སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ཞིང་ཚངས་པར་སྤྱོད་ནས་དབང་པོ་རྣམས་ཡོངས་སུ་སྨིན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེའི་སྐྱེ་བོ་ཕལ་ཆེར་འཐབ་པ་དང་། མཚང་འབྲུ་བ་དང་། འགྱེད་པ་དང་། རྩོད་པ་ལ་ཞུགས་ཤིང་འཁོད་དོ། །དེར་བཅོམ་ལྡན་འདས་ཀྱིས་དེ་རྣམས་གདུལ་བའི་དུས་ལ་བབ་པར་གཟིགས་ནས་དེ་རྣམས་ཀྱིི་གམ་དུ་གཤེགས་པ་ན། དེ་དག་གིས་ཀྱང་བསུས་ཏེ་གདན་བཤམས་པ་ལ་བཞུགས་སུ་གསོལ་ནས་ཆོས་མཉན་པའི་ཕྱིར་མདུན་དུ་འཁོད་པ་ན་བཅོམ་ལྡན་འདས་ཀྱིས་གྲོགས་པོ་དག ཁྱོད་ནི་ཉོན་མོངས་པ་རྣམས་དང་འཐབ་དགོས་ཀྱིས། ཉོན་མོངས་སྤང་བའི་ཕྱིར་འབད་པར་གྱིས་ཤིག་ཅེས། དེ་དག་དང་མཐུན་པའི་ཆོས་བསྟན་པས། དེ་དག་གི་ཁྲོ་བའི་ཀུན་དཀྲིས་ཞི་ནས་སྟན་དེ་ཉིད་དུ་རྒྱུན་དུ་ཞུགས་པ་ཐོབ་ཅིང་། དེ་དག་ཚུར་ཤོག་གིས་བསྙེན་པར་རྫོགས་ཤིང་ལུང་ཕོག་སྟེ་བརྩོན་པས་དགྲ་བཅོམ་པ་མངོན་དུ་བྱས་སོ། །དེར་དགེ་སློང་རྣམས་ངོ་མཚར་དུ་གྱུར་པ་ལ་བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། འདས་པའི་དུས་ནའང་ངས་སྐྱེ་བོ་ཕལ་མོ་ཆེ་འདི་དག་བསམ་གཏན་དང་མངོན་པར་ཤེས་པ་ལ་བཀོད་པ་ཡིན་ཏེ། སྔོན་རི་ཁྲོད་ཀྱི་གྲོང་ཞིག་ན་བྲམ་ཟེ་ཞིག་གིས་མཆོད་སྦྱིན་བྱས་ཏེ། དེར་བྲམ་ཟེ་རྣམས་སྟན་གྱི་ཕྱིར་འཐབ་པ་ལས་དེའི་ཚེ་དཀའ་ཐུབ་ཀྱི་གནས་ཤིག་ན་དྲང་སྲོང་འཁོར་ལྔ་བརྒྱ་དང་ལྡན་པ་ཞིག་ཡོད་པ་དེས་འཐབ་མོ་ཞི་བར་བྱས་ཏེ་ཆོས་བསྟན་པས་དེ་དག་སྐྱོ་བ་སྐྱེས་ཏེ་དྲང་སྲོང་དེའི་ཐད་དུ་རབ་ཏུ་བྱུང་ཞིང་བརྩོན་པས་བསམ་གཏན་བཞི་དང་མངོན་ཤེས་ལྔ་བསྐྱེད་དོ། དེའི་དུས་ཀྱི་དྲང་སྲོང་བྱང་ཆུབ་སེམས་དཔའི་སྤྱོད་པ་ལ་གནས་པ་དེ་ནི་ང་ཉིད་ཡིན་ལ། བྲམ་ཟེ་རྣམས་ནི་སྐྱེ་བོ་ཕལ་པོ་ཆེ་འདི་དག་གོ །གཞན་ཡང་འདི་རྣམས་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ཞིང་ཚངས་པར་སྤྱོད་ནས་དབང་པོ་རྣམས་ཡོངས་སུ་སྨིན་པར་བྱས་པས། ད་ལྟར་རྣམ་པར་གྲོལ་བར་གྱུར་ཏོ་གསུངས།