མཛེ་ནད་ཀྱི་མཚན་ཉིད་ཅེས་བྱ་བ།
སློབ་དཔོན་ཛཱ་བ་རི་པ།
རྒྱ་གར་སྐད་དུ། ཙི་ཏི་ཛྭ་ལ་ལཀྵ་ཎ་ནཱ་མ། བོད་སྐད་དུ། མཛེ་ནད་ཀྱི་མཚན་ཉིད་ཅེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །འགྲོ་རྣམས་རྡུལ་དང་མུན་པ་སྙིང་སྟོབས་ཀྱི། །འདམ་ལ་གནས་ཏེ་རྐྱེན་གྱི་རི་བོས་ནོན། །དེ་བསལ་ཤེས་ཕྱིར་རང་གི་རྟོགས་པས་བྲི། །དམ་པའི་དྲིན་ཐོབ་མགོན་ལ་སྤྱི་བཏུད་བཤད། །དེ་ལ་འདིར་ནད་ཀྱི་མཚན་ཉིད་དང༌། བཟླས་པའི་མཚན་ཉིད་དང༌། དེ་བཟློག་པའི་ཐབས་སོ། །དེ་ལ་མཚན་ཉིད་ལ་བཅུ་གཉིས་སུ་ཤེས་པར་བྱ་སྟེ། གལ་ཏེ་བཅུ་གཉིས་ཀྱི་ས་མ་བཟློག་ན་དེ་འཕྲོ་བཅད་དོ། །འབད་པ་དང་བཅས་པས་ཚོགས་བསག་གོ ། ཐབས་ནི་འདོད་པའི་ལྷ་མཉེས་པས་བཟློག་པ་དང༌། རྟེན་ཅིང་འབྲེལ་པའི་ནུས་པས་བཟློག་པའོ། །འདོད་པའི་ལྷ་མཉེས་པས་བཟློག་པ་ནི་སྒྲུབ་ཐབས་ལས་ཤེས་པར་བྱའོ། །རྟེན་ཅིང་འབྲེལ་བའི་ནུས་པས་བཟློག་པ་ནི་བླ་མའི་མན་ངག་ལས་ཤེས་པར་བྱའོ། །མཚན་ཉིད་རྣམས་ནི་འདི་ལྟ་སྟེ། །རུས་དང་ཤ་དང་པགས་པ་དང༌། །རྩ་དང་ཁྲག་དང་ནང་གྲོལ་དང༌། །བཅུད་དང་ཆུ་སྟེ་ལུས་ཀྱི་སྟོབས། །ལུས་ཀྱི་རྩ་དང་མདོག་དང་དབྱིབས། །རེག་པ་ཆུ་བ་ཆུ་སེར་དང༌། །ཀླད་པ་ལྷ་བ་ལུས་ཀུན་ལ། །ཞུགས་པ་རྣམ་པ་བཅོ་བརྒྱད་ཡིན། །རིགས་ཀྱིས་
མ་ཡིན་གཅིག་ཅིག་མིན། །འོན་ཀྱང་གཅིག་སོགས་རིམ་གྱིས་བརྟག །རུས་པ་ལ་ཞུགས་པ་ནི་བཞི་སྟེ། ལུས་སྐེམ་པ་དང༌། གཟེར་ཆེ་བ་དང༌། ན་ཐང་དེ་བ་དང༌། ཐིག་ལེར་ནའོ། །ཤ་ལ་ཞུགས་པ་ནི་ལྔ་སྟེ། ལུས་བེམ་མེ་འདུག་པ་དང༌། ལུས་ལྕི་བ་དང༌། མདོག་གནག་པ་དང། དྲིངས་པ་སྣར་འོང་པ་དང༌། ཤ་རོ་འབྱུང་བའོ། །པགས་པ་ལ་ཞུགས་པ་ནི་གཉིས་ཏེ། ཤ་འཕྲིག་པ་དང༌། མདོག་སྐྱ་བའོ། །རྩ་ལ་ཞུགས་པ་ནི་བཅུ་སྟེ། ལུས་སྦྲིད་བེར་བེར་བ་བརྟག་པ་ནི་བཟློག་པར་དཀའོ། །སྒྱིད་ལུག་པ་དང༌། སྒྱིད་ལྕིག་ལྕིག་པ་དང༌། ཚ་བ་འཛག་པ་སྙམ་པ་དང༌། ཚ་རབ་རབ་བ་དང༌། ཚ་ཀེར་ཀེར་བ་དང༌། ཚ་བྲེང་བྲེང་བ་དང༌། ལུས་ལ་སོགས་པ་ཚ་ཐང་དེབ་དང༌། ཚ་བིར་བིར་བ་དང༌། ཡན་ལག་ཕྲ་བའོ། །ཁྲག་ལ་ཞུགས་པ་ནི་བཞི་སྟེ། སྣ་ནས་སྐབས་སྐབས་སུ་ཡང་ཡང་འཛག་པ་དང༌། ཚ་བེར་བེར་བ་དང། ལུས་ལྕི་ཡོར་ཡོར་བ་དང༌། གདོང་དམར་བ་ལ་སྟག་པའི་ལོ་མའི་བྲིས་མ་ལྟར་འོད་ངོ༌། །ནང་གྲོལ་ལ་ཞུགས་པ་ནི་བཞི་སྟེ། གློ་སྙིང་མི་བདེ་བ་དང༌། སྐྱུར་ཐིབ་ཐིབ་པ་དང༌། སྙིང་འདར་ཕྲིལ་ཕྲིལ་དང༌། སྙིང་མི་དགའ་བ་སྟེ་བཟློག་དཀའོ། །བཅུད་ལ་ཞུགས་པ་ནི་བཞི་སྟེ། །ཁུ་བ་མི་འབྱུང་བ་དང༌། དབང་པོ་ལྡང་མི་ནུས་པ་དང༌། ཁུ་བ་སྐྱོ་མའི་མདོག་ཏུ་འོང་བ་དང༌། ཁུ་བ་དངས་སྙིགས་བྱེ་ནས་འོང་བའོ། །ཆུ་ལ་ཞུགས་པ་ནི་གསུམ་སྟེ། སྦུབས་ཀྱི་ཆུ་རྒྱ་སྐྱེ་གས་ཀྱི་ཁུ་བ་ལྟར་འོང་བ་དང༌། སྣའི་ཆུ་རྟག་ཏུ་སྐྱོ་མར་འཛག་པ་དང༌། མིག་ཆུ་རྟག་པར་འཛག་པ་སྟེ། དུ་བ་དང་སེར་བུ་བྱུང་བ་ཙམ་གྱིས་མྱུར་བར་འཛག་པའོ། །ལུས་ཀྱི་སྟོབས་ལ་ཞུགས་པ་ནི་གསུམ་སྟེ། ལུས་སྒྱིད་ལུག་པ་དང༌། ལུས་མྱལ་མྱལ་བ་ཡིན་ནོ། །ལུས་ཀྱི་རྩ་ལ་ཞུགས་པ་ནི་གཉིས་ཏེ། སྭ་རྩི་ལ་སོགས་པ་ལུས་ཀྱི་དྲི་མ་བྱའི་པགས་པ་བཞིན་སངས་ཀྱིས་འགྲོའོ། །མདོག་ལ་ཞུགས་པ་ནི་གཅིག་སྟེ། ལྕེ་བཙོད་ཀྱི་མདོག་བཞིན་དུ་སོང་བའོ། །དབྱིབས་ལ་ཞུགས་པ་ནི་གཉིས་ཏེ། ལུས་གཉེར་ཆུང་གིས་ཁེབས་པ་དང༌། ཡན་ལག་གི་སོར་མོ་རྣམས་བྱི་བའི་མཇུག་མ་ལྟར་
སོང་བའོ། །རེག་པ་ལ་ཞུགས་པ་ནི་བཞི་སྟེ། སྣ་རྩེ་ལ་སོགས་པར་ཚ་ཡམ་ཡམ་འོང་བ་དང༌། ཚ་བེར་བེར་འོང་བ་དང༌། ལུས་བརྩེ་བ་དང༌། གཡའ་བེར་འོད་བ་བཞིན་ནོ། །ཆུ་བ་ལ་ཞུགས་པ་ནི་བཞི་སྟེ། ཡན་ལག་རེངས་ཤིང་ན་བ་དང༌། ཤ་འབུར་བ་དང༌། གྲང་སིང་སིང་བ་དང༌། ཚིགས་རྣམས་འཁོར་བ་བཞིན་ནོ། །ཆུ་སེར་ལ་ཞུགས་པ་ནི་ལྔ་སྟེ། ལུས་ཟ་གོལ་གོལ་བ་དང༌། ལུས་ཟ་ཙག་ཙག་པ་དང༌། ལུས་ཟ་ལྕིབ་ལྕིབ་པ་དང༌། ལུས་ལ་ཆུ་རྒང་འོང་བ་དང༌། ཆུ་རྒང་བྱུང་ན་ཡུན་རིང་པོར་མི་ཐོགས་བར་འོང་ངོ༌། །ལུས་ལ་འབྲུམ་པའི་རྗེས་སྲན་ཆུང་ལྟ་བུ་བྱུང་ན་བཟློག་པར་ཡང་སླའོ། །ཀླད་པ་ལ་ཞུགས་པ་ནི་བཞི་སྟེ། མགོ་ཕྱིད་ཕྱིད་སྐྲང་བ་དང༌། འཐོམ་པ་དང༌། བེམ་མེ་བ་དང༌། སྐྲ་ནུལ་ནུལ་འབྱི་བ་ལ་སོགས་པའོ། །ལྷ་བ་ལ་ཞུགས་པ་ལ་ནི་གསུམ་སྟེ། གདོང་པ་ལ་སོགས་པ་ཚ་ལམ་ལམ་འོང་བ་དང༌། གདོང་པ་ལ་སོགས་པ་གྲང་སེང་སེང་འོང་བ་དང༌། དེ་བཟློག་པར་སླའོ། །ལུས་རིད་ཅིང་གདོང་ཐལ་སྐྱའི་མདོག་ཏུ་སོང་བ་ནི་བཟློག་པར་དཀའོ། །ལུས་ཀུན་ལ་ཞུགས་པ་ནི་གསུམ་སྟེ། ཚོར་བ་མེད་པར་གདོང་པ་ལ་སོགས་པའི་ཤ་འགྱུར་ཡིན་ནོ། །ཤིན་ཏུ་ཡང་བཟློག་པར་དཀའོ། །ཀླུ་ཤིན་ཏུ་ཡང་ཁྲོ་བོ་དག་གིས་ཀྱང་རྟགས་དང་མི་ལྡན་པར་ཐུགས་ཀྱིས་ཀྱང་འགྲོའོ། །བཟློག་པར་དཀའོ། །རྨ་ལ་སོགས་པ་འཚོར་མི་འདོད་པའི་རྟགས་དང་མི་ལྡན་པ་ནི་བཟློག་པར་སླའོ། །གཞན་ཡང་ཡན་ལག་ཕྲ་བ་དང༌། སྦོམ་པ་དང༌། ཐུང་བ་དང༌། འཁུམས་པ་དང༌། རེངས་པ་ལ་སོགས་པ་ལ་ཀླུའི་མཚན་ཉིད་དུ་ཤེས་པར་བྱའོ། །རྟགས་དེ་རྣམས་ལས་འགའ་འགའ་ནི་ནད་ཀྱི་གཞི་ལས་ཀྱང་ཤེས་པར་བྱའོ། །འགའ་ལ་ནི་ཀླུའི་གདོན་མ་ཡིན་པ་ལས་ཀྱང་འབྱུང་བས་མཚན་ཉིད་སོ་སོར་ཤེས་པར་བྱ་སྟེ། ནད་གཞི་ལས་བྱུང་བའི་སྨན་ལ་སོགས་པ་དང༌། འཕྲོད་པའི་ཟས་ཀྱིས་ཕན་པའོ། །གཞན་གྱི་ནི་ཡུན་མི་རྟག་པ་འཕྲོ་འཆད་དོ། །འདི་འདྲའི་མཚན་ཉིད་མངོན་དུ་ཤེས། །ཤེས་ནས་མྱུར་བའི་བརྩོན་འགྲུས་ཀྱི། །སྣ་ཚོགས་
ཐབས་ལ་མ་རྨོངས་པས། །བཟློག་པའི་ཐབས་ལ་འབད་པར་བྱ། །ཆུ་རྒྱུན་ཡུན་རིངས་འབབ་པས་ནི། །རྡོ་བདག་ཀྱང་དུས་སུ་འབིགས། །གདུག་པའི་དབང་བྱས་ཞེ་རིངས་ཡང༌། །ལེ་ལོ་དང་བྲལ་རྩེ་གཅིག་སེམས། །རྒྱུན་དུ་བསྒོམས་ན་བཟློག་སེམས་ཀྱིས། །གདུག་པའི་ནད་ལས་ཐར་བར་ངེས། །རྩོལ་བ་ཅན་གྱི་སོམ་ཉི་བྲལ། །གང་བསམ་དེ་ལ་མི་འགྲུབ་མེད། །དེས་ན་འཁོར་བ་གཅེས་པ་ནི། །ཕུང་བོ་སྲོག་ནི་དང་བ་ལ། །མངོན་སུམ་ཉིད་དུ་མཐོང་འགྱུར་གྱིས། །རྩོལ་བ་དོར་བར་མི་བྱའོ། །འགྲོ་བ་སྙིང་རྗེ་རང་གིས་རྟོགས་དང་བཀའ་དྲིན་གྱིས། །བདག་གིས་ནད་ཀྱི་མཚན་ཉིད་འདི་སྦྱར་ཡོན་ཏན་གྱིས། །འགྲོ་བས་མངོན་དུ་དེ་རྟོགས་བརྩོན་པས་དེ་བཟློག་བྱ། །ཅི་ཡོད་དགེ་བས་འགྲོ་བ་འཚོ་དཀའི་ནད་ལས་གྲོལ་བར་ཤོག །མཛེ་ནད་ཀྱི་མཚན་ཉིད་ཅེས་བྱ་བ། ནམ་གྲུའི་རིགས་ལས་བྱུང་བ། དངོས་གྲུབ་བརྙེས་བ་ཛཱ་བ་རི་བས་མཛད་པ་རྫོགས་སོ།། །།བལ་པོའི་པ་ཏིཌ་ཏ་པཱུ་རྞེ་དང༌། བོད་ཀྱི་ལོ་ཙཱ་བ་ཆོས་ཀྱི་བཟང་པོས་བསྒྱུར་ཞིང་གཏན་ལ་ཕབ་པའོ།།