བཞི་བ་སེལ་བ་བཤད་པ།

བཞི་བ་སེལ་བ་བཤད་པ་ལ།

གཙོ་བོའི་ལྟུང་བ་མེད་པ་དང༌། གཙོ་བོ་མ་ཡིན་པའི་སེལ་བ་ལ་ན་སྨད་པ་དང༌། སྦོམ་པོའི་དོན་ཅུང་ཟད་བསྟན་པར་བྱ་བ་དང་གསུམ་ལས། དང་པོ་ནི། རྩ་བར། མ་བསམས་པ་ལ་ལྟུང་བ་མེད་དོ་ཞེས་པ་ལ་སོགས་པས་བསྟན་ཏོ། །འདིའི་དོན་ལ་གསུམ་སྟེ། སེལ་བའི་དབྱེ་བ་དང༌། སེལ་བའི་མཚན་ཉིད། སེལ་བ་ལ་ཅིར་འགྱུར་བསྟན་པའོ། །དང་པོ་སེལ་བའི་དབྱེ་བ་ནི། སེལ་བ་ཞེས་པ་རང་རང་གི་ཡན་ལག་མ་ཚང་བ་དེ་ཡིན་པས་ཡན་ལག་ལས་བཟློག་སྟེ་དབྱེ་བར་བྱའོ། །དེ་ཡང་ཐུན་མོང་གི་སེལ་བ་དང༌། ཐུན་མོང་མ་ཡིན་པའི་སེལ་བའོ། །དང་པོ་ནི་བསླབ་པའི་ཡན་ལག་གི་སེལ་བ་སྡོམ་པ་གཏན་ནས་མ་བླངས་པ་ལྟ་བུ་དང༌། བསམ་པ་རང་བཞིན་དུ་གནས་པའི་སེལ་བ་སྨྱོ་བ་ལ་སོགས་པ་ནི་ཀུན་གྱི་ཐུན་མོང་གི་སེལ་བའོ། ། བསླབ་པ་རྒྱུན་གཅིག་པ་ནི་ལྟུང་བ་དངོས་གཞི་ཀུན་གྱི་ཐུན་མོང་གི་ཡན་ལག་ཡིན་ཡང༌། དེའི་སེལ་བ་བསླབ་པ་རྒྱུན་ཐ་དད་པ་ནི་ཀུན་གྱི་ཐུན་མོང་གི་སེལ་བ་མ་ཡིན་ཏེ། སེལ་བ་འདི་ནི་སྦྱོར་བ་རྒྱུན་ལྡན་རྣམས་ལ་འཇུག་གིསྦྱོར་བ་རྒྱུན་མི་ལྡན་རྣམས་ལ་མི་འཇུག་པའི་ཕྱིར་རོ། །ཐུན་མོང་མ་ཡིན་པའི་སེལ་བ་ལ་བཞི་སྟེ། གཞིའི་སེལ་བ་ནི་གཞིའི་ཡན་ལག་མ་ཚང་བ་དང༌། བསམ་པའི་སེལ་བ་དང༌། སྦྱོར་བའི་སེལ་བ་དང༌། མཐར་ཐུག་གི་སེལ་བ་སྟེ་མཐར་ཐུག་གི་ཡན་ལག་མ་ཚང་བའོ། །