་ནས་བསྒོམས་པས་ལོ་བརྒྱ་དང་བཅུ་བདུན་ལོན་ཚེ་ཕུང་པོ་ལྷག་མེད་དུ་གཤེགས་སོ། །

[༥] དེའི་སློབ་མ་ཉང་བྱང་ཆུབ་གྲགས་ནི།

ཉང་ཡུལ་གཡུ་འབྲུག་སྟོད་དུ་སྐུ་བལྟམས་ཤིང་རྟེན་དགེ་སློང་ལོ་བཞི་བཅུ་རྩ་གཉིས་ལོན་པ་ཞིག་བྱུང་། ཁུ་འགྱུར་གསལ་བ་ལས་གདམས་པ་གསན། ཡང་རྫོང་དང་། མཆིམས་ཕུ་རྣམས་སུ་ཤྭ་བ་ཅིག་ཁྲིད་ནས་བྱོན་པས་ཉང་ཤྭ་བ་ཅན་ཞེས་ཀྱང་གྲགས། བསམ་ཡས་མཆིམས་ཕུར་གནས་ལུགས་ཀྱི་དོན་སྒོམ་གྱིན་བཞུགས་ཙ་ན། དབུ་རུ་ཞའི་ཉང་ཤེས་རབ་འབྱུང་གནས་ཞེས་བྱ་བ་དགེ་སློང་བགྲེས་པོ་གཅིག་བཞུགས་འདུག་པ་དེ་མཇལ་དུ་བྱུང་། ཁོང་ན་རེ། བསྙེན་པར་རྫོགས་ནས་ལོ་ང་རྒན་ཡང་གདམས་པ་ཁྱེད་ཆེ་བར་འདུག རྗེས་སུ་བཟུང་བར་འཚལ་ཞུས་པས། གནང་སྟེ་གདམས་པ་བྱིན་པས་བརྒྱུད་འཛིན་གྱི་ཐུགས་སྲས་གཙོ་བོར་གྱུར། རྗེ་ཉིད་ཕུག་པོ་ཆེར་བྱོན་སྐབས་ཞིག་ན་སློབ་དཔོན་ཤེར་འབྱུང་དང་། སྦ་སྒོམ་གཉིས་ལ་ངས་ལྟད་མོ་གཅིག་སྟོན་གྱི་ལྟོས་ཤིག་གསུངས། ཁོང་གཉིས་ཀས་གཡས་གཡོན་ནས་བལྟས་ཙ་ན། སློབ་དཔོན་དབུས་ན་ཡོད་པ་དེ་རུ་མི་སྣང་བར་སོང་། དེར་ངོ་མཚར་སྐྱེས་ནས་ཡོད་ཙ་ན། རླུང་འཚུབ་ཁྲུ་གང་པ་གཅིག་ཏུ་གྱུར་ནས་ཕར་བསྐྱིལ་ཚུར་བསྐྱིལ་བྱས། དེ་མེར་སོང་། དེའང་ཆུ་གཏོར་གཏོང་བའི་འཁར་གཞོང་དུ་འཕོས་ནས་ཆུར་ལྟེམ་གྱིས་སོང་། དེས་ཚུབ་གཅིག་ངང་ལ་སློབ་དཔོན་རང་དུ་ཀྲོང་གིས་སོང་། དེ་ལྟར་འབྱུང་བཞི་ཟད་པར་གྱི་སྐྱེ་མཆེད་ལ་དབང་བསྒྱུར་ནས། ཞལ་ནས་འདི་སྐད་དུ། འབྱུང་བའི་སྙིགས་མ་དེངས་ནས་དྭངས་མ་མ་ཡལ་བའི་བར་དུ་དེ་ལྟར་འོང་བ་ཡིན། ཤེས་རབ་ཀྱིས་སྒོམ་རྒྱུ་མེད་པའི་དོན་མཐོང་ཡང་བརྡའ་ལ་ཡེངས་པ་མེད་པར་བསྐྱངས་ན་དེ་ལྟར་དུ་རང་དབང་ཐོབ་པ་ལ་ཚེགས་མེད། མ་ཡེངས་པར་སྐྱོང་བ་གལ་ཆེ་བ་ཡིན་གསུངས་ཤིང་མཐར་རང་ཉིད་ཕུང་པོ་ལྷག་མེད་དུ་གཤེགས་སོ། །

[༦] དེའི་སློབ་མ་ཉང་ཤེས་རབ་འབྱུང་གནས་ནི།

དབུ་རུ་ཞྭའི་ཡུལ་དུ་སྐུ་འཁྲུངས་རྟེན་དགེ་སློང་སྡེ་སྣོད་འཛིན་པ་ཆེན་པོར་བཞུགས། སྐུ་ན་ཆེས་སྨིན་པའི་སྐབས་སུ་ཉང་བྱང་ཆུབ་གྲགས་དང་མཇལ་ཏེ་གདམས་ཁྲིད་གསན། མཆིམས་ཕུ་དཔལ་གྱི་ནགས་ཁྲོད། སྒྲགས་ཀྱི་ཡང་རྫོང་། ཕུག་པོ་ཆེ་རྣམས་སུ་ཐུགས་དམ་ལ་བཞུགས་པས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་ཤར། ཐུགས་སྲས་ཐུ་བོ་སློབ་དཔོན་སྦ་སྒོམ་པ་རྗེས་སུ་བཟུང་ནས་བསྐྱངས་པས་བརྒྱུད་པ་ཟིན་པ་བྱུང་། དཔོན་སློབ་གཉིས་བལ་བུའི་ནགས་ཀྱི་དབེན་ཁྲོད་དུ་བཞུགས་སྐབས་ཤིག་ལ་སྦ་སྒོམ་ཤིང་འཐུ་བར་བྱོན། རྒྱང་རིང་ནས་ཚུར་འཇག་སྤྱིལ་ལ་གཟིགས་པས་མེ་དམར་བུན་བུན་འདུག་པ་མཐོང་། སློབ་དཔོན་གྱིས་ནི་མེ་མི་འབུད། མེ་ཤོར་བ་ཡིན་ནམ་སྙམ་ཏེ་བལྟར་ཕྱིན་པས་འཇག་སྤྱིལ་སྔར་བཞིན་ལས་མེ་མི་སྣང་། སློབ་དཔོན་ལ་དེ་ཅི་ཡིན་ཞེས་དྲིས་པས། ངས་མེའི་ཏིང་ངེ་འཛིན་ལ་མཉམ་པར་བཞག་པ་ཡིན། ངའི་བླ་མ་ཉང་བྱང་ཆུབ་གྲགས་པ་དེ་མི་དྲན་ནམ་གསུངས། ཡང་སྐབས་ཤིག་སློབ་དཔོན་གྱི་བཞུགས་སར་ཆུ་ལྟེམ་མེར་འདུག་པ་མཐོང་མཐར། སློབ་དཔོན་གྱིས། ང་མི་འདུག་ན་ལྷ་རིའི་རྩེ་མོ་ལ་ལྟོས་ཤིག་གསུངས། རེ་ཞིག་ན་སློབ་དཔོན་མ་བྱུང་བས་རི་ལ་སྐྱོ་སངས་ལ་བཞུད་པ་ཡིན་གྱི་སང་དགོང་འབྱོན་དུ་འོང་སྙམ་ཡང་མ་བྱོན། བལྟར་ཕྱིན་ཙ་ན། དབུ་ཞྭ་དང་། བོ་དྷིའི་ཕྲེང་བ་ལ་སོགས་སྐུ་ཆས་རྣམས་ཤུག་པ་ལ་གཟར་ཏེ་ཕུང་པོ་ལྷག་མེད་དུ་གཤེགས། འདི་ནི་རང་བཞིན་རྫོགས་པ་ཆེན་པོ་ལས་ནམ་མཁའ་དང་། མཁའ་འགྲོའི་འཆི་ལུགས། མེ་དཔུང་དང་རིག་འཛིན་གྱི་འཆི་ལུགས་ཞེས་པའི་ཡ་གྱལ་གཅིག་ཡིན་པར་གསུངས་སོ།།

[༧] དེའི་སློབ་མ་སྦ་སྒོམ་ཡེ་ཤེས་བྱང་ཆུབ་ནི།

ཡུལ་ལོ་མོ་ཞེས་པའི་ས་ཆར་སྐུ་འཁྲུངས་ཤིང་རྟེན་དགེ་བསྙེན་དུ་བཞུགས། གདུང་རུས་སྦ་ཡིན་པས་སློབ་དཔོན་སྦ་སྒོམ་པའམ་མཚན་ཡེ་ཤེས་བྱང་ཆུབ་ཏུ་གྲགས། སྔར་རང་གི་ཡུལ་ན་ཡོད་པའི་ཚེ་འཁྲུག་པ་ཡོད་པས། ཡུམ་ན་རེ། བུ་འདི་སྲིང་མོ་དྲུག་གི་མིང་པོ་གཅིག་པུ་ཡིན། མ་ཤི་བ་གཅིག་པུས་ཆོག་ཟེར་ནས་སློབ་དཔོན་ཤེས་རབ་འབྱུང་གནས་ལ་བཅོལ་བས་རྗེས་སུ་བཟུང་། ཉི་ཤུ་རྩ་བཞི་ལོན་ཙ་ན་ཉང་ཤེར་འབྱུང་གིས་ཀློང་སྡེའི་གདམས་པ་བཏབ་པས་རྟོགས་པ་ཁྱད་པར་ཅན་འཁྲུངས། རྡོ་ལ་འདམ་རྫབ་ལྟར་བརྫིས་པ་དང་བྲག་ལ་ཟང་ཐལ་དུ་གཤེགས་པ་སོགས་གྲུབ་པའི་རྟགས་མཐུན་སྣང་བ་མང་དུ་བསྟན། དགུང་ལོ་དགུ་བཅུ་རྩ་བརྒྱད་བར་བཞུགས་ཤིང་མཐར་སྐུ་སྙུན་པ་མེད་པར་གཤེགས། ཇོ་མོ་གང་མོས་ཕྱི་རོལ་གྱི་མི་རྣམས་ལ་པུར་མཇལ་མ་བཏང་བས་མཆོད་ཁང་དུ་པུར་མེ་ལ་བྱུང་བས་འོད་རྫ་མ་ཙམ་ཞིག་ནམ་མཁའ་ལ་འགྲོ་བ་ཕྱི་རོལ་གྱི་མི་ཀུན་གྱིས་མཐོང་ཞིང་ཤུལ་དུ་གདུང་རུས་གཅིག་ཀྱང་མ་བྱུང་

ངོ་། །

[༨] དེའི་སློབ་མ་འཛེངས་དྷརྨ་བོ་དྷི་ནི།

ཡབ་ཡར་ལུང་ཐང་ཆུང་བཙད་པོའི་བུ་ཆེ་བ་བཀྲ་ཤིས་གཡུང་དྲུང་ཞེས་ཕྱིས་རབ་ཏུ་བྱུང་ཞིང་རྡོ་རྗེ་ཕུར་པའི་སྒོ་ནས་གྲུབ་པ་ཐོབ་པ་དང་། ཡུམ་མཚར་དགུ་སྐྱིད་གཉིས་ཀྱི་སྲས་སུ་ཆུ་ཕོ་འབྲུག་གི་ལོར་འཁྲུངས། ལོ་བཅུ་དྲུག་ལོན་པའི་དུས་འགྲུལ་ཟླ་ཁ་ཤས་དང་བཅས་དོལ་གྱི་གདོང་སྣར་ཚོང་ལ་ཕྱིན་སྐབས་དོལ་གྱི་འཚེར་ཆུང་ན་མི་མང་པོ་སྤུངས་འདུག་པ་བལྟར་ཕྱིན་པས་དམ་པ་སངས་རྒྱས་དང་མཇལ། ཟླ་བ་བཅུ་བཞིར་དམ་པའི་ཕྱག་ཕྱིར་འབྲངས་ནས་གཙང་གི་གནས་གཞི་བཟང་ཅན་དུ་སླེབས། དེར་དམ་པས་སྣམ་བུ་གཅིག་གནང་སྟེ་དོལ་དུ་འགྲོ་བའི་ཟླ་བོར་འདུག་པས་ཁྱོད་རང་ཡུལ་དུ་ལོག དྭགས་པོ་ནས་ཁམ་བུ་ཁྱེར་ལ་ཤོག་གསུངས། བཀའ་བཞིན་ལམ་དུ་ཞུགས་པ་ན་དམ་པ་ཚུར་བྱོན་ནས། ཅི་ཡང་མ་ཡིན་གནས་གྱུར་པ། །གནས་གྱུར་པ་ལ་གཉིས་འཛིན་མེད། །ཅེས་གསུངས་ནས་མགོ་ཐུག་ལན་གཉིས་བརྒྱབ་པས་སེམས་ཧད་དེ་བ་ལ་ཤེས་པ་བཀྲ་གསལ་བ་ཞིག་བྱུང་། དེ་ནི་དམ་པས་བྱིན་གྱིས་བརླབས་ཏེ་རྡོ་རྗེ་ཟམ་པ་དང་མཇལ་བའི་ལུང་བསྟན་པར་འདུག་སྟེ་དུས་ཕྱིས་ལས་མ་གོ་གསུངས། དེ་ནས་དབུས་སུ་བྱོན་ནས་གསན་པ་ཅི་རིགས་མཛད་ཅིང་སོ་ལྔ་ལོན་ཚེ་སློབ་དཔོན་སྦ་སྒོམ་དང་མཇལ། རིམ་གྱིས་རྟོགས་པ་ཁྱད་པར་ཅན་དུ་ཤེས་ནས་གདམས་པ་གནང་བར་ཞུས་པས། ང་ལ་མན་ངག་རྡོ་རྗེ་ཟམ་པ་ཞེས་བྱ་བ་སྐད་ཅིག་མར་དོན་རྟོགས་ནས་ཚེ་གཅིག་ལུས་གཅིག་ཕུང་པོ་ལྷག་མེད་དུ་སངས་རྒྱས་པའི་བརྒྱུད་པ་ཕྲེང་མ་ཆད་པ་ཞིག་ཡོད། དེ་སྔ་ཕན་ཆད་སུ་ལའང་མ་སྨྲས་པ་ཡིན་མོད་ད་ཁྱོད་ལ་སྦྱིན་ནོ་གསུངས་ནས་རིམ་བཞིན་གྲོལ་ལམ་གྱི་དབང་བཞི་རྫོགས་པར་བསྐུར། གདམས་ངག་མ་ལུས་པ་གནང་སྟེ་ཕྱིས་ཀྱང་བྱིན་རླབས་ལན་བཞི་ཙམ་ཞུས་ཤིང་ཞབས་ཏོག་འབུལ་ཆེན་ལན་ལྔ་ཙམ་ཕུལ། སློབ་དཔོན་གྱིས་སྣང་བ་འདི་ཀུན་རྫུན་མའི་ཆོས་ཅན་ཡིན་གསུངས་ནས་ངོ་མཚར་བའི་རྫུ་འཕྲུལ་དུ་མ་ཡང་བསྟན་ཅིང་གདམས་ངག་གཞན་ཡང་མང་དུ་གནང་། གཞན་གྲུབ་ཆེན་ཡུ་མོ་པ། དྭགས་པོ་ལྷ་རྗེ། མ་ལབ་སྒྲོན། ཁམས་པ་ལུང་པ་སོགས་གསར་རྙིང་རིས་མེད་ཀྱི་མཁས་གྲུབ་དུ་མ་ལས་གདམས་ངག་རྒྱ་མཚོ་ལྟ་བུ་གསན་ཅིང་དེ་དག་ཏུ་དཀའ་ཐུབ་མཛད་པའི་ཚུལ་མང་། ཕུག་པོ་ཆེར་རྡོ་རྗེ་ཟམ་པ་ཞུས་ནས་བདུད་རྩིའི་དཀའ་ཐུབ་མཛད་པས་རིམས་ནད་ཀྱིས་བརྫི་མ་ནུས། གནུབས་ཤོད་པོ་ཆེའི་དྲུང་དུ་བླ་མའི་བྲན་གྱི་དཀའ་ཐུབ་བྱས་པ་གར་ཕྱིན་དུ་བླ་མའི་ཐུགས་ལ་འདོགས། དམ་པ་རྒྱ་གར་གྱི་དྲུང་དུ་རྟོག་དཔྱོད་ཀྱི་དཀའ་ཐུབ་མཛད་པས་ཐམས་ཅད་ལ་རང་བྱན་ཚུད། སྐྱིད་ལུང་དུ་ཕུར་པའི་བཟླས་པ་ལ་དཀའ་ཐུབ་བྱས་པས་འཇིག་རྟེན་ལྷ་འདྲེས་ཅི་སྨྲས་ཉན། ཇོ་བོ་བཀའ་གདམས་པའི་ས་རུ་ཞི་དུལ་གྱི་དཀའ་ཐུབ་བྱས་པས་གར་ཕྱིན་དུ་གཞན་གྱིས་བྱམས། ཡི་གེ་བཞི་ལ་མི་སྡོད་པ་གསུམ་གྱི་དཀའ་ཐུབ་བྱས་པས་བདེ་དྲོད་འབར་ནས་གཙང་དུ་གཅེར་བུ་ལོ་ལྔ་བྱས། དེ་ལ་ངེས་ཤེས་སྐྱེས་ནས་ཕག་མོ་མངོན་འབྱུང་ལ་སྒྲུབ་པའི་དཀའ་ཐུབ་བྱས་པས་མགུར་མོའི་ནུབ་ཕྱོགས་སུ་རྗེ་བཙུན་མའི་ཞལ་གཟིགས། བརྡ་མང་པོ་གནང་། གནུབས་ཡུལ་རོང་དུ་རྨི་ལམ་སྦྱངས་པས་སྣང་བ་ཐམས་ཅད་རྨི་ལམ་དུ་ཤེས། གཞོ་སྟོད་ཏི་སྒྲོའི་ཤེལ་ཕུག་ཏུ་ཁྲོ་བོ་བདུད་རྩི་འཁྱིལ་པའི་ཞལ་མཐོང་ནས་མི་མ་ཡིན་གྱིས་བསྙེན་བཀུར་ཆེར་བྱས། ལྷ་ཟུར་དུ་བཅུད་ལེན་གྱི་སྒྲུབ་པ་བྱས་པས་ཚེ་དཔག་མེད་ཀྱི་ཞལ་མཐོང་། ཆོས་མང་པོའི་རྣམ་བཞག་རྒྱུད་ལ་ཤར། ཨོ་དཀར་བྲག་ཏུ་སྒྲུབ་པ་མཛད་པས་བདེ་མཆོག་ཡབ་ཡུམ་ཞལ་གཟིགས། ལན་གཅིག་འགྲོ་འདོད་པ་ཞིག་བྱུང་ནས་མོན་མགར་གྲོང་མོ་ཆེའི་མདུན་དུ་བྱོན་ནས། ཆུའི་རྫིང་བུ་ཞིག་ལ་ཐུབ་ཚོད་དུ་མཆོངས་པས་འཁྱགས་ཆག་ནས་ཆུར་བྱིང་། སྐྱེངས་པའི་རྣམ་རྟོག་ཞིག་ཤར་ཙ་ན་ཆུ་ལ་རླངས་པ་ནམ་མཁའ་མི་མཐོང་བ་ཙམ་བྱུང་། མི་རྣམས་ངོ་མཚར་སྐྱེས་ནས་ལྕགས་བསྲེགས་ཆུ་ལ་བཙུད་པ་འདྲ་བྱུང་ཟེར། རང་ལ་འཁྱགས་པའི་རྣམ་པ་ནི་བྱུང་གསུངས། ཨ་ཙ་ར་སྟག་ཤམས་ཅན་སོགས་རྣལ་འབྱོར་གྱི་དབང་པོ་ཤ་སྟག་དང་འགྲོགས་ཤིང་སྣང་བ་ལ་ཐོག་རྫིས་ཤིན་ཏུ་ཆེ་བས། དགུན་འཁྱགས་པའི་རུམ། དབྱར་ཆུ་བོའི་གཞུང་། མ་ངེས་པའི་གཡང་རོང་ཟབ་མོར་མཆོང་བ་དང་མགོ་བརྡེབ་པ། མཚོན་བརྡེགས་སོགས་སྤྱོད་པ་ཚན་པོ་ཆེ་མ་བྱས་པ་མེད་པས་དཔའ་བོ་འཛེངས་ཆུང་བར་གྲགས། སོ་མང་བཙན་ལ་ཕྱག་རྒྱ་ཆེན་པོ་བཏབ་པས་འཕྲུལ་སྣང་ཡེ་ཤེས་སུ་གནས་འགྱུར། རི་ཁྲོད་རླུང་ཆུང་པ་དང་དངུལ་མོ་རྒྱ་ལེ་ལྕམ་ལ་ཡི་གེ་བཞི་པ་དང་རྫོགས་ཆེན་བཏབ་པས་འཁྲུལ་ཞིག་ཆེན་པོར་གྱུར་ཏེ་མཐར་ཕུང་པོ་ལྷག་མེད་དུ་དེངས། མ་ཇོ་དད་པ་ཅན་དང་། ཁམས་པ་སྙིང་རུས་ཅན་ཞིག་ལ་རྡོ་རྗེ་ཟམ་པ་བསྟན་པས་ནམ་མཁའ་དང་མཁའ་འགྲོའི་འཆི་ལུགས་ཀྱིས་ཕུང་པོ་ལྷག་མེད་དུ་སོང་། རས་པ་སྒོམ་སྟག ཤོ་རས། རྒྱ་རས། རླུང་རས་སོགས་ལ་གདམས་པ་བཏབ་པ་ཙམ་གྱིས་བདེ་དྲོད་འབར། དེ་བཞིན་དུ་ཆོས་ཉིད་བསྟན་པ་ཙམ་གྱིས་རྟོགས་གྲོལ་དུ་སོང་བ་ཤིན་ཏུ་མང་། རྫུ་འཕྲུལ་གྱི་བཀོད་པ་རྒྱ་མཚོ་ལྟ་བུ་ལ་དབང་འབྱོར་བས་རེས་སྐུ་ལུས་འཇའ་རུ་འཁྱིལ། སྣང་སེམས་རོ་གཅིག་ཏུ་འདྲེས་པས་བྲག་གཡང་ལ་བྱ་ལྟར་ལྡིང་བ་དང་། ཐག་རིང་པོའི་ས་ཡང་ཡུད་ཙམ་ལ་འཁོར་ཞིང་རེས་ཞབས་ས་ལ་མི་རེག་པར་གཤེགས། གཞན་གྱི་སེམས་ཤེས་པ་སོགས་མངོན་པར་ཤེས་པ་ཐོགས་མེད་དུ་མངའ་བས་མ་འོངས་པ་ཐམས་ཅད་ལུང་དུ་སྟོན་པས་མཚོན་ངོ་མཚར་བའི་རྣམ་ཐར་བསམ་གྱིས་མི་ཁྱབ་ཅིང་མན་ངག་རྡོ་རྗེ་ཟམ་པ་གཙོ་བོར་གྱུར་པའི་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་སྐལ་བ་དང་ལྡན་པའི་རེ་བ་ཡོངས་སུ་བསྐངས་པས། འཛེངས་ཇོ་སྲས། སློབ་དཔོན་ཀུན་བཟང་། ཉང་དྷརྨ་སེདྷ། གསེར་ལུང་པ། རུ་རྡོ་རྗེ་རྒྱལ་མཚན། གཟིག་ཡེ་ཤེས་དབང་པོ། གཡག་སྟོན་ཟླ་བ་འོད་ཟེར། སྐྱེ་ཚེ་ཡེ་ཤེས་དབང་ཕྱུག་སོགས་མཁས་པ་དང་གྲུབ་པའི་ཡོན་ཏན་གྱིས་མཐོ་ཞིང་བཤད་སྒྲུབ་གཉིས་ཀྱི་སྒོ་ནས་ངེས་གསང་སྙིང་པོའི་བསྟན་པའི་གསལ་བྱེད་ཆེན་པོར་གྱུར་པའི་ཞལ་སློབ་མང་པོ་བྱོན། རེ་ཞིག་ན་རྟོག་དཔྱོད་ལ་འཛིན་པ་དག་ནས་དགོངས་པ་ཟད་སར་འཁྱོལ་བའི་རྟགས་སུ་ངས་ལོ་མང་པོ་ལོན་ཏེ་ང་ལའང་ཏིག་པོ་བཤད་རྒྱུ་མེད་གསུངས། དེར་འཁོར་རྣམས་ཀྱིས་དགེ་རྩ་ཞིག་མཛད་པར་ཞུས་པས། འདུས་བྱས་ཀྱི་དགེ་རྩ་ལ་ཐུགས་མི་གཏོད་གསུངས། བཅུད་ལེན་ཞིག་མཛད་པར་ཞུས་པས་ཀྱང་། བཅུད་ལེན་བྱས་ན་ལོ་བཅུ་ཙམ་ཚེ་བསྲིང་ནུས་ཏེ་དུས་ངན་ལ་ཚེ་རིང་བས་དགོས་པ་མེད་གསུངས་ནས་དགུང་གྲངས་བརྒྱ་དང་བཅུ་བདུན་ལོན་པ་ས་ཕོ་བྱི་བའི་ལོ་ལ་སྐུ་གཤེགས། པུར་སྦྱངས་པས་ནམ་མཁའ་འཇས་གང་ཞིང་མཆོད་རྟེན་དང་རིང་བསྲེལ་ཡང་མང་དུ་བྱོན། འདི་ནི་ཚོགས་པ་བསྐྱངས་པས་སྙིགས་མ་འཇའ་ལུས་སུ་མ་དེངས་ཀྱང་ཀ་དག་ཆོས་ཟད་ཀྱི་རྒྱལ་སར་གཤེགས་པའི་རྟགས་མཐའ་དག་ཚང་བ་བྱུང་ངོ་། །

[༩] དེའི་སློབ་མ་འཛེངས་ཇོ་སྲས་ནི།

སྔགས་པའི་རིགས་ལས་བཙས་པས་ཆུང་ངུ་ནས་ཡིག་རྩིས་ལ་སྦྱངས། འོལ་ཁའི་ལྷ་བྲིས་པ་ལས་སྒྱུ་འཕྲུལ་ལ་སོགས་རྙིང་མ་དང་། དགྱེས་རྡོར་དང་མཚན་བརྗོད་སོགས་གསན། སློབ་དཔོན་ལྷ་བྲིས་པ་འདའ་ཁར་གཞུང་ཆེན་པོ་འདི་ཙམ་ཞིག་ཤེས་ཀྱང་འཆི་ཁར་ཕན་པ་ཨ་རོ་ཐུན་བདུན་ལས་མ་བྱུང་། ཁྱོད་རང་ཡང་མཚན་ཉིད་ཀྱི་གཞུང་ལ་མ་བསླབ་པར་གདམས་ངག་ལ་ནན་ཏན་གྱིས། དྭགས་པོ་ན་ཁྱེད་རང་གི་བླ་མ་འཛེངས་བྱ་བ་གཅིག་ཡོད་འདུག་པས་དེར་སོང་ཞེས་ལུང་བསྟན། གངས་བར་དུ་རྫོགས་ཆེན་ལྷུན་གྲུབ་མཁན་སློབ་དཔོན་ཟམ་གྱི་སར་དབྱར་དགུན་ཐོག་དྲུག་བཞུགས་ཀྱང་གདམས་ངག་གི་སྤྲོས་པ་མ་ཆོད་ནས་སློབ་དཔོན་འཛེངས་ལས་དཔལ་ལུང་དུ་རྡོ་རྗེ་ཟམ་པ་ཚར་གསུམ་ཞུས། བྱིན་རླབས་མཛད་ནས་ཁྱེད་རང་རེ་ཞིག་གཙང་དུ་སོང་ལ་གཞུང་སློབ། གཙང་ནས་འཁོར་ཙ་ན་དགོན་པ་གཅིག་ཏུ་སྡོད་གསུངས། དེར་གདམས་པ་མི་གནང་བར་དགོངས་ནས། གཞན་སུས་ཤེས་དྲིས་པས། གྲ་ཕྱིའི་ཇོ་སྲས་ཞང་ལ་སྐྱབས་བྱ་བས་ཤེས་གསུངས། དེ་ལས་ཞུ་བར་སེམས་ཙ་ན་ཁོང་གྲོངས། ཡང་དྭགས་པོ་རང་དུ་ལོག་ནས་འཛེངས་ལ་ཞུས་ཀྱང་མ་གནང་། སློབ་མ་གཅིག་ལས་ཞུ་བསམ་ནས། ཤོ་སྐྱམ་དུ་སློབ་དཔོན་དུའི་སྤྱན་སྔར་ཕྱིན་ཙ་ན་དྭགས་པོར་སོང་ལ་ཞུས་གསུངས། ཡང་དྭགས་པོར་བྱོན་ནས་ཞུས་པས། ཅིས་ཀྱང་འདོད་ན་གདམས་པ་ལ་ནན་ཏན་བྱེད་དགོས་པ་ཡིན་གསུངས་ནས་རྫོགས་པར་གནང་། ལོ་དྲུག་ཙམ་ནས་གདམས་ངག་ཕྲན་ཚེགས་དང་བཅས་པ་ཐམས་ཅད་ཡོངས་སུ་རྫོགས་པ་བྱུང་། ཐོད་པའི་བླ་མ་རོག་བོ་དགའ་དང་མ་ཇོ་བཟློ་བ་ལ་སོགས་པ་ལྔ་བཅུ་ཙམ་གྱིས་སློབ་དཔོན་ལ་རྡོ་རྗེ་ཟམ་པ་གསུང་བར་ཞུས་པས། ཇོ་སྲས་ཀྱིས་ཤོད། ཁྱེད་ཚོས་ཉོན་གསུངས་ནས་གདམས་ངག་གི་བཀའ་ཕོག་པའི་བརྒྱུད་འཛིན་དུ་བསྐོས་སོ། །

[༡༠] དེའི་སློབ་མ་ཀུན་བཟང་རྡོ་རྗེ་ནི།

ཡབ་དབུས་པ་ཕག་མོ་གྲུབ་པའི་སློབ་མ་རྟོགས་པ་མཆོག་ལྡན་གྱི་སྒོམ་ཆེན་ཞིག་པོ་ཞིག་དང་། ཡུམ་ཟི་བཟའ་དེས་ཆོག་བྱ་བ་མ་ཇོ་སྨྱོན་མ་བསམ་འགྲུབ་བྱ་བ་ལས་ཆོས་ཐོས་པ་དེ་གཉིས་ཀའི་སྲས་སུ་རྨི་ལམ་གྱི་ལྟས་བཟང་པོ་དང་བཅས་སྐུ་འཁྲུངས། དགུང་ལོ་བརྒྱད་དགུ་ལ་སློབ་དཔོན་ཀོར་སྟོན་རཱ་ཛ་ལས་སློབ་གཉེར་ཅུང་ཟད་བྱས། བཅོ་ལྔ་ལོན་པའི་ཚེ་ཁོང་གྲོངས་ནས་སློབ་དཔོན་དུ་བའི་གམ་དུ་ལོ་ལྔ་ཙམ་ཞི་བྱེད་གསན་ཞིང་བསྡད་ནས་ཞབས་ཏོག་འགྲུབ་ཚད་བྱས། གསེར་ལུང་དགོན་པར་སློབ་དཔོན་དུ་བ་དང་མཇལ་བའི་ཚེ་བཅོ་ལྔའི་ཟླ་བའི་རུམ་ན་སྐར་མ་གཉིས་ཐིམ་པ་རྨིས། འཛེངས་ཆེན་པོ་དྷརྨ་བོ་དྷི་ལས་རྡོ་རྗེ་ཟམ་པ་ཚར་གཅིག་ཞུས། དེ་རྗེས་འཛེངས་ཇོ་སྲས་སྤུང་རིང་དུ་སྤྱན་དྲངས་ནས་རྡོ་རྗེ་ཟམ་པ་ཚར་བདུན་ཞུས། དྭགས་པོར་དགུན་ཐོག་བཞི་ཕྱིན། རྡོ་རྗེ་ཟམ་པ་ཚར་ཕྱེད་པ་གཅིག་དང་བཅུ་བཞི་ཐོབ། ཇོ་སྲས་དང་ལོ་བརྒྱད་འགྲོགས་ནས་རྡོ་རྗེ་ཟམ་པ་ཚར་བདུན་ཞུས། ཕྱི་ནས་ཤོ་རུ་ཚར་གཉིས། གསེར་ལུང་དུ་ཚར་གཅིག གཞན་ལ་གསུང་འཕྲོར་མཇལ་བ་དང་དྲིལ་བས་འཛེང་མེས་དབོན་གཉིས་ལས་རྡོ་རྗེ་ཟམ་པ་ཚར་སུམ་ཅུ་རྩ་ལྔ་ཐོབ། གཉིས་ཀའི་གདམས་པ་བཀའ་བབ་ནས་གཞུང་བཤད་ཆེ་ཆུང་གཉིས་ཀྱང་མཛད་དོ། །

འདི་ལས་སྲས་སྤྲུལ་སྐུ་འོད་འབར་སེང་གེ་བྱ་བ་བྱུང་། དེ་ནི་བློ་རྣོ་བ། ཤེས་རབ་ཕུན་སུམ་ཚོགས་པ་ཞིག་སྟེ། ལོ་བཅུ་བཞི་པ་ལ་རྡོ་རྗེ་ཟམ་པ་གསུངས། དེས་བརྒྱུད་འཛིན་ཇོ་མགོན་ལ་གནང་། དེས་བྱར་མེད་ཚུལ་ཁྲིམས་རིན་ཆེན་ལ་གནང་ངོ་། །ཡང་འཛེངས་གིས་ཡར་ཀླུངས་བཙན་ཐང་པ་ཉང་དྷརྨཱ་སིདྷ་ལ་རྡོ་རྗེ་ཟམ་པ་བཤད་པས་བྱིན་རླབས་ཞུགས། རྟོགས་པ་ཐོད་རྒལ་དུ་སྐྱེས། དུར་ཁྲོད་དགོན་པར་བཞུགས་ཏེ་འགྲོ་དོན་རྒྱ་ཆེན་པོ་མཛད་དེ། མཐར་དགུང་ལོ་དོན་བདུན་པ་ལ་གཤེགས། འདི་ནས་བརྒྱུད་པའི་གཞུང་བཤད་ཀྱང་ཡོད་དོ། །དེའི་སློབ་མ་བཛྲ་པཱ་ཎི། དེའི་སློབ་མ་བླ་མ་ལྷའོ། །ཡང་འཛེངས་ཀྱིས་གསེར་ལུང་པ་ལ་བཤད། དེའི་སློབ་དཔོན་རང་གྲོལ། དེས་སྲས་པོ་ཆོས་རིན་ལ་བཤད་དོ། །ཡང་འཛེངས་ཀྱིས་དུས་རྡོ་རྗེ་རྒྱལ་མཚན་ལ་བཤད། དེས་དུ་སྟོན་དད་པ་བརྩོན་འགྲུས། དེའི་སློབ་མ་ཞིག་གིས་བྱས་པའི་གཞུང་བཤད་ཀྱང་ཡོད། ཡང་འཛེངས་ཀྱིས་གཟིག་ཡེ་ཤེས་དབང་པོ། དེས་མཁན་པོ་ལ་ཁ་བ། དེས་སློབ་དཔོན་མགོན་སྐྱབས། དེས་སློབ་དཔོན་གོ་རི་བ། དེས་སོ་སྟོན་ལ་བཤད་དེ་སོ་སྟོན་གྱི་གཞུང་བཤད་ཀྱང་སྣང་ངོ་། །ཡང་འཛེངས་ཀྱིས་སྤུང་རིང་པ་གཡག་སྟོན་ཟླ་བ་འོད་ཟེར། དེ་ཀློག་སྟོན་དགེ་འདུན་སྐྱབས། འདི་ནས་བརྒྱུད་པའི་གཞུང་བཤད་ཀྱང་ཡོད། ཡང་སྤུང་རིང་གཡག་སྟོན་གྱིས་ལོ་བརྒྱ་ལ་ཉེ་བ་ཐུབ། དེས་འོན་ནག་སྟོད་པ་གླ་རུ་བན་དེ་ལ་བཤད་ནས་ཀྱང་དར། ཡང་འཛེངས་ཀྱིས་སྐྱེ་ཚེ་ཡེ་ཤེས་དབང་ཕྱུག་ལ་བཤད། དེས་གཟིག་ཡེ་ཤེས་དབང་པོ། དེས་མཁན་ཆེན་ངུར་པ། དེས་དུ་སྟོན་བཛྲ་ཤྭ་ར། དེས་མཁན་ཆེན་བསོད་ནམས་རྒྱལ་མཚན། དེས་མཁན་ཆེན་གཞོན་ནུ་ཤེས་རབ། དེས་སློབ་དཔོན་གཞོན་ནུ་གྲགས་པ། དེས་མཁན་ཆེན་སངས་རྒྱས་བཟང་པོ། དེས་བླ་མ་བརྩོན་འགྲུས་དབང་ཕྱུག དེས་མཐའ་བཞི་གྲགས་པ་རིན་ཆེན། དེས་སློབ་དཔོན་ཤཱཀྱ་རྒྱལ་པོ། འདི་སྐུ་གཞོན་ནུའི་ཚེ་ཁྲབ་ལ་ཁར་རབ་ཏུ་བྱུང་། ལོ་དུས་ལ་བསྙེན་པར་རྫོགས། མཛོད་དང་འདུལ་བ་ལ་བྱང་བས་སྐྱོར་ལུང་དུ་གྲྭ་སྐོར་མཛད། ཐུགས་དམ་འཕེལ་བར་བཞུགས་པ་ལ། སྐུ་ན་ཧ་ཅང་མཐོ་བས་སྤྱན་མི་གསལ་ཡང་གཞན་གྱིས་སྤྱན་ཚབས་བྱས་ཏེ་རྗེས་སུ་བརྗོད་ནས་གསུངས་པ་སོགས་ཐུགས་བསྐྱེད་ཤིན་ཏུ་ཆེ། དགུང་ལོ་བརྒྱར་ཉེ་བར་བཞུགས་ནས་གཤེགས་པའི་རྗེས་ཐུགས་ལས་རིང་བསྲེལ་ཟད་པ་མེད་པར་བྱོན་པ་བྱུང་། འདིས་འགོས་ལོ་གཞོན་ནུ་དཔལ་ལ་གསུངས། དེས་སྤྱན་སྔ་བ་ཆོས་ཀྱི་གྲགས་པ། དེས་ཤེལ་བྲག་པ་ཆོས་ཀྱི་བློ་གྲོས། དེས་ཁྱུང་ཚང་བ་བློ་གྲོས་དཔལ་ལྡན། དེས་དཔང་སྟོན་ཀརྨ་གུ་རུ་པ། དེས་དཔང་སྟོན་ཆོས་དབང་ལྷུན་གྲུབ། དེས་ཆོས་དབང་ཀུན་བཟང་། དེས་དཔང་སྟོན་ཀུན་བཟང་ཆོས་རྒྱལ། དེས་རིག་འཛིན་གཏེར་བདག་གླིང་པ་ནས། རྒྱལ་སྲས་རིན་ཆེན་རྣམ་རྒྱལ། ཁྲི་ཆེན་འགྱུར་མེད་པདྨ་བསྟན་འཛིན། ཨོ་རྒྱན་བསྟན་འཛིན་རྡོ་རྗེ། མཁན་ཆེན་རིག་འཛིན་བཟང་པོ་བཅས་ཆོས་རྗེ་སྨིན་པ་ཡབ་སྲས་རྣམས་དང་། དེ་ལས་མཁན་ཆེན་པདྨ་བཀྲ་ཤིས། རྒྱལ་སྲས་གཞན་ཕན་མཐའ་ཡས། མཁས་གྲུབ་པདྨ་བཛྲ། མཁན་ཆེན་ཨོ་རྒྱན་བསྟན་འཛིན་ནོར་བུ། མཁན་ཆེན་ཡོན་ཏན་རྒྱ་མཚོ། མཁན་ཀུན་བཟང་དཔལ་ལྡན། མཁས་མཆོག་ངག་དབང་ནོར་བུ། ཁྱབ་བདག་བླ་མ་ཐུབ་བསྟན་ལུང་རྟོགས་བསྟན་པའི་རྒྱལ་མཚན་བཅས་གྲུབ་དབང་རྫོགས་ཆེན་པ་མཁན་རབས་སློབ་བརྒྱུད་དང་བཅས་ད་ལྟའི་བར་བརྒྱུད་པ་བར་མ་ཆད་པ་བྱོན་ཞིང་རྣམ་ཐར་གོང་འོག་གི་སྐབས་ཅི་རིགས་པ་ལས་འབྱུང་བ་ལ་གཟིགས་ཤིང་མཁྱེན་པར་ཞུ། །

༣༽ ཞར་བྱུང་འཕྲོས་དོན་གྱི་རྣམ་ཐར་གཞན་བཤད་པ།

གསུམ་པ་ཞར་བྱུང་འཕྲོས་དོན་གྱི་རྣམ་ཐར་གཞན་བཤད་པ་ནི། གངས་རིའི་ལྗོངས་འདིར་སྔ་འགྱུར་མདོ་སྒྱུ་སེམས་གསུམ་གྱི་བསྟན་པ་སྤེལ་བ་ལ་བཤད་སྒྲུབ་ཀྱི་ཕྲིན་ལས་ཟླ་དང་བྲལ་བ་ཀུན་གཟིགས་རོང་ཟོམ་མ་ཧཱ་པཎྜི་ཏ་དང་ཡུལ་མངའ་རིས་ཀྱི་པཎྜི་ཏ་ཆེན་པོ་པདྨ་དབང་རྒྱལ་རྣམ་གཉིས་ཀྱི་རྟོགས་པ་བརྗོད་པར་འདོད་དེ།

[༡] ཕུལ་དུ་བྱུང་བའི་པཎྜི་ཏ་ཆེན་པོ་ཀུན་མཁྱེན་རོང་ཟོམ་ཆོས་ཀྱི་བཟང་པོ་ནི།

སློབ་དཔོན་པདྨ་འབྱུང་གནས་ཀྱི་དངོས་སློབ་ཚེ་ཡི་རིག་འཛིན་བརྙེས་པས་དགུང་ལོ་སུམ་བརྒྱའི་བར་འགྲོ་བའི་དོན་མཛད་པ་རོང་བན་དཔལ་གྱི་རིན་པོ་ཆེའི་སྲས། རོང་བན་རིན་ཆེན་ཚུལ་ཁྲིམས་ཞེས་དགུང་ལོ་ཕྱེད་དང་སུམ་བརྒྱའི་བར་བཞུགས་པའི་གྲུབ་ཐོབ་དེ་ཉིད་ཀྱིས་རྒྱུའི་དུས་ཀྱི་མངོན་བྱང་ལྔའི་ཆོ་ག་བྱས་པ་ལས། ཕྱོགས་ཀྱི་གླང་པོའི་ཤེས་རབ། དབྱིག་གཉེན་ཞབས་ཀྱི་ཐོས་པ། ཙན་དྲ་གོ་མིའི་བརྗོད་པ། ཆོས་ཀྱི་གྲགས་པའི་བརྒལ་བརྟག །སློབ་དཔོན་དཔའ་བོའི་རྩོམ་པ་སྟེ་ཕུན་སུམ་ཚོགས་པ་ལྔའི་ངོ་བོར་བྱང་ཆུབ་པའི་སྐྱེ་བའི་མྱུ་གུ་གཙང་སྨད་རུ་ལག་གི་སའི་ཆ་སྣར་ལུང་རོང་དུ་སྐྱེ་སྲིད་བཟུང་། སློབ་དཔོན་སྨྲྀ་ཏི་ཛྙཱ་ན་ཀིརྟི་དང་ཨ་ཙ་ཪྱ་ཕྲ་ལ་རིང་མོའི་སྐྱེ་བར་ཡང་ངོས་འཛིན། བྱིས་པའི་དུས་སུ་ཨ་ཙཪྱ་ཐམས་ཅད་ལ་དགྱེས་ཤིང་དེ་དག་དང་བརྡ་འཕྲོད་པས་ཝརྟའི་པུ་ཏི་ལ་བརྟགས་པ་ཙམ་གྱིས་མཁྱེན་པ་ལ་ཚེགས་མ་བྱུང་། སྐུ་གཞོན་ནུ་ནས་ལྷུན་གྱིས་གྲུབ་པའི་ཤེས་རབ་ཆེན་པོ་མངའ་བས་ཉང་སྨད་དུ་མགར་སྟོན་ཚུལ་ཁྲིམས་བཟང་པོ་ལས་གསན་སྦྱོང་མཛད། དེར་ཡབ་རྒྱགས་སྐྱེལ་དུ་བྱོན་པར་མཆེད་གྲོགས་དག་ན་རེ། ཁྱེད་ཀྱི་བུ་འདི་བློ་དྲེད། ཐོ་ཅོ་ཆེ་བས་ངེད་ཅག་ཀྱང་སུན་པར་བྱེད་ན་ད་རེས་ཕར་འཁྲིད་པ་ལེགས་ཟེར། ཡབ་ཀྱིས་སློབ་དཔོན་ལ་ཁོང་རྣམས་དེ་སྐད་གསུངས་པས་འཁྲིད་པར་བྱའམ་ཞུས་པར། མགར་སྟོན་ཆེན་པོས། དེ་སྐད་མ་ཟེར། ཆོས་ཐམས་ཅད་ཁོས་གོ་ནས་ཡོད་པ་ཡིན་གསུངས། ལོ་བཅུ་གཅིག་པ་ལ་མཚན་ཉིད་གསན། ཆོས་མཚམས་སུ་བྱིས་པའི་རྩེ་སར་ཡང་སློབ་དཔོན་གྱི་གསུངས་ཚད་ཤར་རེ་བཤད་ཤེས་པ་བྱུང་བས་ཐམས་ཅད་ངོ་མཚར་བར་གྱུར། ཆོས་ཁྲིད་ཐམས་ཅད་ཚར་རེ་གསན་པས་ཚིག་གཅིག་ཀྱང་མ་ནོར་བར་ཐུགས་སུ་ཆུད་པས་འཇམ་དཔལ་གྱི་སྤྲུལ་པར་གྲགས། དགུང་གྲངས་བཅུ་གསུམ་ལོན་པའི་དུས་ནས་ཀྱང་གསན་པ་རྫོགས་པ་དང་འདྲ་བར་ཐུགས་སུ་མ་ཆུད་པའི་ཆོས་ཤེས་བྱ་ལ་སྲིད་པར་མ་གྱུར་པས་ཐམས་ཅད་མཁྱེན་པའི་གནས་ལ་བདག་གིར་མཛད། ཉིད་ཀྱི་ཞལ་ནས་ཀྱང་། བདག་ཐོས་པ་ཆུང་བ་ཡང་མ་ཡིན་ཏེ། ཆོས་ཐམས་ཅད་མ་ཐོས་པ་མེད་དོ། །ཐོས་པ་ཆེ་བ་ཡང་མ་ཡིན་ཏེ། ཆོས་ཐམས་ཅད་ཚར་རེ་ལས་མ་ཐོས་སོ་གསུངས་སྐད། སྤྱིར་བླ་མ་མང་པོ་ལས་མདོ་སྔགས་སོ་སོའི་བརྒྱུད་པའི་ཆོས་བཀའ་གྲངས་མང་གསན་ཞིང་། ཁྱད་པར་སྔ་འགྱུར་རྡོ་རྗེ་ཐེག་པའི་ཆོས་སྐོར་ལས། སློབ་དཔོན་ཆེན་པོ་པདྨའི་གདམས་པ་རྣམས་ནི་སྣ་ནམ་རྡོ་རྗེ་བདུད་འཇོམས། མཁར་ཆེན་དཔལ་གྱི་དབང་ཕྱུག ། དོམ་ཨ་ཙ་ར་དཔལ་གྱི་མེ་ཏོག །སྒྲ་རྡོ་རྗེ་གཞོན་ནུ། ཞང་ཞང་ཡོན་ཏན་གྲགས། རོང་བན་ཡོན་ཏན། རོང་བན་ཚུལ་ཁྲིམས་རིན་པོ་ཆེའི་བར་དུ་བརྒྱུད་ནས་དེ་ལས་ཉིད་ཀྱིས་གསན། བཻ་རོ་ཙ་ནའི་མན་ངག་རྣམས། བཻ་རོས་གཡུ་སྒྲ། དེས་བླ་ཆེན་དགོངས་པ་རབ་གསལ། དེས་གྲུམ་ཤིང་གླག་ཅན། དེས་གནུབས་དཔའ་བརྟན། དེས་ཟི་བོན་སྟོན། དེས་ཀུན་མཁྱེན་རོང་ཟོམ་ལ་བཤད་དེ་སེམས་སྡེའི་བརྒྱུད་པ་གཅིག་གོ། །ཡང་ཀློང་ཐང་སྒྲོལ་མར་ཨ་རོ་ཡེ་ཤེས་འབྱུང་གནས་ཞེས་བྱ་བའི་གྲུབ་པའི་སྐྱེས་བུ་ཞིག་བྱུང་སྟེ། དེ་ལ་རྒྱ་གར་བདུན་བརྒྱུད་དང་། རྒྱའི་སློབ་དཔོན་བདུན་བརྒྱུད་ཀྱི་གདམས་པ་མངའ་ཞིང་།

དེས་ཅོག་རོ་ཟངས་དཀར་མཛོད་ཁུར་དང་། ཡ་ཟི་བོན་སྟོན། དེས་རོང་པ་ཆོས་བཟང་ལ་གནང་བ་ལ་རྫོགས་ཆེན་ཁམས་ལུགས་སུ་གྲགས། ཡང་བཱི་མ་ལས་ཉང་ཏིང་འཛིན་བཟང་པོ་ལ་གསུངས་པ་དང་། བཱི་མ་ལས་རྨ་རིན་ཆེན་མཆོག་དང་། གཉགས་ཛྙཱ་ན་ཀུ་མཱ་ར་ལ་གསུངས་པའི་མན་ངག་ཀྱང་། གཉིས་ཀས་ཁུ་བྱང་ཆུབ་འོད། ཁྱུང་པོ་དབྱིག་འོད་ལ་བརྒྱུད་ནས་རིམ་གྱིས་རོང་ཟོམ་ལ་བཀའ་བབ་པས་གསང་སྔགས་སྔ་འགྱུར་གྱི་བསྟན་པའི་ཆུ་འགོ་གཅིག་ཅེས་ཡོངས་སུ་གྲགས། སྐྱེས་བུ་ཆེན་པོ་འདི་ནི་ཤེས་རབ་མྱུར་ལ་ཟབ་པ། ཆོས་ཀྱི་ཚིག་དོན་ལ་ཐོགས་རྡུག་མེད་པར་འཇུག་པའི་སྤོབས་པའི་གཏེར་ཆེན་པོ་བརྒྱད་གྲོལ་བས་སྟོན་པ་དྲང་སྲོང་ཆེན་པོའི་གསུང་གི་གསང་བ་དང་རྗེས་སུ་མཐུན་པའི་བསྟན་བཅོས། དོན་བཟང་པོ། ཚིག་འབྲུ་བཟང་པོ། བརྗོད་པ་མ་འདྲེས་པ་ཤ་སྟག་འབྱུང་བ་སྟེ། སྐུ་གཞོན་ནུའི་ཚེ་མདོ་སྟོན་སེང་གེ་བྱ་བ་ལས་སྔ་འགྱུར་གསན་པའི་ཚེ་རེ་ཞིག་ན་མནལ་ལམ་དུ། གསང་བ་སྙིང་པོས་ཟན་བྱས། སངས་རྒྱས་མཉམ་སྦྱོར་གྱིས་ཚོད་མ་བྱས་ནས་གསོལ་གྱིན་འདུག་པ་རྨིས། དེ་སློབ་དཔོན་ལ་ཞུས་པས། ཤིན་ཏུ་ངོ་མཚར་ཆེ། ཆོས་དེ་ཁོང་དུ་ཆུད་པའི་རྟགས་ཡིན། ཁྱེད་ཀྱིས་འགྲེལ་པ་རེ་གྱིས་གསུངས། བླ་མའི་དགོངས་པ་རྫོགས་པར་བྱ་བའི་ཕྱིར་བསླབ་པ་རིན་པོ་ཆེ་གསུམ་ལ་བརྟེན་པའི་མན་ངག་གསུམ་མཛད་དེ། ལྷག་པ་ཚུལ་ཁྲིམས་ཀྱི་བསླབ་པའི་དོན་གྱི་ངེས་བརྗོད་དམ་ཚིག་མདོ་རྒྱས། ལྷག་པ་ཏིང་ངེ་འཛིན་གྱི་བསླབ་པ་སྟོན་པ་འགྲེལ་པ་ཚུལ་བཞི་ཡན་ལག་བཅོ་ལྔ་པ། ལྷག་པ་ཤེས་རབ་ཀྱི་བསླབ་པ་སྟོན་པ་རྫོགས་པ་ཆེན་པོའི་ལྟ་སྒོམ་མན་ངག་མཉམ་སྦྱོར་གྱི་འགྲེལ་པ། དེ་བཞིན་དུ་ངན་སོང་སྦྱོང་རྒྱུད། འཇིགས་བྱེད་ལ་སོགས་པའི་འགྲེལ་པ་དང་མན་ངག་མང་ངོ་། །དེ་དག་གི་ནང་ནས་ཀྱང་ཐེག་པ་ཆེན་པོའི་ཚུལ་ལ་འཇུག་པའི་བསྟན་བཅོས་དང་གསང་སྙིང་དཀོན་ཅོག་འགྲེལ་ལ་སོགས་པ་གཞུང་གཏིང་ཟབ་ལ་གོ་དོན་སློང་ཆེ་བ་འགྲན་ཟླ་བྲལ་བ་མང་པོ་དང་། དེ་བཞིན་ཚད་མའི་རིག་བྱེད་ཀྱི་བསྟན་བཅོས་དང་། དོན་དུ་འགྱུར་པའི་ཚིགས་བཅད་དང་། སྙན་ངག་གི་བསྟན་བཅོས། སྨྲ་སྒོ་ལ་སོགས་པའི་འགྲེལ་པ་བསྟན་བཅོས་མང་དུ་མཛད་པ་ནས་ཐ་ན་འཇིག་རྟེན་པའི་ཞིང་ལས་དང་། ཕྱུགས་སྐྱོང་བ་དང་། དཀར་ཤེ་ཇི་ལྟར་སྒྲུབ་པ་ཚུན་ཆད་ཀྱི་བསྟན་བཅོས་ཀྱང་མང་དུ་མཛད་པས་གསུང་འབུམ་གླེགས་བམ་བརྒྱ་ཕྲག་ལོངས་པར་གྲགས་ཀྱང་ཕལ་མོ་ཆེ་སྔར་གྱི་དུས་ནས་འཐོར་བརླག་ཏུ་ཕྱིན་པས་མི་བཞུགས་པར་གྱུར། ཕྱི་མའི་དུས་སུ་རྒྱལ་སྲས་གཞན་ཕན་མཐའ་ཡས་ཀྱིས་སྐུ་ཚེགས་ཆེན་པོས་དབུས་གཙང་གི་ཡུལ་རིས་ཀུན་ནས་འཚོལ་སྡུད་མཛད་ཀྱང་གླེགས་བམ་སྐུ་གསུམ་གྱི་གྲངས་ལྡན་ལས་མ་རྙེད། དེ་ཉིད་འཇམ་མགོན་བླ་མ་མི་ཕམ་རིན་པོ་ཆེས་ཞུས་དག་མཛད་དེ་སྐུ་ཞབས་གཉིས་པ་ཐུབ་དབང་བསྟན་པའི་ཉི་མས་རྫོགས་ཆེན་ཤྲཱི་སེང་ཆོས་གྲྭ་ཆེན་མོར་ཤིང་པར་དུ་བསྐྲུན་པའི་བཀའ་དྲིན་ལས་དེང་དུས་དཔེ་རྒྱུན་ཕྱོགས་ཀུན་ཁྱབ་པ་འདི་བྱུང་ངོ་། །བསྟན་བཅོས་རྩོམ་པ་ན་གླེགས་བམ་བསྡུ་ཞིང་གཟིགས་པ་སོགས་རྟོག་དཔྱོད་ཀྱི་སྒྲོ་འདོགས་མི་དགོས་ཤིང་མཁས་པར་གྲགས་པ་གང་གིས་ཀྱང་རྩོད་པའི་གནས་སྐབས་དང་བྲལ། རྗེ་འདིས་མཛད་པའི་གསང་སྔགས་ཀྱི་མན་ངག་རྣམས་ལ་ལུང་མ་ཐོབ་ཀྱང་ཡི་གེ་ལས་བྱུང་བ་བཞིན་ཁ་ཏོན་དུ་བྱས་པས་ཀྱང་བྱིན་རླབས་མ་བྱུང་བ་མེད་ཅེས་གྲགས། ཇོ་བོ་རྗེ་དཔལ་ལྡན་ཨ་ཏི་ཤས་བདག་ཉིད་ཆེན་པོ་འདི་མཇལ་པའི་ཚེ། ཞལ་ནས་རྒྱ་གར་གྱི་ཨ་ཙཪྱ་ནག་པོ་སྤྱོད་པ་དེ་ཉིད་ཚེ་འཕོས་པ་འདི་ཁོ་ན་ཡིན་ཏེ། ཁོ་བོས་འདི་དང་ཆོས་གཏམ་བྱ་བ་ག་ལ་ཐུབ་ཅེས་བསྔགས་བརྗོད་མཛད། སྤྱིར་གཏམ་དུའང་། འདུལ་བ་ཚུར་སྟོན་དབྱིག་གི་མཁས། །ཆོག་སྒྲིག་བཟངས་ཀྱི་ཡེ་གྲགས་མཁས། །སྒྲ་དང་ཚད་མ་རོང་པ་མཁས། །ཐམས་ཅད་འཛོམས་པ་ཆོས་གྲགས་རང་། །ཟེར་སྐད། དུས་དེའི་ཚེ་བོད་རུ་བཞིའི་མཁས་པ་ཐམས་ཅད་ཀྱིས་དང་པོར་རྩོད་པའི་བྱ་བ་ལ་ལྷགས་པ་སྟེ། ཡང་ཁྱེད་བླ་མ་དང་། མར་པ་དོ་པ། འུ་ཡུག་པ་མདའ་སྟོན། མདོའི་ཁྱུང་པོ་ཧཱུྃ་སྙིང་། སེ་ཁྲོམ་རྒྱ་མཚོ་འབར། མཚམས་སྟོན་གོ་ཆ། སྤང་ཀ་དར་ཆུང་དང་། འགོས་ལྷས་བཙས། རྒྱ་རྒྱལ་ཚུལ་ལ་སོགས་པའི་མཁས་པ་ཐམས་ཅད་ཀྱིས་བོད་དུ་སྐྱེས་པའི་གང་ཟག་ཞིག་གིས་བསྟན་བཅོས་འདི་ཙམ་རྩོམ་པ་ཞེས་དཔྱས་གདགས་སུན་འབྱིན་བསམ་ཏེ་སྐྱེས་བུ་ཆེན་པོ་དེའི་གམ་དུ་སོང་བ་ན། ལུང་གི་འཐད་པ་དང་། རིགས་པས་དཔྱད་བཟོད་པ་དང་། གཏན་ཚིགས་དང་བླ་མས་ཉེ་བར་བསྟན་པ་དང་མི་འགལ་ཞིང་། སྒྲ་སྐྱོན་དང་། དོན་སྐྱོན་ལ་སོགས་འགལ་ཟླའི་ཕྱོགས་ཐམས་ཅད་རྣམ་པར་སྤངས་པའི་མཁྱེན་རབ་ཀྱི་སྤོབས་པས་ཚར་བཅད་དེ་བསྟན་བཅོས་རེ་མཐོང་ཞིང་དེའི་དོན་ལ་རོ་མྱངས་པས་ཐམས་ཅད་ངོ་མཚར་སྐྱེས་ནས་བསྟི་སྟངས་དང་བླ་མར་མཛད་པ་ཤ་སྟག་ཡིན་ཞེས་གྲགས། དེ་བཞིན་གོ་རུབ་ལོ་ཙཱ་བ་དགེ་སློང་ཆོས་ཀྱི་ཤེས་རབ་ཅེས་བྱ་བ་ཐོས་པ་མང་བའི་ཚད་འཛིན་པ་དེ་ཉིད་ཀྱིས་ཀྱང་དང་པོར་དཔྱས་གདགས། བར་དུ་བླ་མ་རོང་པས་མཛད་པའི་ཐེག་པ་ཆེན་པོའི་ཚུལ་ལ་འཇུག་པའི་པོ་ཏི་གཟིགས་པས་གུས་པ་ཆེན་པོ་སྐྱེས། ཐ་མར་ཟང་ཟིང་མང་པོས་བསྙེན་བཀུར་ཏེ་རྗེས་སུ་གཟུང་བར་གསོལ་བ་བཏབ། འཇམ་དཔལ་གསང་བའི་རྒྱུད་ལ་སོགས་པའི་ཆོས་མང་དུ་གསན། གསང་རྒྱུད་ཀྱི་སྐབས་ན་པཎྜི་ཏ་ཆེན་པོའི་ཞལ་ནས། འོ་སྐོལ་ལ་རྒྱ་དཔེ་ཡོད་པར་གྱུར་ན་འདི་ལྟར་འགྲོ་བ་ཡིན་ཏེ། རྒྱ་དཔེ་མེད་པས་ད་ལྟ་བཅོས་སུ་མེད་གསུངས་པ་ལ། གོ་རུབ་ལོ་ཙཱ་བས་དེ་བློ་ལ་བཟུང་པ་ཕྱིས་སུ་ཇོ་བོ་ཀྲྀཥྞ་ཞེས་བྱ་བའི་པཎྜི་ཏ་ལས་རྒྱ་དཔེ་བྱུང་ནས་དེ་ལ་མཉན་པས། རོང་པ་པཎྜི་ཏའི་གསུང་བཞིན་བྱུང་ནས་ཤིན་ཏུ་མོས་པ་ཐོབ་པར་གྱུར་ཏེ། ཀྲྀཥྞ་པ་ལས་བྱུང་བའི་རྒྱ་དཔེ་གཅིག་རོང་པ་ཉིད་ལ་ཕུལ་ནས་སླར་ཡང་གསན་སྐད། དེ་བཞིན་དུ་མར་པ་ཆོས་ཀྱི་དབང་ཕྱུག་ལ་སོགས་པའི་ལོ་ཙཱ་བ་དང་། མཁས་པར་གྲགས་པའི་བློ་རྩལ་ཅན་མང་པོས་ཀྱང་ཞབས་ལ་བཏུད། རྒྱ་གར་གྱི་མཁན་པོ་མཉྫུ་ཤྲཱི་ལྦརྨ་དང་། མཉྫུཤྲི་ཛྙཱ་ན་དང་། ཨུ་པ་ཡ་ཤྲཱི་མི་ཏྲ་དང་། བུདྡྷ་ཨཱ་ཀ་ར་བྷ་དྲ་དང་། དེ་བཱ་གར་ཙནྟྲ་དང་། པར་མེ་ཤྭ་དང་། ཨ་མོ་གྷ་བཛྲ་ལ་སོགས་པ་པཎྜི་ཏ་མང་པོ་བསྟེན་ཅིང་དེ་དག་གི་ལོ་ཙཱ་བ་མཛད་དེ། རྡོ་རྗེ་འཇིགས་བྱེད་དང་། གཤིན་རྗེ་དགྲ་ནག་གི་རྒྱུད་དང་། འཇམ་དཔལ་གསང་ལྡན་དང་། བདེ་མཆོག་རྩ་རྒྱུད་ལ་སོགས་པ་མང་དུ་བསྒྱུར། འགྱུར་ཤིན་ཏུ་བཟང་བས་གསར་འགྱུར་གྱི་དཔེར་གླེང་། རྒྱ་གར་གྱི་པཎྜི་ཏ་ཀུན་ན་རེ། དྷརྨ་བྷ་དྲ་ཁྱོད་ཆོས་མང་པོ་རྩོམས་ལ་འགྲོ་བ་རྣམས་སྐྱོབས་རིགས། ཁྱོད་ཀྱི་ཡོན་ཏན་གཞན་ལྟ་ཞོག་སྒྲ་ཚད་ཀྱི་ལུགས་འདིའི་སུམ་ཆ་ཙམ་ལས་མི་ཤེས་པས་ཀྱང་རྒྱ་གར་ན་ཆོས་རྩོམ་པ་ཡིན་ན་ཁྱོད་ཅིའི་ཕྱིར་མི་རྩོམ་ཞེས་གསུངས་སྐད། དེ་ལྟ་བུའི་ཡོན་ཏན་ཕུན་སུམ་ཚོགས་པ་དང་ལྡན་ཡང་གཅོམ་བསྐྱུངས་ཤིང་ཁེངས་པ་སྙིལ་བ་ལྷུར་མཛད་དོ། །གྲུབ་པའི་རྣམ་ཐར་ལ་གཞལ་ན། བྲག་ཆེན་མེ་ལོང་ལྟ་བུའི་ངོས་ལའང་རྫུ་འཕྲུལ་གྱི་སྤྱོད་པས་གཤེགས་པ་དང་། བྲག་ལ་ཕུར་པ་འདེབས་པ་དང་། ནམ་མཁའ་ལ་འཕུར་བ་དང་། བོད་ཀྱི་ལྷ་འདྲེ་ཕལ་མོ་ཆེའི་གནས་དང་སྤྱོད་པ་ཐུགས་སུ་ཆུད་པའི་མངོན་པར་མཁྱེན་པ་མངའ་བ་སོགས་མང་། དེ་ལྟར་སྤྲུལ་པའི་སྐུར་རྩོད་པ་མེད་པའི་པཎྜི་ཏ་ཆེན་པོ་དེ་ལ་དུས་སྐབས་དེ་ཙམ་ན་བྱོན་པའི་མཁས་པ་ཐམས་ཅད་ཀྱིས་མངོན་པར་བསྟོད་ཅིང་སྤྱི་བོས་བཏུད་པར་གྱུར་ཅིང་དགུང་ལོ་བརྒྱ་དང་བཅུ་དགུ་བཞུགས་ཏེ་སྐུ་ལ་སྙུན་མེད་པའི་ངང་ནས་གཤེགས་པར་གྲགས། བོད་གངས་ཅན་གྱི་ལྗོངས་འདིར་འདི་དང་མཉམ་པའི་མཁས་པ་ནི་སུ་ཡང་མ་བྱུང་ཞེས་འགོས་ལོ་ཆེན་པོས་ཀྱང་བསྔགས་ཤིང་ཡོངས་སུ་གྲགས་སོ། །རྒྱུད་འཛིན་སྲས་བརྒྱུད་དང་སློབ་བརྒྱུད་གཉིས་ལས། དང་པོ་ནི། སྲས་གཟི་བརྗིད་འབར་དང་། འབུམ་འབར་གཉིས་ལས་སྲས་བརྒྱུད་ཡུན་རིང་པོའི་བར་བྱུང་བ་ཀུན་ཀྱང་རྡོ་རྗེ་ཕུར་པ་ལས་དངོས་གྲུབ་བརྙེས་པ་ཤ་སྟག་ཡིན། སློབ་བརྒྱུད་ནི། གོ་རུབ་ལོ་ཙཱ་བ་དང་། མར་པ་དོ་པ། འགོས་ལ་སོགས་པའི་ལོ་ཙཱ་བ་ཆེན་པོ་བཅུ་བདུན། གཡག་རྡོ་རྗེ་འཛིན་པ་སོགས་ཏེ་གྲུབ་ཐོབ་ཆེན་པོ་སུམ་ཅུ་རྩ་ལྔ། མ་གཅིག་ཞ་མའི་མིང་པོ་རྗེ་འཁུར་པུ་པ་ལ་སོགས་སྒོམ་ཆེན་རྣལ་འབྱོར་གྱི་དབང་པོ་བརྒྱ་དང་བརྒྱད་ཅུ། ཡོལ་ལྕགས་དགེ་བསྙེན་རྡོ་རྗེ་དབང་ཕྱུག་དང་། ཡང་ཁྱེད་བླ་མ་སོགས་གདུགས་ཐོགས་པ་ལྔ་བརྒྱ་བྱུང་བ་བཅས་ཀྱིས་གསང་ཆེན་སྔ་འགྱུར་གྱི་བསྟན་པ་རིན་པོ་ཆེ་བླ་ནས་བླར་འདེགས་པའི་མཛད་པ་བསྐྱངས་སོ། །

[༢] མཁས་དང་གྲུབ་པའི་དབང་ཕྱུག་ཡུལ་མངའ་རིས་ཀྱི་པཎྜི་ཏ་ཆེན་པོ་པདྨ་དབང་རྒྱལ་རྡོ་རྗེ་ནི།

ཆོས་རྒྱལ་ཁྲི་སྲོང་ལྡེའུ་བཙན་གྱི་ཐུགས་སྤྲུལ་རྒྱལ་སྲས་ལྷ་རྗེའི་སྐྱེ་བ་དགུ་པ་སྟེ། ཡབ་མར་པ་ལོ་ཙཱའི་སྐྱེ་བ་ལྷ་རིགས་གྲུབ་པའི་དབང་པོ་འཇམ་དབྱངས་རིན་ཆེན་རྒྱལ་མཚན་ཞེས་གྲུབ་པའི་དབང་ཕྱུག་ཐང་སྟོང་རྒྱལ་པོ་སོགས་མཁས་གྲུབ་ཀྱི་བླ་མ་མང་པོའི་ཞབས་ལ་གཏུགས་ཤིང་བཀའ་གཏེར་བསྟན་པ་རྒྱ་མཚོའི་མངའ་བདག་ཏུ་གྱུར་པ་དེ་དང་། ཡུམ་འབྲོ་ལྕམ་ཁྲོམ་པ་རྒྱན་གྱི་སྲས་སུ་རབ་བྱུང་བརྒྱད་པའི་མེ་མོ་ལུག་གི་ལོ་སྟེ་སྤྱི་ལོ་༡༤༨༦པར་ཡུལ་མངའ་རིས་གློ་བོ་མ་ཐང་གི་སའི་ཆར་སྐུ་བལྟམས། ཡབ་རྗེ་མཆོག་ནས་མཚན་པདྨ་དབང་རྒྱལ་དུ་བཏགས་ཤིང་དགུང་ལོ་བརྒྱད་པ་ལ་རྟེན་དགེ་བསྙེན་དུ་མཛད། ཡབ་ལས་བྱང་ཆུབ་ཏུ་སེམས་བསྐྱེད་པའི་སྡོམ་པས་རྒྱུད་སྦྱངས་པ་ནས། འཇམ་དཔལ་མཚན་བརྗོད། སྒྱུ་འཕྲུལ་ཞི་ཁྲོ། ཡང་དག་མེ་དགུ། སེམས་ཕྱོགས་ལ་སོགས་གསན་པ་རྒྱ་ཆེན་མཛད། བཅུ་གཅིག་པར་རྩ་རྒྱུད་གསང་སྙིང་། སློབ་དཔོན་སྒེག་པའི་རྡོ་རྗེའི་འགྲེལ་པ། གཡུང་ཊིཀ་ཁ་དམར་ཅན། སུམ་སྟོན་གྱི་ཊི་ཀ་ལ་སོགས་པ་ཕལ་ཆེར་ཟླ་བ་བདུན་གྱིས་ཁོང་དུ་ཆུད་པ་བྱུང་། ཁྱད་པར་དུ་མདོ་དབང་དང་། ཕུར་པ། སྒྲུབ་ཆེན་བཀའ་བརྒྱད་བཅས་ལ་ནན་ཏན་ཆེན་པོ་མཛད། དགོངས་འདུས་ལ་སོགས་པའི་མདོའི་གནས་ཀྱང་བྱང་བར་བྱས། བཅུ་གཉིས་པའི་ཚེ་མཁས་པ་མང་པོའི་དབུས་སུ་གཞུང་བསྒྱུར་གྱི་བཤད་པ་མཛད་པས་སྙན་པའི་གྲགས་པ་ཕྱོགས་སུ་རྒྱས། བླ་མ་གསང་བ་འདུས་པ་དང་། སྒྱུ་འཕྲུལ་ཞི་ཁྲོ། རྟ་མགྲིན་ལ་སོགས་པའི་བསྙེན་སྒྲུབ་མཐར་ཕྱིན། གྲུབ་པའི་རྟགས་མཚན་གྱི་ཐོག་མར་ཤྭ་ལོག་ཆེན་པོ་ཞིག་བྱུང་བ་ལ་ཕུར་པ་གདེངས་པ་ཙམ་གྱིས་ནམ་མཁའ་ཐོག་སོ་བདུན་ཙམ་གྱི་སར་འཁྱིལ་ཞིང་བཟློག །དེ་བཞིན་དུ་གཏོར་ཆེན་འཕངས་པའི་ཚེ་ས་སྟེང་ནས་ཁྲུ་གང་ཙམ་འཕགས་པ་བྱུང་། གྲུབ་པ་བརྙེས་པའི་རྣམ་ཐར་གཞན་ཡང་རྗེ་ཉིད་ཀྱི་གསུང་ལས། བྲག་དམར་གྱི་མཚོ་ལ་རོ་སྙོམས་བྱས། །སྨིན་ནག་ཆུ་ལ་རྡོག་པས་བརྫིས། །ལྷ་ལུང་གི་བྲག་ལ་བྱ་ལྟར་ལྡིང་། །བ་གམ་ཅན་བྲག་ལ་བྱི་ལྟར་འཛུལ། །མགོ་བོ་ཅན་བྲག་གི་ལོགས་ལ་རྒྱུགས། །གྲོགས་ཤེར་སེང་དང་ཤེར་དཔལ་རྒྱལ་བཟང་གསུམ། །བྱང་རྒྱལ་དང་བླ་མ་རིན་སེང་བ། །སྐྱེས་ཕོ་མོ་འགས་གྲུབ་ཐོབ་གྲུབ་ཐོབ་ཟེར། །དེར་གྲུབ་ཐོབ་ཀྱི་གོ་བ་ང་མི་ལེན། །ཆོས་ཉམས་བླངས་ཀྱི་ཉམས་སྣང་ཐོབ་ཙམ་ཡིན། །དོན་འཕོ་འགྱུར་བྲལ་བ་མ་རྟོགས་ན། །ལུས་སྒྱུ་མའི་ཆོ་འཕྲུལ་བྱ་བྱིས་སྟོན། །ཞེས་པའི་གསུང་བྱོན། དགུང་ལོ་བཅུ་བཞི་ནས་བཀའ་བརྒྱད་དང་མ་གཤིན་ལ་སོགས་པའི་སྒྲུབ་ཕྲིན་མང་དུ་བསླབས་ཤིང་བཟླས་སྒོམ་ཚད་མེད་མཛད། དེ་ནས་ལོ་བདུན་གྱི་བར་དུ་གཅོད་ཡུལ་དང་རོ་སྙོམས་མཛད། བྱེ་མ་དང་། ཆུ་རྡེལ། མེ་ཏོག་ལ་སོགས་པའི་བཅུད་ལེན་ཁོ་ནས་དཀའ་སྤྱད་ཡུན་རིང་མཛད། ཐེམ་སྤངས་ཀྱི་དམ་བཅའ་ལོ་གསུམ་དང་ངག་བཅད་ཀྱི་དམ་བཅའ་ལོ་གསུམ་སོགས་སུ་བཞུགས། ཤ་ཁྲག་གི་ཟས་ལ་ཤིན་ཏུ་སྡང་ཞིང་། སྨྱུང་གནས་དང་། གསོ་སྦྱོང་མང་དུ་མཛད་པས་སྤྱན་རས་གཟིགས་ཀྱིས་ཞལ་ལན་བདུན་དུ་གཟིགས། ལོ་གཅིག་ལ་བླ་མ་གསང་འདུས་ཀྱི་གདམས་ངག་ལ་ནན་ཏན་མཛད། བཅུ་བདུན་གྱི་ལོ་ལ་ཐུགས་ལ་དམ་བཅའ་བརྒྱད་མཛད་པ་སྟེ་། དགེ་འདུན་ལ་མཐོང་ཕྱག་བྱེད་པ་དང་། ཕ་ཡུལ་དུ་ཞག་བདུན་ལས་མི་བཞུགས་པ། དབེན་པ་འབའ་ཞིག་ལ་བློ་གཏད་པ་དང་། རྒྱལ་པོའི་སྒོ་ཁང་ལན་གསུམ་ལས་མི་འགྲིམ་པ་དང་། ཚོང་ཁེ་དང་གྲལ་འགོ་མི་འཛིན་པ། རོ་ཆོག་གི་དབུ་གཙོ་མི་བྱེད་པ་དང་། འཚོ་བ་བསོད་སྙོམས་ལ་བརྟེན་པ་དང་། སྒྲུབ་པ་དང་ཐོས་བསམ་འབའ་ཞིག་བྱེད་པ་རྣམས་སོ། །སློབ་དཔོན་ནོར་བསྟན་བཟང་པོ་ཡང་ཡང་དུ་བསྙེན་ནས་འདུལ་བ་དང་། མདོ་སྡེའི་སྐོར་དང་། ཇོ་བོ་བཀའ་གདམས། ནཱ་རོ་མཁའ་སྤྱོད་མ་བཅས་སྙན་བརྒྱུད་བསམ་མི་ཁྱབ་པ་ཞུས། སྐྱིད་གྲོང་དུ་འཕགས་པ་ཝ་ཏི་མཇལ་བས་གསུང་བྱོན། སྐུ་ཚེ་སྔ་མའི་སྔོན་གནས་མང་པོ་རྗེས་སུ་དྲན། དགུང་ལོ་བཅུ་དགུ་པར་ཕ་ཡུལ་དུ་ཡིག་དྲུག་གིས་འགྲོ་དོན་མཛད། ཉི་ཤུ་ལ་བྱམས་ཆོས་ལྔ། ཕར་ཕྱིན། ཚད་མ། དབུ་མ་རྩ་ཤེར། བཞི་བརྒྱ་པ་དང་། བསླབ་བཏུས། སྤྱོད་འཇུག་སོགས་གཞུང་ལུགས་ཆེན་པོ་བརྒྱ་ཕྲག་གཅིག་ཁོང་དུ་ཆུད་པས་མ་ཧཱ་པཎྜི་ཏ་ཞེས་པའི་མཚན་གྱི་ཅོད་པན་དཔྱངས། ཉེར་གཅིག་པ་ལ་འཇམ་དབྱངས་ཆོས་སྐྱོང་དང་སྡོམ་བརྩོན་ཚུལ་ཁྲིམས་དཔལ་ལས་གཤེད་དམར་ལ་སོགས་པའི་དབང་སྒྲུབ་གདམས་པ་གསན་ཞིང་བསྒྲུབས་པས་ཞག་བདུན་ན་གཤེད་དམར་དངོས་སུ་མཐོང་། ཉི་ཤུ་རྩ་གཉིས་པར་ཡབ་ཀྱི་དྲུང་དུ་སྔ་འགྱུར་བཀའ་གཏེར་ལ་ཞུན་ཐར་ལེགས་པར་བཅད་ནས་བཀའ་བརྒྱད་ཀྱི་སྒྲུབ་པ་མཛད་པས་བདུད་རྩི་ཁོལ་ཞིང་མར་མེ་ཆུང་ངུ་ཞིག་གིས་ཞག་གསུམ་ཐུབ་པར་གྲགས། དེའི་ཚེ་ཡབ་ཀྱི་གཟིགས་སྣང་ཉིད་ཀྱི་ཚིགས་སུ་བཅད་པ་ལས། བུ་ཁྱོད་ཚེ་ལ་བར་ཆད་མ་བྱུང་ན། །འཇིག་རྟེན་འདིར་ནི་ཆོས་ཀྱི་འཁོར་ལོས་སྒྱུར། །མདང་སུམ་དཀྱིལ་འཁོར་མཐའ་ལ་ཀུན་བསྐོར་ནས། །བླ་མ་ཟུར་ཆེན་རྔོག་སྟོན་ཆེན་པོ་དང་། །རྗེ་བཙུན་གྲགས་པ་འཕགས་པ་རིན་པོ་ཆེ། །ནམ་མཁའི་སྙིང་པོ་བསོད་ནམས་བླ་མ་དང་། །འགྲོ་མགོན་ཉང་རལ་རས་ཆུང་རྡོར་གྲགས་དང་། །རྒྱལ་སྲས་དབང་ཆེན་གློ་བོ་ཡབ་སྲས་དང་། །ཆག་ལོ་ཆོས་དཔལ་ཁྲོ་ཕུ་ལོ་ཙཱ་དང་། །ནག་ཚོ་ལོ་ཙཱ་ཀུན་མཁྱེན་མུས་སྲང་པ། །མཁས་གྲུབ་བསོད་བཟང་གྲུབ་ཆེན་དམར་ཞབས་དང་། །དམ་པ་སངས་རྒྱས་བཻ་རོ་བཱི་མ་ལ། །ཨོ་རྒྱན་ཡབ་ཡུམ་རྒྱལ་པོ་ཁྲི་སྲོང་དང་། །མ་གཅིག་ལབ་སྒྲོན་ཞང་ལོ་རས་ཆེན་པ། །ཁམས་པ་སྒ་ལོ་རྒྱ་གར་པཎ་ཆེན་རྣམས། །གཅིག་ལ་གཅིག་ལྟ་འཛུམ་ཞིང་བཞད་པ་ལ། །ཀུན་ཀྱང་ང་ནི་པདྨ་དབང་རྒྱལ་ཡིན། །སྨྲ་ཞིང་ཐམས་ཅད་ཁྱོད་ལ་ཐིམ་ནས་སོང་། །ཞེས་གསུངས། ཉེར་གསུམ་པ་ལ་གློ་བོ་ལོ་ཙཱ་བ་ལས་ལམ་འབྲས་ཚོགས་བཤད་དང་སློབ་བཤད་གཉིས་ཞིབ་གསན་མཛད། ཉེར་ལྔའི་དུས་བསམ་འགྲུབ་གླིང་དུ་གློ་བོ་མཁན་ཆེན་བསོད་ནམས་ལྷུན་གྲུབ་ཀྱིས་མཁན་པོ་དང་། ཆོས་རྗེ་དཀོན་མཆོག་སྐྱབས་ཀྱིས་ལས་སློབ་སོགས་དད་པའི་དགེ་སློང་ཉི་ཤུ་རྩ་ལྔ་དང་བཅས་པའི་དབུས་སུ་ཚིགས་གསུམ་གྱིས་བསྙེན་པར་རྫོགས་པའི་དངོས་པོར་བསྒྲུབས། ཉེར་དྲུག་པ་ལ་ཤེལ་གྱི་རི་བོ་འབྲུག་སྒྲ་ལ་སོགས་པའི་དབེན་གནས་སུ་ཆོས་གོས་གསུམ་དང་། གླེགས་བམ། མཁར་གསིལ། ལྷུང་བཟེད་ལས་གཞན་པའི་ཡོ་བྱད་ཐམས་ཅད་སྤངས་ཏེ་སྒོ་གཅིག་པའི་བརྟུལ་ཞུགས་བཟུང་ནས་དམ་པའི་ཆོས་འདུལ་བའི་ལག་ལེན་ཚུལ་བཞིན་བསྟར་བས་དུས་དེར་འདུལ་བ་འཛིན་པ་ཐམས་ཅད་ཀྱི་ཁྱུ་མཆོག་ཏུ་གྱུར། སླར་ལྗོངས་རྒྱུ་བའི་བརྟུལ་ཞུགས་ཀྱིས་མངའ་རིས་ཀྱི་གནས་རྟེན་རྣམས་ཀྱང་མཇལ་བཞིན་གློ་བོ་མཁན་ཆེན་གྱི་དྲུང་དུ་ཕེབས། རྗེ་དེ་ཉིད་ཀྱི་ཞལ་སྔ་ནས་དགྲ་གདོང་། འཇིགས་བྱེད། གཤེད་དམར། གསང་བ་འདུས་པ་ལ་སོགས་པ་མང་དུ་གསན། མཁན་པོ་དེ་དང་། གུ་གེ་པཎ་ཆེན་རྣམ་རྒྱལ་དཔལ་བཟང་། འཇམ་དབྱངས་བློ་གྲོས་དཔལ་མགོན་རྣམས་ལས་བརྟག་གཉིས་ཀྱི་བཤད་པ་དང་གསང་སྔགས་ཀྱི་དབང་དང་མན་ངག་མང་དུ་གསན། སྤུ་ཧྲང་དང་། ཏི་སེ་དང་། ཁོ་ཆར་ལ་སོགས་པའི་གནས་རྟེན་བསྐོར་ནས་སླར་གློ་བོར་བྱོན་གཏེར་སྟོན་ཤཱཀྱ་བཟང་པོ་ལས་བྱང་གཏེར་མང་དུ་གསན་པས་མཚོན། གསང་སྔགས་གསར་རྙིང་གི་དབང་རྒྱུད་མན་ངག་གི་རྒྱུན་བཞུགས་པ་ཕལ་ཆེར་འབད་པས་གསན་ཅིང་བསྙེན་སྒྲུབ་མཛད། བྱ་བཏང་སྒོ་གཅིག་པའི་བརྟུལ་ཞུགས་ཀྱིས་བལ་ཡུལ་འཕགས་པ་ཤིང་ཀུན་དང་། བྱ་རུང་ཁ་ཤོར། བལ་པོ་ཕམ་མཐིང་། ཡང་ལེ་ཤོད་ལ་སོགས་པའི་གནས་ཆེན་ཐམས་ཅད་དུ་གཤེགས་ཤིང་བལ་བོད་ཀྱི་བླ་མ་མང་པོ་བསྟེན་ནས། གནས་འབྲེལ་དང་ཐུགས་དམ་མཛད་པས་དག་པའི་སྣང་བ་མཐའ་ཡས་པ་ཤར་ཞིང་ཡི་དམ་དང་ཆོས་སྐྱོང་མང་པོས་ཞལ་གཟིགས། མཁའ་འགྲོ་མས་སློབ་དཔོན་ཨ་བྷྱ་ཀ་རའི་སྐྱེ་བར་ལུང་བསྟན། ལོ་ཆེན་དཀོན་མཆོག་སྐྱབས་ཀྱིས་རྡོ་རྗེ་ཕྲེང་བའི་དབང་ལ་དོགས་ཆ་མཛད་པས། མཚན་ལམ་ན་འཁོར་ལོ་སྡོམ་པའི་དཀྱིལ་འཁོར་གཙོ་བོ་པཎ་ཆེན་པདྨ་དབང་རྒྱལ་གྱིས་མཛད་ཅིང་འདུག་པའི་སྒོ་དྲུང་ནས་མཁའ་འགྲོ་མས་ཁོང་བཀག་ནས་མ་བཏང་བས་སླར་འགྱོད་དེ་གནང་། ཞར་ལ་ལམ་འབྲས་གསར་མའང་ཐོབ། དགུང་ལོ་སོ་བརྒྱད་པ་ནས་གསར་རྙིང་རིས་མེད་པའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་ནས་དབུས་གཙང་ཕྱོགས་ཀྱི་གསར་རྙིང་གི་ཆོས་རྒྱུན་ཉམས་པ་དག་གསོ་བའི་ཐུགས་བསྐྱེད། ཡབ་དང་གློ་བོའི་སྡེ་བདག་ཀུན་ལ་གནང་བ་ཞུས་ནས་གཅུང་ལེགས་ལྡན་དང་ལྷན་གཅིག་ཏུ་ཟང་ཟང་ལྷ་བྲག་སོགས་བརྒྱུད་ནས་རིམ་བཞིན་དབུས་སུ་བྱོན། ལྷ་སའི་གཙུག་ལག་ཁང་ཇོ་ཤཱཀ་རྣམ་གཉིས་ཀྱིས་གཙོས་པའི་རྟེན་བརྟེན་པ་རྣམས་མཇལ། རྔོག་ཆོས་དང་ཞི་བྱེད་ལ་ཐུགས་འདུན་དྲག་པོ་ཡོད་པས་རྗེ་བཙུན་སྒྲོལ་མ་དང་དཔལ་ལྷའི་སྤྲུལ་པས་སྐོར་ལམ་ནས་ལུང་བསྟན་ཐོབ། གཞུང་སྤྲེ་ཞིང་དུ་རྔོག་བསོད་ནམས་བསྟན་འཛིན་ལས་རྔོག་དཀྱིལ་དང་། གྲྭ་ཐང་དུ་ཞཱ་ལུ་ལོ་ཆེན་ཆོས་སྐྱོང་བཟང་པོ་ལས་གཤེད་དམར་སྐོར་སོགས་གསན། བསམ་ཡས་སུ་བྱོན་པས་སྔོན་བཙན་པོ་ཁྲི་སྲོང་ལྡེའུ་བཙན་གྱི་བག་ཆགས་དུ་མ་སད་ཅིང་བར་ཁང་དུ་བདེ་གཤེགས་འདུས་པའི་དཀྱིལ་འཁོར་བཞེངས་ནས་སྒྲུབ་མཆོད་དང་སྨོན་ལམ་མཛད། ལྷོ་བྲག་གུ་རུ་བ་དང་། ཀཿཐོག་པ་ཆོས་རྗེ་བསོད་ནམས་རྒྱལ་མཚན་སོགས་བཤེས་གཉེན་མང་དག་དང་ཆོས་སྐྱེས་འབུལ་རེས་མཛད། ཕྲེང་པོ་ཨོ་རྒྱན་ཆོས་རྫོང་དུ་ཀོང་ཆེན་ནམ་མཁའ་དཔལ་ལྡན་ལས་བླ་མ་དགོངས་འདུས་གསན། སྒྲགས་ཀྱི་ཡང་རྫོང་དང་མཆིམས་ཕུར་ཐུགས་དམ་མཛད་པས་རྩ་བ་གསུམ་གྱི་ལྷ་ཚོགས་མང་པོས་ཞལ་གཟིགས། ཆོས་དབང་གི་གདུང་རབས་བརྒྱད་པས་ལྷོ་བྲག་ཏུ་སྤྱན་དྲངས་ཤིང་རིམ་པར་མཁར་ཆུ་དང་། བསམ་གྲུབ་བདེ་ཆེན། ལྷ་བྲོ་དང་། སྨྲ་བོ་ཅོག །གྲོ་བོ་ལུང་ལ་སོགས་པར་བྱོན། མངའ་བདག་ཉང་ལ་ཨོ་རྒྱན་ཆེན་པོས་ལུང་བསྟན་པ་བཞིན། པཎ་ཆེན་འདིས་ཆོས་བརྒྱུད་ཉམས་པ་གསོ་བར་གསུངས་པའི་དུས་ལ་བབ་པ་དགོངས་ཏེ་རང་ལུགས་ཀྱི་བཤད་ཁྲིད་རྒྱ་ཆེན་པོ་མཛད། སྡིག་ཅན་འགའ་ཞིག་ལ་གནས་སྤོར་མཛད་པས་འཇའ་འོད་ཀྱིས་བར་སྣང་བཀང་། ཞྭ་སྟོད་དང་བཙན་གྲོ་སོགས་སུ་སྒྲུབ་ཆེན་བདེ་གཤེགས་འདུས་པའི་སྨན་སྒྲུབ་དང་སྐྱེ་བདུན་གྱིས་འགྲོ་དོན་མཛད། སྔོན་གྱི་སྨོན་ལམ་ལས་བདེ་གཤེགས་འདུས་པ་ལ་དོན་གཉེར་ཆེན་པོ་དང་ལྡན་པས་རང་གི་ཡབ་རྗེ་སོགས་ལས་བཀའ་བརྒྱད་བདེ་འདུས་ཚར་ཉི་ཤུ་རྩ་ལྔ་གསན། ཁྱད་པར་ལྷོ་བྲག་དགོན་དཀར་དུ་རི་བྲག་ལ་ཐོགས་པ་མེད་པར་གཤེགས་ནུས་པའི་རྗེ་རིགས་ནམ་མཁའི་རྣལ་འབྱོར་ལས་ཀྱང་གསན་པས། ཕྱི་མ་འདི་ཁུངས་བཙུན་ཞིང་ཡིད་རྟོན་པར་ནུས་པ་ཡིན་ཞེས་ཉིད་ཀྱིས་གསན་ཡིག་ཏུའང་བསྔགས་པ་ཆེན་པོ་མཛད་དེ་དགོངས་པ་མཐར་ཐུག་རྫོགས་པའི་གསུང་བྱོན། དེ་ནས་ཟབ་གཏེར་གྱིས་འགྲོ་དོན་སྐྱོང་ཚུལ་ཡང་དགུང་ལོ་ཞེ་དྲུག་པར་བསམ་ཡས་སྟེང་ཁང་ནས་རྣམ་སྣང་མི་བཞི་རྒྱབ་སྤྲོད་ཀྱི་གསང་སྒྲོམ་ནས་བཀའ་འདུས་ཕྱི་མ་རིག་འཛིན་ཡོངས་འདུས་ཀྱི་ཆོས་སྐོར་གསོལ་འདེབས་ལེའུ་བདུན་མའི་སྒྲུབ་ཐབས་གཏེར་ནས་བཞེས་ཤིང་ཕལ་ཆེར་གཏན་ལ་ཕབས་པ་ད་ལྟའང་དར་རྒྱས་ཆེ། གཅུང་རིག་འཛིན་ལེགས་ལྡན་རྡོ་རྗེས་མཚམས་སྦྱར་ནས་འབྲི་གུང་པ་རིན་ཆེན་ཕུན་ཚོགས་གདན་དྲངས་ཏེ་དཔོན་སློབ་གསུམ་ཀས་བསམ་ཡས་རབ་གནས་མཛད་པས་བོད་ཁམས་ཡུན་དུ་བདེ་བའི་རྟེན་འབྲེལ་བསྒྲིགས། འདི་ནས་བཟུང་ཆོས་རྒྱལ་རིན་ཆེན་ཕུན་ཚོགས་ཀྱང་ཐུགས་སྲས་ཀྱི་དམ་པར་གྱུར་པས་རྒྱལ་དབང་པདྨའི་རིང་ལུགས་ལ་ཕྲིན་ལས་རྒྱ་ཆེན་པོའི་འགྲོ་དོན་བྱུང་། རྗེ་འདིའི་ཞལ་སྔ་ནས་མཛད་པའི་ཚིག་ཉུང་ལ་དོན་འདུས་པའི་བསྟན་བཅོས་སྡོམ་གསུམ་རྣམ་ངེས་གཅིག་པུ་སྔ་འགྱུར་པ་རྣམས་ཀྱི་མགྲིན་པའི་རྒྱན་དུ་གྱུར་པས་མཚོན་བསྟན་པ་ལ་བཀའ་དྲིན་ཀྱང་བསམ་གྱིས་མི་ཁྱབ། མདོར་ན་རྗེ་འདི་མཁས་བཙུན་གྲུབ་པའི་རྣམ་ཐར་བསམ་གྱིས་མི་ཁྱབ་པས་གངས་རིའི་ལྗོངས་ན་ཕུལ་དུ་བྱུང་བའི་སྐྱེས་བུ་སྔ་འགྱུར་བཀའ་གཏེར་གྱི་བསྟན་པ་གསལ་བའི་ཤིང་རྟ་ཆེན་པོ་སྟེ། རིག་འཛིན་འཇིགས་མེད་གླིང་པའི་ཞལ་སྔ་ནས། སྤྱིར་སྐྱེས་བུ་འདི་ཉིད་ནི་གནས་ལྔ་རིག་པའི་པཎྜི་ཏ་ཆེན་པོ། མདོ་སྔགས་གསར་རྙིང་རིས་མེད་པའི་བསྟན་པ་ཡོངས་རྫོགས་ཀྱི་དགེ་བའི་བཤེས་གཉེན་ཆེན་པོ། བཞོན་པ་དང་འཇོལ་བེར་ལ་སོགས་པའི་ཆོས་བརྒྱད་ཡོངས་སུ་སྤངས་པས་ཤཱཀྱ་ཐུབ་པའི་རྗེས་ཞུགས་བསོད་སྙོམས་པ་ཆེན་པོ། ཞེན་ལོག་དང་དཀའ་སྤྱད་ཁུར་དུ་བཟོད་པས་བྱ་བཏང་རྣལ་འབྱོར་གྱི་དབང་པོ་ཆེན་པོ། རིག་པ་དང་གྲོལ་བའི་སྤོབས་པ་བསམ་གྱིས་མི་ཁྱབ་པའི་བྱང་ཆུབ་སེམས་དཔའི་དགེ་འདུན་ཆེན་པོ་ཞེས་ཆེད་དུ་བརྗོད་པའི་གསུང་གིས་ཡང་ཡང་བསྔགས་པ་མཛད་དོ། །དེ་ལྟར་བསྟན་འགྲོའི་དོན་མཐའ་ཡས་པ་མཛད་པའི་མཐར་དགུང་གྲངས་ང་དྲུག་པ་རབ་བྱུང་དགུ་པའི་ཆུ་སྟག་ལོར་འོན་སྨོན་ཐང་དུ་སྐུ་གཤེགས་སོ། །