བདེན་གཉིས་གཅིག་ཐ་དད་ལ་དཔྱད་པའི་སྒོ།
བདེན་གཉིས་གཅིག་ཐ་དད་ལ་དཔྱད་པའི་སྒོ་ནི།
ཀུན་རྫོབ་འཁོར་བ་དང་དོན་དམ་ཆོས་ཉིད་གཉིས་ཆོས་ཅན། ཐ་དད་ལས་གྲོལ་བ་ཡིན་པར་ཐལ། དེའི་ཕྱིར། འདོད་ན།ཀུན་རྫོབ་འཁོར་བ་དང་དོན་དམ་ཆོས་ཉིད་གཉིས་ཆོས་ཅན། ཐ་དད་ལས་གྲོལ་བ་མ་ཡིན་པར་ཐལ། ཐ་དད་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། ཐ་དད་ཡིན་པར་ཐལ།གཅིག་པ་བཀག་པའི་ཐ་དད་ཡིན་པའི་ཕྱིར། མ་ཁྱབ་ན། ཁྱབ་པ་ཡོད་པར་ཐལ། དེ་ལྟར་ཁྱབ་པ་དེ་ཡང་རྟོན་པ་བཞི་ལྡན་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱི་དགོངས་པ་ཡིན་པའི་ཕྱིར། མ་གྲུབ་ན། དེའི་དགོངས་པ་ཡིན་པར་ཐལ། དེ་ཉིད་ཀྱིས་མཛད་པའི་ཆོས་ཤན་འབྱེད་ལས། ཐ་དད་ཀྱང་ཡིན་པའི་ཕྱིར་ཏེ། ངོ་བོ་གཅིག་པ་བཀག་པའི་ཐ་དད་ཡིན་ཏེ།དེ་ཉིད་དང་གཞན་དུ་བརྗོད་དུ་མེད་པའི་ཐ་དད་དོ། །ཞེས་གསུངས་པའི་ཕྱིར། འདོད་ན།འོ་ན་བདེན་པ་གཉིས་ཆོས་ཅན། ཐ་དད་ཡིན་པར་ཐལ། འདོད་པའི་ཕྱིར། འདོད་ན། བདེན་པ་གཉིས་ཆོས་ཅན། ཐ་དད་མ་ཡིན་པར་ཐལ། གཅིག་དང་ཐ་དད་བྲལ་བའི་མཚན་ཉིད་ཅན་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ལྟར་ཡིན་པ་དེ་ཡང་སངས་རྒྱས་བཅོམ་ལྡན་འདས་ཀྱི་དགོངས་པ་ཡིན་པའི་ཕྱིར། མ་གྲུབ་ན། དེའི་དགོངས་པ་ཡིན་པར་ཐལ།དེ་ཉིད་ཀྱིས་མཛད་པའི་མདོ་སྡེ་དགོངས་པ་ངེས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དོ། །ཞེས་གསུངས་པའི་ཕྱིར། འདོད་ན། བདེན་པ་གཉིས་པོ་ཆོས་ཅན། ཐ་དད་མ་ཡིན་པར་ཐལ། འདོད་པའི་ཕྱིར། འདོད་ན།བདེན་པ་གཉིས་ཆོས་ཅན། ཐ་དད་ཡིན་པར་ཐལ། དེ་ལྟར་ཡིན་པ་དེ་ཡང་དོལ་པོ་བ་ཤེས་རབ་རྒྱལ་མཚན་གྱི་དགོངས་པ་ཡིན་པའི་ཕྱིར། མ་གྲུབ་ན། དགོངས་པ་ཡིན་པར་ཐལ། དེ་ཉིད་ཀྱིས་མཛད་པའི་བཀའ་བསྡུ་བཞི་བ་ལས། ཐ་དད་གཏན་ནས་མེད་པ་མ་ཡིན་ཏེ། །ངོ་བོ་གཅིག་པ་བཀག་པའི་ཐ་དད་དོ། །ཞེས་གསུངས་པའི་ཕྱིར། དེ་ལྟར་དཔྱད་པར་བྱའོ། །