ཆོས་ཀྱི་བདག་མེད་ཉན་རང་གིས་རྟོགས་མ་རྟོག་ལ་དཔྱད་སྒོ།

ཆོས་ཀྱི་བདག་མེད་ཉན་རང་གིས་རྟོགས་མ་རྟོག་ལ་དཔྱད་སྒོ་ནི།

ཆོས་ཀྱི་བདག་མེད་དེ་ཉན་རང་གིས་རྟོགས་པ་མ་ཡིན་པ་གང་ཞིག མ་རྟོགས་པ་མ་ཡིན་པའི་ཕྱིར།རྟགས་དང་པོ་མ་གྲུབ་ན། ཆོས་ཀྱི་བདག་མེད་དེ་ཉན་རང་གིས་རྟོགས་པ་ཡིན་པར་ཐལ། རྟགས་མ་གྲུབ་ཀྱི་ལན་འཐད་པའི་ཕྱིར། འདོད་ན། ཆོས་ཀྱི་བདག་མེད་དེ་ཉན་རང་གིས་རྟོགས་པ་མ་ཡིན་པར་ཐལ། དེ་ལྟར་མ་ཡིན་པ་འཇམ་མགོན་ཏཱ་ར་ནཱ་ཐའི་དགོངས་པ་ཡིན་པའི་ཕྱིར། རྟགས་མ་གྲུབ་ན། དེ་ལྟར་ཡིན་པར་ཐལ། དེ་ཉིད་ཀྱིས་མཛད་པའི་གཞན་སྟོང་དབུ་མའི་རྒྱན་ལས། དེ་ཕྱིར་ཉན་རང་འཕགས་པའི་ཆོས་ཐམས་ཅད། །ཆོས་བདག་མེད་པར་རྟོགས་ཞེས་འདི་མི་འཐད། །ཅེས་གསུངས་པའི་ཕྱིར། འདོད་ན། ཆོས་ཀྱི་བདག་མེད་ཆོས་ཅན། ཉན་རང་གིས་མ་རྟོགས་པ་ཡིན་པར་ཐལ། འདོད་པའི་ཕྱིར། འདོད་ན། ཆོས་ཀྱི་བདག་མེད་ཆོས་ཅན། ཉན་རང་གིས་རྟོགས་པ་ཡིན་པར་ཐལ། བཟུང་བ་བདེན་མེད་རྟོགས་པའི་ཕྱིར། རྟགས་མ་གྲུབ་ན། དེ་རྟོགས་པར་ཐལ། དེ་ལྟར་རྟོགས་པ་ཉ་དབོན་ཀུན་དགའ་དཔལ་གྱི་དགོངས་པ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་ཉ་ཊཱིཀ་ཡིད་ཀྱི་མུན་སེལ་ལས། རང་རྒྱལ་ལ་བཟུང་བ་རང་བཞིན་མེད་པར་རྟོགས་པ་ཡོད་པས།ཞེས་གསུངས་པའི་ཕྱིར། འདོད་ན། རང་རྒྱལ་ལ་བཟུང་བ་རང་བཞིན་མེད་པར་རྟོགས་པ་ཡོད་པར་ཐལ། འདོད་པའི་ཕྱིར། འདོད་ན། ཆོས་ཀྱི་བདག་མེད་རྟོགས་པ་ཡོད་པར་ཐལ།འདོད་པའི་ཕྱིར། འདོད་ན། ཉན་རང་ལ་ཆོས་ཀྱི་བདག་མེད་རྟོགས་པ་མེད་པར་ཐལ། དེ་ལྟར་རྟོགས་པ་མེད་པ་སངས་རྒྱས་བཅོམ་ལྡན་འདས་ཀྱི་དགོངས་པ་ཡིན་པའི་ཕྱིར། རྟགས་མ་གྲུབ་ན། དེ་ལྟར་ཡིན་པར་ཐལ། དེ་ཉིད་ཀྱིས་གསུངས་པའི་རྒྱན་སྡུག་པོ་བཀོད་པའི་མདོ་ལས། ཕུང་པོ་གང་ཟག་བདག་མེད་པར། །རབ་ཏུ་རྣམ་ཕྱེ་མཐོང་གྱུར་ཅིང༌། །ཆོས་ཀྱི་དངོས་ཡོད་མ་བཤིག་པར། །ཉན་ཐོས་དེ་དག་མངོན་རྟོགས་གྱུར། །བདག་མེད་གཉིས་ལ་མཁས་པ་རྣམས། །རྒྱལ་བའི་སྲས་རྣམས་སྒོམ་པར་བྱེད། །ཅེས་གསུངས་པའི་ཕྱིར། འདོད་ན། ཆོས་ཀྱི་བདག་མེད་ཆོས་ཅན། ཉན་རང་གིས་མ་རྟོགས་པ་ཡིན་པར་ཐལ། འདོད་པའི་ཕྱིར། འདོད་ན། ཆོས་ཀྱི་བདག་མེད་ཆོས་ཅན། ཉན་རང་གིས་རྟོགས་པ་ཡིན་པར་ཐལ།མཚན་མ་མེད་པར་མ་རྟོགས་པར་ཐར་བ་ཐོབ་པ་མེད་པའི་ཕྱིར། མ་གྲུབ་ན། དེ་མ་རྟོགས་པར་ཐར་བ་ཐོབ་པ་མེད་པར་ཐལ། དེ་ལྟར་མེད་པ་དཔལ་མགོན་འཕགས་པ་ཀླུ་སྒྲུབ་ཀྱི་དགོངས་པ་ཡིན་པའི་ཕྱིར། རྟགས་མ་གྲུབ་ན། དེ་ལྟར་ཡིན་པར་ཐལ། དེ་ཉིད་ཀྱིས་མཛད་པའི་འཇིག་རྟེན་ལས་འདས་པར་བསྟོད་པ་ལས། མཚན་མ་མེད་པར་མ་རྟོགས་པར། །ཁྱོད་ཀྱིས་ཐར་བ་མེད་པར་གསུངས། །དེ་ཕྱིར་ཁྱོད་ཀྱིས་ཐེག་ཆེན་ལས། །དེ་ནི་ཚང་བར་བསྟན་པ་ལགས། །ཞེས་གསུངས་པའི་ཕྱིར། །གཞན་ཡང་ས་བཅུ་བའི་མདོ་ལས་ཉན་རང་གཉིས་ས་དང་པོའི་བློས་ཟིལ་གྱིས་མི་གནོན་པར་གསུངས་པ་སོགས་ལ་དཔྱད་པར་བྱའོ། །